Attus 8

1Igme Sawlu ig tuguhkise gihiyekemni hehpekuye gikakkis neras umehekevutnevwi.

Jesus gihiyegavu hiyap mbeyne

Avim ini han pitatit, madikte Jesus gihiyegavu ayge Jerusalém igkis hiyapkiska mbeyne gitkis ka aynsima. Ayteke nikwe igkis madikte ibekhewbet. Igkis bisike muwapuw judeyamnaw, muwapuw Samariyamnaw. Igkisme Kiyavwiye Jesus giwatnivwi igkis misekwe ayge Jerusalém.

2Avim ini hiyeg kiyathenevwi Kiyavwiye Uhokri igkis iwe amekene Estevawh givit. Igkis avuhpig. Ayge igkis tihenes giharit, ka aynsima gikadnikis.

3Igme Sawlu mpiksaw adahan ig pisenwa gihawkankis Jesus gihiyegavu. Muwapuw paytwempu ig parak givinekutkis. Ig taris awaykemni payak gukakkis tinogben. Ig padakgukis tahan arikut parakseket.

Filip ekkene Uhokri giwn ayge paytwempu Samariya

4Avimnewa ini neras ku pariye bisikavye igkis ibekhewvi muwapuw. Ku kit igkis danuh igkis ekkene Kiyavwiye Uhokri giwn.

5Igme Filip tivik tahan avitit paytwempu Samariya. Ayge ig kinetihwene gimin Cristo gitkis hiyeg.

6Ayge madikte hiyeg ataybiswa git Filip. Igkis avuriw giwn awaku igkis hiyap madikte annut ku pariye ig keh akak Kiyavwiye Uhokri gannu ay givit.

7Mmanawa ig pekkis ka aynsima wavitye givititakis hiyeg wavityewnavye. Akak kabimanka ignes pes. Hawata ig makniwe ka aynsima hiyeg miyavuvye, ig makniwe ka aynsima hiyeg dathuvye.

8Igkis hiyeg paytwempuyenevwi hiyapni hene, igkis ka aynsima batek.

Ihamwi muwaka isim Uhokri gannu

9Ayge avit ini paytwempu pahavwi awayg kewye Simawh. Ig ihamwi. Ig kuwis wakaymnise madikte hiyeg ayge Samariya akak gannu. Ig ikawvari ke wotbe ig detye hiyegbe.

10Madikte hiyeg, kiyavwiyegben gikakkis bakimnayh, igkis madikte ihpa giwn. Igkis awna:

— Kiyavwiye Uhokri gannu ay givit. Ig detyewa ig.

11Igkis ataybiswa arit giwn mmanawa ka kuyenema ig wakaymnisevgikis akak giyahmara.

12Heneme ayteke igkis ihe Filip giwn. Igme Filip ekkene inakni kibeyne inetit amin Uhokri gikumadukan. Ig kinetihwene gimin Jesus Cristo. Igkisme hiyeg timapni hene, igkis ihe inakni ginetni. Ayteke nikwe igkis kewvi, awaykemni payegbitak gukakkis tinogben.

13Avim ini igwa Simawh ihe Filip ginetni. Nikwe ig kewvi. Ayteke ig kavusa wew gikak Filip. Ig hiyap ka aynsima annut ku pariye Filip keh, kibeyne annut ku pariye hiyeg amadgaya inin ka hiya nikehka. Ig hiyapni hene, ig wakaymni ka aynsima.

14Ayteke ariwnteke ini igkis Jesus giwatnivwi aynte Jerusalém igkis time gakkis ignes hiyeg ayge avitnenevwi paytwempu Samariya ku igkis kuwis ameve Kiyavwiye Uhokri giwn. Igkis timapni hene, igkis awahkise Pedru gikak Joawh atere giminkis.

15Igme Pedru gikak Joawh igkis tivik, igkis danuh atere. Ayge igkis piriyepkew gidahankis neras hiyeg adahan Kiyavwiye Uhokri iki Gitip givititkis.

16Mmanawa ig Kiyavwiye Uhokri Gitip kote kawihgikiste. Ininewa ignes kewvi giwavrik Kiyavwiye Jesus.

17Ayteke igkis Pedru sarayh giwakkis givititkis neras hiyeg. Amun ini Kiyavwiye Uhokri kawihkis Gitip givititkis.

18Ig Simawh hiyapni hene ku Kiyavwiye Uhokri Gitip ikepka givititkis hiyeg akak ku samah Jesus giwatnivwi sarayh giwakkis givititkis, ig hiyapni hene, givewkan ig isim ini gannukis nikwe ig akka karukri gitkis Pedru.

19Ig awna gitkis:

— Uyay piyuk nutuh ini yannu kahadbe nah sarayh nuwakuh givititkis hiyeg, igme Kiyavwiye Uhokri Gitip ikepka givititkis.

20Igme Pedru kaytwa giwn:

— Kuri pis biyuke payak akak pikakura awaku pivewkan pis hiya asimka ini Kiyavwiye Uhokri gikan.

21Pis yuma pannu akebi ini awaku pihiyekemni ka wadit giwtrik Kiyavwiye Uhokri.

22Miniwvinaba ariw inin pihiyekemni mbeyevye. Piriyepkawnaba git Kiyavwiye Uhokri adahan ig bayhminap ariw inin pihiyekemni.

23Nah hiyak ku pihiyekemni kivun akak kaminwatnihka. Pis wanamin akak pivathawni.

24Igme Simawh kaytwa giwn:

— Uya piriyepkaw nudahan git Kiyavwiye Uhokri kahadbe inakni piwn ka danuh nutuh.

25Ayteke ariwnteke ini ig Pedru gikak Joawh igkis ekkenes Kiyavwiye Uhokri ginetni gitkis neras hiyeg. Igkis kinetihwenes gidahan Kiyavwiye Jesus. Pisenwa igkis diyuhe avitit Jerusalém. Abetnewa gidiyhemnikis igkis ekkenes Kiyavwiye Uhokri ginetni avit ka aynsima paytwempu ayge Samariyamnaw.

Filip akki Uhokri giwn git awayg Etiyópiyene

26Igme Filip, pahavwi ahj Uhokri giwatni danuh git. Ig awna git:

— Ahekbetawnaba. Ataknaba han tiwrikut avigkut ini ahin ayivwivye ku pariye pes aytontak Jerusalémtak, in danuh tahan avitit ini paytwempu Gaza.

27Ig Filip timapni hene, ig ahegbetew ig tivik. Ig danuh atere, ig ute pahavwi awayg avigku ini ahin. Ig awayg ariwntak Etiyópiyamnaw. Ig ka kahayohwati. Ig kiyatye hiyeg. Ig avuriwkevutne karukri gudadan kiyavuno Kandasi nor ku pariye kumadukano madikte hiyeg ayge Etiyópiyamnaw.

28Kuhwekwa ig aynte Jerusalém adahan ig kiyene Kiyavwiye Uhokri. Kurime ig gidiyhemni avitit Etiyópiyamnaw. Ig bete amadga giwewten kahos. Ayge ig ivegbohene ini kagta ku pariye Uhokri gannasan git gawneve amekene Izaíyas.

29Igme Filip, ig Kiyavwiye Uhokri Gitip awna git:

— Su patiptaka nor kahos.

30Ig timapni hene, ig sigise atere. Ig danuh atere, ig timap ner awayg ig ivegbohene ini kagta ku pariye Uhokri gannasan git amekene Izaíyas. Ig timapni hene, ig ayavgi:

— Ba pis pukuhpa inakni iwit?

31Igme kaytwa giwn:

— Nah ka hiyak ku samahpa nah pukuhpin. Nah muwaka pahavwi nukannuhun. Ba hiya pisma? Ba ayta. Wagah atan. Bat atan nuhumwat. Igme Filip ihe giwn.

32Igme ner awayg ayge ivegbohene iwit gimin Cristo amadga ini Uhokri gannasan. Inakni iwit awna:

— Ig waxwepka ke pahavwi muwtohbe adahan giwmepka. Ku samah pahavwi muwtoh tinwo amun ini ku samah hiyeg tigah gisivgi, ner hawata tinwo. Ig kawnata awna pahatnema iwit adahan ig wihwa ariw giwmepka.

33Ig arewhepka git mbeye arewhaki. Neras amedgenevwi inin igkis keh mbeye hawkri gikak. Yuma hiyeg gimabyankis hene akiw. Ka ik adahan wis kinetihwa nimin. Igkis bukihe gidehetni amadgatak inin.

34Pisenwa givegbohan inakni iwit, ig awayg ayap Filip:

— Uya akki nutuh. Kaminki ig Uhokri gawneve kinetihwene? Ba giminwa ba kawk? Batke gimin nawenyewa hiyeg akiw?

35Igme Filip kaytwa giwn:

— Inakni iwit kinetihwene gimin Kiyavwiye Jesus. Ayteke ig akkamnih git inakni Uhokri gannasan. Ayteke ig tiviknene ekkene git madikte Kiyavwiye Uhokri ginetni gidahan Kiyavwiye Jesus.

36Avim ini ku samah igkis tiviknenes avigku ini ahin, igkis danuh atere ku kiney un. Ig ner awayg hiyapni hene, ig awna git:

— Iveg. Ay un. Ba ik adahan nah kewvi ahakwat inin un?

37Igme kaytwa giwn:

— Ku pis ihpa inakni nuwnuh avititakwa piyakni hiyawa pis kewvi.

Igme ner awayg awna:

— Nah ihpa ku ig Kiyavwiye Jesus Cristo ig Kiyavwiye Uhokri gikamkayh.

38Ayteke nikwe ig misakkise giwewten. Igkis muhuke gumadgatak. Ayteke igkis piyamate tubuke ahakwat un. Ig Filip kaywevgi ayge.

39Pisenwa igkis wagehe ahakwatak un. Aynewa ig Kiyavwiye Uhokri Gitip iwe Filip. Igme ner awayg ka hiyavgi akiw. Heneme ig tivik akak batekka.

40Igme Filip danuh atere paytwempu Azotu. Ig hiyapni hene, ig tivik ekkene Kiyavwiye Uhokri giwn avuwiw madikte paytwempu he ig danuhe avitit paytwempu Sesareya.

Currently Selected:

Attus 8: pluPB

Highlight

Copy