Sawmus 44
44
Uya amnih mpitha usuh ariw mbeyne
1Kiyavwiye Uhokri, usuh timap akakwa utaybi ini ku pariye wahawkrivwi kinetihwe wotuh. Usuh timap inetit amin ka aynsima arikna ku pariye pis kehe abetnewa ku samah igkis ivegnete. Ka aynsima kamukri kuwis.
2Igkis kinetihwe amin mmahpa pis pekise hiyeg ku pariye kane ihpekere piwn, pis ike pihiyegavu avitit giwaxigkis. Igkis kinetihwe amin mmahpa pis hiyapkise gitkis nawenyevwi hiyegviyenevwi. Pihiyegavume pis kehe igkis kibihwe.
3Ka akakma giwanakis igkis mateke ini waxri. Kawnata akakma gidatnikis igkis mateke neras hiyeg aygenevwi. Igkis matekevgikis akak pidatni, akak pannu hawata akak ku samah pis ay gikakkis. Hene pis ekke gitkis ku pis batek gikakkis.
4Pisnewa nukivara nuwohkiga, pis keh pihiyegavu mataka givetunyavukis.
5Akak pidatni usuh mateke uvetunyavu hawata akak ku samah pis ay ukakuh igkis uvetunyavu biyuk utivut.
6Ka avititma numedga nah kamaxwa hawata ka nuwanama keh nah mataka nuvetunyavu.
7Mmanawa pisnewa wiwhe usuh giwakutakkis uvetunyavu. Hawata pis mateke ignes ku pariye amiyhenevwi usuh.
8Usuh kibenapnek madikte hawkri. Usuh kabayhapnek adahan avanenekwa.
9Hiyaksa kuri, Kiyavwiye Uhokri, in ke wotbe pis tukuhe usuh mmanawa pis isakse usuh matak gitkis. Ku aysaw usuh abet kerka pis yuma ayge gikakkis usuwtatavu akiw. Mmahki hene?
10Pis keh usuh bisike gavitkis uvetunyavu, igkisme iwavave madikte ku pariye udahan wewkanbet.
11Pis ike usuh kewa muwtohbe ku pariye tivikwiye arimkat umehket. Hawata pis ibekhe usuh givuwiwkis nawenyevwi nawwotunyevwi.
12Pis piyukise pihiyegavu ka katiwenema ke wotbe igkis ka kawihbe adahan ariknawnama.
13Hiyegviyenevwi ku pariye kennesa womkat, igkis hiyap ku pariye pis keh ukakuh, nikwe igkis mahivwih usuh hawata igkis miyatha usuh.
14Pis keh usuh he adahan mahivwihkanenwa gavitkis nawenyevwi hiyegviyenevwi. Nawenyevwi hiyegviyenevwi igkis hiyaraptih usuh.
15Nahme kayah ka aynsima maraki gitivutkis hiyegviyenevwi.
16Mmanawa nuvetunyavu ku pariye namiyhetnivwi igkis mahivwihun, igkis miyathan.
17Madikte inin danuh wotuh, heneme usuh ka miyehpi, usuh kawnata dunih ahegbetawka ku pariye pis kehe gikakkis pihiyegavu.
18Usuh avanenekwa kamaxwenenekwa pivitit, usuh ka dunih pikumadukan.
19Hiyaksa kuri in ke wotbe pis tukuhe usuh gibetitkis puwikneviyene ahavwikunevwi, pis ikise usuh aynte abet amisnavye ku pariye kane aynsima misanapnene.
20Wake usuh miniwviyebe piw, uwohkiga, wake usuh piriyepkawbe git nawenyewatbe uhokri akiw,
21pis hiyaknikama madikte. Mmanawa pis hiyak mpuse hiyeg gihiyekemnikis ayemewnene.
22Heneme awaku ku samah usuh kamaxwa pivitit, usuh abet miyaka mataytak pivatra; usuh ikaka kewa muwtohbe ku pariye tivikwiye arimkat ariwmhekri.
23Wadisnaba, Kiyavwiye! Mmahki pis himeke mpiynevevye? Kannikawnaba! Ka ba tukuhpima usuh adahan avanenekwatma.
24Mmahki pis ayemwe wowhu? Mmahki pis miyehe uhiyvan mbeyne akak uwakemni?
25Usuh kuwis mihenevye, tuguhevye waykborit. Usuh kuwis matekepka, padekwika abetit hew.
26Kannikawnaba, ba ayta ayava usuh! Amnih usuh akak pamnihra!
Currently Selected:
Sawmus 44: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
