Yela 49
49
Gɛnee dɛɛ hwɛɡɛ o kondɔɔh ta
Kora dea bii yel
1Nómɛlbwa no waa nɔ,
nɛra haa lɔ harɛ nɔ ta
bobɛlbwa,
2dansaara ne nɛnjena,
dɔɔhna ne nyaara bwa.
3Mɛɛ bol wejemwaa,
á ɡel he liire bini chaah,
hɛɛ no waa mun.
4Mɛɛ cheɡ deŋnee dɛɛ no
wobosɛɡla,
dɛ́ kpɔ janjela lɔ dɛɛ baɡle
a mun.
5Dɛ wenaale balɔ,
n dɔma bar mɛ cheme,
kwaraa naa, maa ɔmɛ.
6Nɛra baa kpɔ ba te dawɛ
ba kondɔɔh ta koh a waa
dɛɛ ɛ mbarafo aa,
maa ɔmɛ.
7Nomɛlbwa aa won lɛ
o dɔŋ mkpa,
kɛɛ dɛ́ kpɔ komɛl charɛ
o nyu Korowii be.
8Nɛwɛnyini mkpa yoɡ kpeɡri,
komɛlbwa toole
bá won kpɔ yawɔ,
9ásɛ o won so le
saŋ bɛlbwa dɛɛ la,
waa wola sewɛ.
10Nomɛlbwa nao kɛŋɔ
wejerema dɛ sewɛ,
ɡɛna ne banɔ la baa wola
liire dɔe ɡe ɛɛ sewɛ,
dɛ́ ɡel ba kondɔɔh tɛ bane.
11Ba lalbɔɔne ɛɛ ber ba
deenee bá chɔ a bini,
a lole kɛŋɔ dɛ ba fa dɔ
harɛre,
baa do belaa saŋ bɛlbwaa
dɛɛ la.
12Nɛra dɔ kondɔɔh
ɡɛ bɛlbwa kwaraa naa,
aa won lɛɛ ba ba bɛ sewɛ,
baa serewoo kɛ ola ken.
13Waa aa chɔ le dɛ tɛ nɛra baa
dɛ hwɛɡɛ ba ɡbaɡba nɛɛ,
ne nɛra baa teŋɛ ba nɛɛ
dɛɛ no waa
baa dɛ bol ta laanee.#Luk 12:19-20
14Baa na waa, dɛ́ serewe kɛ
peera,
seo tɔ ba sie dɛ́ kaa ba ne
lalbɔɔne bini.
Nɛra ba wa aa toɡra ɛɛ tiɡri
ba nɛɛ,
ba pɔh ba lalbɔɔne bini,
ba ne ba deremi baah do
jaŋne.
15Kɛ Korowii ɛɛ lɛɛ mɛɛ,
wɛɛ lɛɛ mɛɛ le kpeɡri
seo aa dɔa la nyoa.
16Dɛ nɛn dɔ kondɔɔh kohona
naa,
bɛ ɡel a we he nɛ,
hale dɛ a nao dɛɛ dawɛ
ɡɛ bɛlbwa kwaraa naa,#1Ti 6:7
17o baa sewaa,
waa komɛlbwa ne kaala ba,
waa won kpɔ a bɛlbwa kaa
o be lalbɔɔ bini.
18Gɛ saŋ waa soɡe le la,
dɛ o dɛ lii o te
nɛn waa na som,
nɛra ɛɛ kpɛɛro a wa aa,
19wɛɛ sewɔɔ ka pu o naawa,
waa wola bɔr chaahnaa na
kpa.
20Nɛn waa dɔ kondɔɔh
waa wola waa mun no la,
ɡɛ ola aa dɛ sewɛ
laanee o ɡe ɛɛ ba sewa.
Currently Selected:
Yela 49: mzw
Highlight
Share
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
