Sawmus 35
35
Uya amnih mpithamnihun giwkis nuvetunyavu
1Kiyavwiye Uhokri, uya amnih mpithamnihun giwkis neras nuvetunyavu. Ker gitivutkis neras ku pariye keryevwi nukakuh.
2Iwinaba pimarduk payak akak pimaptenten adahan pis ayta mayuw nutuh.
3Iwinaba nor piyakwok kurumwi payak gukak nor pimegwan adahan kerka. Kernaba nudahan gitivutkis neras ku pariye nuharaksetnivwi. Kehnaba nah hiyak ku pis inyewa amnihunnek giwkis.
4Numawkan pis matekevgikis nudahan hawata pis marekevgikis ignes ku pariye aharitwiye nuwmepten. Keh igkis bisike akak madikte gimarankis ignes ku pariye ahegbetenevwi mbeyne nudahan.
5Keh igkis humaw ke ahamnabe bohka gavit kamaygviye ta gitivut Ahj, Uhokri giwatni, ku aysaw ig keryenek gikakkis.
6Keh gihinakis misakwa misanap hawata ka akikinisima gitkis ku aysaw ig Ahj, Uhokri giwatni, haraksevgikisnek.
7Mmanawa nah yuma ariknawnama nukehni gikakkis. Hiyaksa igkis ahegbete tey nudahan; igkis atike pahayku miyokwiye mihad adahan nukamaxwitni.
8Heneme, ku aysaw igkis ka wahapnimanek, igkis umahavepkanek. Innewa giteynikis ku pariye gahegbetankis kamaxwigkisnek; igkis tuguhenek atere arikut, ayge igkis miyarapnek.
9Nahme bateknek ka aynsima adahan ku pariye Kiyavwiye Uhokri gikehni; mmanawa ignewa amnihpen ariw miyaka.
10Nah awnanek git avitakwa nuyakni:
“Yuma pahavwinema hiyeg kewa pisbe, Kiyavwiye! Pisnewa mpithamni neras ku pariye yumanene gawaygikis gitivutkis hiyeg detyevwi. Pisnewa amnih hiyeg madiptavye gikakkis ku pariye abetnenevwi mbeyne giwakukis neras ku pariye kabukhewnevwi gitkis.”
11Hiyegme mbayavye igkis kehbeta wasaymka numinuh, igkis awna ku nah tarakse, bawa nah yuma ariknawnama nukehni.
12Inme kabayka ku pariye nah nukehni gidahankis, igkis katiwnihun akak mbeyne. Inneki keh nah ka aynsima wakaymni.
13Heneme, ku aysaw igkis kakahriye, nah wakaymniye gidahankis, nah kawih sak kasiwboye, nah hawata maxhaw adahan kiyene Uhokri gidahankis.
14Nah piriyepkewne ke wotbe gidahan pahavwibe nukagmadabe ba gidahan nukebyibe. Nah wew mabubeti awaku nuwakemni gidahankis, kewa nah wakaymniyebe guharit nnaguh.
15Heneme, ku aysaw nahme abet kiyimwiki, igkisme batek ka aynsima nudahan, igkis madikte misakwa pahadguvu adahan ahegbetne ginetnikis adahan nuwmepten. Hiyeg ku pariye nah kane hiyakti avim ini igkis hawata madikte ahegbet adahan pisenwevye nukakuh.
16Igkis hiyavun akak madikte mahivwihka, akak madikte gamiyhankis, inneki keh nuvetunyavu batek giminkis.
17Kiyavwiye Uhokri, aysawhki ayivwi pis misakwanek he iveg numkanit? Uya amnihun, wiwhun giwkis neras arewhavyempu kene axtigibe ku pariye aharit pisenwevye nuhawkan.
18Nahme kabayhapnek aynte gibetkis pihiyegavu, ku kiney igkis pahadguvunene kabeyhene piw.
19Ka ba isaksa neras nuvetunyavu wasaymavye batek adahan ku samah nah hahwa. Ka ba isaksa neras ku pariye amiyhan waditnevyenen yuma kavatranesima hiyaraptan akak madikte gibetkis ku samah nah abet mbeyne.
20Mmanawa igkis ka kannu awna amin pasamraki; madikte ku pariye giwnkis in he adahan kinisakanenwa, igkis ahegbet adahan pisenwevye gikakkis hiyeg ku pariye batekyevwi akak pasamraki.
21Igkis kamiyan akak kabimanka, igkis awna: “Usuh hiyap akakwa wowtyak ku pariye pikehni!”
22Pisme, Kiyavwiye, pis hiyap madikte ku pariye gikehnikis. Nikwe ka ba tinwonama giwkis, hawata ka ba ikiswenuma nah pahapo.
23Wadisnaba, Kiyavwiye, ba ayta mpithamnihun. Amnihun parak abet nuhawkan, uya hiyavun akak waditka.
24Mmanawa pisnewa waditye, Kiyavwiye; nikwe numawkan piswa awna nutuh ku nah barewvit ariw taraksaki. Nuwohkiga, ka ba isaksa nuvetunyavu batek giminkis nuharavrik!
25Ka ba isaksa igkis awna: “Ka kuyenema usuh aharit adahan pisenwevye gikak, metakwa usuh matakig. Kuri usuh pisenwa gihawkan.”
26 Kiyavwiye, uya pisenwa gikakkis madikte neras ku pariye batekyevwi akak nuhiyvan mbeyne, neras ku pariye aharitnevwi nuwmepten abetnewa nah yumanene nawaygi. Kehnaba igkis marakwa givitkis givetunkis madikte pihiyegavu.
27Nerasme ku pariye muwaka hiyavun ku nah yuma nutaraksan, kivunsinigkisba akak batekka. Keh igkis awna: “Kibeyne gidahan Kiyavwiye Uhokri, mmanawa ig ka gamnihrasima gikak gibuk.”
28Nikwe nahme kabayhapnek adahan ku samah pis hiyavun akak madikte waditka. Nah hawata paksapnek mataytak akiw.
Currently Selected:
Sawmus 35: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
