Markus 11
11
Jesus parak ta avitit Jerusalém
Mt 21.1; Lk 19.28; Jo 12.12
1Ayteke igkis tivikwiye akiw. Igkis kennesmin gidawnhankis arimkanit paytwempu Jerusalém, igkis danuh ta avitit pisaya paytwempu ku pariye nopsanyuvwinen kewye Betfaje akak Betaniya ayge avit ini waxri imuhgivitnene kewye Olivegvit. Ayge ig Kiyavwiye Jesus awahkiswiye piyana gikebikis giwatnivwi adahan igkis ta sunepnes gidahan kaway.
2Ig awna gitkis:
— Ataknay avitit inetra paytwempu nopsesa pahabakaytak. Parakantenwa yis hiyap pahavwi kawayan “jumento”. Ayge ig wanak. Hiyeg kote batte giduhyamadgat. Wataknig waxwanig atan nutuh.
3Ku hiyeg ayge awna yit: “Mmeneki yis dax?”, yisme kaytwa giwnkis: “Kiyavwiye muwakavgi. Ig ka ayivwihwa, ig diyuhkiswig atanewa akiwnek.”
4Ayteke nikwe igkis giwatnivwi tivik igkis danuh ta avitit paytwempu. Ayge igkis ute pahavwi kawayan avigku ahin. Ig wanak anumeku paha lapot. Igkis atere watekwig.
5Ignes hiyeg aygnenevwi hiyapni hene, igkis ayavgikis:
— Mmeneki yis dax yis watak ner kawayan?
6Igkisme akkamnih gitkis inakni iwit ku samah Kiyavwiye Jesus awna. Nikwe igkis isaksevgikis adahan igkis tivik.
7Ayteke igkis diyuhe waxwe ner kawayan ta gimkanit Kiyavwiye Jesus. Igkis danuh atere, igkis ambohe gidagmanvitkis ta giduhyamadgat. Pisenwa ig Kiyavwiye Jesus sarayhwe giduhyamadgat ner kawayan.
8Ka aynsima hiyeg ayge igkis hiyapni hene, igkis barewhe ahin gavit pitati. Igkis awasavrike ahin akak gidagmanvitkis. Gaytakisme ihuk ahamna ke kariktimnabe amadgatak giwasrakis. Igkis awasavrike ahin nikak.
9Ayteke ku pariye hiyeg kabubuknene gavitkig gikakkis neras buttitwiyevwi igkis kabiman:
— Kibeyne gidahan Kiyavwiye Uhokri! Kiyavwiye Uhokri gabay gikaknek ner ku pariye ayta giwavrik Kiyavwiye Uhokri.
10Kiyavwiye Uhokri gabay gikaknek. Ig ayta kumadukawiy atan hawata ku samah amekene Davi gikumadukan. Kibeyne gidahan Kiyavwiye Uhokri!
11Ayteke ig Kiyavwiye Jesus pareke avuwit paytwempu Jerusalém. Ayteke ig parak ta arikut ini leglis kewye Uhokri Givin. Ig ivegvusa madikte. Ayteke ig pese, ig tivik ta avitit paytwempu Betaniya gikakkis giwatnivwi mmanawa kuwis aygete.
Jesus huruhrusa ah akat adahan areketni ku wis akak ukehbetannenwa, wis ka hiya wisma keh Uhokri gibetki
Mt 21.18
12Hewke akiw ig Kiyavwiye Jesus pese avititak paytwempu Betaniya gikakkis gikannuhnivwi. Ig mativwe.
13Ig hiyap pahakti ah akat piyawakte aynesa. Nor ah akat kewyo “figeyra”. Nikwe ig atere iwasene guw. Ig danuh atere, ig ka uti pohownema guw. Ig uti he gavannenwa ayge mmanawa guhawkanavrik kote danuhte adahan eg kew.
14Ig hiyapni hene, ig awna ta gut nor ah akat. Giwn:
— Kuri hiyeg ka takunima ax piw akiw.
Igkisme gikannuhnivwi timap inakni giwn ayge.
Jesus pekkis piyuknevwi arikutak Uhokri Givin
Mt 21.12; Lk 19.45
15Ayteke ariwnteke ini igkis danuh ta avitit paytwempu Jerusalém. Ig Kiyavwiye Jesus pareke ta arikut ini leglis kewye Uhokri Givin. Ayge ig ute hiyeg ku pariye piyuknevwi puwikne adahan hiyeg kakanhewnes ta git Kiyavwiye Uhokri. Ig hiyapni hene, ig ivukavevgikis. Hawata ig ivukave hiyeg ku pariye isimnevwi ayge. Ig tukuhave gaxtenkis hiyeg ku pariye uniyehkevutnevwi karukri. Ig tukuhave gevwikis hiyeg ku pariye piyuknevwi tukwa.
16Ig mpithe hiyeg mpiya arikuw Uhokri Givin hiyuwe akak arikna.
17Ayteke ig kannuhekne ayge. Ig awna ta gitkis hiyeg:
— Uhokri gannasan awna:
“Inin nuvinuh in piriyepkewket adahan madikte hiyegviyenevwi amadga wayk.”
Yisme kehne Givin humaw amevwiyeket.
18Igkisme neras muwveg kiyatyevwi gikakkis neras kannuhekevutnevwi amin amekene Moís gikumadukan igkis timapni hene, igkis ivegminene gihiyekemnikis, igkis awna:
— Mmenevgi wixwiy hiya giwmepka kuri?
Igkis avisemun gibohri awaku madikte hiyeg ayge wakaymnibdi adahan gikannuhakni.
19Aygete kuwis ig Kiyavwiye Jesus tivik avititak paytwempu gikakkis gikannuhnivwi.
Ku wis kamaxwa givitit Uhokri, madikte wayapni git humaw wotnek
Mt 17.20, 21.18; Mk 11.13; Jo 14.13; Tiy 1.6; 1Jo 3.22
20Hewke akiw ig Kiyavwiye Jesus diyuhpiye ta arimkat paytwempu Jerusalém akiw gikakkis gikannuhnivwi. Ku aysaw igkis avigku ahin, igkis hiyap nor ah akat kewyo “figeyra”, eg kuwis huruhrup madikte payak akak guhanpabet.
21Igme Pedru hiyapni hene, ig kiye inakni ku pariye Kiyavwiye Jesus awna ta gut nor ah akat. Nikwe ig awna ta git:
— Kiyavwiye, iveg gumkat nor ah akat ku pariye pis awna gukak. Eg kuwis huruhrup.
22Igme Kiyavwiye Jesus kaytwa giwn:
— Kamaxwanabay givitit Uhokri.
23Ku yis awna ta arit inin waxri imuwadnene: “Waxri, pis higihwa ayteke. Su tivik ta ahakwate parahwokwa.” Ku yis aya git Uhokri akak madikte yikamaxwan, ku yis hiyak ku inyewa in yayapni git ku in humaw, nikwe madikte yayapni git humaw yitnek. Ihanabay inakni nuwnuh. Henewatbaki in humaw.
24Inneki keh nah awna yit: Ihpanay ku yis kuwis darihe ku pariye yayapni git Uhokri. Nikwe in humaw yitnek.
25Ku aysaw yis piriyepkewne, bayahmninabay ku pariye hiyeg tarakse yikak. Ku yis bayahminigkis ariw gitaraksankis yikak, nikwe Wigwiy inurikyene ig hawata bayahminay ariw yitaraksan gikak.
26Henneme ku yis ka bayahminigkis ariw gitaraksankis, nikwe Wigwiy inurikyene kawnata bayahminay ariw yitaraksan.
Kariwntak Jesus uti gikumadukan?
Mt 21.23; Lk 20.1
27Pisenwa inakni gawnan igkis danuh ta avitit paytwempu Jerusalém. Igme Kiyavwiye Jesus tivik parekwiye arikut ini leglis kewye Uhokri Givin. Ku samah ig waywe ayge, neras muwveg kiyatyevwi gikakkis judeyenevwi giwewkistenkis igkis patiptakig atere.
28Igkis ayavgi:
— Mmahki pis keh ini ku pariye pikehni ay? Kariwntak pis uti pikumadukan adahan pis keh hene?
29Igme Kiyavwiye Jesus kaytwa giwnkis:
— Nah hawata ayavyi pahat ayapka. Ku yis akkamnihni nutuh, nikwe nah hawata akkamnih yit ku kariwntak nah uti nukumadukan adahan nah keh hene.
30 Uyay akki nutuh. Kariwntak Joawh Batistamni uti gikumadukan adahan ig kaywa hiyeg? Ba giwntakwa Uhokri? Ba kawk, ba he giwntakisnenwa hiyeg amadgayavu inin?
31Igkis timapni hene, igkis kinetihwa pawtak adahan ahegbeteviyes ginetnikis. Ayge igkis awna:
32— Ku wixwiy kaytwa giwn ku ig Joawh Batistamni uti gikumadukan giwntakwa Kiyavwiye Uhokri, nikwe ig awne wotwiy: “Mmahki nikwe yis ka iha giwn?” Heneme ku wixwiy kaytwa giwn ku ig uti gikumadukan he giwntakisnen hiyeg amadgayavu inin, nikwe madikte neras hiyeg ay hahayruke ukakwiynek.
Igkis pukuhpaw gibohrikis neras hiyeg kabubuknene ayge mmanawa gitkis neras hiyeg ig Joawh Batista ignewa Uhokri gawneve.
33Ayteke nikwe igkis kaytwa giwn Kiyavwiye Jesus:
— Usuh ka hiyak ku kariwntak ig uti gikumadukan.
Ayge nikwe igme Kiyavwiye Jesus awna gitkis:
— Ku samah yis ka akki nutuh, nikwe nah kawnata akki yit ku kariwntak nah uti nukumadukan adahan nah kehne ini ku pariye nukehni ay.
Currently Selected:
Markus 11: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
