Sawmus 34
34
Uhokri gabay
1Nah avanenekwa kabayhanek Kiyavwiye Uhokri Dehetniye akak nubiyuh. Nah kabayhignek takunipti.
2Nah kabayhignek adahan madikte arikna ku pariye gikehni. Hiyeg tuwatavye igkis timapninek igkis bateknek giminkis.
3Akkanay payak nukakuh in Kiyavwiye Uhokri Dehetniye gikiytani. Uyay kabayha giw kabubuk.
4Nah amnihswe git Kiyavwiye Uhokri, igme kaytwe nuwnuh. Ig wiwhpen ariw madikte aviska.
5Neras ku pariye kene tuwatevyebe igkis iveg gimkat. Igkis bateke giminkis. Igkis ka mabukwa akak maraki.
6Nahme kewa pahavwi madiptivyebe hiyepne mbeyne. Nah ayep git Kiyavwiye Uhokri igme timevun ig wiwhpen abetitak kiyimwiki.
7Kiyavwiye Uhokri Dehetniye giwatni ahj misakwa ganwavrikkis neras ku pariye kiyathenevwi giw. Ig mpithigkis ariw mbeyne.
8Hiyaknay yiwnteknewa ku samah ig Kiyavwiye Uhokri Dehetniye ka gabaysima. Ka aynsima kabayka gidahan ner pahavwi ku pariye kamaxwa givitit.
9Avisnay gibohri Kiyavwiye Uhokri, yis, gihiyegavu, mmanawa neras ku pariye kane taraksekere gikak igkis ka muwakti ariknawnama gitkis.
10He igkiswa kawokwine yuma gimanakis, igkis kamax mativwa, heneme ka muwakti ariknawnama gitkis neras ku pariye amnihswenevwi git Kiyavwiye Uhokri Dehetniye.
11Aytninay, nukamagdavu takwaviye, hawata timapnay, nah kannuhyite adahan avis gibohri Kiyavwiye Uhokri Dehetniye.
12Pariye muwaka uti gidehetni? Pariye muwaka dahwa ayivwite ay amadga inin hawkri adahan hiyepne kabayka?
13Nikwe ka yi muwaka awna iwit mbeyviye ine kawnata yi kinetihwa amin wasaymka.
14Miniwnay ariw mbeyne, kehnay kabayka; ivegvanay pasamraka adahan yis wew nikak.
15Ig Kiyavwiye Uhokri hiyap ku pariye kibeynevwi. Ig timap gayapnikis.
16Heneme ig givetunyakis neras ku pariye kehnevwi mbayka; hene, ku aysaw igkis miyarapnek, ig keh igkis miyehavepkanek kibehtenwa.
17Ku aysaw hiyeg barewvityevwi amnhiswa git Kiyavwiye Uhokri Dehetniye, igme timavgikis. Ig wiwhgikis ariw madikte kiyimwiki.
18Ig misakwa kennesa gihumwakis neras ku pariye wakaymniyevwi hawata ig amnih neras ku pariye biyuksevye gikamaxwankis.
19Igkis kibeynevwi mpiyasa ka aynsima kiyimwiki, heneme ig Kiyavwiye Uhokri wiwhgikis ariw madikte ini.
20Ig mpithigkis pahavwite. Yuma pahatnama givitakis dunihne.
21Hiyeg ku pariye kehnevwi mbeyne innewa mbeyne giwmeptenkisnek. Igkisme ku pariye amiyhenevwi wadityevwi igkis hiyapkiskanek mbeyne gitkis.
22Heneme ig Kiyavwiye Uhokri Dehetniye amnih neras ku pariye kannivwiye gidahan. Madikte ku pariye ayemwenevwi git ig bayahminigkisnek.
Currently Selected:
Sawmus 34: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
