Sawmus 38
38
Uhokri amnihwiy ku aysaw wixwiy abetnewa mbeyne
1Kiyavwiye Uhokri, ka ba dagawnevima nutuh. Ka ba himahun mpiynevevyema. Ka ba bukih nutaraksan nuwhu abetnewa pidagoni!
2Nah kayah ke wotbe pis haviswenube akak yakot ta nihbetit. Nah kayah mpiynevevye ini mbeyne ku pariye pis ike nuvitit. In ke wotbe piwak kane awiynisima in tavahun ka aynsima.
3Nah ka aynsima kakahrip awaku pis ka batek akak patahwaki aynesima. Nikwe nuvituh pahavwite kakahriye awaku nuvathawni.
4Nah me aniksewmet abet nutaraksan. Nuhawkan matekbet mpiynevevye. In ke iyakaptibe kane awiniysima nudahan. Nah ka hiyap ahiyuhka akiw.
5Awaku ku samah nah ka wadit, inneki keh nah busukvit. Nubuskana ka kayhki hawata in bus.
6Nah ka aynsima mabimne, nah misakwa mabubet. Nah tihene takunipti.
7Nah ka aynsima kakahri. Nah ka aynsima awehe awaku nawaki.
8Nah kayah ka aynsima mabimnaki. Madikte nawaygi tuguhe. Nuyakni wakaymnip. Nah migiswa awaku katiwka!
9Kiyavwiye, pis hiyak ku pariye numawkan, mmanawa pis timap madikte numigiswan.
10Nuyakni biwh ka araptisima. Nah ka aysnima mabimne. Nuvegi madikte tigehe.
11Nukagmadavu ka misekwekere nuhumwa awaku nubuskana. He igkiswa nukamkayuvwi ayguhwebdi nuwhu.
12Ku pariye aharitnevwi nuwmepten igkis ah tey adahan nukamaxwitni. Igkis puwimahun adahan igkis nuhwivwihpitni. Igkis ka matiswati ahegbeta ginetnikis nutivut.
13Nahme miniwkiswa ke wotbe nah ka timapbe. Nah keh ke wotbe nah mownpiyebe. Nah ka awna.
14Henewatbaki, nah kewa pahavwibe ku pariye ka kaytwa awaku ig ka timap.
15Hiyawa nuwskawni hene, Kiyavwiye, heneme nahnewa kamaxwa pivitit. Pis, Kiyavwiye nuwohkiga, pis kaytwanek nuwnuh.
16Ka ba isaksa nuvetunyavu batek giminkis akak inin ku samah nah wakaymniye. Ka ba isaksa adahan igkis batek akak inin ku samah nah tarakse.
17Mmanawa nah me tuguhemet. Nuhiyvan mbeyne ka mpiyama.
18Nah akkamnih nuvathawni pit, mmanawa inin nutaraksan kehun nah ka aynsima wakaymni.
19Igkisme nuvetunyavu igkis makniwbet, igkis kivun akak gidatnikis. Henewatbaki, ka ba aynsima hiyeg namiyhetnivwi yuma kavatranesima.
20Ignes ku pariye katiwnihnevwi kabayka akak mbayka igkis ka batek ginaktinkis nukakuh. Mmanawa nah mpiksaw keh kabayka.
21Kiyavwiye Uhokri, ka ba ikiswenuma! Ka ba ayguhwepma nuwhu, nuwohkiga!
22Parak abet nuhawkan kuri, Kiyavwiye, namnihten!
Currently Selected:
Sawmus 38: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
