Sawmus 17
17
Uya amnih wadithebdih nuhawkan
1Kiyavwiye Uhokri, timapnaba nayapni kabayka pit, timapnaba namnihswan pit! Ataybiswanaba arit nuviryepkawni, mmanawa nuwnuh in barewbet. Yuma ariknawnama mbeyviye hiyakemniki nibet.
2Uya amnih wadithebdih nuhawkan. Mmanawa pis hiyak ku pariye nukehni kabay hawata ku pariye kane kabay.
3Pis hiyak ku pariye abet nuhiyekemni. Tiyegem pis ivegbetin. Henewa, pis ivegbete nuhiyekemni kabayntiwa. Kibeyne, pis ka uti pahatnama nutaraksan gikak ner nuvetunya. Nah kuwis ahegbete nuhiyekemni adahan nah ka awna pahatnama iwit mbaynema.
4Nah kawnata keh pahaynema mbayka gikak. Mmanawa nah mpiksaw ihpa piwn. Inneki keh nah ka wew akak ignes hiyeg arewhavye gihiyekemnikis.
5Avanenekwa numawkan nah wewkere akak pidahanenwa pihiyekemni. Ku nah waywe nikak, nah ka taraksati.
6Kiyavwiye Uhokri, nah piriyepkewne pit, mmanawa nah hiyak ku pis kaytwa nuwnuh. Uya ataybiswa numkanit ku avim inin. Uya timap nuviryepkawni.
7Uya akka nutuh pamnihra barewye, mmanawa pisnewa mpitha hiyeg ku pariye amnihswenevwi pit gavitkis givetunyavukis.
8Uya mpithan ariw mbeyne hawata ku samah wis mpithamni wowtyak anag ariw iget. Uya kavigsan ke takarakbe eg ayam gukamkayh anavi guhanpi.
9Mpithan giwkis hiyeg mbayavye ku pariye ahegbet adahan pisenwevye akak nuhawkan. Igkis nuvetunyavu ay kiyaran nukakuh adahan nukamaxwitni.
10Igkis ka amnih pahavwinema hiyeg. Gitkis igkis datte ariw madikte.
11Igkis ivegve nudukwen muwapuw he igkis utevun. Igkis kiyaran nukakuh kuri. Igkis wahap ku aysaw danuh ahawkanavrik adahan igkis nuwmepten.
12Igkis kewa kawokwinebe kadasene giwin. Igkis ahegbet adahan nusigkebdihpitni.
13Kiyavwiye, kannikawnaba adahan pis kavetunsa neras nuvetunyavu adahan pis pisenwa gikakkis akak piwana pebkaknano guyaw. Uya amnih wiwhun giwakutakkis.
14Kiyavwiye, akak ini pidatni uya keh nah isahptaw giwkis; henewa, keh nah isahptaw giwkis neras amadgayavu inin ku pariye kuwis kadahan madikte kabayka ku pariye gimawkankis. Katiwnisa gitkis akak ini mbeyne ku pariye pis bayehe gidahankis. Hawata katiwnisa gikamkaykis gitaraksankis gitkis, hawata gihiwhivwikis gitaraksankis akiw.
15Nahme hiyapinek, mmanawa pis hiyavun nah kibeyne piwtrik; hawata, ku aysaw nah wadisnek amun nawenyewa nuvituh, nah bateknek ka aynsima awaku ku samah nah kuwis ay pivetun, pisme ay nukakuh.
Currently Selected:
Sawmus 17: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
