Sawmus 32

Nah kayah nutaraksan

1Ka aynsima batekka ay gimun pahavwi taraksevye ku aysaw Kiyavwiye Uhokri bayahminig ariw gitaraksan, ig ka hiyap givathawni akiw.

2Ka aynsima batekka ay gimun pahavwi ku pariye Kiyavwiye Uhokri Dehetniye ka hiyavgi kema patehwevyema akiw. Ig batek awaku ig inyewa kayah gitaraksan ig ka yamahpa gitaraksan giw Kiyavwiye Uhokri.

3Ku aysaw nah kote akkate nutaraksan, avim ini nah ka ik adahan keh ariknawnama annivwit. Mmanawa nah nudukwenewa kiyenene nutaraksan, in keh nah mataytak tihene awaku.

4 Kiyavwiye, pis keh nah kayah ke wotbe awikabe ay nuduhyamadga. Nudatni madike ke unbe makerviye abet kamukri.

5Ayteke nah hiyapni hene, nah ekke nutaraksan pit. Nah ka yamahpin piw akiw. Nah awna: “Nah akkate nutaraksan git Kiyavwiye.” Henewa nah kehpin. Kibeyne, avim ini pisme bayahminevun ariw madikte nutaraksan.

6Inneki keh, amawka madikte pihiyegavu amnihswa pit kurinewa, ku aysaw igkis kahawkanate. Ayge nikwe ku aysaw mbeyne aytanek kivuni kewa digiswikibe, in ka huwitnek gitkis aynesnima.

7 Kiyavwiye, pisnewa nayemwekri. Pis wiwhun ariw madikte kiyimwiki. Hawata pis keh nah pak avat adahan kabeyhene pamnihra akak madikte nubetki, mmanawa pisnewa mpithan ariw mbeyne.

8 Pis awna nutuh: “Nah huwithapte adahan ekkene pit ku kitwiye pis. Nahwa ikinek pihiyekemni. Nahwa iveginek pimkanit adahan pavuriwten. 9Ka ba ikaw kewa pahavwi kawaybe ig ka hiyak hawkri. Ig kaway muwaka pahat sivarisa idiska gibiyrikut adahan gihwitenten ku kitwiye ig. Gimawkan ig mpiksaptihka avit ig keh gikivara gibetki.”

10Hiyeg mbayavye gihiyekemnikis igkis hiyap ka aynsima mbeyne. Heneme pahavwi ku pariye kamaxwene givitit Kiyavwiye Uhokri Dehetniye, igi Kiyavwiye Uhokri gamnihra avanenekwa ay gikak.

11Nukebyuvwi kibeynevwi, uyay batek unaktinwiy giwntak Kiyavwiye Uhokri. Uyay batek ka aynsima. Yis ku pariye barewbetyevwi yihiyekemni, paknay avat akak madikte yibetki!

Currently Selected:

Sawmus 32: pluPB

Highlight

Copy