Sawmus 18

Davi pak adahan ku samah ig mateke givetunya

1Kiyavwiye, nah ka nubetkisima pikak! Pisnewa nudatni.

2Kiyavwiye Uhokri, pisnewa nayemwekri kewa tipbe nudahan. Pisnewa keh nah isahptaw ariw mbeyne. Kibeyne, nuwohkiga, pis kewa pahow tipbe adahan nah ayemwene panmavrikut. Pisnewa numaptenten. Pisnewa mpithan ariw mbayka. Pimkanit nah bisik adahan nah isahptaw.

3Ku aysaw nah piriyepkaw git Kiyavwiye Uhokri, igme wiwhun giwakutakkis nuvetunyavu. Nernewa Kiyavwiye Uhokri Dehetniye kis adahan wis kabayhig.

4 Minikwak ig amnihpen wiwhpen ariw miyaka. Avim ini hawkri in kibohrikinenwa nudahan. In kewa parawbe ku pariye mpiye nuvitminew aharit pisenwevye nukakuh.

5In miyaka kanukminevun pahavwite kewa kuwawtabe. In ke wotbe nah tuguhpiwamet arikut imewti. In humaw kewa teybe adahan nukamaxwitni.

6Abet ini kiyimwiki nah piriyepkew git Kiyavwiye Uhokri Dehetniye. Nah ayep git adahan ig ayavan. Arikutak givin inuriktak ig timep nukuvimna. Ig timep namnihswan git.

7 Ayge nikwe igme amnihpen akak madikte gidatni. Nikwe waxri mukuse in segke. Hawata waxribdi imuwadminene segkebdi. In mukusebdi awaku Kiyavwiye Uhokri gidagowni.

8Sariyan pese gikigkaptak. Tiket pese gibiyaptak payegbitak akak amey.

9Ig woke en. Ig muhuke akak ukuhne misanapnene anavi gikugku.

10Ig batahkiswe givitminkis igkis inurikyenevwi kewye “kegubih”. Igkisme humew giwewten. Ayteke ig amere kibehtenwa ahavumpi kamaygviye.

11Ig awastew akak amisnavye. Ukuhne kuhogbadnene, unbetyene, muwapuw ganwew.

12Pahaye adahan gikiytani kahayak. Ugugune pese ariwntak ini ukuhne kuhogbadnene payegbitak akak muwok tiphawnene ayesri. Ahivak ke tiket ameybe.

13Nikwe ig Kiyavwiye Uhokri Dehetniye awna kewa digidgiyebe inuriktak. Ig awna ka gimantiwisima.

14Ayteke ig havise giyaka. Igkisme givetunyavu pekewbet. Akak gibutni ig keh igkis bisikbet.

15Kibeyne, Kiyavwiye, pis ivukave pivetunyavu, akak ini kamaygviye ku pariye pis puhe pibiyaptak. Ini kamaygviye huwite arit parahwokwa, in pasuhe un madikte. Avim ini kahayak madikte warik amihawni.

16Ayteke avim ini ig Kiyavwiye Uhokri tareke giwak inuriktak. Ig kidiswen, ig wiwhpen abetitak mbeyne ke wotbe ig nutariswitnibe ariwntak ini un amihawni.

17Ig wiwhpen giwakutakkis nuvetunyavu, giwkis neras ku pariye namiyhetnivwi. Awaku igkis madikte detyevwinenwa nuwhu.

18Ku aysaw nah abet kiyimwiki, ahavumpi ini igkis pisenwevye nukakuh, heneme avim ini ig Kiyavwiye Uhokri Dehetniye ike nawaygi adahan igkis ka matakan.

19Ig wiwhpen ariw mbeyne. Ig keh barewye hawkri nudahan. Ig amnihpen awaku ig batek nukakuh.

20Ig Kiyavwiye Uhokri Dehetniye diyuhkis kabayka nutuh awaku nah muwaka keh wadit, nah ka muwaka taraksa.

21Nah mpiksaw huwithasaw arit gihiyekemni. Nah ka kehti ini taraksaki adahan nah miniw giw nuwohkiga.

22Takunipti nah ivegminene nuhiyekemni amin gihiyekemni adahan nah hiyakni huwewe. Nah ka taraksati gikumadukan.

23 Ku nah tarakse, nah akkin git Kiyavwiye Uhokri. Nikwe ig hiyavun ke wotbe nah yuma nutaraksanbe. Nah ka daxtaw akak patahwaki.

24Inneki keh ig katiwnihun pakeku akak ini kabayka ku pariye nah keh. Mmanawa ig hiyavun giwtrik nah barewvitye hiyeg.

25 Kibeyne, Kiyavwiye, ignesnewa hiyeg ku pariye kehnevwi kabayka, igkisnewa uti kabayka piwntak. Ignesnewa hiyeg ku pariye wadityevwi, igkisnewa pis mpithigkis ariw mbayka.

26Ku pariye hiyeg amiyhene patahwaki, gikakkisnewa pis darihwak mmanawa pis hawata amiyha patahwaki. Heneme ku pariye hiyeg kane darihwekere pikak, pis kawnata darihwak gikakkis.

27Pis amnih hiyeg tuwatviye. Heneme neras ku pariye ikewnevwi givitminkis giyakikis hiyeg pis ikigikis warikap.

28 Kibeyne, Kiyavwiye nuwohkiga, pis uguhnenekwa nuhiyekemni. Nikwe yuma amisnavye ayge nibet.

29Pis iki nutuh nudatni adahan nah matekene nuvetunyavu kane aynsima. Akak pidatni, nuwohkiga, nah ik adahan nah manuk giyaranwakis.

30Ig Kiyavwiye Uhokri keh madikte wadit. Ig avanenekwa keh ku pariye gikaksan. Ig kewa pahak arab gidahankis hiyeg ku pariye ayemwenevye git.

31Ig Kiyavwiye Uhokri ignewa Uhokri ay. Ignewa umaptentenwiy ariw mbeyne.

32Ignewa Kiyavwiye Uhokri ku pariye kawihkis nutuh nudatni. Ignewa huwithan adahan nah ka ibakhaw ariw nuhina.

33Hiyawa nah wew, heneme nah ka kiyihptaw. Ig keh nukugku ke pahavwi it gikugkube, ig sigis waxribdiw ig ka kiyih. Ig keh nah misakwa aynte inut.

34Ig kannuhun adahan nah suguhne nuvetunyavu. Ig keh nah datte giwkis. Ig iki nutuh nudatni adahan nah ehne imedgit ku pariye kane avatisima.

35Kiyavwiye Uhokri, pis kawihkise numaptenten nuvitit adahan in keh nah isahptaw giwkis nuvetunyavu. Nah ka matak gitkis awaku pis avuriwnan amadga piwak. Pis hiyavun aynte warikwi, heneme pis mabukwe atere numinuh adahan nukidsetni, adahan pis ikene nutuh nukiytani.

36Pis ahegbete nudahan barewye ahin adahan nah wewne. Yuma mpitbetka nivigku adahan keh nah tuguh.

37Kuri nahme harakse nuvetunyavu nah kamaxwigkis. Nah pisenwe gihawkankis. Ku igkis kote madikte nah ka miniw giwkis.

38Nah sibuhgikis. Igkisme ka kannikaw awaku igkis tuguhbet anavit nukugku.

39Pis ike nutuh nudatni adahan nah kerye gikakkis. Ayteke pis matakasevgikis nutuh.

40Pis kehe igkis bisikbet nuvitkigtak. Nahme haraksevgikis adahan pisenwevye gikakkis.

41Igkis kabiman adahan amnihswenes, heneme yuma pahavwinema hiya gamnihkakis. Igkis kabiman git Kiyavwiye Uhokri Dehetniye, heneme ig ka kaytwa giwnkis.

42Nah batakwesevgikis he igkis wageswe atabdabni. Ayteke nah sagehpigkis ke ibugbe avigkutak ahin.

43Kibeyne, Kiyavwiye, pis wiwhpen giwakutakkis hiyeg ku pariye kavetunsevun. Pis kehe nah humew hiyegviyenevwi gikivarakis. Hiyegviyenevwi ku pariye nah kane hiyakti kuri igkis ihpene nukumadukan.

44Nawwotunyevwi paberetusaw adahan igkis kiyathan. Hawata igkis ihpa nuwnuh ku aysaw nah awna gitkis.

45Igkis biyuksa gibokakis. Igkis pes arikutak gayemwekegkis, duwidwiptip.

46 Kibeyne, ig Kiyavwiye Uhokri Dehetniye, igyewa ay akak gidatni! Nah kabayhig. Ignewa numaptenten. Ignewa namnihten. Uyay kiyathig!

47Ignewa iki nuvetunyavu nuwakurit. Ig kumadukasa hiyegviyenevwi nutuh.

48Ig amnihpen xuwehpen giwkis nuvetunyavu. Kibeyne, Kiyavwiye, pis keh nah datte giwkis neras hiyeg arewhavye. Pis keh nah isahptaw giwkis.

49Kiyavwiye, inneki keh nah kabayhap ay gibetkis hiyegviyenevwi muwapuw. Inneki keh nah pak avat adahan kabeyhene piw.

50Kibeyne, pis kanniyven adahan nah kumadukene hiyeg. Pis keh nah mateke ka aynsima nuvetunyavu. Pis ike ka aynsima kabayka nutuh. Hawata pis kehnek gikakkis nuhiwhivwi, adahan avanenekwa.

Currently Selected:

Sawmus 18: pluPB

Highlight

Copy