Attus 7
7
Estevawh giwn
Jen 11; Jen 12; Jen 17
1Ayteke nikwe ner muwvegviyene gikivarakis awna git. Giwn:
— Mmah inyewa ku samah neras awna?
2Igme amekene Estevawh kaytwa giwn akak kiyabawkad iwit. Ig awna:
— Nukebyuvwi, kiyavwiyegben, ataybiswanabay numkat. Kiyavwiye Uhokri ka gikiytanisima. Minikwak ig hiyapkiswe git uhawkriwiy amekene Abraawh. Ig hiyapkiswe git avim ini avit ig misakwa avit paytwempu Arah avim ini ku samah ig ayge Mesopotâmiyamnaw.
3Ig Kiyavwiye Uhokri awna git:
— Pesnaba ayteke avititak inin waxri. Ikisnaba pikebyuvwi. Su tivik atere ku kit nah akki pit.
4Ig amekene Abraawh timapni hene, ig pese avititak inere waxri ku kiney kawdewyenevwi misakwa. Ig atere misakwa avitit paytwempu Arah. Ayge gig miyap. Ayteke ig Kiyavwiye Uhokri waxwevgi atan avitit inin waxri ku kiney wixwiy misakwa kuri avim inin.
5Ig amekene Abraawh danuh atan heneme avim ini ig Kiyavwiye Uhokri kote ikite git aytnihtema inin waxri adahan in humaw gidahanwatma. Ig ka iki git aynesnima adahan gikukapta. Heneme ig awna git:
— Aysawnemenek nah ike inin waxri piwakuritnek, giwakuritkis pihiwhivwi ku pariye nehmnikuhpiyevwi.
Ig ikaksa git hene, nikwe yumahte gikamkayh.
6Hawata akiw ig awna git:
— Avit nah iki inin waxri yiwakuwit, neras pihiwhivwi pes aytekenek. Avim ini igkis atak misakwa avit nawotunyevwi giwaxigkis. Ayge igkis humaw ibuktinek. Igkis hiyapkiska mbeyne gitkisnek adahan paxkabu madikawku madikwa (400) akebi kamukrinek.
7Avim ini nahme hiyapkisnek mbeyne gitkis neras hiyeg ku pariye kabukhewne gitkis pihiwhivwi. Ariwnteke ini ignes pihiwhivwi pesnek. Igkis danuh atan akiwnek adahan igkis kumadukasewne nutuh.
8Ayteke nikwe ig Kiyavwiye Uhokri ahegbete ginetni gikak amekene Abraawh. Ig awna git: “Kuri pis gikak pikamkayh yis hiwh yivit adahan arakak ku yis nuhiyegavu.” Ayteke nikwe ig amekene Abraawh ihe giwn. Ku aysaw gikamkayh amekene Izaki amadga wayk, pahay paka gaw, ig amekene Abraawh hiwhe givit. Ariwnteke ini igme amekene Izaki hiwhe givit gikamkayh amekene Jakó. Ariwnteke ini igme amekene Jakó hiwhe givitkis gikamkayuvwi madikawkunene gikebikis gikakkis piyananene gawnakis (12). Igkisme humaw uhawkrivwiy wixwiy hiyeg judeyenevwi.
Amekenegben tukuhe José
Jen 39.21
9— Ig amekene Jakó gikamkayuvwi egutyevwi igkis atihe gisamwikis amekene José. Ayteke nikwe igkis kamaxwig piyukwig. Igme waxwepka temkete avitit Ejitumnaw. Ayge ig humaw ibukti. Heneme Kiyavwiye Uhokri ayge gikak 10adahan ig giwiwhpitni ariw mbayka. Ig keh amekene José humaw hiyakemniye hiyeg giwtrik ner amekene Faraó ku pariye kumadukene madikte hiyeg ayge. Ig keh amekene Faraó batek gikak. Ayteke nikwe ig amekene Faraó iki Ejitumnaw giwakuwit adahan ig avuriwne gihiyegavu. Hawata ig iki givin giwakuwit.
11Ayteke ariwnteke ini ka aynsima mihetniki danuh muwapuw ayge Ejitumnaw. Hawata in danuhe aynte Kanaahmnaw ku kiney ig amekene José gikebyuvwi misakwa. Hiyeg hiyap mbeyne ka aynsima ayge. Ig amekene Jakó gikakkis gikamkayuvwi igkis ka uti gimanakis. 12Ayteke nikwe ig amekene Jakó kinetni arak ihetit ku in adukwenewa ayge Ejitumnaw. Ig timapni hene, ig awahkise gikamkayuvwi atere adahan isimwiyi gimanakis. Ini pitatye gidawnhankis atere.
13 Pisenwa igkis diyuhe givinwatkis. Ayteke igkis atak atere Ejitumnawit akiw. Aveynivye gidawnhankis atere, ig amekene José ekkew gitkis gikebyuvwi. Ayge nikwe gikebyuvwi ekkepka git amekene Faraó.
14Ayteke ig amekene José watihe gig amekene Jakó adahan ig ayta gimkat Ejitumnawit payegbitak gikakkis madikte gikebyuvwi. Igkis ka aynsima hiyeg, ntewnehker madikwa gikebikis akak pohowku gawnakis (75).
15Ig amekene Jakó timapni hene, ig atere avitit Ejitumnaw payak gikakkis gikamkayuvwi. Igkis danuh atere, igkis misakwa ayge adahan kibite kamukri. Ayge igkis kiyavwip igkis miyarap madikte. He gikamkayhkisnen misekwe.
16Igkis hiyuhe gapkis atan avitit judeyamnaw, avitit paytwempu Sikeh. Igkis avuhpin aynte ariku ini imewti ku pariye amekene Abraawh isime gitkis amekene Emor gikamkayuvwi.
17 Ayteke kibite kamukri mpiye gawkis. Gikamkayhkis judeyenevwi ayge Ejitumnaw igkis kibihwe. Igkis ka aynsima hiyeg. Ayteke nikwe ahawkanavrik danuh adahan Kiyavwiye Uhokri ikevye inin waxri giwakuritkis ku samah ig kuwis ikakse git amekene Abraawh.
18Avim ini pahavwiwa ikivarat akiw kavusa kumaduka madikte hiyeg ayge Ejitumnaw. Igwata kewye Faraó. Ig ner ka kiye amekene José. Ig ka kiyatha gihiwhivwi judeyenevwi. 19Ayteke nikwe ig kiniswigkis. Ig arewhevye gitkis. Ig padakkis gikamayhkis nukuvesniye kabaywakat kahadbe igkis miyarap kahadbe givewkan uhawkrivwiy judeyenevwi ka kibihwa akiw.
20Avim ini amekene Moís wayvuka amadga hawkri. Ig barewyewa bakimni. Ayteke nikwe ginag gikak gig egkis gikavuriwten ayamaw ay guvinwakis adahan mpana kayg.
21Ayteke egkis ayempig ay kabaywak heneme ig amekene Faraó gise utevgi. Ayge nikwe eg iwevgi aymuhpig ke wotbe ig gudahanwatbe gukamkayhbe.
22Ayteke ariwntak ini ig amekene Moís aymuhwe. Ig ayge kannuhwene madikte ejituyenevwi gihiyekemnikis. Ig aymuhwe kibeyne awayg. Ku pariye ig awna ig awna akak hiyakemniki. Ku pariye gikehni ig keh kabayntiwa.
Amekenegben tukuhe Moís
Ezz 2.11
23Ig amekene Estevawh awna akiw. Giwn:
— Ig amekene Moís ig paxnika madikwa (40) kamukri gaw kuwis, gihiyekemni tuguh adahan ig danuhpene gitkis gikebyuvwi izhaewyenevwi. Nikwe ig tivik danuhpene.
24Ig danuhpene, ig ute pahavwi ejituyene kehne mbeye hawkri gikak pahavwi Izhaewyene. Ig hiyapni hene, ig amnihe gikebyi, ig pareke abet gihawkan ig umehe ner ejituyene.
25 Ayteke ig tivik. Ig givewkan gikebyuvwi judeyenevwi hiyakkam ku samah Kiyavwiye Uhokri kawihpig adahan giwiwhpitnikis ariw mbeyne. Heneme igkis ka pukuhin.
26Hewke ig danuhpene akiw, ig ute piyana gikebikis keryes. Ig hiyapni hene, ig kibeyhevye gihawkankis. Ig awna gitkis: “Awaykemni, mmahki yis kehne mbayka pawtak, yisweke pakebyekne kerbet?”
27Henneme ku pariye kehne mbayka gikak gikebyi ig tukuhe amekene Moís. Ig awna git: “Pariyenekap pis? Pis ka nukivarama. Pis ka hiya pisma mpitha usuh.
28Mmah pis kehkere nukakuh ke amakabe pis umehe ner ejituyene? Mmah kuri pis keh hawata nukakuh?”
29Ig amekene Moís timapni hene, ig bisike. Ig tivik ig danuh avitit pahawa waxri akiw kewye Midiyamnaw. Ayge ig misekwe. Ayteke ig kahayo ig kakamkayh piyana gikebikis ayge.
30Ariwnteke ini paxnika madikwa (40) akebi kamukri akiw, ig amekene Moís ayge amadga amatap kennesa amun ini waxri imuwadnene kewye Sinay. Ayge pahavwi ahj hiyapkiswe git abetwi tiket, avuwivi ewakti.
31Ig amekene Moís hiyapni hene, ig wakaymni. Ig danukwa atere kennesawa kahadbe ig hiyap kabayte. Heneme ig timap Kiyavwiye Uhokri awna git.
32Giwn:
— Nahnewa pihawkrivwi giwohkigakis. Nahnewa kuri Abraawh giwohkiga. Nahnewa kuri Izaki giwohkiga. Nahnewa kuri Jakó giwohkiga.
Igme amekene Moís timapni hene, ig avisasew. Ig segke. Ig ka kiboka iveg atere.
33Ayteke ig Kiyavwiye Uhokri awna git akiw. Giwn:
— Wiwhnaba pikaswatni pukugkuptak adahan pis ka pataha inin iwetrit. Ay ku kiney pis tabirnene in waxri ka nikiytanisima mmanawa nahwa ay.
34Nah hiyak ku samah nuhiyegavu hiyepne mbeyne aynte Ejitumnaw. Nah timap ku samah igkis amka. Kuri nah ayta adahan giwiwhkiswitnikis giwakutakis neras ejituyenevwi. Ku avim inin nah awahkisne pis tahan avitit Ejitumnaw.
35Henewatbaki ig Kiyavwiye Uhokri awna git amekene Moís givitimpi ner ahj ku pariye hiyapkiswe git abetwi tiket, avuwivi ewakti. Henewatbaki ig awahkiswig giminkis neras amekenegben. Ig awahkis nernewa amekene Moís ku pariye neras amekenegben ayipa kuwis tukuhe minikwak. Mmanawa igkis tukuhevgi amun ini ku samah ner pahavwi awna git: “Pariyenekap? Pis ka nukivarama. Pis ka hiya pisma mpitha usuh.” Heneme nernewa amekene Moís ku pariye tukuhpika gavitkis hiyeg ignewa ku pariye awahkiska giminkis gavit Kiyavwiye Uhokri. Ig awahkiska adahan ig humaw gikivarakis neras amekenegben, adahan ig giwiwhpitnikis ariw mbeyne. Yis ku avim inin yis hawata tukuhe ner ku pariye awahkiska gavit Kiyavwiye Uhokri adahan uwiwhpitniwiy ariw mbeyne.
36Ner amekene Moís ku pariye neras amekenegben tukuhe minikwak, ignewa giwiwhpitnikis ariw mbeyne. Ig tivik ig danuh atere Ejitumnawit, ig wiwhpigkis ayteke akak ka aynsima annut ku pariye keh hiyeg wakaymni ku pariye areketni gitkis Kiyavwiye Uhokri gidatni. Akak ini annut ig manukke ini parahwokwa kewye Parahwokwa Duwweh. Akak ini annut ig wewkise ignes amekenegben aynte amadga amatap adahan paxnika madikwa (40) akebi kamukri.
37Hawata akiw ig ner amekene Moís ku pariye tukuhpika gavitkis hiyeg, ignewa kinetihwa gimin Cristo gitkis amekenegben. Ig awna gitkis:
— Aysawnemenek Kiyavwiye Uhokri awahkisnek pahavwi gawneve kewa nahbe, adahan ig ekkene Kiyavwiye Uhokri giwn yit. Ig waytakwiy ukebyiy.
38Ig ner amekene Moís ku pariye tukuhpika gavitkis hiyeg ignewa darihe Kiyavwiye Uhokri giwn dehetniki adahan nikepten wotwiy. Ig darihni minikwak ku aysaw neras amekenegben pahadguvu amadga amatap. Amun ini pahavwi ahj danuh atere arit ini waxri imuwadnene Sinay. Ayge ig ekkene Kiyavwiye Uhokri giwn git amekene Moís adahan igme akkin gitkis neras amekenegben.
Amekenegben tukuhe Moís akiw
Num 14.3
39— Heneme neras amekenegben ka ihpekere amekene Moís giwn. Igkis tukuhpig akiw. Mmanawa igkis ivegminenes gihiyekemnikis adahan igkis diyuhpiyes tahan avitit Ejitumnaw akiw.
40Avim ini ig amekene Moís wagehe tivige avitit ini waxri imuwadnene adahan darihpiye Kiyavwiye Uhokri giwn. Ku aysaw ig tivik, igkis amekenegben kinetihwa gikak gegni. Igkis awna git:
— Uyay keh pahavwiwa uwohkigawiy akiw, pahavwi ahehpakti batakka adahan wixwiy hiyuh wavitkiyawiy adahan umaptentenwiy ariw mbeyne. Ner Moís ku pariye uwiwhpitniwiy ariwntak Ejitumnaw usuh ka hiyak ku kite ig.
Amekenegben tukuhe igwa Uhokri
Amos 5.25
41— Nikwe avim ini igkis bateke pahavwi pak akamkayh gahehpak adahan ig humaw giwohkigakis. Ayteke igkis umehe puwikne ay avetun ini ahehpakti adahan igkis kakanhewnes git. Ayteke igkis kehe fet adahan kiyathenes ini ku pariye he gibatkankisnen.
42Ig Kiyavwiye Uhokri hiyapni hene, ig tukuhwe giwkis. Ig isaksevgikis adahan igkis keh gibetkikis. Nikwe igkis kawohkigahew arit warukma akak waravyu. Henewa in ku samah Uhokri gannasan gitkis gawnevevu buttityevwi. Inakni gannasan awna:
— Yis hiyeg izhaewyenevwi, minikwak ku samah yis misekwenete paxnika madikwa (40) akebi kamukri aynte amadga amatap ayge yis umehne puwikne adahan yis kakanhewne git yiwohkiga. Heneme ka nutuhma yis kakanhaw. Yis kakanhaw gitkis nawenyevwi yiwohkigavu akiw.
43Yis hiyuh yiwohkiga Moloki gatiy. Yis hiyuh warukma gahehpak gidahan yiwohkiga Renfah. Yis kawohkigahewne arit ahehpakti ku pariye he yibatkannen amadgaya inin. Kuri nikwe yis katiwnivwe avatra ini yitaraksan. Nah hiyuhkisyi gitkis yivetunyavu tahan piyawakad pahabakaytak paytwempu Babiloniya.
Henewatbaki ig Kiyavwiye Uhokri awna.
Uhokri ka amadgayama inin
44— Heneme ku aysaw neras uhawkrivwiy gidukweneswa ayge amadga amatap igkis hawata kadahan paha payt kehka akak puwikne amar kewye Uhokri Givin. Ini payt humaw areketni gitkis ku Kiyavwiye Uhokri ayge gikakkis. Igkis kehpin hehpekuye ku samah ig Kiyavwiye Uhokri kehkise git amekene Moís. Igkis ahehpin avigkutavrik ku samah gakkan git.
45Ariwnteke ini kibite kamukri akiw igkis amekenegben gikamkayhkis danuh atan avitit inin waxri. Igkis ewke ini payt atan ku pariye igkis darihe giwntakis gigkis. Ayge gikivarakis ig amekene Joswe ig matakave neras hiyeg ku pariye kane judeyenevwima ku pariye misekwenevwi ay mmanawa ig Kiyavwiye Uhokri bisiksevgikis. Ayteke igkis amekenegben misakwa ay avit inin waxri akak ini Kiyavwiye Uhokri Givin kehka akak puwikne amar. In ay gimunkis adahan kibite kamukri he ku kavim amekene Davi amadga hawkri.
46Ig Kiyavwiye Uhokri batek gikak amekene Davi ka aynsima. Igme amekene Davi awna: “Ig Kiyavwiye Uhokri ku pariye uhawkriwiy amekene Jakó giwohkiga ig ka gikiytanisima. Inin Givin ka kis gidahan akiw. Nah kehkiste paha payt kabaytenene adahan Kiyavwiye Uhokri Givin.” Heneme ig Kiyavwiye Uhokri ka isaksa ig keh.
47Igme amekene Davi gikamkayh amekene Salomão ignewa kehkise ini payt.
48Bawa ig Kiyavwiye Uhokri inurikyene ig ka misakwa arikuma payt ku pariye hiyeg amadgayavu inin gikehnikis. Uhokri gannasan git gawneve minikwak akki wot inakni hene. In awna:
49— En kewa nevwibe adahan nah bat ayge kumadukene madikte hiyeg. Inme inin waxri adug in humaw ke nukugkaptabe. Pariyeki payt yis keh nudahan? Kineyki iwetrit kawih nudahan adahan nah mayekne amadga hawkri? Yumahwa.
50Nahnewa keh inin hawkri madikte.
Henewatbaki ig Kiyavwiye Uhokri awna.
Yis tukuhe Kiyavwiye Jesus
51Ayteke ig amekene Estevawh awna akiw. Ig awna:
— Adaniskata yiyakni hene. Yihiyekemni piyawakad giw Kiyavwiye Uhokri. Yis mataybiswe git Kiyavwiye Uhokri. Mmahkay yis yihiyekemni hawata ke neras amekenegbenbe? Yis kewa ignesbe amekenegben yis hawata tukuhnenekwa Kiyavwiye Uhokri Gitip ke igkisbe.
52Igkis hiyapkise mbeyne gitkis Uhokri gawnevevu madikte. Yuma pahavwinema mpiya kabay giwakuriwkis. Igkisme gawnevevu ekkenes gitkis ku pahavwi nehmnikuhpiye ku pariye igyewa waditye hiyeg. Heneme igkis ka timepkere inakni giwnkis. Igkis tukuhpigkis madikte. Igkis umehpigkis. Ku avim inin yis hawata wageswe givitit nernewa ku pariye igyewa waditye hiyeg. Yisnewa giwmepten.
53Wixwiynewa izhaewyenevwi darihe ini Uhokri gikumadukan ku pariye ekkepka git amekene Moís gavitkis ahj. Kameki yis ihpinme.
Estevawh umehpika
54Igkis judeyenevwi gikivarakis timapni hene, igkis dagawnhewbetkis ka aynsima git amekene Estevawh. Gidagonikis keh igkis kagah gaybukis.
55Igme amekene Estevawh ka aminama. Ig gitiphewne Kiyavwiye Uhokri. Ig sarayhe givegi inut, ig hiyap Kiyavwiye Uhokri gikiytani aynte inurik. Ig hiyap Kiyavwiye Jesus tabir ay gihumwa Kiyavwiye Uhokri kihehaptak.
56Ig hiyapni hene, ig awna:
— Ivegnay, nah hiyap en woke. Nah hiyap Kiyavwiye Jesus ku pariye wageswe awayg amadgaya inin. Ig tabir ay gihumwa Kiyavwiye Uhokri kihehaptak.
57Igkisme timapni hene, igkis pitihe gitaybikis. Igkis kabimanbet kihaw. Igkis awna:
— Uyay umehpig.
Pahatya amin igkis ivukwe gimin. Igkis kamaxwig.
58Ayteke igkis iwevgi aytontak avititak paytwempu. Igkis waxwevgi tahan amatmadgat. Ayge igkis givadkatepten akak tip. Avim ini igkis avuriwse gidagmanvitkis git pahavwi takweye kewye Sawlu.
59Ayteke nikwe igkis padakte amekene Estevawh akak tip. Igme ayge piriyepkewne. Ig awna:
— Kiyavwiye Jesus, uya amava nanmap kuri.
60Ayteke ig paberetusaw, ig awna akak madikte giwakemni. Giwn:
— Kiyavwiye, bayahmina neras ariw inin gitaraksankis.
Awnimpi inakni iwit, ig miyap.
Currently Selected:
Attus 7: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
