Sawmus 42

Nah ka muwaka nah kiyimarnema

1Kiyavwiye, nah ka aynsima mpiksaw piharit avititak nuyakni, ke pahavwi itbe arabyuvye un, ig ivegva parewni akak madikte gimaviswangimaviswan.

2Nah piharitne ka aynsima! Pisnewa dehetniye. Heneme ke nutuhbe pis yumahbe ay nukakuh. Aysaw nah utivi akiw? Aysaw nah hiyak ku pis ay nukakuh?

3Nah tihene piharit hewke tiyegem, mataytak. Nah ka kiye naxni. Nukantak wageswe ke numanabe. Takunipti nuvetunyavu awna nutuh: “Mmah piwohkiga ig yuma ay? Kitwikig?”

4Ku aysaw nah kiyeminene amin minikwak, nah kayah ka aynsima. Minikwak ku aysaw hiyeg atak lamesya kabubukuh nah aygewata gikakkis. Nahwa waywe gavitkigkis. Avim ini usuh batekye. Usuh waywe pekempi avat adahan kabeyhene Kiyavwiye Uhokri. Kurime ka henema akiw.

5Nah kayah ke wotbe nah piyawakad piw. Mmahki hene? Nah ka muwaka nah kiyimanema. Nah kamaxwate givitit Kiyavwiye Uhokri akiw. Nah kabayhate giw akiw, mmanawa ignewa namnihten, ignewa nuwohkiga.

6Nuyakni avanenekwa kiyimarnenekwa, Kiyavwiye, ke wotbe pis yumahbe ay. Heneme ka sam. Nah kiyete ku samah pis ay nukakuh minikwak. Avim ini pis amnihpen ayge ahumwa egu warik Jordawh. Hawata pis amnihpen ku aysaw nah avit ini waxri kewye Ermoh. Hawata ku aysaw nah ayntehan Mizar. Nah kiye madikte ini in iki nawaygi akiw.

7Heneme nudukwenewa nah kayah. Kiyimwiki biwh abet nuhiyekemni ka ahawnasima ke avetetnibe. Ke wotbe nah tabirnebe abet paraw eg biwh nuvitit ka ahawnasima adahan nutukepten kahadbe nah tuguhe.

8 Ka sam. Hewkevye ig Kiyavwiye Uhokri ka gamnihrasima nukakuh. Hawata tiyegem ig keh nah pak avat, ig keh nah piriyepkaw git, mmanawa ignewa keh nah aymuhwa amadga inin.

9Nah awna git: “Kiyavwiye, pisnewa nawayghetni. Mmahki nah kayah ke wotbe pis piyawakad nuwhu? Mmahki nuvetunyavu matekevun?”

10Ku aysaw igkis mahivwihun nah kayah pahavwite ke wotbe nuvituhwa katiw. Takunipti igkis awna: “Mmah piwohkiga ig yuma ay? Kitwikig?”

11Nah kayah ke wotbe nah piyawakad piw. Mmahki hene? Nah ka muwaka nah kiyimarnema. Ka sam, nah kamaxwate givitit Kiyavwiye Uhokri akiw. Nah kabayhate giw akiw. Mmanawa ignewa namnihten, ignewa nuwohkiga.

Currently Selected:

Sawmus 42: pluPB

Highlight

Copy