Sawmus 19

En ahumwan akka wotwiy Uhokri gikiytani

1Aynte inurik en abewi in arakak ku samah ig Kiyavwiye Uhokri barewye. Madikte ku pariye amadga en areketni wotwiy Kiyavwiye Uhokri gannivwi.

2In akka wotwiy gidatni akak gikiytani takunipti. Puwivaka akak tiyegemka avanenekwa.

3Ka akakma iwit in akkaka wotwiy. Ine kawnata akakma ikuvimnat.

4Heneme muwapuw ku samah ayesri hawkri, arakak wotwiy ku Kiyavwiye Uhokri ay. In huwewehe wotwiy muwapuw he danuhe amaksemni waxri.

5Ig Kiyavwiye Uhokri keh kamuw asara barewyewa. In humaw kewa givinbe. Igme kamuw pes anavitak ini gisara kewa pahavwi awaygbe maripkewviye ig pes givinwatak kibehtenwa akak madikte gibetki. Ig ahegbetvari avigku gihina kewa pahavwi awaygbe ku pariye hikekne garapti.

6Ig pes wahamavriktak. Ig hamah uvitkiyavrikut. Yuma ik adahan ayamwa ariw giwahni.

Uhokri gannasan akka wotwiy Uhokri gikiytani

7Madikte ku pariye ayge amedgene en in akka wotwiy ku Kiyavwiye Uhokri ay. Inme Kiyavwiye Uhokri gannasan in akka wotwiy ka aynisma huwewete akiw ku samah Kiyavwiye Uhokri gihiyekemni. In akka wotwiy avigkutavriknawa. In keh uhiyekemni nukunehwa. Inakni giwn inyewa hiyakemniki. Ik adahan wis kamaxwa nivitit. Hiyawa wixwiy yuma uhiyekemniwiy, heneme ku wixwiy hiyak giwn, nikwe wixwiy humaw hiyekemniye hiyeg.

8Ini ku pariye Kiyavwiye Uhokri Dehetniye gayapni wotwiy in adahan kabaykanenwa, in adahan batekkanenwa. Ini gikumadukan in kibeyne kumadukaki. In uguhne uhiyekemniwiy.

9Ini wavisniwiy gibohri Kiyavwiye Uhokri in yuma mbayka nibet. In keh wixwiy tiviknene kehnenekwa gibetki. Ku pariye ig Kiyavwiye Uhokri akka wotwiy ku in kabay, inyewa in kabay. Inme ku pariye ig akka wotwiy ku in ka kabay, inyewa in ka kabay.

10Ini gannasan in ka aynsima kabayte ariw karukri wahano, ariw ka aynsima karukri wahano egyewatnano. In ka aynsima magute wotwiy ariw ahayak anunu, ariw ku pariye ka aynsima kitertenene.

11 Kibeyne, Kiyavwiye, ini pannasan in mpithan, nah pibuk, adahan nah ka taraksa. Ku nah ihpin, nah utinek ka aynsima kabayka.

12Kiyavwiye, nuwnteknewa nah ka ik adahan hiyak nutaraksan. Uya bayahminan ariw ini nutaraksan ku pariye nah keh nah ka hiyaknima.

13 Hawata bayahminanuba ariw nutaraksan ku pariye nah hiyakni kuwis. Amnih mpithan adahan nah ka keh ku pariye nah kuwis hiyakni ku in taraksaki. Keh nah ka isaksaw nit. Ku pis amnihun hene, nikwe nah wewnek avigkutavrik ku samah pimawkan, nah ka keh mbayka akiw.

14Kiyavwiye, numawkan madikte nuwnuh ku pariye ay nubiyrik akak madikte nuhiyekemni, numawkan madikte in kibeynekuye ay piwtrik. Mmanawa pisnewa nawayghetni, pisnewa namnihten!

Currently Selected:

Sawmus 19: pluPB

Highlight

Copy