Luk 8

Mea dui sɛɡla

1Aa ɛ tama la, Yeesu jo bwɛjena ne bwɛjeɡre ta dɛɛ bol Amanesoma la kɛ Korowii Kora la dii telo. Dɛ o habɔteŋra fi dɛ banɛ la, 2ne haahna bane waa doŋi kwaa ba nɛɛ dɛ chaah ba weela la ja o nɛ. Gɛ haahna nɔ bɛlee Mɛɛre waa le Maɡdala Yeesu fa aa doŋi kwaa bele anuanɛ le o nɛɛ la.#Jɔn 19:25#Mat 27:55-56 3Bɛl ɡee Joana waa ɛ Kusa waa ɛ nomoa dɛɛ nyiŋi Kooro Hɛrɔd dem la haah, ne Susaana ne ba bala bane baa wara dɛ teŋɛ Yeesu ne o habɔteŋra la nɛ, dɛ kpɔ ba ɡbaɡba suuɡa dɛ yawɛ kwaa tɛɛ ba baa di la.

4Dɛ nɛra teŋɔ le bwɛɛre aa teŋɛ dɔŋa nɛɛ la ta dɛɛ ba Yeesu be. Nɛnlaa la aa wara dɛ bar Yeesu cheme la, o kpɔ sɛɡla dɛ bol waa baɡ ba ŋɔ,#Mat 13:1-9; Mak 4:1-9 5“Baa bɛlee ira dɛ kaa merɛ mea o koo ta. Waa dɛ merɛ mea la la, ane lee ŋwɛnɛ ta, asɛ nɛra tiɡri a ta, jumbii ɡe ba tɔɔ di. 6Mea la ane ɡe lee bwetala ta. Aa lea la, a jwalɔ dɛ serewe, dɛkalkɛŋɔ sɔn toole bela. 7Mea la ane lee sɔɔhne baah dɛ le, sɔɔhne la kpeɡ dɛ lawa a serewe. 8Ane ɡe lee harɛdɛɛɡe ta dɛ le, dɛ do wer kɛrɛdɛ, asɛ mendaa bɛlbwa ɛ bie lafa.”

Yeesu aa bol waa nɔ tonɛ la, o kpɔ takpeɡ ŋɔ, “Nomɛlbwa waa dɛ nyin dɛ́ no la, ó no!”

Mea dui sɛɡla mun baɡla

(Mat 13:10-17; Mak 4:10-12)

9Yeesu aa tonɛ o wobol la, o habɔteŋra la bɔɔro sɛɡla la mun. 10Anee o ŋɔ ba be ŋɔ, “Korowii ta o Kora bini wobɛlbwa kpɔe sɔh he te. Kɛ nɛra baa kaa la te, sɛɡla nee mɛɛ ba waa ba be bola, ásɛ a ɛ ɡɛ baa chwera ŋɔ,

‘Ba dɔ sibie kɛ baa na,

dɛ dɔ deŋna kɛ baa no, baa waa mun jemɛ.’#Aes 6:9-10

11Hé no sɛɡla la mun. Mea la cheɡɔ tɛ Korowii Waa la.#Mat 13:18-23; Mak 4:13-20 12Anɔ la aa lee ŋwɛnɛ nyoa jumbii ba tɔɔ di la cheɡɔ tɛ nɛra baa no Korowii Waa la, asɛ buɡ ta dɛ Bɔnsam baa laa kpɔ ba nyu bini ásɛ ba bɛ ba te kpɔ tɛ Korowii ó lɛɛ ba la. 13Anɔ la ɡe aa lee bwetala ta bela teera aa wola toole kohona a lune aa wola wone kaa bini a jwalɛ dɛ sewɛ la, a do kɛ nɛra ba yon no waa la, dɛ ba sie lɛo, kɛ aa wola won ban jooɡe dɛɛ ka ba nyu bini la. A cheɡɛ Korowii Waa ta waane puu ba aa, dɛ ba horɔ. 14Asɛ anɔ la ɡe aa lee sɔɔhne baah, sɔɔhne la lawa a sewɛ la ɡee nɛra baa no Korowii Waa la, asɛ ba soɡa bini ne kondɔɔh waa ne wepuu aa lɔ harɛ nɔ ta beɡre ba sie, baa ɡelɛ waa la ɛɛ dɔ tɔnɔ la. 15Anɔ la ɡe aa lee harɛdɛɛɡe ta dɛ le dɛ do wer dɛ ma kohona la ɡee nɛra baa no Korowii Waa la dɛ kpoŋe a bini kɛrɛdɛ, dɛ dɔ bambile dɛ teŋɛ a ta, dɛ́ ɡel a dɔ tɔnɔ la.”

Kandea waa chɔŋɛ kon ta sɛɡla

(Mak 4:21-25)

16Yeesu berɔ ŋɔ, “Nomɛlbwa aa kandea choŋi dɛ kpɔ kon dɛɛ pi o ta, kɛɛ dɛ kpɔ dɛɛ do mpa lɔɡa. Ba choŋi kandea aa, kon taa ba kpɔ dɛɛ chɔŋɛ ásɛ wɛɛ chaah nɛra bwa. 17Komɛlbwa waa sɔah la ɛɛ le bochaahnee ba nao. Waa bwa baa tɔ a ta la ɛɛ ba leo nɛra jemɛ. 18Anomanta, hé no kɛrɛdɛ dɛ́ jemɛ waa nɔ mun. Dɛ he wono no a mun aa, mɛɛ ja heyaa anee, dɛkalkɛŋɔ naate waa dɔa la, baa jao anee ó dɔ kohona. Kɛ naate waa wola komɛlbwa dɔe la, tama kwaraa waa dɔa la ɛɛ le o nɔn taa.”

Yeesu nya ne o nimanar

(Mat 12:46-50; Mak 3:31-35)

19Yeesu nya ne o nimanar la bela waa lole la, kɛ nɛnlaa la nomanta, ba ta wone tel o be. 20Anee nomɛl ŋɔ o be ŋɔ, “He nya ne he nimanar cheɡɛ buse dɛɛ nyin ba nae.”

21Belaa Yeesu ŋɔ ba be ŋɔ, “N nya ne n nimanaree nɛra baa dɛ no Korowii Waa dɛɛ teŋɛ a ta la.”

Yeesu sɔɔh peujen bɛl nyoa

(Mat 8:23-27; Mak 4:35-41)

22Awola bɛl, Yeesu ne o habɔteŋra la kaa jo ɡbera bini, asɛ o ŋɔ ba be ŋɔ bá kaa moo baŋ, asɛ ba taɡɛ ɡbera la do. 23Baa tawa dɛɛ kaa la, Yeesu chɔ dom ɡbera la bini. Buɡ la ta, dɛ peujen bɛl dɛ ta dɛ kpɔ nehɛma dɛɛ jo ba ɡbera la bini, asɛ ɡbera la ɛɛ ba mora.

24Anee o habɔteŋra la chumu dɛ ŋɔ, “Nomoa, ya serewɔ tonɛ!”

Belaa o ir dɛ kɔr peu la ne nehɛma la, asɛ a hel, asɛ bɔr hel kerker ken. 25Bɔr aa hela la, o bɔɔ o habɔteŋra la ŋɔ, “Ɛrɛɛ haa wola men yarada nɔɔ?”

Ba ɔmɔ, ba bwa bwara hwah, asɛ baa bɔɔ dɔŋa ŋɔ, “Nɛn besoo siwii nɔ, wɛɛ bol waa peu ne nehɛma ɛɛ no o wobol nɔɔ?”

Yeesu chah baa bɛl kwaa aa dɛ ir o nɛ

(Mat 8:28-34; Mak 5:1-20)

26Yeesu ne o habɔteŋra la tawɛ ɡbera kaa Galilia Moo la baŋ, Gerasa harɛ ta. 27Yeesu aa le ɡbera la bini la, baa bɛl waa ɛ bwɛɛ la te kwa aa dɛ ir o nɛɛ baa chemo. Dɛ kwaa la aa lɔ o nɛɛ biɡro, asɛ o foo o laala ta, dɛ chwa le dem dɛ ka so lala huɡribɔr. 28Gɛ baa nɔ aa na Yeesu la, o chwao dɛ ba ɡuŋi o sie, dɛ kpɔ takpeɡ ŋɔ, “Yeesu, Nemenɛ Korowii Bie, bɔkwaa hɛɛ nyin n be nɔ? N dɛ soŋe, bɛ men weweele do.”#Mak 3:11 29Pɛɛ laa baa la do lɔŋɔ la, dɛkalkɛŋɔ dɛ Yeesu tɔ sie ŋɔ kwáa la le o nɛ. Gɛɛ kwaa la yon dɛɛ ir o nɛ, asɛ baa lawɔ dɛɛ doo jɔɡrɔre. Ba doo kpɛɛ ɡe aa, ɡɛɛ o yon kuuɡa, asɛ kwaa la yon kaa o ne pua hɛŋle ɡbo harɛ ta.

30Belaa Yeesu bɔɔro ŋɔ, “He sɔne ɛrɔɔ?”

Asɛ o ŋɔ, “N sɔne Dɔm.” Dɛ kwaa la warɔ pirim dɛ do o nɛ, a waa o ŋɔ o sɔne Dɔm la. 31Anee kwaa la soŋe Yeesu ŋɔ o bɛ an doŋi ka ta bela baa dɛ ba wechɔɡ-ɛɛra bwa hɔhɔrɔwa doe la.

32Bela la, dɛ parakooni damanta ane lɔ diŋɡoŋ bɛl ta dɛɛ di. Anee kwaa la soŋe Yeesu ŋɔ ó ɡel a kaa parakooni la nɛ, asɛ o tɛa ŋwɛnɛ. 33A le baa la nɛɛ dɛ ka jo parakooni la nɛ, asɛ parakooni damanta la bwa chwa biribiribiri, dɛ wili diŋɡoŋ la dɛ ka lee moo ta dɛ serewe kwaraa.

34Belaa nɛra baa dɛ nyiŋi parakooni la aa na waa aa chiɡa la, ba chwa dɛ la bwɛɛ la ta, ne daamune aa bɛne bela la ta, dɛ ka bol waa aa chiɡa la bela tena be. 35Bela tena aa noa la, ba le ba bwɛɛre ta dɛ ba na waa aa chiɡa la. Baa ba Yeesu be la, dɛ baa la kondamanta fa aa lɔ o nɛɛ la, dɛ o kwaa la bwa kaalɔ, o liire ba harɛ, o do laala dɛ so Yeesu sie. Baa na ɡɛ waa nɔ la, ba ɔmɔ. 36Nɛra baa lɔ bela dɛ na ɡɛ Yeesu aa chah baa la kwaa fa aa lɔ o nɛɛ la bol a waa ba bwɛɛ tena la aa ba bela la be. 37Yeesu aa ɛ ɡɛ la, nɛra baa le baah bela la soŋo ŋɔ ó le ba harɛ ta dɛ kaa, dɛkalkɛ dɛ ɔmee tenten chole ba nɛ, asɛ o jo ɡbera la bini dɛ kaa.

38Yeesu aa dɛ kaa la, anee baa la kwaa fa aa lɔ o nɛɛ la soŋo ŋɔ, “Gel n ne he kaalɔ.” Waa ŋɔ ɡɛ la, Yeesu ŋɔ o be ŋɔ, 39“Kaa he nɛra be dem, dɛ́ ka bol wejena Korowii aa ɛa tɛɛ la.” Baa la laŋɔ dɛ ka bol waa Yeesu aa ɛa tɛo la bwɛɛ la bwa ta.

Bitolo bɛl waa sewa ne hanweelate bɛl wa

(Mat 9:18-26; Mak 5:21-43)

40Yeesu aa bera kaa moo la baŋ la, nɛra baa lɔ bela la jaamo silɛɛ ne, dɛkalkɛ dɛ ba soɡo dɛɛ kpao. 41Belaa cheremi dea nomoa bɛl baa dɛ yerɔ Jaerɔs ba, dɛ ba ɡuŋi Yeesu sie, dɛ soŋo ŋɔ o dɛ nyinu o dem. 42Dɛ ɡɛ baa nɔ bibeŋkpoŋ waa dɔɔ, o ɛ bihaah dɛ di bene fi dɛ anɛ bwara dɛ weo wɛɛ ba sewa.

Yeesu aa dɛ kaa la, dɛ nɛnlaa bane teŋɛ o nɛ, dɛ fiilo do baah ta dɛɛ taɡɔ. 43Dɛ haah bɛl ɡe lole chal ɛɛ fuɡo bene fi dɛ anɛ, o chah, o komɛlbwa tonɛ tɛɛɡa tena be. Kɛ nomɛlbwa ta wone chaoh. 44O jo nɛra la baah ta dɛ ka che Yeesu habɔɔ dɛ leɡe o batakaare nyoa. Buɡ la ta, dɛ chal la aa dɛ fuɡo la teŋo.

45Asɛ Yeesu bɔɔ ŋɔ, “Umee leɡ mɛ nɔɔ?” Waa bɔɔra la, nomɛlbwa ta sɛɛh.

Anee Pita ŋɔ, “N Dɔɔ, nɛnlaa nɔ aa bare cheme dɛɛ taɡɛ dɔŋa nɔ, anee he berɛ dɛɛ bɔɔ naate waa leɡe naa?”

46Anee Yeesu ŋɔ, “N nao kɛ nomɛl leɡ mɛ, dɛkalkɛ kpeɡri ane le n bini.”

47Belaa haah la aa naa kɛŋɔ waa won kpɔ o te sɔh la, o kpɔ bochela dɛ ka ɡuŋi Yeesu sie nɛra la bwa siwi ta, dɛ baɡle waa la aa bala o leɡo la, ne ɡɛ o weela la aa kaala buɡ la ta la. 48Anee Yeesu ŋɔ o be ŋɔ, “Tolo, he yarada haa yarada mɛ la ɡelɔ he ɡbaŋre. Dɛɛ la. Korowii tɛɛ bosɔɔhna.”

49Yeesu nyoa taa lɔ waa waa dɛ bol la ta la, torome le cheremi dea nomoa la dem dɛ ba ŋɔ nomoa la be ŋɔ, “He bihaah la sewɔ. Bɛ berɛ ha nomoa la kpa.”

50Ajaah Yeesu no waa la torome la aa baa bol la, anomanta, o ŋɔ Jaerɔs be ŋɔ, “Bɛ ɔmɛ, kɛ yarada mɛ. Wɛɛ berɔɔ dɔ bokpeɡa ja.”

51Yeesu aa tel dem bela la, o ta ɡelɛ nomɛlbwa ja o nɛɛ dɛ jo bela bie la aa chɔa la, nemenɛ Pita ne Jɔn ne Jems ne bie la nya ne o mɛɛ ɡbosoroo. 52Dɛ nɛra baa lɔ bela la koh bie la waa dɛɛ wi. Anee Yeesu ŋɔ ba be ŋɔ, “He bɛ wi. Bie la ta sewɛ, domii o chɔ!”

53Yeesu aa ŋɔ ɡɛ la, dɛ ba dɛ mamɔ, dɛkalkɛ dɛ ba jemɔ kɛ o sewɔ. 54Waa ba bie la jwɛɛh la, o lawɛ o nɔn dɛ kpɔ takpeɡ ŋɔ, “Bie, ir!” 55Waa ŋɔ ɡɛ la, bie la hweera berɔ ba ja, asɛ o fuɡri ir buɡ la ta, asɛ Yeesu ŋɔ bá nyin kwaa tɛo o di. 56Bie la nya ne o mɛɛ bwa bwara yɔrɔ, asɛ Yeesu kah ba ŋɔ ba bɛ nomɛlbwa be waa aa chiɡa la bol.

Currently Selected:

Luk 8: mzw

Highlight

Copy