Markus 14

Jesus givetunyavu ahegbeteviye ginetnikis adahan giwmasepten Jesus

Mt 26.1; Lk 22.2; Jo 11.47

1Pineme hawkri misekwe adahan judeyenevwi gifetrakis adahan igkis axnes muwtohyan arih akak bugut miyegbiye. Ignes axni adahan kiyene ku samah minikwak Kiyavwiye Uhokri umahkise muwtohyan gidukwenavrikkis gihiyegavu. Ayge neras muwveg kiyatyevwi gikakkis neras kannuhekevutnevwi amin amekene Moís gikumadukan igkis awna:

— Amawka ku wixwiy umahkise Jesus. Uyay kamaykiswig. Heneme ka ariwtrikma hiyeg.

2Ka ik adahan wixwiy kamaykisgi abet fet. Nawenetke hiyeg fetyavu hahayruke ukakwiynek givatra.

Pahavu tino imiha Jesus

Mt 26.6; Jo 12.1

3Igme Kiyavwiye Jesus misekwe ay nivit paytwempu Betaniya ayge givineku pahavwi awayg kewye Simawh. Igme Simawh minikwak ig axpusakarete avit busukne. Ku samah ig Kiyavwiye Jesus bat ayge aranwa axtet, pahavu tino danuh atere git. Eg ayta akak imihgi ariku paha atiy kehka tip seyno. Ini imihgi kehka akak “nardu” inyekata. In ka nitiwnisima. Eg tino danukwe kennesa git, eg dunihe abita ini imihgi atiy, eg dimukwin ta gitewharit Kiyavwiye Jesus.

4Heneme gaytakis hiyeg axnevwi hiyapni hene, igkis dagawne. Igkis awna:

— Mmahki inin imihgi he sarayhpikanen waditnevyenen hene?

5Wake in ka sarayhpikama hene, ikkam adahan in piyukwika adahan ka aynsima karukri, mpiya mpanamku madikawku madikwa (300) karukri. Ikkam adahan akakuravig ibekhepka givuwiwkis madiptavye.

Igkis awnebdi gumin ayge.

6Igme Kiyavwiye Jesus hiyapni hene, ig awna gitkis:

— Maytwangu. Mmah yis mbayha nor tino gutew hene? Ka ba yis hiyap eg kehno ka aynsima kabayka nukakuh?

7Hiyawa avanenekwa yis keh kabayka gidahankis madiptavye ku samah yimawkan awaku igkis ay yibet avanenekwa. Heneme nahme ka misakwa yibet avanenekwatma adahan yis kehne kabayka nukakuh.

8Eg keh ku pariye eg hiya asamanak. Eg imihevun adahan nahegbetepten adahan nah avuhpiki.

9Aysawnemenek hiyeg ekkene kibeyne inetit numinuh muwapuw amadga inin. Amun ini ginetnikis ignes kinetihwanek amin inin kabayka ku pariye eg keh nukakuh. In gukehni misakwa akiwka akiwkanek. Ihanabay inakni nuwnuh. Henewatbaki in misakwa.

Judas iskariyotis ahegbeteviye ginetni adahan gikamaykiswitni Jesus

Mt 26.14; Lk 22.3

10Igme pahavwi gaytakis giwatnivwi, ig Judas Iskariyotismin, ig timapni hene, ig awna ginaktin:

— Kuri nah kamaykiswigte.

Ig tivik ta gimkanitkis neras muwveg kiyatyevwi. Ig danuh atere, ig kinetihwa gikakkis adahan ig kamaykiswevye Kiyavwiye Jesus ta gitkis.

11Igkisme timapni hene, igkis batek ginaktinkis ka aynsima. Igkis awna git:

— Ku pis kamaykise Jesus wotuh, usuh katiwnihpi.

Ayteke nikwe ig gihavumpi Kiyavwiye Jesus adahan ig hiyap ku aysaw gihawkan danuh kabayntiwa adahan ig kamaykiswig.

Iwetrit ahegbet adahan Jesus fetya gikakkis giwatnivwi

Mt 26.17; Lk 22.7

12Ayteke ariwnteke ini danuh ahawkanavrik adahan ini fet adahan hiyeg axne bugut miyegbiye. Abet pitatye hawkri abet ini fet ignes judeyenevwi umah muwtohyan adahan kiyene ku samah minikwak Kiyavwiye Uhokri umahkise muwtohyan gidukwenavrikkis amekenegben adahan giwiwhkiswitnikis giwakutakis hiyeg ejituyenevwi. Ayge nikwe gaytakis Kiyavwiye Jesus gikannuhnivwi ayavgi:

— Kiyavwiye, kineyva pimawkan adahan usuh ahegbeta pahavwi muwtohyan adahan waxniwiy abet uvetrawiy?

13Igme kaytwa giwnkis:

— Yis piyana yikebyi, ataknabay paytwempuwit Jerusalém. Ayge pahavwi awayg patiptak yikaknek. Ig hiyuwe akak kaggap un atiy.

14Makekwepnay gihavu. Ku kiney ig parak arikut payt, yis parak aterewata. Awnanay ta git payt akivara ku yikannuhten awna: “Kineyva xam adahan nah fetya axne muwtohyan arih gikakkis nukannuhnivwi?”

15Ayge nikwe ig akki yitnek pahayku xam nopsadnene aynte payt avahnap inuteknene. Arikna ayge madikte ahegbet kuwis. Ahekbetanabay umanawiy ayge adahan wixwiy fetya.

16Ignes piyananene timapni hene, igkis tivik ta paytwempuwit. Igkis danuh atere, igkis uti madikte ku samah ig Kiyavwiye Jesus akkamnih gitkis. Ayge nikwe igkis ahegbete madikte adahan igkis fetya. Pisenwa igkis diyuhe ta git Kiyavwiye Jesus.

Jesus akki ku pariye gikamaykiswitni

Mt 26.20; Lk 22.21; Jo 13.21

17Aygete ig Kiyavwiye Jesus atere fetya gikakkis giwatnivwi madikawkunene gikebikis gikakkis piyananene gawnakis (12).

18Ku samah igkis ayge axne aranwa axtet, ig Kiyavwiye Jesus awna gitkis:

— Pahavwi yaytak ku pariye axne ay nukakuh igi kamaykiswenek ta gitkis nuvetunyavu. Ihanabay inakni nuwnuh. Henewatbaki in.

19Igkisme giwatnivwi timapni hene, igkis wakaymnibdi. Igkis awnebdi pahavwimpi:

— Kiyavwiye, ku ka nawhnema kamaykiswepnek?

20Igme Kiyavwiye Jesus kaytwa giwnkis:

— Pahavwi yaytak nuwatnivwi ku pariye mehbetene bugut nukakuh amadga paheknene miruk, ignebaki nukamaykiswitninek.

21 Nah, ku pariye wageswe awayg amadgaya inin, nah umahkiswenek ku samah Uhokri gannasan awna numinuh. Amawka ku nah miya, heneme ner ku pariye nuwmasepten nah ku pariye wareswe awayg amadgaya inin ig hiyap mbeyne ka aynsimanek nuvatra. Ka kiskama ner awayg humaw amadga wayk.

Jesus kiyekiswa gitkis giwatnivwi

Mt 26.26; Lk 22.15; 1Ko 11.23

22Ku samah igkis axnes ayge, ig Kiyavwiye Jesus iwe pahak bugut. Ig kabayha Kiyavwiye Uhokri. Ayteke ig sigkebdihe ini bugut, ig ibekhepni givuwiwkis giwatnivwi. Ig awna gitkis:

— Ahah. Inin bugut in nihuh yidahan. Amavanay inin bugut, axnay niwntak.

23Pisenwa gibakhan ini bugut, ig iwe pohow higeptet. Ig kabayha Kiyavwiye Uhokri. Ig ikepni givuwiwkis. Igkisme higa ariwntak nor higeptet.

24Igme awna gitkis:

— Inin win in numiguh yidahan. Ig Uhokri ahegbete ginetni nukunewa akiw gikakkis hiyeg adahan ku samah ignes humaw gihiyegavu. Nahme pahavwiwa nah sukase numiguhnek gidahankis ka aynsima hiyeg kahadbe ini gahegbetawni in humaw.

25Kuri nah ka takunima higa win ay amadga inin akiw. Awetuvye nah higa win he aynte amun Uhokri gikumadukan nah higa nukunewa win yikak akiw. Ihanabay inakni nuwnuh. Henewatbaki in.

26Ayteke pisenwa gihigvankis igkis peknes avat. Ayteke igkis peswiye ta avitit ini waxri imuhgivitnene kewye Olivegvit.

Jesus akki git Pedru ku igme wihwevye giw

Mt 26.31; Lk 22.31; Jo 13.37

27Ayge ig Kiyavwiye Jesus awna gitkis:

— Ku avim inin yis madikte ikiswenek. Mmanawa Uhokri gannasan kinetihwa hene. In awna:

“Nah umahkise ner muwtohvutne. Ayge nikwe givigvu muwtoh madikte ibekhewbetnek.”

28 Avim ini nah umehpikanek, heneme nah kannikaw akiwnek. Ayteke ariwnteke nukankawni nah tivik pitati yavitnek ta avitit Galileyamnaw.

29Igme Pedru timapni hene, ig awna git:

— Hiyawa madikte hiyeg ikiswep awaku ini mbayka ku pariye me danuhmet pit, nawhme ka ikispiti.

30Igme Kiyavwiye Jesus kaytwa giwn:

— Ku avim inin mitipka pis wihwe nuwhunek. Avit takarak awna pimavut gawnan pisme ayiva wihwe nuwuhnek mpamavut. Ihanaba inakni nuwnuh. Henewatbaki pis wihwe nuwhunek.

31Igme Pedru kaytwa giwn:

— Hiyawa nah umahkiswe payak pikak, heneme nah ka wihwa piw.

Igkisme gikannuhnivwi igkis madikte awnanekuye henep.

Jesus piriyepkaw ayge Jetsêmani

Mt 26.36; Lk 22.40

32Ayteke ig Kiyavwiye Jesus gikakkis gikannuhnivwi igkis tivik ta avitit paha iwetrit kewye Jetsêmani. Ig awna gitkis:

— Batnay ay in. Nahme tahan piriyepkewne.

33Ig iwe Pedru gikak Tiyagumni gikak Joawh. Igkisme wewkiswe atakesa, ayge igme kavusa wakaymni. Ig kayah avititak giyakni. Ig ka daykiswekere arit ini patahwaki ku pariye me danuhmet git.

34Ig awna gitkis:

— Nah wakaymni mpinevevye avit nuyakni. Ini nuvewkan umehpen pahayewvi. Nah tahan piriyepkawte. Yisme misakwa aynewa. Misakwanay avuriw adahan yis piriyepkaw payak nukakuh.

35Ayteke ig wewkiswe atakesa aynesa. Ig tuguhkiswe mabuw ta waygborit. Ig piriyepkaw ta git Kiyavwiye Uhokri. Ig hiyap ba hiya amaptanka ini mbeyne.

36Ig awna:

— Pa, Niguh, madikte arikna ka mahikonema pidahan. Ik adahan pis mpitha ini mbeyne danuh nutuh. Ku pis mpithekere, uya amnihun mpithin nudahan. Heneme ku in pimawkanwa in danuh nutuh, ka sam in danuh nutuh. Nah ka kehkere nudahan nubetki. Heneme nah kehkere pidahanwa pibetki.

37Pisenwa giviryepkawni ig diyuhe ta gitkis gikannuhnivwi. Ig utevgikis himekweke. Ig hiyapni hene, ig awna ta git Pedru:

— Simawh, mmahki pis himeke? Mmah yis ka hiya yisma misakwa avuriw nukakuh aynesnima?

38Avuriwnabay piriyepkawnay marihwa yis ka isaksaw arit mbayka. Yitip ka isaksawkere arit mbayka heneme yivit amadgaya inin ik adahan isaksaw arit mbayka mmanawa yis yuma yawaygisima nitivut.

39Pisenwa gawnan inakni, ig diyuhe aterewata akiw. Ig piriyepkaw inwata piriyepkawka ta git Kiyavwiye Uhokri.

40Pisenwa ig diyuhe akiw. Ig ute gikannuhnivwi himekweke mmanawa igkis isevwe ka aynsima. Igkisme hiyapni hene, igkis marekevwe. Igkis ka hiyak ku samah igkis diyuhkis giwn.

41Ayteke ig diyuhe ig piriyepkaw ta git Kiyavwiye Uhokri akiw. Ayteke pisenwa giviryepkawni ig diyuhe amamnavut ta gitkis neras mpemnenene gikebikis. Ig awna ta gitkis:

— Mmahpaki yivewkan yis he himeknenenwa? Mmahpaki yivewkan yis he mayeknenenwa? Ikeyvi. Kuwis danuh nuhawkanavrik. Kuri Nah, ku pariye wageswe awayg amadgaya inin, nah me ikepkamet giwakuritkis hiyeg taraksavye.

42Kannikawnay. Uyay patiptakigkis. Ivegnay atere. Ig nukamaykiswitni nehmnik.

Jesus kamaxwika

Mt 26.47; Lk 22.47; Jo 18.3

43Ku samah ig awnempiye inakni iwit, igme Judas Iskariyotismin danuh atere. Ig pahavwi gaytakis giwatnivwi. Ig danuh atere akak pahabunad hiyeg. Igkisme danuh atere akak giwanakis akak gisugakis. Igkis iwatit gidahankis neras muwveg kiyatyevwi gikakkis neras kannuhekevutnevwi amin amekene Moís gikumadukan gikakkis neras judeyenevwi giwewkistenkis.

44Ig Judas Iskariyotismin, ku pariye kamaykistinene Kiyavwiye Jesus, ig ayipa ahegbet ginetni gikakkis adahan ku samah ig ekkeviye Kiyavwiye Jesus ta gitkis. Ig awna gitkis:

— Ku yis hiyap nah ayhboka pahavwi, ignewatbaki Jesus. Kamaxwinigbay, iwepnigbay. Avuriwnigbay kabayntiwa.

45Ayteke nikwe ig Judas Iskariyotismin tivik wade gimkat Kiyavwiye Jesus. Ig danuh atere, ig awna git:

— Aa, Kiyavwiye.

Akak ini ig ayhbokig.

46 Neras pahabunene hiyeg igkis hiyapni hene, igkis sigise gimin, igkis kamaxwig, igkis sumuhpig.

47Aynewa pahavwi gaytakis neras ku pariye aygnenevwi gikak Kiyavwiye Jesus ig kehe giwana. Ig huwivwihe pahavwi ibukti gidahan ner muwvegviyene gikivarakis. Ig ihuke gitaybi.

48Ig Kiyavwiye Jesus hiyapni hene, ig awna gitkis neras hiyeg. Giwn:

— Mmahkay yis ayta akak madikte yiwana akak madikte yasuga? Mmahkay yis ayta nukamaxwitni ayamaw ke wotbe nah amepyebe?

49Takunipti nah ayge yikak yikannuhten ariku Uhokri Givin. Heneme yis ka kiboka kamaxun ayge. Ka sam. Amawka ku ini danuh nutuh ku samah Uhokri gannasan kinetihwa numinuh.

50Igkis gikannuhnivwi timapni hene, igkis madikte tivikbet giw. Igkis ikiswig pahapo. Ayteke nikwe ig Kiyavwiye Jesus tivik gikakkis ignes hiyeg.

51Pahavwi awayg takweye makekwevi gihavu Kiyavwiye Jesus. Ig he kanuktewvi akak gidagmanvit. Ku samah ig waywempiye gihavu atere, ignes hiyeg wageswe givitit adahan gikamaxwitni.

52Ig hiyapni hene, ig he pitukminew ariw gidagmanvit. Ig bisike makawihan.

Jesus ay givetun muwvegviyene gikivarakis

Mt 26.57; Lk 22.66; Jo 18.12

53Ayteke ariwnteke ini ignes hiyeg waxwe Kiyavwiye Jesus ta givinekut ner muwvegviyene gikivarakis. Ayge madikte muwveg kiyatyevwi gikakkis neras kannuhekevutnevwi amin amekene Moís gikumadukan gikakkis neras judeyenevwi giwewkistenkis igkis kuwis pahadguvu ayge.

54Ig Pedru hiyapni hene, ig makeke gihavu butte heneme ig piyawakte giw aynesa. Ig wadite ta arimkanit muwvegviyene gikivarakis givinbuk. Ig pareke atere, ig batahkiswe payak gikakkis neras avuriwnevwi Uhokri Givin. Ig awahpusewne ayge ahumwa tiket.

55Avimwata ini neras muwveg kiyatyevwi igkis pahadguvu gikakkis madikte judeyenevwi gikivarakis ku samah igkis kehnes givahdukawnikis. Igkis aharitnes ba igkis uti Kiyavwiye Jesus gikehni mbaynema ku pariye ik adahan keh igkis umahkiswig. Inneki keh igkis aharitnes ba igkis uti hiyeg ku pariye gikamyehpitnivwi. Amawka igkis uti gikamyehpitnivwi ku pariye giwnkis tuguh hehpekuye. Heneme igkis ka uti.

56Hiyawa ka aynsima hiyeg kamiyevgi akak gikehbetankisnen heneme giwnkis ka tuguh hehpekuyema.

57Ayteke gaytakis neras hiyeg kannikaw akiw adahan igkis kamihevgi atere akak gikehbetankisnen. Igkis awna:

58— Usuh timap ner awayg awna: “Nah mehbetenek inin leglis Uhokri Givin ku pariye hiyeg amadgaya inin gikehnikis. Ayteke adahan mpana hawkri nah kannikasa nawenyewa akiw ku pariye ka hiyegma amadgaya inin gikehnikisma.”

59He inakni ginetnikis ka tuguh hehpekuyema.

60Igme muwvegviyene gikivarakis ig timapni hene, ig kannikaw ayge gibetkis madikte hiyeg. Ig awna git Kiyavwiye Jesus:

— Mmahki pis ka kaytwa giwnkis? Mmah henewatma ku samah igkis awna pimin?

61Igme Kiyavwiye Jesus tinwo, ig ka kaytwa giwn. Igme muwvegviyene gikivarakis ig ayavgi:

— Mmah pisnewa Cristo. Mmah pisnewa Uhokri gikanyan adahan ukumaduketni? Mmah pisnewa Kiyavwiye Uhokri gikamkayh?

62Igme kaytwa giwn:

— Nahnewa. Kuri yis batebdedbi adahan yis hiyekne nukakuh. Heneme aysawnemenek yis hiyavunek, nah ku pariye wageswe awayg amadgaya inin, yis hiyavun nah bat ayge gihumwa Uhokri detye ay amun ini iwetrit ku pariye kane nikiytanisima kihehaptak. Yis hiyavunek nah muhuk abetimpi ukuhne inuriktak. Avim ini nahme hiyekne yikak nikwe.

63Ig muwvegviyene gikivarakis timapni hene, ig sigke gisimsa adahan areketni gidagoni avatra ku samah ig Kiyavwiye Jesus awna gitkis inakni iwit. Ig awna:

— Pariyeki umawkanwiy akiw? Wixwiy ka muwaka hiyeg akki wotwiy ariknawnema Jesus gitaraksan akiw.

64Kuwis ig makukse Kiyavwiye Uhokri ay wowtrikwiy. Yis kuwis timapni akakwa yitaybi. Uyay katiwnise ini gitaraksan git. Mmani yit?

Igkisme kaytwa giwn:

— Pugamawka ig umehpika.

Hiyeg biwh Jesus

Mt 26.67; Lk 22.56-62

65Ayge nikwe gaytakis neras hiyeg tuvestevgi. Gaytakisme wanakotevgi igkis biwhbokevgi. Igkis awna git:

— Ku pis Uhokri gawneve, asa akki wot ku pariye pibiwhatepten.

Ayteke neras avuriwnevwi Uhokri Givin igkis iwevgi igkis biptevgi.

Pedru wihwa giw Jesus

Mt 26.69; Lk 22.55; Jo 18.15

66Avimwata ini ig Pedru bat ayge paytbuhku. Ayteke pahavu tino ku pariye ibukti gidahan ner muwvegviyene gikivarakis eg danuh atere git.

67Eg hiyap Pedru ayge ig awahpusewne aranwa tiket. Eg sarayh guvegyi ta gimkat, eg marotpi git. Ayteke eg awna git:

— Pis hawata wew gikak Jesus Nazaréyene.

68Igme wihwe giw. Ig awna gut:

— Nah ka hiyakwa inakni iwit ku kamin pis awna. Nah ka pukuhawa inakni piwn.

Ayteke ig pese ta anumekut pesket. Nikwenewa pahavwi takarak awna.

69Ayge eg tino bukitwiyo hiyavgi akiw. Eg hiyapni hene, eg awna ta gitkis hiyeg ku pariye ay kennesa guhumwa. Guwn:

— Nernewa awayg pahavwi gaytakis Jesus gikannuhnivwi.

70Heneme igme wihwe giw akiw. Ayteke ariwnteke ini ayiptenesa akiw neras hiyeg ku pariye ayge kennesa gihumwa awna ta git. Giwnkis:

— Henewa. Pisnewa gaytakis Jesus gikannuhnivwi mmanawa pis hiyeg galileyene hawata ke igkisbe.

71Ig timapni hene, ig awna akak madikte gawaygi. Giwn:

— Ku nah ka awna inyewatma iwit, hiyawa Kiyavwiye Uhokri hiyapkis mbeyne nutuh. Nah kawa hiyakgiwa ner awayg ku kamin yis awna.

72Nikwenewa pahavwi takarak awna aveynevye akiw. Igme Pedru timapni hene, ig kiye inakni ku pariye Kiyavwiye Jesus giwn kuhwekwa ta git amin: “Avit takarak awna pimavut gawnan pisme ayipa wihwe nuwhunek mpamavut.” Ig kiye inakni giwn nikwe, ig biyuk gikan. Ig tihene ayge mpinevevye.

Currently Selected:

Markus 14: pluPB

Highlight

Copy