Attus 9

Sawlu wages gihiyekemni

At 22.3, 26.9

1Avim ini hawkri ig Sawlu pitimnekne gikakkis Jesus gihiyegavu. Ig awna:

— Nah pisenwate gihawkankis madehkis. Nah umahkiswigkiste.

Avim ini ka aynsima Jesus gihiyegavu aynte avit paytwempu Damasku. Ig hiyapni hene, ig atak git neras muwvegviyene gikivarakis.

2Ig danuh atere, ig aya git:

— Uya awahkis nudahan pahak kagta giminkis neras awewkistenvu judeyenevwi gileglisakis tahan avitit Damasku. Wani igkis mayuw nutuh adahan usuh kamaxe Jesusmin gihiyegavu ayge, adahan usuh waxwigkis atan avitit Jerusalém wanamnave, awaykemni payegbitak gukakkis tinogben.

Igme timapni hene, ig keh ku samah gayapni git.

3Ayteke nikwe ig Sawlu tivikwiye atere avitit ini paytwempu Damasku. Ig kennesmin gidawnhan, pahaye adahan kabutniki inuriktak uguhpig.

4Ig tuguhe waygborit. Ayge ig timap pahat ikuvimnat awna git. In awna:

— Sawlu, Sawlu. Mmahki pis hiyapkisne mbeyne nutuh?

5Igme kaytwa giwn:

— Pariyenekap, Kiyavwiye?

Giwn:

— Nah Jesus ku pariye pis hiyapkisne mbeyne nutuh.

6Kannikaw kuri. Su tivik avitite paytwempu. Ayge akkaka pitnek adahan ku pariye Kiyavwiye Uhokri gimawkan pit.

7Ig Sawlu gihaptiyevwi hiyapni hene, igkis wadisasew. Igkis barukiswe ayge. Igkis timap pahat ikuvimnat awna, heneme igkis ka hiyap pahavwinema.

8Igme Sawlu kannikew waygbotak. Ig woka giwtyak, ig ka hiyap givegi. Igkisme gihaptiyevwi hiyapni hene, igkis kamaxe giwanmin igkis itukevgi tahan avitit paytwempu Damasku.

9Igkis danuh atere, ayge adahan mpana hawkri ig ka hiyap givegi. Abetnewa ini ku samah ig motpi ig ka ax ine ig ka higap ariknawnema awaku giwakemni.

Ananiyas iwasa Sawlu

10Avimwata ini pahavwi awayg Jesus gihiyega ayge avit ini paytwempu Damasku. Giw Ananiyas. Ig ayge, pahaye adahan Kiyavwiye Jesus hiyapkiswe git. He giwtyakveynen ig hiyapkiswa git. Ig awna git:

— Ananiyas.

Igme Ananiyas kaytwa giwn:

— Nah ay, Kiyavwiye.

11Igme Kiyavwiye Jesus awna git:

— Asa ahegbetaw. Su atak avigkut ini ahin kewye “Wadit”. Ayge pis parak givinekut kiyavwiye Judas. Pis aya gak pahavwi awayg Sawlu tarsuyene git. Igme Sawlu ayge piriyepkewne.

12Ig kuwis hiyap giwtyakveynen pahavwi awayg kewye Ananiyas parak git sarayh giwak givitit kahadbe ig hiyap akiw.

13Igme Ananiyas kaytwa giwn:

— Kiyavwiye, ka aynsima hiyeg awna gimin nere awayg ku samah ig keh mbeye hawkri gikakkis pihiyegavu aynte avit Jerusalém.

14Kuri ig danuh atan Damasku akak kumadukaki giwntakis neras muwveg kiyatyevwi adahan ig kamaxne madikte hiyeg ku pariye ikewnevwi pihiyegavu.

15Igme Kiyavwiye Jesus awna git:

— Su atak gimkat. Nah kuwis kaniyvig adahan ig nuwatni adahan ig ekkene nnetni gitkis hiyeg ku pariye kane judeyenevwima, gitkis gikivarakis, hawata gitkis hiyeg ku pariye izhaewyenevwi.

16Ku avim inin nahwa akki gitnek ku samah ig hiyap mbeyne ka aynsima nudahanek.

17Ig Ananiyas timapni hene, ig tivik. Ig danuh atere givinekut Judas. Ayge ig ute Sawlu. Ig hiyapni hene, ig sarayh giwak givitit. Ig awna git:

— Nukebyi Sawlu, igwa Kiyavwiye Jesus awahkisun atan pimin. Igwata ku pariye hiyapkiswe pit avigku ahin abetnewa ku samah paytni. Ig awahkisun adahan Kiyavwiye Uhokri Gitip kawihpi ku avim inin.

18Aynewa arikna ke imbe amar mpiye giwtriktak Sawlu. Aynewa ig hiyap. Ig hiyapni hene, ig kannikew, ig kewvi unihkwat.

19Pisenwa ig ax ig hawkamnihwa akiw. Ariwnteke ini ig misekwe gimunkis Jesus gihiyegavu ayge Damasku adahan aynesa hawkri.

Sawlu kavusa akka Uhokri giwn

2Ko 11.32

20Aynewa ig awna:

— Kuri nah kinetihwate gitkis hiyeg gimin Kiyavwiye Jesus.

Ayge nikwe ig tivik lammesya ariku judeyenevwi gileglisakis. Ayge ig kinetihwene ku ig Kiyavwiye Jesus ignewa Kiyavwiye Uhokri gikamkayh.

21Madikte hiyeg ku pariye timepnevwi inakni giwn igkis wakaymnibdi. Igkis awna:

— Mmahki? Ka ba nernewatma aynte Jerusalém umehne neras ku pariye ikewnevwi Jesus gihiyegavu? Ka ba nernewatma ayta adahan ig gikamaxwitnikis adahan ig giwaxwitnikis wanamnave tahan gitkis neras muwveg kiyatyevwi?

Henewatbaki igkis awna.

22Igme Sawlu gidatni tiviknene. Ig ekkene gitkis huwewe ku Kiyavwiye Jesus igyewa Cristo, ig Uhokri gikanyan adahan ukumaduketniwiy. Igkisme neras hiyeg judeyenevwi ayge Damasku igkis ka hiya adiyesak ginetni.

Sawlu bisike ariku kat

23Ariwnteke ini kibite hawkri akiw, neras judeyenevwi pahadguhwe pawtak. Igkis awna:

— Pugamawka wixwiy pisenwa akak Sawlu gihawkan.

24Heneme ig Sawlu kinetni gakkis ku igkis kadasevgi. Hewke tiyegem mataytak igkis kadasevgi anumeku paytwempu ahina. Igkis wahapnig mpiya adahan igkis giwmepten.

25Igkisme Jesus gihiyegavu hiyapni hene, igkis bisiksevgi tiyegem. Igkis muhuksevgi anumekutak payt alapota. Igkis muhuksevgi ariku nopsad kat, aytontak inutak tahan waygborit.

Sawlu ekkene Uhokri giwn avit Jerusalém

26Ayteke nikwe ig Sawlu tivik avitit Jerusalém. Ig danuh atere, ig darihwekkerevye gikakkis Jesus gihiyegavu aygnenevwi. Igkisme ka ihpa giwn ku igwata Kiyavwiye Jesus gihiyega. Igkis avise gibohri.

27Igme Barnabe hiyapni hene, ig pareke abet gihawkan. Ig ekke Sawlu gitkis Jesus giwatnivwi. Ig awna gitkis:

— Ku samah ig Sawlu avigku ahin ig hiye Kiyavwiye Jesus. Igwa Kiyavwiye Jesus kinetihwa gikak ayge. Ayteke ig tivik avitit paytwempu Damasku. Ayge ig kinetihwene gimin Kiyavwiye Jesus akak madikte gawaygi.

28 Igkisme timapni hene, metakwa igkis amavig. Ayteke nikwe ariwnteke ini ig Sawlu misekwe gimunkis Jesus gihiyegavu ayge Jerusalém. Ig wageswa gikakkis muwapuw. Ayge ig kinetihwene gimin Kiyavwiye Jesus akak madikte gawaygi.

29Avim ini ig kinetihwa gikakkis neras judeyenevwi ku pariye awna gresiyenevwi giwnavrikkis. Igkisme aharitne giwmepten.

30Igkisme Jesus gihiyegavu timapni hene, igkis waxwe Sawlu tahan avitit paytwempu Sesareya. Ayteke igkis awahkiswig tivik avitit paytwempu Tarsu.

Jesus gihiyegavu kibihwa

31Ayteke Jesus gihiyegavu ka hiyap mbeyne akiw. Muwapuw judeyamnaw, Galileyamnaw, Samariyamnaw, igkis ka kiyimwihka akiw. Igkis tiviknenes wagahkisne gawaygikis akiw. Igkis kibihwa mmanawa igkis wew kiyathene Kiyavwiye Uhokri, igme Kiyavwiye Uhokri Gitip gawayghetnikis.

Pedru makniwa pahavwi awayg miyavuvye

32Ayteke nikwe ig Pedru wew muwapuw danuhpene gitkis Jesus gihiyegavu. Avim ini ig atere gitkis neras ku pariye misekwenevwi aynte paytwempu Lida.

33Ig danuh atere, ig patiptak gikak pahavwi awayg kewye Eneyas. Ig Eneyas miyavuvye. Ig ka kannikaw amadgatak giwetri adahan ntewnehkerbu akebi kamukri akak pahak arawna.

34Ig Pedru hiyapni hene, ig awna git:

— Kiyavwiye Eneyas, ku avim inin Jesus Cristo makniwpi. Kannikaw kuri. Minah piwetri.

Ig timapni hene, aynewa ig kannikew.

35Ayteke nikwe madikte hiyeg ayge paytwempu Lida, akak paytwempu Sarona, igkis hiyapni hene, igkis madikte wagese gihiyekemnikis gidahan Kiyavwiye Jesus.

Pedru kannikasa pahavu tino kewyo Kariku

36Avimwata ini, aynte avit paha paytwempu akiw kewye Jopi ayge pahavu tino misakwa kewyo Tabita. Inakni guw wownavrikwiy Kariku. Eg Jesus gihiyega. Eg kabayno tino. Eg avanenekwa kehno kabayka gikakkis hiyeg, eg amnihno madiptavye.

37Avimnewa ini hawkri eg ute karayt, eg miyop. Gudahawektenvu hiyapni hene, egkis akehevgu. Ayteke egkis wagahkiswig tahan arikut payt avahnap inuteknene. Ayge egkis haritase guvit.

38Ini paytwempu Jopi kennesa amun paytwempu Lida. Ayge nikwe Jesus gihiyegavu ayge Jopi igkis time gak Pedru ku ig aynte paytwempu Lida. Igkis timapni hene, igkis awahkise piyana gikebikis awaykemni gimin Pedru. Igkisme tivik, igkis danuh atere, igkis awna git:

— Ba ayta atan wotuh kibehtenwa.

39Ig Pedru hiyapni hene, ig kannikew ig tivik gihaptikis. Ig danuh atere, igkis waxwevgi arikut ini xam inuteknene. Ayge ka aynsima madankunovwi kiyaraniw gihumwa Pedru. Egkis tihanos. Egkis ekke git Pedru simis ku pariye eg kiyavuno Kariku guvodkan ku samah eg wewvaruhte.

40Igme Pedru hiyapni hene, ig hiyak ku samah ig keh. Ig pekkiswigkis. Ayteke ig paberetusaw, ig piriyepkaw. Pisenwa ig wageswa gumkat nor miyoviyo. Ig awna gut:

— Tabita. Kannikaw kuri.

Aynewa eg iveg. Eg hiyap Pedru eg kannikew.

41Ig hiyapni hene, ig sumuhe guwaku, ig kannikasig. Ayteke ig humak Jesus gihiyegavu payegbitak gukakkis egnes madankunovwi. Egkis danuh atere, ig akki gutkis ku samah eg kuwis kannikew akiw.

42Ayteke madikte hiyeg ayge Jopi time gak. Inneki keh ka aynsima hiyeg kamaxwa givitit Kiyavwiye Jesus.

43Ig Pedru hiyapni hene, ig misekwe ka aynsima hawkri ayge Jopi. Ig misekwe gimun pahavwi awayg giw Simawh ku pariye gannivwi mitibdihne puwikne amar.

Currently Selected:

Attus 9: pluPB

Highlight

Copy