Markus 6

Nazareyenevwi ka kiyatha Jesus

Mt 13.53; Lk 4.16; Jo 12.37; Ro 10.16

1Pisenwa gawnan inakni iwit patuwesbunka, ig Kiyavwiye Jesus tivik ayteke. Ig diyuhe ta avitit giwaxig Galileyamnaw. Gikannuhnivwi igkis tivik gihapti.

2 Igkis danuh atere. Ayteke abet samdi ig kavusa kannuhak ariku judeyenevwi gileglisakis. Neras timepnevwi giwn ayge igkis wakaymnibdi gimin. Igkis awna:

— Kariwntak ner awayg uti inakni giwn? Kariwntak ig uti ini hiyakemniki? Kariwntak ig uti ini gannu?

3Ka ba pis hiyap ku ner he ahevutnenen gikamkayh? Ka ba nernema kinagniyo kiyavuno Mahi? Ka ba Tiyagu gikak José, Judas, Simawh, ka ba igkisnema gisamwivwi? Ba gisamuvwi ka ba egkisnema misakwa ay ubetwiy?

Ayge nikwe igkis kiyimwih gikak Kiyavwiye Jesus, igkis tukuhwevwa giw.

4Igme hiyapni hene, ig awna gitkis:

— Madikte hiyeg kiyathenekuye pahavwi ku pariye Uhokri gawneve. Ignesnewa gikebyuvwi gikakkis gimunyavu gikakkis hiyegiviyene ku pariye avitya giwaxigwa ignes ka kiyatig.

5Ayge nikwe ig ka keh kibitema annut ayge awaku yumahwa gikamaxwankis givitit. Ig he sarayh giwak givititkis aynesa hiyeg kakahribdavye ayge igkis makniw.

6Ig wakaymni ka aynsima adahan ku samah igkis ka kamaxwa givitit.

Jesus awahkis giwatnivwi muwapuw

Mt 10.1; Lk 9.1

Ayteke ariwnteke ini ig Kiyavwiye Jesus mpiye muwapuw avuriw madikte paytwempu. Ig kannuhne hiyeg ayge.

7Ayteke pisenwa ig Kiyavwiye Jesus pahadguhe giwatnivwi madikawkunene gikebikis gikakkis piyananene gawnakis (l2) ta gimkanit. Ayge ig gawahkiswitnikis muwapuw. Nikwe ig gibekheptenkis piyenmempi adahan igkis atak avitit mpuse paytwempu. Ayteke ig ike kumadukaki gitkis adahan igkisme pekkiswiye wavitye givititakis hiyeg.

8Ig awna gitkis:

— Ataknay henen yiwakyekata. Ataknay ininewa akak yasuranenwa. Ka yi muwaka atak akak yimana, ine akak yisakola adahan yiwewni, ine akak karukri ariku yivusra.

9Ik adahan yis kawih yikaswatni heneme ka yi muwaka atak akak pikanema yisimsa.

10Ayteke ig awna gitkis akiw:

— Ku aysaw yis danuh ta avitit paha paytwempu, misakwanabay pahayriknene ku kiney yis amavaka he ku aysaw yis pes ayteke paytwemputak.

11Henneme ku ignes hiyeg aygnenevwi ku ignes ka amavay aynesnima, ku ignes ka timepkere yiwn, nikwe ku aysaw yis pes ayteke, yis sassah yikugku ariw avathawni. Ini arakak ku samah gitaraksankis.

12Pisenwa inakni gawnan, igkisme tivikbet muwapuw. Igkis kinetihwenes ta gitkis hiyeg adahan igkisme wages gihiyekemnikis ariw gitaraksankis.

13Avim ini igkis pekkis wavityempu ka aynsima givititakis hiyeg. Hawata igkis dimuk ah ariw ariy ta gitewharitkis hiyeg kakahribdavye adahan makniwevgikis.

Joawh Batista umehpika

Mt 14.1

14Avim ini hawkri ner hiyaptigi Erodis ig time gak Kiyavwiye Jesus, mmanawa giw Kiyavwiye Jesus hiyakkan muwapuw. Ig timap gaytakis hiyeg awna:

— Ke wotuhbe ignewa Joawh Batistamni. Ig kannikew akiw ariw gimiremni. Inneki keh ig ka gannusima keh annut.

15Gaytakisme hiyeg awna:

— Ke wotuhbe ignewa amekene Eliyas.

Gaytakisme awna:

— Ke wotuhbe ignewa pahavwi gawneve Kiyavwiye Uhokri. Mmanawa ig kewa Uhokri gawnevevu pitatyevwibe.

16Igme Erodis ku samah ig time Kiyavwiye Jesus gak, ig awna:

— Ke nutuhbe ignewa Joawh Batistamni. Nah bukihkise gibita, kurime ig kannikew akiw.

17Ig awna inakni hene mmanawa ignewa kamaykistinene Joawh Batista. Ig wanakkiswig, ig sarayhkiswig arikut parakseket. Ig keh hene guvatra amakano Erodiyas, ku pariye gegni Filip gihayo mmanawa ig kamaxwig.

18Avim ini ig Joawh Batista himehpig. Ig awna git:

— Pis ka keh wadit ku samah pis kamax pegni gihayo. Ka henema Kiyavwiye Uhokri aya wotwiy.

19Ayteke nikwe egme amakano Erodiyas kanaktin gikak Joawh Batista. Eg aharitno giwmasepten. Heneme eg ka hiya gisamanak.

20Mmanawa ig Erodis avisemun gibohri Joawh Batista awaku ig hiyakni ku ig waditye hiyeg, ig hiyakni ku ig Kiyavwiye Uhokri gihiyega. Ayge nikwe ig avuriwkisgi ariku parakseket. Ku aysaw ig timap Joawh Batista kinetihwa git, ig matekbet gihiyekemni heneme ig batek timap giwn.

21Egme amakano Erodiyas guhawkanavrik danuh adahan eg giwmasepten. In danuh ku aysaw ig Erodis keh gifetra adahan ku samah ig amadga wayk. Avim ini ig awnase ka aynsima hiyeg kiyatyevwi. Ig awnese gihiyegavu ku pariye avuriwnevwi gikumadukan payak gikak. Ig awnese gisuwtatavu gikivarakis. Hawata akiw ig awnese madikte neras Galileyenevwi ku pariye pi kiyatenene ayge.

22 Igkis madikte danuh atere, igkis fetya ayge. Abet ini fet eg amakano Erodiyas gukamkayh himano eg kayno eg pahavo gidahankis gawnasanvu. Eg keh ig Erodis batek ginaktin mpinevevye payak gikakkis gawnasanvu. Pisenwa nikwe ig awna ta gut:

— Hiyawa pis aya nutuh madikte ku pariye pimawkan nutuh. Nah ikaksa pit madikte. 23Uhokri timap nuwnuh ku nah awna pit. Nah ikaksa pit madikte ku pariye payapni nutuh. He abusku nukumadukan.

24Egme himano timapni hene, eg pes ta gut gunag. Eg danuh atere, eg ayavgu:

— Pariye nayapni kuri?

Egme gunag kaytwa guwn:

— Aya Joawh Batista gitew.

25Egme himano diyuhe kibehtenwa ta git Erodis. Eg awna git:

— Nah muwaka pis ike nutuh Joawh Batista gitew. Uya ikepni nutuh kurinewa amadga pahak miruk.

26Igme Erodis timapni hene, ig wakaymni mpinevevye mmanawa ig ka ihpekere inakni guwn. Heneme kuwis ig ikaksin gut giwtrikneswa gawnasanvu. Nikwe ig ka muwaka kaytwin “Kawk”.

27Ayteke nikwe ig awahkis pahavwi gisuwtata. Ig awna git:

— Su atak bukihe Joawh Batista gibita. Ayta ewk gitew atan.

Igme suwtat tivik ig bukihe Joawh Batista gibita ayge ariku parakseket.

28Ayteke nikwe ig aytwe ewk gitew atere amadga pahak miruk. Ig ikepni ta gut nor himano. Egme ewkwin ta gut gunag.

29Ayteke ku aysaw ig Joawh Batista gikannuhnivwi time gak, igkis danuh atere, igkis iwe givit, igkis avuhpig ariku gimew.

Jesus iki im ta gitkis hiyeg

Mt 14.13; Lk 9.10; Jo 6.1

30Ig Kiyavwiye Jesus giwatnivwi igkis pisenwa gannivwikis, igkis diyuhe ta gimkanit. Igkis akki git madikte ku pariye gikehnitnenkis madikte ku pariye gakkankis gitkis hiyeg.

31Ayteke ariwnteke ini igme Kiyavwiye Jesus awna ta gitkis:

— Uyay higihwa aynesa ta avitit paha iwetrit ku kiney yumanene hiyeg. Ayge wixwiy mayak aynesa.

Ig awna inakni hene, awaku gaxnikiswa igkis ka igkisma mmanawa ka aynsima hiyeg danuhpene git pawenyaneke.

32Ayteke nikwe igkis tivik igkiswonas. Igkis tivik muhumdakew ta avitit paha iwetrit ku kiney yumanene hiyeg.

33Heneme ka aynsima hiyeg ayge gihivetnikis adahan ku samah gitepkemnikis atere. Igkis hiyapni hene, igkis sigise atere waxriw. Igkis pesbetwikis avititak madikte paytwempu ayge. Igkiskit danuh atere giw Kiyavwiye Jesus.

34Igme Kiyavwiye Jesus sarayhwe atere waxrihbakat. Ayge ig hiyap madikte neras hiyeg kabubuknekis. Ig hiyapni hene, ig kayah gidahankis. Ig amnihpigkis awaku igkis ayge kewa muwtohpiyenebe ku pariye yumanene gikivarakis gikavriwtenkis. Ayge nikwe ig kinetihwa gitkis amin ka aynsima hiyakemniki.

35Ayteke ariwnteke ini, tepti kamuw, igkis gikannuhnivwi danukwa atere git. Igkis awna:

— Kiyavwiye, kuwis aygete kuwis. Inin iwetrit yuma hiyeg misekwene ay.

36Wani neras hiyeg tivik adahan igkis isim gimanakis. Ik adahan gaytakis atak ta gitkis was akivara. Gaytakisme atak tahan paytwempuwit adahan igkis isim gimanakis atere.

37Igme Kiyavwiye Jesus kaytwa giwnkis:

— Kawa. Yisnewa iki axka ta gitkis ku avim inin.

Igkisme awna git:

— Mmah pimawkan usuh atak isim bugut adahan gaxnikis? Amawka usuh sarayh ka aynsima karukri mmukna madikawku madikwa (200) karukri. Usuh yuma ukakura akebi ini.

38Igme Kiyavwiye Jesus ayavgikis:

— Aysaw akebi bugut yis kadahan? Su yi iwasa.

Igkisme tivik iwasa. Ayteke igkis diyuh akiw, igkis kaytwa giwn:

— Usuh kadahan pohowkubu akebi bugut akak piyana akebi im masaraku.

39Igme Kiyavwiye Jesus awna ta gitkis madikte hiyeg:

— Batnay kabubuk ay abet ini pamatka mitibetnene.

40Igkisme batahkiswebdi atere. Igkis ahegwa adahan pohowku madikwa (50) gikebikis, adahan madikawku madikwa (100) gikebikis.

41Ku aysaw igkis kuwis batebdebdihpikis, ig iwe ini pohowkubunene bugut akak piyananene im. Ig sarayh givegi ta inut, ig kabayha Kiyavwiye Uhokri adahan ini. Ayteke ig sigkebdihe ini bugut. Ig ikepni ta gitkis gikannuhnivwi kahadbe igkisme ibekhepni ta givuwiwkis neras hiyeg. Hawata ig ibakhase ini piyananene im ta givuwiwkis madikte hiyeg.

42Igkis madikte ax kabihribdave.

43Ka aynsima asemne misekwe. Pisenwa nikwe, igkis gikannuhnivwi ahiwavemni, igkis kivunse ka aynsima panye akak asemne gimanakis, madikawku akebi panye akak pisaya arawna (12).

44Igkis neras hiyeg ka aynsima gikebikis. Awaykemninen pukuhka kaba danuh pohowku mil (5.000) gikebikis.

Jesus wew ahakwew un

Mt 14.22; Jo 6.15

45Ayteke ariwnteke ini ig Kiyavwiye Jesus awna ta gitkis gikannuhnivwi. Giwn:

— Kataptawnabay amadgat wahmunwiy. Manukwinay pitati tahan pahabakat ta avitit paytwempu Betsayda. Kuwewanek nah aterenek.

Igkis timapni hene, igkis tivik.

46Igme misekwe ayge adahan ig ekkewviye ta gitkis neras hiyeg.

Pisenwa gekkewven, ig wagehe avitit paha waxri imuwadnene adahan ig piriyepkewne atere.

47Misanpi gaw, nor gihmunkis aynte pakwa mahakwa. Igme adukwenewa ig ayge pahavo.

48Ig hiyap ku igkis mpiksewnes puwehnes mmanawa mayg aytniva gitivutkis. Ayteke nikwe kabeyweke ig Kiyavwiye Jesus aytweni ta gimkanitkis, ig waywe ahakwew un. Ig gimapiyeptenkis.

49Igkisme hiyapni hene ku samah ig waywe ahakwew un, igkis ikiygi ku ig anmapti. Ayge igkis kabimenbet akak gavisnikis.

50Igkis madikte hiyavgi. Igkis avisasew ka aynsima. Igme awna ta gitkis. Giwn:

— Kibokahwanabay. Nahnewa ay. Ka yi muwaka avis.

51Ayteke ig katapte amadgat gihmunkis. Ig misekwe ayge gikakkis. Aynewa mayg misekwe. Igkisme amadgaya umuh igkis hiyapni hene, igkis wakaymnibdi gidahan mpinevevye.

52Mmanawa igkis ka pukuha ini gannu akak ini bugut. Igkis pet gihiyekemnikis.

Jesus makniwa hiyeg kakahribdavye aynte Jenesaremnaw

Mt 14.34

53Igkis manuke mahakwa, igkis danuh ta avitit Jenesaremnaw. Ayge igkis minehwe ihapkat.

54Ku aysaw igkis katapte muhumdaketak, neras hiyeg ayge murotvi git Kiyavwiye Jesus.

55Igkis wasavanew giminkis hiyeg muwapuw giwaxigkis. Ayteke nikwe igkis waxwave madikte hiyeg kakahribdavye ta gimkat amadga gisivamnakis. Igkis waxwigkis muwapuw ku kit igkis time gak ku ig ayge.

56Ku kitwiye ig danuh, atere igkis amnihswe ta git adahan ig isaksa neras kakahribdavye adahan igkis dax he gikanwaptanen akigbimna. Igme isaksevgikis. Madikte hiyeg ku pariye daxni igkis makniw.

Currently Selected:

Markus 6: pluPB

Highlight

Copy