Yela 50
50
Korowii toma ŋwɛnɛdɛɛɡe ta
Asaf yel
1Nemenɛ Korowii
waa dɔ kpeɡri kohona
yerɛ nɛra baa lɔ harɛ nɔ ta
bobɛlbwa ba cheme,
le wee leebɔr ba kaa wee
cholibɔr.
2Korowii do kɛ kandea
dɛɛ chaah dɛ le bwɛjen
Saayɔn
waa wera kohona ta.
3Korowii yaa dɛ tomɔ
dɛ ba naa,
waa sɔeh dɛɛ ba,
nijena dɛ́ tɔ o sie,
ásɛ peukpeɡ ta baro
dɛɛ cheme.
4O ŋɔ nyundua ne harɛ
di danseɛ kɛŋɔ nɛra,
ásɛ o bol o nɛra wa,
dɛ́ pa ba bole.
5Korowii berɔ ŋɔ,
“N dɛ nyin kɛ n nɛra
maa lee ba cheɡ
tɛ n te boa ba nyoa,
nɛra baa kpo kon ɛ saraha,
a che tɛ fɔo n ne baa fɔwa
la.”
6Kwaa aa lɔ nyundua dɛ baɡle
kɛŋɔ Korowii waa toɡrɔ,
dɛkalkɛ onee bol nɛra waa
dɛɛ pa bole.
7Korowii ŋɔ,
“Hé no, n nɛra Israel tena,
maa he waa bola ba
dɛ́ tɛ heya, menee Korowii
haa dɛ tom mɛ.
8Maa heyaa kah ŋɔ
kwaa haa kpoora ɛ
sarahare,
kɛɛ kwaa haa fuah ɛ
sarahare
n sie saŋ bɛlbwa la aa
were.
9Maa nabala nyin
dɛ́ le he naleɡa ta,
kɛɛ boohna
dɛ́ le he boohna leɡa bini,
10dɛkalkɛ kpɔɡ bini
ola bwa ɛ n kwa,
a ne nae aa lɔ deŋɡarere
kaɡboŋa ta bwa.
11N jemɛ jumbii
aa lɔ bwejena dor wa,
asɛ koŋkwaa maa taa bwa
ɛ n kwa.
12Dɛ lɔr dɛ kpo mɛ naa,
maa he bee bol,
dɛkalkɛŋɔ harɛ nɔ ne kwaa
aa lɔ o ta bwa ɛ n kwa.
13N dɛ chwe nabala ol
kɛɛ boohna chalee mɛɛ diɔ?
14Hé kpɔ jam ɛ saraha tɛ
men Korowii, dɛ́ ka chuɡri
he nyobaɡa bwa
Nemenɛ Korowii be.#Hib 13:15; Rom 12:1
15Hé yer mɛ he wenaale
tɔpere aa,
mɛɛ ba lɛ heyaa,
ásɛ he kpɔ duure tɛ mɛ.”
16Kɛ Korowii ŋɔ wechɔɡ-ɛɛra la
be ŋɔ,
“Ɛrɛɛ me Mmarare dawɛ
he nyoo hɛɛ kura,
kɛɛ hɛɛ bol n ne he fɔo la
waa nɔɔ?
17He hah waa maa do heyaa a
ta la,
dɛ kpɔa ta habɔɔ.
18He na ŋwɛɛ bɛlbwa naa,
he kpɔɔ dɛɛ berɛ he dam,
he ne nɛra baa dɛ bɔ
jwamanee dɛɛ valɛ.
19Wobochɔɡa ɡboo su he nyoo,
he do ɡbaŋre nyosone teŋa
ta.
20He won soɡa dɛɛ bol
he dɔŋa bwara wechɔɡa,
dɛɛ chɔɡ he ɡbaɡba nyabii.
21Anɔ bwaa hɛɛ ɛ, asɛ n tɔ
nyoa,
he dɛ lii kɛŋɔ n do kɛ heya.
Kɛ n dɛ kah heya, dɛ́ kpɔ
waa haa ɛa bwa bil he sie.”
22Hé no, he banɔ la haa soh
men Korowii waa la,
ɡɛ laa aa, mɛɛ chɔɡ heyaa,
nomɛlbwa aa wola won lɛ
heya.
23Nomɛlbwa kpɔ jam tɛ mɛ
naa,
dɛ sarahaa o ɛ tɛ mɛ la,
onee dɛɛ duu mɛ.
O kpɔɔ kwaa ŋwɛnɛ
dɛɛ cheɡ,
dɛ́ na ɡɛ men Korowii
aa won nɛra lɛɛ.
Currently Selected:
Yela 50: mzw
Highlight
Share
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
