ਰਸੂਲਾਂ ਦੇ ਕੰਮ 8

ਸੌਲੁਸ ਦਾ ਕਲੀਸੀਯਾ ਉੱਤੇ ਅੱਤਿਆਚਾਰ

1 ਸੌਲੁਸ ਸਤੀਫ਼ਨੁਸ ਦੇ ਕਤਲ ਨਾਲ ਸਹਿਮਤ ਸੀ । ਉਸ ਦਿਨ ਤੋਂ ਯਰੂਸ਼ਲਮ ਦੀ ਕਲੀਸੀਯਾ ਦੇ ਉੱਤੇ ਭਾਰੀ ਅੱਤਿਆਚਾਰ ਸ਼ੁਰੂ ਹੋ ਗਿਆ । ਇਸ ਕਾਰਨ ਰਸੂਲਾਂ ਨੂੰ ਛੱਡ ਕੇ ਸਾਰੇ ਵਿਸ਼ਵਾਸੀ ਯਹੂਦਿਯਾ ਅਤੇ ਸਾਮਰਿਯਾ ਵਿੱਚ ਤਿੱਤਰ-ਬਿੱਤਰ ਹੋ ਗਏ । 2ਕੁਝ ਸ਼ਰਧਾਲੂ ਲੋਕਾਂ ਨੇ ਸਤੀਫ਼ਨੁਸ ਨੂੰ ਦਫ਼ਨਾਇਆ ਅਤੇ ਉਸ ਦੇ ਲਈ ਬਹੁਤ ਵਿਰਲਾਪ ਕੀਤਾ ।

3 # ਰਸੂਲਾਂ 22:4-5, 26:9-11 ਪਰ ਸੌਲੁਸ ਕਲੀਸੀਯਾ ਨੂੰ ਨਾਸ਼ ਕਰਨ ਦੀ ਕੋਸ਼ਿਸ਼ ਕਰ ਰਿਹਾ ਸੀ । ਉਹ ਘਰ ਘਰ ਜਾ ਕੇ ਆਦਮੀਆਂ ਅਤੇ ਔਰਤਾਂ ਨੂੰ ਬਾਹਰ ਖਿੱਚ ਕੇ ਕੈਦ ਵਿੱਚ ਬੰਦ ਕਰ ਰਿਹਾ ਸੀ ।

ਸਾਮਰਿਯਾ ਵਿੱਚ ਸ਼ੁਭ ਸਮਾਚਾਰ ਦਾ ਪ੍ਰਚਾਰ

4ਜਿਹੜੇ ਲੋਕ ਤਿੱਤਰ-ਬਿੱਤਰ ਹੋ ਗਏ ਸਨ, ਉਹ ਜਿੱਥੇ ਵੀ ਗਏ, ਸ਼ੁਭ ਸਮਾਚਾਰ ਦਾ ਪ੍ਰਚਾਰ ਕਰਨ ਲੱਗੇ । 5ਇਸ ਤਰ੍ਹਾਂ ਫ਼ਿਲਿੱਪੁਸ ਸਾਮਰਿਯਾ ਦੇ ਸ਼ਹਿਰ ਵਿੱਚ ਗਿਆ ਅਤੇ ਉੱਥੇ ਉਹਨਾਂ ਵਿੱਚ ਮਸੀਹ ਦਾ ਪ੍ਰਚਾਰ ਕਰਨ ਲੱਗਾ । 6ਲੋਕਾਂ ਨੇ ਬੜੇ ਪਿਆਰ ਨਾਲ ਉਸ ਦੇ ਵਚਨ ਸੁਣੇ । ਉਹਨਾਂ ਸਾਰਿਆਂ ਨੇ ਇੱਕ ਮਨ ਹੋ ਕੇ ਫ਼ਿਲਿੱਪੁਸ ਨੂੰ ਸੁਣਿਆ ਅਤੇ ਉਸ ਦੇ ਦੁਆਰਾ ਕੀਤੇ ਗਏ ਚਮਤਕਾਰ ਦੇਖੇ । 7ਬਹੁਤ ਸਾਰੇ ਲੋਕਾਂ ਵਿੱਚੋਂ ਅਸ਼ੁੱਧ ਆਤਮਾਵਾਂ ਉੱਚੀ ਆਵਾਜ਼ ਨਾਲ ਚੀਕਦੀਆਂ ਹੋਈਆਂ ਨਿਕਲੀਆਂ ਅਤੇ ਬਹੁਤ ਸਾਰੇ ਅਧਰੰਗੀ ਅਤੇ ਲੰਗੜੇ ਚੰਗੇ ਹੋ ਗਏ । 8ਇਸ ਤਰ੍ਹਾਂ ਉਸ ਸ਼ਹਿਰ ਵਿੱਚ ਖ਼ੁਸ਼ੀ ਦੀ ਲਹਿਰ ਉੱਠ ਪਈ ।

9ਉਸ ਸ਼ਹਿਰ ਵਿੱਚ ਸ਼ਮਊਨ ਨਾਂ ਦਾ ਇੱਕ ਆਦਮੀ ਰਹਿੰਦਾ ਸੀ । ਉਹ ਜਾਦੂਗਰੀ ਦੇ ਕੰਮਾਂ ਰਾਹੀਂ ਸਾਮਰਿਯਾ ਦੇ ਲੋਕਾਂ ਨੂੰ ਹੈਰਾਨ ਕਰਦਾ ਹੁੰਦਾ ਸੀ । ਉਹ ਆਪਣੇ ਆਪ ਨੂੰ ਕੋਈ ਮਹਾਨ ਮਨੁੱਖ ਦੱਸਦਾ ਸੀ । 10ਇਸ ਲਈ ਹਰ ਕੋਈ, ਛੋਟੇ ਤੋਂ ਵੱਡੇ ਤੱਕ ਉਸ ਦਾ ਇਹ ਕਹਿ ਕੇ ਆਦਰ ਕਰਦਾ ਸੀ, “ਇਹ ਆਦਮੀ ਪਰਮੇਸ਼ਰ ਦੀ ਉਹ ਸਮਰੱਥਾ ਹੈ ਜਿਹੜੀ ‘ਮਹਾਂ-ਸਮਰੱਥਾ’ ਅਖਵਾਉਂਦੀ ਹੈ ।” 11ਉਹ ਉਸ ਨੂੰ ਬਹੁਤ ਮੰਨਦੇ ਸਨ ਕਿਉਂਕਿ ਉਸ ਨੇ ਬਹੁਤ ਸਮੇਂ ਤੋਂ ਉਹਨਾਂ ਨੂੰ ਜਾਦੂਗਰੀ ਦੇ ਕੰਮ ਦਿਖਾ ਕੇ ਹੈਰਾਨ ਕੀਤਾ ਹੋਇਆ ਸੀ । 12ਪਰ ਜਦੋਂ ਲੋਕਾਂ ਨੇ ਫ਼ਿਲਿੱਪੁਸ ਦੇ ਉਪਦੇਸ਼ ਵਿੱਚ ਵਿਸ਼ਵਾਸ ਕੀਤਾ ਜਿਹੜਾ ਪਰਮੇਸ਼ਰ ਦੇ ਰਾਜ ਅਤੇ ਯਿਸੂ ਮਸੀਹ ਦੇ ਸ਼ੁਭ ਸਮਾਚਾਰ ਦਾ ਪ੍ਰਚਾਰ ਕਰ ਰਿਹਾ ਸੀ ਤਾਂ ਆਦਮੀਆਂ ਅਤੇ ਔਰਤਾਂ ਨੇ ਬਪਤਿਸਮਾ ਲਿਆ । 13ਸ਼ਮਊਨ ਨੇ ਵੀ ਵਿਸ਼ਵਾਸ ਕੀਤਾ ਅਤੇ ਬਪਤਿਸਮਾ ਲੈ ਕੇ ਫ਼ਿਲਿੱਪੁਸ ਦੇ ਨਾਲ ਰਹਿਣ ਲੱਗਾ । ਉਹ ਚਮਤਕਾਰ ਅਤੇ ਮਹਾਨ ਸ਼ਕਤੀਸ਼ਾਲੀ ਕੰਮ ਹੁੰਦੇ ਦੇਖ ਕੇ ਹੈਰਾਨ ਸੀ ।

14ਜਦੋਂ ਯਰੂਸ਼ਲਮ ਵਿੱਚ ਰਸੂਲਾਂ ਨੇ ਸੁਣਿਆ ਕਿ ਸਾਮਰਿਯਾ ਦੇ ਲੋਕਾਂ ਨੇ ਪਰਮੇਸ਼ਰ ਦੇ ਵਚਨ ਨੂੰ ਸਵੀਕਾਰ ਕਰ ਲਿਆ ਹੈ ਤਾਂ ਉਹਨਾਂ ਨੇ ਪਤਰਸ ਅਤੇ ਯੂਹੰਨਾ ਨੂੰ ਉਹਨਾਂ ਦੇ ਕੋਲ ਭੇਜਿਆ । 15ਉਹ ਦੋਵੇਂ ਗਏ ਅਤੇ ਉਹਨਾਂ ਲਈ ਪ੍ਰਾਰਥਨਾ ਕੀਤੀ ਕਿ ਉਹ ਪਵਿੱਤਰ ਆਤਮਾ ਪ੍ਰਾਪਤ ਕਰਨ 16ਕਿਉਂਕਿ ਪਵਿੱਤਰ ਆਤਮਾ ਅਜੇ ਤੱਕ ਉਹਨਾਂ ਵਿੱਚੋਂ ਕਿਸੇ ਉੱਤੇ ਨਹੀਂ ਉਤਰਿਆ ਸੀ । ਉਹਨਾਂ ਨੇ ਤਾਂ ਕੇਵਲ ਯਿਸੂ ਮਸੀਹ ਦੇ ਨਾਮ ਵਿੱਚ ਹੀ ਬਪਤਿਸਮਾ ਲਿਆ ਸੀ । 17ਇਸ ਲਈ ਪਤਰਸ ਅਤੇ ਯੂਹੰਨਾ ਨੇ ਉਹਨਾਂ ਉੱਤੇ ਹੱਥ ਰੱਖੇ ਅਤੇ ਉਹਨਾਂ ਨੇ ਪਵਿੱਤਰ ਆਤਮਾ ਪ੍ਰਾਪਤ ਕੀਤਾ ।

18ਜਦੋਂ ਸ਼ਮਊਨ ਨੇ ਦੇਖਿਆ ਕਿ ਰਸੂਲਾਂ ਦੇ ਹੱਥ ਰੱਖਣ ਨਾਲ ਪਵਿੱਤਰ#8:18 ਕੁਝ ਪ੍ਰਾਚੀਨ ਲਿਖਤਾਂ ਵਿੱਚ ‘ਪਵਿੱਤਰ’ ਸ਼ਬਦ ਨਹੀਂ ਹੈ । ਆਤਮਾ ਮਿਲਦਾ ਹੈ ਤਾਂ ਉਹ ਉਹਨਾਂ ਕੋਲ ਪੈਸੇ ਲੈ ਕੇ ਆਇਆ 19ਅਤੇ ਕਹਿਣ ਲੱਗਾ, “ਮੈਨੂੰ ਵੀ ਇਹ ਸਮਰੱਥਾ ਦਿਓ ਕਿ ਜਿਸ ਕਿਸੇ ਉੱਤੇ ਮੈਂ ਹੱਥ ਰੱਖਾਂ, ਉਹ ਪਵਿੱਤਰ ਆਤਮਾ ਪ੍ਰਾਪਤ ਕਰੇ ।” 20ਪਰ ਪਤਰਸ ਨੇ ਉਸ ਨੂੰ ਉੱਤਰ ਦਿੱਤਾ, “ਤੇਰਾ ਅਤੇ ਤੇਰੇ ਪੈਸਿਆਂ ਦਾ ਨਾਸ਼ ਹੋਵੇ ਕਿਉਂਕਿ ਤੂੰ ਪਰਮੇਸ਼ਰ ਦੇ ਵਰਦਾਨ ਨੂੰ ਪੈਸਿਆਂ ਨਾਲ ਮੁੱਲ ਲੈਣ ਲਈ ਸੋਚਿਆ ! 21ਤੇਰਾ ਸਾਡੇ ਇਸ ਕੰਮ ਵਿੱਚ ਕੋਈ ਹਿੱਸਾ ਨਹੀਂ ਹੈ ਕਿਉਂਕਿ ਪਰਮੇਸ਼ਰ ਦੇ ਸਾਹਮਣੇ ਤੇਰਾ ਦਿਲ ਸਾਫ਼ ਨਹੀਂ ਹੈ । 22ਇਸ ਲਈ ਆਪਣੀ ਬੁਰਾਈ ਤੋਂ ਤੋਬਾ ਕਰ ਅਤੇ ਪ੍ਰਭੂ ਅੱਗੇ ਪ੍ਰਾਰਥਨਾ ਕਰ ਕਿ ਸ਼ਾਇਦ ਤੇਰੇ ਦਿਲ ਵਿੱਚ ਇਸ ਤਰ੍ਹਾਂ ਦਾ ਸੋਚਣਾ ਮਾਫ਼ ਕੀਤਾ ਜਾਵੇ । 23ਕਿਉਂਕਿ ਮੈਂ ਦੇਖ ਰਿਹਾ ਹਾਂ ਕਿ ਜ਼ਹਿਰ ਵਰਗੀ ਕੁੜੱਤਣ ਤੇਰੇ ਅੰਦਰ ਹੈ ਅਤੇ ਪਾਪ ਦੇ ਬੰਧਨ ਵਿੱਚ ਤੂੰ ਜਕੜਿਆ ਹੋਇਆ ਹੈਂ ।” 24ਤਦ ਸ਼ਮਊਨ ਨੇ ਕਿਹਾ, “ਤੁਸੀਂ ਲੋਕ ਹੀ ਮੇਰੇ ਲਈ ਪ੍ਰਭੂ ਦੇ ਅੱਗੇ ਪ੍ਰਾਰਥਨਾ ਕਰੋ ਕਿ ਜੋ ਕੁਝ ਤੁਸੀਂ ਕਿਹਾ ਹੈ ਉਹ ਮੇਰੇ ਨਾਲ ਨਾ ਵਾਪਰੇ ।”

25ਜਦੋਂ ਉਹ ਗਵਾਹੀ ਦੇ ਚੁੱਕੇ ਅਤੇ ਪ੍ਰਭੂ ਦਾ ਵਚਨ ਸੁਣਾ ਚੁੱਕੇ ਤਾਂ ਯਰੂਸ਼ਲਮ ਨੂੰ ਵਾਪਸ ਚਲੇ ਗਏ । ਰਾਹ ਵਿੱਚ ਉਹਨਾਂ ਨੇ ਸਾਮਰਿਯਾ ਦੇ ਬਹੁਤ ਸਾਰੇ ਪਿੰਡਾਂ ਵਿੱਚ ਸ਼ੁਭ ਸਮਾਚਾਰ ਸੁਣਾਇਆ ।

ਫ਼ਿਲਿੱਪੁਸ ਅਤੇ ਈਥੋਪੀਆ ਦਾ ਅਫ਼ਸਰ

26ਪ੍ਰਭੂ ਦੇ ਇੱਕ ਸਵਰਗਦੂਤ ਨੇ ਫ਼ਿਲਿੱਪੁਸ ਨੂੰ ਕਿਹਾ, “ਉੱਠ ਅਤੇ ਦੱਖਣ ਵੱਲ ਯਰੂਸ਼ਲਮ ਤੋਂ ਗਾਜ਼ਾ ਜਾਣ ਵਾਲੀ ਸੜਕ ਉੱਤੇ ਜਾ ।” (ਇਹ ਸੜਕ ਵੀਰਾਨ ਹੋ ਚੁੱਕੀ ਹੈ ।) 27ਫ਼ਿਲਿੱਪੁਸ ਉੱਠਿਆ ਅਤੇ ਚੱਲ ਪਿਆ ਤਾਂ ਦੇਖੋ ਇੱਕ ਈਥੋਪੀਆ ਨਿਵਾਸੀ ਜਿਹੜਾ ਈਥੋਪੀਆ ਦੀ ਰਾਣੀ ਕੰਦਾਕੇ#8:27 ‘ਕੰਦਾਕੇ’ ਰਾਣੀ ਦੀ ਉਪਾਧੀ ਹੈ । ਦਾ ਇੱਕ ਵੱਡਾ ਅਫ਼ਸਰ ਸੀ ਅਤੇ ਉਸ ਦੇ ਸਾਰੇ ਖ਼ਜ਼ਾਨੇ ਦਾ ਅਧਿਕਾਰੀ ਸੀ, ਅਰਾਧਨਾ ਦੇ ਲਈ ਯਰੂਸ਼ਲਮ ਆਇਆ ਸੀ । 28ਹੁਣ ਉਹ ਵਾਪਸ ਜਾ ਰਿਹਾ ਸੀ ਅਤੇ ਆਪਣੇ ਰੱਥ ਵਿੱਚ ਬੈਠਾ ਹੋਇਆ ਯਸਾਯਾਹ ਨਬੀ ਦੀ ਪੁਸਤਕ ਪੜ੍ਹ ਰਿਹਾ ਸੀ । 29ਪਵਿੱਤਰ ਆਤਮਾ ਨੇ ਫ਼ਿਲਿੱਪੁਸ ਨੂੰ ਕਿਹਾ, “ਅੱਗੇ ਵੱਧ ਅਤੇ ਇਸ ਰੱਥ ਦੇ ਨਾਲ ਹੋ ਜਾ ।” 30ਫ਼ਿਲਿੱਪੁਸ ਉਸ ਵੱਲ ਦੌੜਿਆ ਅਤੇ ਉਸ ਨੂੰ ਯਸਾਯਾਹ ਨਬੀ ਦੀ ਪੁਸਤਕ ਪੜ੍ਹਦੇ ਸੁਣਿਆ । ਤਦ ਫ਼ਿਲਿੱਪੁਸ ਨੇ ਉਸ ਤੋਂ ਪੁੱਛਿਆ, “ਜੋ ਤੁਸੀਂ ਪੜ੍ਹ ਰਹੇ ਹੋ, ਕੀ ਸਮਝਦੇ ਵੀ ਹੋ ?” 31ਉਸ ਨੇ ਉੱਤਰ ਦਿੱਤਾ, “ਜਦੋਂ ਤੱਕ ਕੋਈ ਮੈਨੂੰ ਨਾ ਸਮਝਾਏ, ਮੈਂ ਕਿਸ ਤਰ੍ਹਾਂ ਸਮਝ ਸਕਦਾ ਹਾਂ ?” ਫਿਰ ਉਸ ਨੇ ਫ਼ਿਲਿੱਪੁਸ ਅੱਗੇ ਬੇਨਤੀ ਕੀਤੀ ਕਿ ਉਹ ਉੱਪਰ ਆ ਕੇ ਉਸ ਦੇ ਨਾਲ ਰੱਥ ਵਿੱਚ ਬੈਠੇ । 32#ਯਸਾ 53:7-8ਪਵਿੱਤਰ-ਗ੍ਰੰਥ ਵਿੱਚੋਂ ਜਿਹੜਾ ਪ੍ਰਸੰਗ ਉਹ ਪੜ੍ਹ ਰਿਹਾ ਸੀ, ਉਹ ਇਹ ਸੀ,

“ਜਿਵੇਂ ਭੇਡ ਕੱਟੇ ਜਾਣ ਦੇ ਸਮੇਂ,

ਅਤੇ ਲੇਲਾ ਉੱਨ ਕਤਰਨ ਦੇ ਸਮੇਂ,

ਚੁੱਪ ਰਹਿੰਦੇ ਹਨ,

ਉਸੇ ਤਰ੍ਹਾਂ ਉਸ ਨੇ ਆਪਣਾ ਮੂੰਹ ਨਾ ਖੋਲ੍ਹਿਆ ।

33ਉਹ ਤੁੱਛ ਜਾਣਿਆ ਗਿਆ

ਅਤੇ ਨਿਆਂ ਤੋਂ ਵਾਂਝਾ ਰੱਖਿਆ ਗਿਆ ।

ਉਸ ਦੀ ਵੰਸਾਵਲੀ ਦਾ ਵਰਣਨ ਕੌਣ ਕਰੇਗਾ ?

ਕਿਉਂਕਿ ਉਸ ਦਾ ਜੀਵਨ ਧਰਤੀ ਦੇ ਉੱਤੋਂ

ਸਮਾਪਤ ਕੀਤਾ ਜਾ ਰਿਹਾ ਹੈ ।”

34ਅਫ਼ਸਰ ਨੇ ਫ਼ਿਲਿੱਪੁਸ ਤੋਂ ਪੁੱਛਿਆ, “ਕਿਰਪਾ ਕਰ ਕੇ ਮੈਨੂੰ ਦੱਸੋ ਕਿ ਨਬੀ ਕਿਸ ਦੇ ਬਾਰੇ ਕਹਿ ਰਿਹਾ ਹੈ ? ਆਪਣੇ ਬਾਰੇ ਜਾਂ ਕਿਸੇ ਹੋਰ ਦੇ ?” 35ਤਦ ਫ਼ਿਲਿੱਪੁਸ ਨੇ ਦੱਸਣਾ ਸ਼ੁਰੂ ਕੀਤਾ ਅਤੇ ਪਵਿੱਤਰ-ਗ੍ਰੰਥ ਦੇ ਇਸ ਪ੍ਰਸੰਗ ਤੋਂ ਸ਼ੁਰੂ ਕਰ ਕੇ, ਉਸ ਨੇ ਉਸ ਨੂੰ ਯਿਸੂ ਦਾ ਸ਼ੁਭ ਸਮਾਚਾਰ ਸੁਣਾਇਆ । 36ਚੱਲਦੇ ਚੱਲਦੇ ਉਹ ਰਾਹ ਵਿੱਚ ਇੱਕ ਅਜਿਹੀ ਥਾਂ ਉੱਤੇ ਪਹੁੰਚੇ ਜਿੱਥੇ ਪਾਣੀ ਸੀ । ਅਫ਼ਸਰ ਨੇ ਕਿਹਾ, “ਦੇਖੋ ਇੱਥੇ ਪਾਣੀ ਹੈ ਹੁਣ ਮੇਰੇ ਬਪਤਿਸਮਾ ਲੈਣ ਵਿੱਚ ਕੀ ਰੁਕਾਵਟ ਹੈ ?” [37ਫ਼ਿਲਿੱਪੁਸ ਨੇ ਕਿਹਾ, “ਜੇਕਰ ਤੂੰ ਆਪਣੇ ਸਾਰੇ ਦਿਲ ਦੇ ਨਾਲ ਵਿਸ਼ਵਾਸ ਕਰਦਾ ਹੈਂ ਕਿ ਯਿਸੂ ਮਸੀਹ ਪਰਮੇਸ਼ਰ ਦੇ ਪੁੱਤਰ ਹਨ ਤਾਂ ਇਹ ਹੋ ਸਕਦਾ ਹੈ ।”]#8:37 ਕੁਝ ਪ੍ਰਾਚੀਨ ਲਿਖਤਾਂ ਵਿੱਚ ਇਹ ਆਇਤ ਨਹੀਂ ਹੈ । 38ਅਫ਼ਸਰ ਨੇ ਰੱਥ ਨੂੰ ਰੋਕਣ ਦਾ ਹੁਕਮ ਦਿੱਤਾ । ਫਿਰ ਉਹ ਦੋਵੇਂ ਫ਼ਿਲਿੱਪੁਸ ਅਤੇ ਅਫ਼ਸਰ ਪਾਣੀ ਵਿੱਚ ਉਤਰੇ ਅਤੇ ਫ਼ਿਲਿੱਪੁਸ ਨੇ ਉਸ ਨੂੰ ਬਪਤਿਸਮਾ ਦਿੱਤਾ । 39ਜਦੋਂ ਉਹ ਪਾਣੀ ਵਿੱਚੋਂ ਨਿੱਕਲ ਕੇ ਉੱਪਰ ਆਏ ਤਾਂ ਪ੍ਰਭੂ ਦਾ ਆਤਮਾ ਫ਼ਿਲਿੱਪੁਸ ਨੂੰ ਚੁੱਕ ਕੇ ਲੈ ਗਿਆ । ਅਫ਼ਸਰ ਨੇ ਉਸ ਨੂੰ ਫਿਰ ਨਾ ਦੇਖਿਆ ਅਤੇ ਉਹ ਅਨੰਦ ਮਨਾਉਂਦਾ ਹੋਇਆ ਆਪਣੇ ਰਾਹ ਚਲਾ ਗਿਆ । 40ਪਰ ਫ਼ਿਲਿੱਪੁਸ ਅਜ਼ੋਤੁਸ#8:40 ਯੂਨਾਨੀ ਸ਼ਬਦ ਅਜ਼ੋਤੁਸ ਦੱਖਣੀ ਇਸਰਾਏਲ ਦੇ ਤੱਟ ਉੱਤੇ ਇੱਕ ਸ਼ਹਿਰ ਹੈ ਜਿਸ ਨੂੰ ਇਬਰਾਨੀ ਭਾਸ਼ਾ ਵਿੱਚ ਅਸ਼ਦੋਦ ਵੀ ਕਿਹਾ ਜਾਂਦਾ ਹੈ । ਵਿੱਚ ਦਿਖਾਈ ਦਿੱਤਾ ਅਤੇ ਕੈਸਰਿਯਾ ਪਹੁੰਚਣ ਤੱਕ ਸਾਰੇ ਸ਼ਹਿਰਾਂ ਵਿੱਚ ਸ਼ੁਭ ਸਮਾਚਾਰ ਸੁਣਾਉਂਦਾ ਗਿਆ ।

Currently Selected:

ਰਸੂਲਾਂ ਦੇ ਕੰਮ 8: CL-NA

Highlight

Copy