Markus 13
13
Uhokri givin mehpikanek
Mt 24.1; Lk 21.5,20
1Pisenwa inakni gawnan, ig Kiyavwiye Jesus tivikwiye adahan giveswen ayteke arikutak Uhokri Givin. Ig pesante, pahavwi gikannuhni awna git:
— Kiyavwiye, ivegnamu in Uhokri Givin barewyewa paytwempu. Ivegnamu ini paytwempu ayaranwa kehka akak nopsadmin tip, barewyovwinen tip.
2Igme awna git:
— Mmah pis hiyap ini paytwempu? Aysawnemenek pis hiyapni madikte mehpikanek. In higohe madikte waygboritenek. Ine pohow tip ka misakwanek pavitmintak akak guyaki tip akiw.
Ka aynsima mbayka nehmnikuhpiye
Mt 24.3; Lk 21.7; 2Tim 4.1; 2Tim 3.1; Ap 6.1
3Ayteke ig tivik, ig danuh atere avitit waxri imuhgivitnene kewye Olivegvit. Ayge ig batahkiswe asebha, ig pitatki ariw Uhokri Givin. Igme Pedru gikakkis Tiyagumni, Joawh, Andre, igkis danuh atere git igkiswonakis. Igkis ayavgi:
4— Kiyavwiye, kabetvahki inakni piwn kahayaknek? Pariye danuh adahan areketni ku madikte inakni pinetni kennesa adawnhanek?
5Igme Kiyavwiye Jesus kaytwa giwnkis akak kiyabawkad iwit. Ig awna:
— Ka yi muwaka kinikiswa ta gitkis hiyeg.
6Mmanawa aysawnemenek ka aynsima hiyeg kahayaknek nuwavrik ke wotbe ignes ayta nuwntakbe. Igkis awnanek: “Nahnewa Cristo, nah Uhokri gikanyan adahan yikumaduketni.” Avim ini igkis kinisnes hiyeg ka aynsimanek.
7Ayge avim ini yis timap kutimniki kennesa yis timap arak kutimniki piyawakad, heneme ka yi muwaka avis. Amawka ku ini kutimniki danuh heneme kote danuhte amaksemni hawkri.
8Mmanawa aysawnemenek pahabunene hiyegviyenevwi kerbetpikisnek gikakkis nawenyewa hiyegviyenevwi akiw. Guvelma kerbetpikis igkisweke guvelma. Avim ini hawkri ka aynsima sagkaki muwapuw waxribdiw. Hawata ka aynsima mihetniki danuh muwapunek. Heneme ininewa akavuska mbeyne. In ke pahavu tinobe ku aysaw eg kavusa kayah gukamkayh adahan eg pamakutekwiyo. In he akavuskanen.
Aysawnemenek Jesus gihiyegavu hiyapkiska mbeyne gitkisnek
Mt 10.19, 24.9; Lk 21.12; 2Tim 3.1
9— Misakwanabay ahegbet avit ku pariye danuh ta yitnek avim ini hawkri. Mmanawa avim ini yis kamaxwikanek, yis waxwepka ta givetunatkis hiyeg giwewkistenkisnek. Hawata yis biptepkanek ariku leglis. Avim ini yis kamiyepkanek ta gitkis hiyaptigi, ta gitkis yikivaravu. Yis waxwepka ta givetunatkis avatra ku samah yis nuhiyegavu. Ka sam. Ini humaw yihawkanavrik adahan yis kinetihwene nudahan giwtrikkis.
10Amawka ini kibeyne inetit amin Uhokri gikumadukan amawka in ekkepka givuriwkis madikte hiyegviyenevwi ay amadga inin.
Uhokri Gitip iki yit iwit adahan yis awna
Mt 10.19; Lk 12.11, 21.13
11— Avim ini ku aysaw yis kamaxwika, ku aysaw yis kamiyepka ta gitkis hiyaptigi, ka yi muwaka ivegmina yihiyekemni adahan ku pariye yis awna gitkis avim ini hawkri. Heneme awnanay ku pariye iwit ikaka yit avim ini. Ayge nikwe ka yisnema awnene heneme Uhokri Gitip ignewa awnene ay yivititak.
Aysawnemenek ignesweke pakebyekne kamaykisekbet
Lk 21.16
12— Avim ini hawkri ignesweke pakebyekne kamaykisekbetnek adahan miyaka. Ignesme igti kamaykis gikamkayhkis. Ignesme ikamkayit hawata kavetunsa gigkis gukakkis ginagkis. Igkis kamaykiswigkis adahan miyaka.
13Ayge madikte hiyeg amiyhevyinek awaku ku samah yis nuhiyegavu. Ka sam. Ku yis ka isahkiswa nuwhu he amaksemni hawkri, yis isahptawnek.
Avit amaksemni hawkri danuh, ka aynsima mbeynenek
Mt 24.15; Lk 21.20; 2Tes 2.3; Ap 6.1, 13.14
14— Aysawnemenek hiyeg amedgenevwi inin igkis hiyanek pahavwi aseneweknevye umehekevutne, ig tabirnek ay ku kiney kane kis adahan ig misakwa. Yis ku pariye ivegbohevye inakni iwit, ku aysaw in kahayaknek metakwa yis pukuhpinek. Ku aysaw hiyeg hiyap in danuh amawka ignes tivik kibehtenwa. Amawka ku pariye misekwenevwi ay Judeyamnaw amawka igkis bisike ta ahavwikute avuheku ini waxribdi.
15Ku pahavwi ay givin higiwmadga, ig ka muwaka diyuh ta givinekut adahan iweviye gewkanbet adahan ig bisikwiye.
16Ku pahavwi aynte amadga giwasra, ig kawnata muwaka diyuh ta givinwat adahan iweviye gikawihni adahan ig bisikwiye.
17Akayih. Ka aynsima mahikoriki avim ini hawkri gudahankis tinogben ku pariye biwhkisnovwi, gudahankis tinogben ku pariye sukkisanyovwi. Ka aynsima mahiko adahan egnes bisiknek.
18Piriyepkawnay adahan in ka danuh yit abetma kamukrima ine abetma samdi.
19Mmanawa avim ini hawkri yis hiyap mbeyne ka aynsimanek. Ku samah akavuska hawkri yumahte mbeyne kema inima. Ariwntak ini akiw, yuma mbeyne akiw kema inima. 20Wake Uhokri ka matkuh ini hawkribe, yumakam pahavwinema bisikne ariw miyaka. Heneme kibeyne, ig matkuhe ini hawkri gidahankis gihiyegavu gikanyanvu.
Kiniseknevutnevwi keh annut ke wotbe ignes Cristobe
Ezz 7.11,22, 8.7; Mt 7.21, 24.5,23; 2Tes 2.3; Ap 13.1
21— Avim ini gaytakis hiyeg awnanek: “Kuwis Cristo ay kuwis.” Gaytakisme awnanek: “Ig ayntehan nawenyewa paytwempu.” Ku pahavwi awna yit inakni hene, ka yi muwaka iha inakni giwn.
22Mmanawa avim ini kinisekevutnevwi kahayaknek. Gaytakis awna: “Nahnewa Cristo.” Bawa waditnevyenen. Gaytakisme ikawnamah ke wotbe ignes Uhokri gawnevevube bawa igkis ka giwntakma Uhokri. Igkis keh ka aynsima annut ku pariye keh hiyeg wakaymni ke wotbe in areketnibe Uhokri gidatni. Akak ini annut igkis hiyap ba igkis hiya gikinsakkis Uhokri gikanyanvu.
23Kuri nah kuwis akkamnih yit madikte ku pariye nehmnikuhpiye. Ka ba yi kinikiswa ta gitkis hiyeg.
Jesus gidawnhan atan
Mt 24.29; Lk 21.25; 1Tes 1.7; 2Ped 3.10; Ap 1.7, 19.11
24— Avim ini hawkri ariwnteke ini mbeye hawkri, kamuw misanpinek, kayg ka kabutni akiwnek, 25warukma akak waravyu tuguhenek inuriktak. Madikte arikune hawkri, avim ini in ayguhwebdinek ariw niwetri.
26Ayteke nikwe hiyeg hiyavun nah ku pariye wageswe awayg amadgaya inin. Nah ayta abetimpi ukuhne akak madikte nudatni akak madikte nukiytani kabutennene.
27 Nah awahkisnek nuhiyegavu ahj ayta pahadguhpiye Uhokri gikanyanvu muwapuw amadgatak hawkri. Igkis pahadguhpigkisnek ariwntak wahamatak, ariwntak tiwriktak, ariwntak mekaptak, ariwntak uvitkiyavriktak, he danuhe amaksemni waxri.
Yuwit patuwesbunka amin “figeyra” akat
Mt 24.32; Lk 21.29
28— Ivegnay ta gumkat nor ah akat “figeyra”. Kannuhwanay gut. Ku aysaw gutawna imihwa akiw, ku aysaw eg kavanhaw akiw, wis hiyak ku guhawkanavrik kennesa danuh nikwe adahan eg kew.
29Hawata aysawnemenek ku aysaw yis hiyap ini mbeyne danuh, metakwa yis hiyakni kuri ku nuhawkanavrik kennesa danuh kuwis. Nah kennesawa nudawnhan ke wotbe nah kuwis anumeku pareketbe.
30Hiyeg ku pariye amedgenevwi inin avim ini hawkri, avit ignes madikte miyarap, ayipa inakni madikte danuh gitkisnek ku samah nuwnuh. Ihanabay inakni nuwnuh. Henewatbaki in.
31En biyuke, waxri biyuke, heneme nuwnuh ka biyuk.
Yuma hiyeg ahiyekten ku kavim Jesus danuh atan akiw
Mt 24.36; Lk 12.37, 17.26; At 1.6; 1Tes 5.2; 2Ped 3.3
32— Heneme nah danuh pahaye adahan. Yuma hiyeg ahiyekten ku kavim nah danuh. Ine ahj inurikyenevwi ka hiyak. Ine nahwa Uhokri gikamkayh nah kawnata hiyak. Ignewa Wigwiy hiyak.
33Misakwanabay ahegbet navituh takunipti. Pukuhpawnabay. Mmanawa yis ka hiyaknima ku kabet nuhawkanavrik danuh.
34Nudawnhan kewa pahavwi awayg gidawnhanbe. Ig awayg tivik danuhpene avawyewa ariw giwaxig. Avit gitepkemni ig avuriwkise givin gitkis gihiyegavu. Ig ike gannivwikis ta giwakuritkis. Ig awna ta git ner pahavwi ku pariye avuriwne lapot. Giwn: “Misakwanaba ahegbet takunipti.”
35Misakwanabay ahegbet takunipti nikwe. Mmanawa yis ka hiyaknima ku kabet nah yikivara danuh. Yis ka hiyak ba aygetema, yis ka hiyak ba pabuskak mitipkama, yis ka hiyak ba kabeywekema.
36Pukuhpawnabay nawenetke nah danuh atan akiw nah utevyi ke wotbe yis himeknebe yis ka ahegbetnema.
37Ku pariye nah awna yit, nah awna ta gitkis madikte hiyeg. Nah awna: “Misakwanabay ahegbet avanenekwa.”
Henewatbaki ig Kiyavwiye Jesus awna.
Currently Selected:
Markus 13: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
