Sawmus 33
33
Kabayhanay Kiyavwiye Uhokri
1Madikte yis ku pariye wadityevwi, bateknay giwntakwa Kiyavwiye Uhokri Dehetniye, bateknay akak gabay. In kis adahan yis kabayha Kiyavwiye Uhokri awaku yis wewne akak gihiyekemni.
2Kabayhanay Kiyavwiye Uhokri akak yagigni hebek. Paknay adahan kabeyhene Kiyavwiye Uhokri akak yagigni kimsaku.
3Paknay git Kiyavwiye Uhokri nukune avat. Tesnay yagigni kabayntiwa. Paknay kihaw.
4Mmanawa Kiyavwiye Uhokri giwn in inyewa. Madikte ku pariye ig keh in kis adahan wis kamaxwa nivit.
5Ig Kiyavwiye Uhokri Dehetniye batek akak ku pariye hiyeg keh kabayntiwa, wadit. Gamnihra muwapuw amadga hawkri.
6Akak giwnenwa, ig Kiyavwiye Uhokri Dehetniye humawase en inurik; akak gimaygibinenwa ig kehe kamuw akak kayg hawata akak warukmebdi akiw.
7Ig pahadguhe madikte parahwokwa amun pahayruknene iwetrit. Ig ike madikte un ariku abeyhekri mihadnene.
8Madikte yis amadgayavu inin wakaymni gimin Kiyavwiye Uhokri Dehetniye! Madikte yis misekwenevwi ay amadga inin kiyathanigbay!
9Mmanawa ig he awnevi, ikevi. Madikte ariknebdi humaw git. Ku aysaw ig awna, madikte kahayak git.
10Ig Kiyavwiye Uhokri Dehetniye mpitha madikte hiyegviyenevwi gahegbetawnikis, ig ka isaksa igkis keh ini ku pariye gimawkankis.
11Heneme ku pariye ig Kiyavwiye Uhokri ahegbeta, in dahwa adahan avananekwa. Ku pariye ig kaniy in dahwa adahan akiwka akiwnek.
12Ka aynsima kabayka ay gidahankis hiyegviyenevwi ku pariye kawohkigahaw git Kiyavwiye Uhokri! Ka aynsima kabayka ay gidahankis neras ku pariye gikanyanvu adahan igkis humaw gihiyegavu!
13Ig Kiyavwiye Uhokri Dehetniye iveg womkanit ayta inuriktak. Ig hiyap madikte hiyegviyenevwi atan amadgat inin.
14Ariwntak giwetri ku kiney ig misakwa, ig iveg gimkanitkis madikte amedgenevwi inin.
15Ignewa Kiyavwiye Uhokri ku pariye keh uhiyekemni. Ig hiyak madikte ku pariye ukehni.
16Hiyawa pahavwi ikivarat kadahan ka aynsima gisuwtatavu, heneme ka igkisma keh ig isahptaw giwkis givetunyavu. Ine suwtatviyene gidatnikis ik adahan keh igkis mataka kerka.
17Kawnata ik adahan wis kamaxwa givitit kaway kerkevutne adahan ig keh wis mataka uvetunya; in gidatni kane aynsima ka ik adahan mpithaw giw.
18Ignewa Kiyavwiye Uhokri Dehetniye ku pariye gimaptentenkis neras kiyathenevwi giw, ignewa kavigsa neras ku pariye kamaxwenevwi avitit gamnihra.
19Ig keh igkis isahptaw ariw miyaka. Hiyawa igkis abet mihetniki, heneme ig keh igkis aymuhwenene amadga inin.
20Kibeyne wixwiy kamaxwene givititnewa Kiyavwiye Uhokri Dehetniye. Ignewa wayavetniwiy. Ignewa mpithawiy ariw mbeyne.
21Ignewa Kiyavwiye Uhokri keh uyakniwiy batek, mmanawa wixwiy kamaxwa avit giw barewvitye.
22Kiyavwiye Uhokri, kehnaba ini pamnihra ay ukakuh, usuh madikte, mmanawa pivititnewa usuh iki ukamaxwan!
Currently Selected:
Sawmus 33: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
