Markus 12

Yuwit patuwesbunka amin akavriwten was kane kibeynevwima

Mt 21.33; Lk 20.9

1Ayteke ig Kiyavwiye Jesus awna pahat iwit patuwesbunka ta gitkis. Ig awna:

— Minikwak pahavwi awayg mutuhe giwasra. Giwasra “uva”vunen. Ayteke ig kiyaraniwhe ini giwasra. Ayteke ig atikeku pohow tip nopsadnano adahan kumuktet adahan wiwhne uva araku. Ayteke ig keh avuriwket imuwad. Pisenwa nikwe ig ibekhe giwasra pabakak gikakkis hiyeg ku pariye giwasra akavriwten. Pisenwa ig tivik ta avitit nawenyewa waxri akiw.

2Ku aysaw danuh avatyavrik amutri, ig awahkise pahavwi gihiyega ta giminkis neras akavriwten was adahan igme iweviye abusku gamutra guw amadgatak giwasra adahan ewkwiye ta git.

3Igkisme akavriwten was igkis kamaxe gihiyega. Igkis biptevgi. Ayteke igkis awahkiswig henen. Igme tivik, ig danuh ta git gikivara yuma ariknawnema giwaku.

4Ig was akivara hiyapni hene, ig awahkis pahavwiwa gihiyega atere akiw. Igme danuh atere, igkisme akavriwten was huwivwihe gitew. Igkis mahivwihpig. Pisenwa igkis awahkiswig tivik.

5Ayteke igme gikivara awahkis pahavwiwa gihiyega akiw atere giminkis. Igme danuh atere, igkisme umehpig. Ka aynsima nawenyevwi gihiyegavu awahkiska giminkis. Igkis akavriwten was bipte gaytakis, gaytakisme igkis umahave.

6Pahavwi misekwe adahan ig was akivara awahkiswiye atere giminkis, igi gikamkayh gibetki. Ig hiyapni hene, ig awna: “Nawenetke ner nukamkayh igkis kiyatha.” Nikwe ig awahkiswig atere giminkis.

7Henneme ig gikamkayh danuh atere, neras akavriwten was amiyhevgi. Igkis kinetihwa pawtak, igkis awna: “Nernewa was akivara gikamkayh. Uyay umehpig mpinekata kuwewanek inin was misekwe madikte gidahan. Pi kabayte wixwiy umehpig adahan inin was misekwe udahanwiy.”

8Ayteke nikwe igkis kamaxwig igkis umehpig igkis padekwig ayteke amadgatak giwasra.

9Pisenwa gawnan inakni iwit patuwesbunka, ig Kiyavwiye Jesus awna gitkis:

— Kuri uyay akki nutuh. Pariye yivewkan ig was akivara keh gikakkis neras akavriwten giwasra? Nah akkite yit. Ig ayta pisenwa gikakkisnek. Pisenwa ig ibekhe giwasra pabakak gikakkis nawenevwiwa hiyeg akiw.

10Mmah yis kote ivegbohate Uhokri gannasan ku samah in kinetihwa amin inakniwata hiyakemniki? In awna:

“Hiyeg kehne payt tiptiye, igkis tukuhe pohow tip. Givewkankiskam ku egu tip ka kawihkam. Bawa egu tip pi awaygtenano ariw madikte. Eg humaw adahan payt akoksa. 11Igwa Kiyavwiye Uhokri ikaksig hene. In kabayntiwa wotwiy eg humaw hene.”

Henewatbaki in Uhokri gannasan awna.

12 Neras judeyenevwi giwewkistenkis timapni inakni iwit patuwesbunka hene, igkis pukuhe ku ig awna inakni iwit giminkis ku samah igkis tukuhptevgi. Ayge nikwe igkis mpiksaw giharit adahan gikamaxwitni. Heneme igkis avisemun gibohrikis neras hiyeg kabubuknene ayge awaku ignes hiyeg kiyatha Kiyavwiye Jesus.

Ikinay git Uhokri madikte ku pariye kawih gidahan

Mt 22.15; Lk 20.20; Ro 12.1

13Ayteke ariwnteke ini igkis farizewkis kiyatyevwi awahkise gaytakis farizewkis payak gikakkis Erodis gihiyegavu adahan igkis hiyap ba igkis keh Kiyavwiye Jesus awna iwit taraksebetnema adahan igkis gimetkepten.

14Igkisme danuh atere, igkis awna git:

— Kiyavwiye, usuh hiyakpi ku pis waditye hiyeg. Pis ka awna mpusema iwit gidahankis hiyeg. Pis awna pahatwowa iwit ta gitkis madikte hiyeg. Hiyawa hiyeg gihiyekemnikis nawenyewa ariw pidahan, heneme in ka sam ta pit. Pis awna pahatwowa iwit. Pis akki Kiyavwiye Uhokriyewa gihiyekemni gitkis. Kiyavwiye, usuh muwaka hiyak pahat hiyakemniki. Ig kiyavwiye Sezar neras romayenevwi gikivarakis ig mpiksaptih wixwiy judeyenevwi adahan wixwiy katiwnihgi.

15Ba wadit adahan wixwiy katiwnihgi? Ba ka wadit? Ba amawka ku wixwiy katiwnihgi? Ba kawk, ba wixwiy ka muwaka?

Igme Kiyavwiye Jesus kuwis hiyakni ku gihiyekemnikis pivutnambet igkis awna inakni adahan gikinsepten. Ig hiyapni hene, ig kaytwa giwnkis:

— Mmahki yis ayta nuhikekten hene? Ewknay nutuh pahamku karukri adahan nah hiyavgu.

16Igkisme timapni hene, igkis iwe pahamku karukri igkis ewkwig ta git. Ayteke nikwe ig ayavgikis:

— Pariyeva kahehpakye gumadga nor karukri? Pariyeva kiwye ay gumadga?

Igkisme kaytwa giwn:

— Inin kiyavwiye Sezar giw. Inin ahehpakti kiyavwiye Sezar gahehpak.

17Igme kaytwa giwnkis:

— Nikwe nor karukri kawih gidahan kiyavwiye Sezar. Hiyawa wixwiy ikevgu git. Heneme amawka ku wixwiy iki ta git Uhokri madikte ku pariye kawih gidahan Uhokri.

Igkis timapni inakni giwn hene, igkis wakaymnibdi ka aynsima.

Wixwiy kannikaw ariw umiremniwiynek

Mt 22.23; Lk 20.27; Jo 5.21, 6.39; Ro 8.10; 1Ko 6.14, 15.12; 1Tes 4.16; Ap 20.4

18Ayteke ariwnteke ini nawenyevwi hiyeg danuh atere git Kiyavwiye Jesus akiw. Igkis sadusewkis. Gitkis sadusewkis hiyeg miyap ignes pisenwe gihawkankis ignes ka kannikaw akiw. Igkis sadusewkis danuh atere, igkis awna git:

19— Kiyavwiye, amekene Moís tamakkis gikumadukan amadga kagta udahanwiy. Inakni gikumadukan awna:

“Ku pahavwi hiyeg miyap guw gihayo, ku ig yuma gikamkayh gukak egu gihayo, amawka gikebyi maripkew gukak egu giwgun marihwa eg kakamkayh hawata ke wotbe ignebe gikebyibe kakamkayh gukakbe.”

Henewatbaki ig amekene Moís gikumadukan awna.

20Kuri, minikwak ntewnehker gikebikis. Ig eggutye maripkew gukak pahavu tino. Ayteke ig miyap kawke ig kakamkayh gukak.

21Ayteke nikwe ig gisamwi givun maripkew gukak egu giwgun. Ig hawata ig miyap guw. Ig kawnata kakamkayh gukak. Ayteke nikwe ig gisamwikis gimamnamkis ig hawata ig maripkew gukakwata akiw.

22Hene madikte neras ntewnehkernene gikebikis miyarapwata. Igkis yuma pahavwinema kakamkayh gukak. Pisenwa egme hawata eg miyop.

23 Kuri Kiyavwiye, usuh ayapi. Aysawnemenek avim ini ku aysaw hiyeg kannikaw ariw gimiremnikis, pariyevahki gibetitakis neras ntewnehkernene gikebikis darihgu? Mmanawa igkis ntewnehkernene gikebikis maripkewnekuye gukak.

24Igme Kiyavwiye Jesus kaytwa giwnkis:

— Mmahkay yis tarakse? Yis tarakse mmanawa yis ka pukuha Uhokri gannasan ine yis kawnata hiyak ku samah Uhokri gidatni.

25Aysawnemenek avim ini ku aysaw hiyeg kannikawbet ariw gimiremnikis, ayge ignes ka maripkaw akiw. Igkis misakwa henep ke ahjbe.

26 Kuri uyay kinetihwa amin wixwiy hiyap ba hiyeg kannikaw ariw gimiremnikis. Mmah yis kote ivegbohate amadgatak amekene Moís gikagtan, ay abet inakni iwit adahan tiket avuwivi ewakti ku samah Uhokri awna ta git? Ig awna:

“Nahnewa kuri Abraawh giwohkiga, nahnewa kuri Izaki giwohkiga, nahnewa kuri Jakó giwohkiga.”

27Inakni iwit akki wot huwewe ku igkis gidukweneswa igkis iveg. Ig Uhokri kawki miyaravyema giwohkigakisma. Ig hiyeg ivegnene giwohkigakis. Yis tarakse ka aynsima ku samah yis awna ku hiyeg miyap ignes pisenwa gihawkankis.

Uhokri gikumadukan adahan wis batek gikak Uhokri mpinevevye in pi kabayte ariw madikte kumadukaki

Mt 10.37, 22.34; Lk 10.25; Jo 21.24; 1Jo 2.15, 5.3; Ap 2.4

28Ayteke ariwnteke ini pahavwi kannuhekevutne amin amekene Moís gikumadukan danuh atere, ig timepne ginetnikis ayge. Ig timapni hene ku samah Kiyavwiye Jesus kaytwa giwnkis kabayntiwa, ig ayavgi:

— Kiyavwiye, pariyeva Uhokri gikumadukan pi kabayte ariw madikte kumadukaki?

29Igme Kiyavwiye Jesus kaytwa giwn:

— Nah akkite pit ku pariye pi kabayte ariw madikte kumadukaki:

“Ataybiswanabay numkanit, yis izhaewyenevwi. Ukivarawiy Kiyavwiye Uhokri ig pahavwiwa ukivarawiy.

30Uyay batek gikak Kiyavwiye Uhokri avititak madikte yiyakni. Bateknay gikak akak madikte yibetki. Bateknay gikak abet madikte yihiyekemni. Bateknay gikak akak madikte yidatni.”

31Ayteke ariwnteknewa inakni iwit ay pahat gikumadukan akiw ku pariye pi kiyate pi kabayte ariw madikte kumadukaki:

“Batek gikakkis piyakivwi hiyeg hawata ku samah pis batek akak pivit.”

Yuma nawenyewa gikumadukan pi kiyate pi kabayte ariw inakni pitenemnene gikumadukan.

32Ner kannuhekevutne timapni hene, ig awna git:

— Henewa, Kiyavwiye. Pis awna wadit ku ig Kiyavwiye Uhokri ig pahavwiwa ukivarawiy. Ignewa Kiyavwiye Uhokri. Yuma pahavwinema kema igma.

33Amawka wixwiy batek gikak akak madikte uyakniwiy. Amawka wixwiy batek gikak abet madikte uhiyekemniwiy. Amawka wixwiy batek gikak akak madikte udatniwiy. Hawata amawka wixwiy batek gikakkis uyakivwiy hiyeg hawata ku samah wixwiy batek akak uvitwiy. Pi kabayte wixwiy ihpa inakni gikumadukan ariw wixwiy kakanhaw akak puwikne ta git Kiyavwiye Uhokri. Ku wis ihpin, in pi kabayte git ariw madikte kakanhawka.

34Ig Kiyavwiye Jesus hiyapni hene ku samah ig kaytwa giwn akak gihiyekemni, ig awna git:

— Pis kennesa arit Uhokri gikumadukan.

Ariwnteke ini yuma pahavwinema kibokaye ayavgi akiw.

Cristo ignewa amekene Davi gikivara

Mt 22.41; Lk 20.41

35Ayteke ku samah ig Kiyavwiye Jesus kannuhekne ayge ariku Uhokri Givin, ig aya hiyeg ayge:

— Mmahki neras kannuhekevutnevwi amin amekene Moís gikumadukan kanumgi Uhokri gikanyan adahan ukumaduketni, Cristo, mmahki igkis kanumgi “amekene Davi gihiwhi”? Mmahki igkis ka kanumgi “amekene Davi gikivara”?

36Igwa amekene Davi kanumgi “nukivara”. Inakni iwit ikepka git gavit Uhokri Gitip minikwak. Giwn:

“Ukivarawiy Kiyavwiye Uhokri awna ta git nukivara Cristo. Giwn: ‘Batnaba ay nuhumwa kihehaptak amun inin iwetrit kiyatye ku samah nah sibuhkisnete pivetunyavu pit.’”

37Ka ba yis hiyap igwa amekene Davi ka kanum Cristo “nuhiwhi”? Kawa. Ig kanumgi “nukivara”. Ig Cristo ig ka he gihiwhinenwatma. Ig hawata ig gikivara.

Neras hiyeg kabubuknene ayge igkis timapni hene, igkis bateke akak inakni giwn.

Farizewkis ikaw kibeyne he kiniseknenen

Mt 23.1; Lk 11.46

38Ayteke ariwnteke ini ku aysaw ig Kiyavwiye Jesus kannuhekne, ig awna gitkis:

— Pukuhpawnabay adahan yis ka iwi gihiyekemnikis neras kannuhekevutnevwi amin amekene Moís gikumadukan. Igkis ba gibetkatunkis wewnamahkis ariku gibereswetnikis. Igkis batek hiyeg aytnihgikis higiwmadga akak kiyathaki.

39Igkis batek bat amadga epti pi kiyatenene ariku leglis. Igkis batek bat amadga epti kiyatyo abet fet.

40Bawa igkis wiwhpiyes madankunovwi guvinkis guwkis payak akak gewkanbetkis akak kiniska, heneme igkis piriyepkaw kiyabawkad marihwa hiyeg ikiygikis ku igkis kibeynevwi hiyeg. Aysawnemenek igkis katiwnivwenek avatra ini gihiyekemnikis. Avim ini igkis pi hiyapte mbeyne ariw nawenyevwi hiyeg taraksavye.

Madankuno gukan pi kahayakte givetunat Uhokri

Lk 21.1

41Ayteke ig Kiyavwiye Jesus bat kennesa ahumwa karukri atiy ayge ariku ini leglis kewye Uhokri Givin. Ayge ig avuriwne hiyeg kakanhewnevwi gidahan Kiyavwiye Uhokri. Ka aynsima hiyeg igisavye mpiya awvre, igkis ikenes ka aynsima karukri ta arikut atiy.

42Egme pahavu madankuno madiptivyo danuh atere, eg ikano mmukna kirehka ta arikut nor karukri atiy, aynesa karukri.

43Ig Kiyavwiye Jesus hiyapni hene, ig pahadguh gikannuhnivwi ta gimkat. Ig awna ta gitkis:

— Nor madankano madiptivyo gukan pi kahayakte ta givetunat Uhokri ariw gikankis madikte neras hiyeg. Ihanabay inakni nuwnuh. Henewatbaki in.

44Mmanawa igkis kakanhaw akak gikakurakis asemne. Egme kakanhaw akak madikte gudahan gukakura. Yuma ariknawnema eg darih adahan isimno ku pariye gumawkanitnene.

Currently Selected:

Markus 12: pluPB

Highlight

Copy