Sawmus 37
37
Ka muwaka kiyimwihwa gikakkis hiyeg taraksavye
1Ka muwaka kiyimwihwa gikakkis hiyeg mbayavye. Ine ka muwaka atihpigkis.
2Mmanawa igkis ka misakwa ayivwadima ay amadga inin. Igkis biyukenek kibehtenwa kewa pamatkabe huruhruvye.
3Pisme, kamaxwanaba givitit Kiyavwiye Uhokri Dehetniye kabayntiwa. Kehnaba kabayka avanenekwa. Mmanawa ku wis keh hene, wis misakwa kabayntiwa ay amadga inin, wis ax kabayntiwa yuma kiyimwiki abet uhiyekemni.
4Bateknaba giwntakwa Kiyavwiye Uhokri! Ignewatbaki pibetki. Nikwe ig ikinek pit madikte ku pariye pimawkan.
5Ikinaba pihiyekemni git Kiyavwiye Uhokri Dehetniye adahan igwa hiyak pikak. Kamaxwanaba givitit. Nikwe igme huwitanek pihiyekemni avigkut ahin wadit.
6Nerasme taraksavye gaytakkis kiyathaka ay amadga inin. Heneme aysawnemenek gikehnikis kahayaknek mbaykanenwa. Pisme avim ini hawkri pikehni kahayaknek kabaykanenwa. In kahayaknek huwewehe, kabutenne ke kamuwbe.
7Hiyawa pis mayaksa pihiyekemni git Kiyavwiye Uhokri. Wahapnig akak madikte kiyaknihwaki adahan ig wadithebdih pihawkan. Ku pis hiyap pahavwi taraksevye madikte wew kabayntiwa gidahan, ka muwaka kiyimwihwa gikak. Ku pis hiyap pahavwi ig kehne madikte mbayka ku pariye ig kehkere, kawnata muwaka kiyimwihwa gikak.
8Ka muwaka dagawnaw. Uya mpiyasin. Ku pis kiyimwihwa nikak, in ka ayavap. In wageswanek mbayka adahan pihiyekemni.
9Mmanawa aysawnemenek madikte taraksavye wis ka hiyavgikis aynek akiw. Ignesme ku pariye kamaxwenevwi givitit Kiyavwiye Uhokri, igkis gidukweneswa aynek, igkis hiyepne kabaykanenwa.
10Igkisme hiyeg mbayavye ka misakwanek ayivwadima ay amadga inin akiw. Avim ini hiyawa pis ivegvigkisnek, heneme pis ka utivgikisnek.
11Igkisme hiyeg ku pariye tuwatasewnevwi gitivut Uhokri, aysawnemenek ig Kiyavwiye Uhokri kumadukasanek madikte hiyeg amadga hawkri gitkis. Avim ini nikwe yuma kiyimwiki akiw.
12Kuri akak inin hiyeg taraksavye ahegbeta ginetnikis gitivutkis hiyeg kibeynevwi. Igkis sikigasa gaybukis gimkanitkis.
13 Ka sam. Igme Kiyavwiye Uhokri hiyara gimkanitkis. Ig hiyak ku gihawkanavrikkis kaba danuh adahan igkis biyukwiye.
14 Igkisme mbayavye ka hiyaknima. Giwanakis ahegbet ay giwakukis adahan igkis giwhmeptenkis hiyeg madiptavye. Hawata igkis ah gimedgakis adahan pisenwevye gikakkis hiyeg kibeynevwi.
15 Ka sam. Giwanakisnewa wageswanek givititkis. Gimedgakisme dunihbetepkanek.
16Ku wis kibeyne hiyeg, ka sam wis madiptivye. Kabayte wis madiptivye, mpinekata wis igisye akak ewkaki ku pariye wameyi.
17Mmanawa ig Kiyavwiye Uhokri pisenwanek akak mbayavye gidatnikis ke wotbe ig dunihpiyebe giwankis. Gitkisme hiyeg kibeynevwi, ig ikinek gawaygikis.
18Mpuse hewkevye ig Kiyavwiye Uhokri avuriw gihiyegavu adahan hiyepne ku pariye kabayka gikehnikis. Aysawnemenek ig katiwnihgikisnek akak ini kabayka ku pariye dahwa adahan avanenekwa.
19Hiyawa igkis misakwa abet mbeyne ka aynsima, heneme ka sam gitkis awaku igkis avuriwka. Hiyawa igkis misakwa abet mihetniki, heneme igkis kawnata muwakti gitkis.
20Igkisme hiyeg mbayavye igkis miyavapnek. Igkis Kiyavwiye Uhokri Dehetniye givetunyavu igkis biyukenek kibehtenwa kewa ivuritibe kigiswiye. Igkis menwenek kewa tiket asayanbe.
21Hiyeg taraksevye yuma gidahan ariknawnama. Ku ig sunap, ig ka uti awenyan. Igme ku pariye kibeyne hiyeg igi kadahan ka aynsima. Nikwe ik adahan ig amnih hiyeg adahan ig ikene gitkis.
22Mmanawa ignes hiyeg ku pariye Kiyavwiye Uhokri iki kabayka gitkis, igkis ikakanek gitkis madikte kabayka amadga inin. Ignesme hiyeg ku pariye ig hiyapkisne gitaraksankis gitkis, igkis pisenwepkanek gikakkis.
23Igme Kiyavwiye Uhokri Dehetniye avuriw ku pariye kibeyne hiyeg. Ig akka git adahan ku samah ig keh. Ayteke nikwe ig keh ini gikehni humaw kabayntiwa. Ini ku samah igi hiyeg keh avigkutavrik ku samah ig Kiyavwiye Uhokri gimawkan, in keh ig Kiyavwiye Uhokri bateke ginaktin.
24Hiyawa ig tuguhe, heneme ka sam. Kuwewa ig kannikawnek akiw. Mmanawa ig Kiyavwiye Uhokri sumuhnig giwaku. Ig ahegbet adahan gayavetni.
25Nah kuwis takweye minikwak; kurime nah kiyaparivye, heneme nah ka hiyapti Kiyavwiye Uhokri miniw giw pahavwi ku pariye kibeyne hiyeg, nah ka hiyapti igi hiyeg gikamkayuvwi makahpa gimanakis gitkis hiyeg.
26 Kawk. Ig ner awayg ignewa kakanhewne gitkis hiyeg; ig sunapkisne gitkis. Hawata gikamkayuvwi kannuyevwi keh kabayka gikakkis hiyeg hawata ke gigkisbe.
27Nikwe, nukebyi, ayguhwanaba ariw mbayka. Kehnaba kabaykanenwa. Ku pis keh hene, pis aymuhwanek adahan avanenekwa.
28Mmanawa ig Kiyavwiye Uhokri Dehetniye batek akak ku pariye hiyakemniki waditye. Ig ka miniwnema giwkis gihiyegavu. Ig avuriwnigkis avanenekwa. Heneme ig pisenwanek akak hiyeg taraksavye gihawkankis.
29Ignesme hiyeg kibeynevwi, aysawnemenek ig Kiyavwiye Uhokri kumadukasanek madikte hiyeg amadga hawkri gitkis adahan igkisme kumadukigikis adahan avanenekwa.
30Ku pariye hiyeg kibeyne igi avanenekwa awna iwit avigkutavrik hiyakemniki. Ig ka awnbetema iwit.
31Ig batek akak Kiyavwiye Uhokri gikumadukan avititakwa giyakni. Ig ka isahkiswati niw.
32Igme hiyeg ku pariye mbeye gihiyekemni ig avuriw pahavwi ku pariye kibeyne gihiyekemni adahan ig giwmepten.
33Heneme ig Kiyavwiye Uhokri Dehetniye ka ikinek hiyeg kibeyne giwakurit givetunya. Ku igme givetunya kamiyevgi git hiyaptigi, kawnata sam. Ig ka hiya gisamanaknek.
34Nukebyi, ivegnaba givitit Kiyavwiye Uhokri Dehetniye. Tivikneneba gikak. Mpiksawnaba wew avigku gihiyekemni. Kuwewa pis hiyapnek ig wadithebdih pihawkan madikte. Ig ikinek madikte kabayka pit. Avim ini pis hiyapnek ig pisenwa akak gihawkankis hiyeg taraksavye.
35Nah kuwis hiyap akakwa nuwtyak ig Kiyavwiye Uhokri pisenwe akak gihawkan pahavwi hiyeg ku pariye mbeyevye gihiyekemni. Ig ikawvari givitminkis madikte hiyeg kibeynevwi. Git ig ke pahakti ahbe nopsadnano eg awasta madikte waxri akak gutawnibdi, eg imuwte ariw madikte ah nopsanyovwinano.
36Heneme ig ner awayg mpiye kibehtenwa. Ig yuma ay akiw. Nah ivegvevgi, heneme nah ka utivgi akiw.
37Igme ku pariye kibeyne hiyeg ig ka kema ner awaygma. Aysawnemenek ig uti kabaykanenwa. Nikwe uya ka muwaka iki uhiyekemni gitkis hiyeg taraksavye. Kabayte wis iki uhiyekemni gitkisnenwa hiyeg kibeynevwi.
38Mmanawa hiyeg taraksavye aysawnemenek igkis pisenwepkanek gihawkankis. Igkis biyukapnek payak akak madikte ku pariye gidahankis.
39Ignesme hiyeg kibeynevwi gihawkankis ka pisenwanek hene. Ignekis Kiyavwiye Uhokri amnihgikis. Ignewa gawaygikis ku kavim igkis abetnewa mbeyne.
40Ignewa gayavetnikis, gimaptentenkis. Ignewa giwiwhtenkis giwakutakkis hiyeg mbayavye. Ig amnihgikis awaku igkis kamaxwene givitit.
Currently Selected:
Sawmus 37: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
