Luk 7

Rom sooja nomoa bɛl bonɔɔ chaeh

(Mat 8:5-13)

1Yeesu aa bol a ɡɛ waa nɔ bwa baɡle nɛra la tonɛ la, o le bela dɛ kaa Kapeeneɔm. 2Dɛ Rom sooja nomoa bɛl lɔ bela dɛ dɔ bonɔɔ bɛl dɛɛ nyin o waa kɛrɛdɛ. Dɛ bonɔɔ la bwara dɛ weo, a ka jɛɛ ken o sewɛ. 3Sooja nomoa la aa no Yeesu waa la, o tomɛ Juu tena nomonome bane ŋɔ bá ka soŋo ó ba chah o bonɔɔ la tɛo. 4Baa la Yeesu be la, ba soŋo kohona ŋɔ ó ba chah nomoa la bonɔɔ la tɛo, dɛ ŋɔ o be ŋɔ, “A wer kɛŋɔ he cha nomoa nɔ, 5dɛkalkɛ o dɛ nyin ya Juu tena wa, hale o do cheremi dea tɛ yaa kwara.” 6Baa ŋɔ ɡɛ la, Yeesu iro, o ne baa kaa.

Aa ka tama o tel dem bela la, sooja nomoa la tomɛ o daamanar o be ŋɔ bá ba ŋɔ o be ŋɔ o ta chɛɛ kɛ Yeesu ba o dem, anomanta, o bɛ o te koh, 7dɛ ŋɔ o ɡbaɡba ɡe ta chɛɛ kɛŋɔ o ba Yeesu be. Kɛ Yéesu bol waa waa ba o dem dɛ́ ba bol la ásɛ o bonɔɔ la ɡbaŋre. 8O bolɔ ŋɔ, “N ɛ nɛn maa lɔ nomonome bane lɔɡa, dɛ dɔ soojare ba do n ɡe lɔɡa. Mɛɛ wonoo ŋɔ bɛl be ŋɔ, ‘Ba,’ ó ba, dɛ́ berɛ ŋɔ onfale be, ‘Kaa,’ ó ɡe kaa. Mɛɛ wonoo ŋɔ n bonɔɔ be ŋɔ, ‘Ɛ ken tɛ mɛ,’ ásɛ o ɛ.”

9Yeesu aa no waa nɔ la, o nyoa kpoo, yarada waa yaradao la wa, asɛ o berɛ habɔɔ dɛ ŋɔ nɛnlaa baa teŋɛ o nɛɛ la be ŋɔ, “Kasinteŋ, n ta nɛn waa yarada mɛ ken nae bwa. N ta o yarada dɔŋ nae Israel tena kwaraa bini.” 10Belaa nɛra sooja nomoa la aa tom ba la berɛ kaa o be. Baa tel o dem la, ba nao kɛŋɔ o bonɔɔ la ɡbaŋrɔ.

Yeesu ir luhaah bɛl bie seo ta

11Aa ɛ tama la, Yeesu leɔ dɛɛ kaa bwɛɛ bɛl baa dɛ yerɔ Neen. Waa dɛ kaa la, dɛ o habɔteŋra ne nɛnlaa bane ja o nɛ. 12Waa dena dɛɛ tel bwɛɛ la ta la, dɛ ba cheɡɛ baa bɛl waa sewa dɛɛ kaa ka huɡe. Dɛ ɡɛ nɛn waa sewa la ɛ luhaah bɛl bibeŋkpoŋ waa dɔa. Dɛ bwɛɛ la tena bane teŋɛ luhaah la nɛɛ pirim. 13Yeesu aa na luhaah la, o waa do o sum, asɛ o ŋɔ o be ŋɔ, “Dɛɛ berɛ wii.”

14Waa ŋɔ ɡɛ la, o kaa leɡe lale la baa fɔrɔwo la, asɛ nɛra baa cheɡɔɔ la jaɡɛ che bobeŋkpoŋ, asɛ o ŋɔ, “Bonɔɔ, n ŋɔ hé ir!” 15Belaa bonɔɔ la fuɡri ir so, dɛ den dɛɛ bol wa. Asɛ Yeesu ŋɔ haah la be ŋɔ, “He biee la.”

16Ɔmee lawɛ nɛra baa lɔ bela la bwa, asɛ baa kpɛɛ Korowii dɛɛ ŋɔ, “Korowii keamejen bɛl ba ya bini bonɔ! Korowii balɔ dɛ́ ba lɛ o nɛra!” 17Yeesu waa waa ɛa la perɛ Juda harɛ ne harɛre aa baro cheme la bwa ta.

Yeesu ne Jɔn waa dɛ sɔ nɛra Korowii nee wa

(Mat 11:2-19)

18Anee Jɔn waa dɛ sɔ nɛra Korowii nee la habɔteŋra ba Jɔn be dɛ ka bol a ɡɛ waa nɔ bwa baɡlo. 19Asɛ o yerɛ ba bini banɛ, dɛ tom ba Yeesu be ŋɔ bá ka bɔɔro ŋɔ onee nɛn Korowii aa baɡɛ nyoa ŋɔ wɛɛ ɡeloo o ba la aa, kɛɛ o laa ɔ, ásɛ baa nyiŋi naate habɔɔ?

20Jɔn habɔteŋra la aa ba Yeesu be la, ba ŋɔ o be ŋɔ, “Jɔn waa dɛ sɔ nɛra Korowii nee laanee tomɛ yaa he be dɛ ŋɔ yá ba bɔɔre ŋɔ, henee naate Korowii aa baɡɛ nyoa ŋɔ wɛɛ ɡeloo o ba la aa, kɛɛ he laa ɔ, ásɛ yaa nyiŋi naate habɔɔ?”

21A ɡɛ saŋ la dɛ Yeesu chah weela tena taeh, dɛ doŋi kwaa aa dɛ ir nɛra nɛ a le ba nɛ, asɛ dɛ ɡel nyoŋa ɡee na bɔr. 22Anee Yeesu ŋɔ Jɔn toroma la be ŋɔ, “Hé ka bol Jɔn be waa haa baa na ne anɔ la haa baa no. Hé ŋɔ o be ŋɔ nyoŋa dɛ na bɔr, boobie ɛɛ valɛ, asɛ nɛra weechɔɡa aa chɔɡ ba bwadabii la ɡe bwara kwaa. Hé ŋɔ o be ŋɔ amumure dɛ no wa, lala ir seo ta, asɛ nyaara ɡe dɔ Amanesoma la dɛɛ no.#Aes 35:5-6 23He naate haa wola men tɔŋle la, he na som.”

24Jɔn toroma la aa kaala la, Yeesu bol Jɔn waa nɛnlaa la be ŋɔ, “Haa la pua hɛŋle ɡbo harɛ la ta bela la, bɔkwaa he fe ɛɛ nyin kɛ he na laɔ? Kpɔɡ bɛl peu aa dɛ ta wɛɛ yiiɡi waa he la bela kɛɛ? 25Dɛ ɡɛ laa ɡe aa, dɛ bɔkwa tenee he la ŋɔ he ka nyiŋi ɔ? Nɛn waa do laaladɛɛɡaa he la ka nyiŋi kɛɛ? Nɛra baa dɛ do laaladɛɛɡa dɛɛ di ba tetookondikwaa la, koodemii ba do. 26Hé den baɡ mɛ, bɔkwa tenee he la bela ka nyiŋi ɔ? Korowii keamee kɛɛ? Kasinteŋ, Korowii keamee he na la, kɛ o ɡwaa Korowii keame kwara. 27Jɔn nɔ waa ba chwerɛ Korowii Tɔn bini ŋɔ,

‘Korowii ŋɔ, “Mɛɛ tomɛ n toromee ó tɔ he sie

dɛ́ kwaa ŋwɛnɛ tɛɛ” ’ la.#Mal 3:1

28N dɛ ŋɔ he be, ba lolɛ nɛnjena harɛ nɔ ta, kɛ Jɔn ɡwaa ba bwa. Kɛ nomɛlbwa waa ɛ bechala Korowii Kora la ta te berɔ ɡwaalo.”

29Nɛmpɛɛne la ne toɔ lɛɛra la kwaraa baa dɛ bɔ nɛra apoo aa no Yeesu waa la, ba sɛoh ŋɔ Korowii waa dɔ kasinteŋ. Gɛ nɛra nɔɔ Jɔn fa aa sɔ Korowii nee la. 30Kɛ ba nomonome ne Farisii tena la ne Tɔnjerema la te vɛh Korowii waa aa wera tɛɛ ba la. Dɛ ba te fa ta ɡelɛ Jɔn sɔ ba Korowii ne.

31Yeesu berɔ ŋɔ, “Bɔkwa konee mɛɛ ba fini nɛra nɔ kpɔe dɛ maɡɔɔ? Bɔkwa nɛraa ban ɔ? 32Ba do kɛŋɔ bechale bane aa dɛ hɛlɛ fɔɡbaah, asɛ bane ŋɔ ba bala be ŋɔ,

‘Ɛrɛɛ ya ɡo silɛɛ yela

he sie ta lɛɛ he sa,

ya berɛ ta wiile ɡe,

he loo ta kui he wi nɔɔ?’

33Jɔn waa dɛ sɔ nɛra Korowii nee la aa bala la, dɛ waa sen nyɔ, dɛ yon vɔwɛ nyoa, asɛ he ŋɔ kwaa dɛ ir o nɛ! 34Asɛ Men Nɛn Bie ɡe aa bala nɔ, n dɛ di kwaa dɛɛ nyɔ sen, asɛ he ŋɔ, ‘Hé na baa nɔ! Kondikondidii ne sennyɔɔree on. Toɔ lɛɛra baa dɛ bɔ nɛra apoo ne wechɔɡ-ɛɛraa o daamanar.’ ” Yeesu aa bol ɡɛ tonɛ la, o ŋɔ, 35“Wejereme bɛlbwa we-ɛɛla taa a che baa jemɛ kɛ o ɛ wejereme.”

Yeesu la Seemɔn waa ɛ Farisii te dem

36Farisii te bɛl yerɛ Yeesu ŋɔ ó ba ó ne o di kwa, asɛ Yeesu la o dem ba ka so tiɡ ta, dɛɛ ba kwaa dii. 37Bwɛɛ la ta la, dɛ haah bɛl dɛ bɔ jwamane dɛ do bela. Waa noa kɛ Yeesu lɔ Farisii te la dem dɛɛ di kwaa la, anee o ka kpɔ nosɔɔhsoma loŋ bɛl del, 38dɛ ba ɡuŋi Yeesu jwɛh dɛ wi ta o napaala ta, dɛ kpɔ o nyumpona fee o sinii la waa wia ta Yeesu napaala ta la, dɛ mo o napaala, dɛ fuɡe nosɔɔhsoma la fɔɡla.

39Belaa Farisii te la waa yerɛ Yeesu ŋɔ ó ba di kwaa la aa na a ɡɛ waa nɔ la, o lii o nyu bini ŋɔ, “Baa nɔ fe ɛ Korowii keame tenten naa, o fe jemɛ haah nɔ hahsoo waa dɛ leɡo nɔ. O fe jemɛ o wechɔɡa waa lɔ a ta bwɛɛ nɔ ta.”

40Anee Yeesu ŋɔ o be ŋɔ, “Seemɔn, n dɔ waane dɛ́ bol he be.”

Asɛ baa la ŋɔ, “Nomoa, bol.”

41Belaa Yeesu sɛɡlo ŋɔ, “Nɛra banɛ banee di baa bɛl kem. Ba bwa di o kem te, kɛ bɛl kwaa ɡwaa o dɔŋ kwaa kera fi. 42A ɡɛ kema la nɛra banɛ la aa dia la, ba bɛlbwa ta wone bɔ, asɛ o kpɔ kɛ ba. A ɡɛ waa nɔ aa do ɡɛ nɔ, ba bini umee hɛɛ lii kɛŋɔ wɛɛ nyin baa la waa kohonaa yɔ?”

43Anee Seemɔn chaŋo ŋɔ, “N dɛ lii kɛ naate o kem aa kana la, onee dɛ́ nyin baa la waa kohona.”

Asɛ Yeesu ŋɔ, “Kpelaa he ŋɔ.”

44Yeesu aa ŋɔ ɡɛ la, o berɛ sie ta haah la be, dɛ ŋɔ Seemɔn be ŋɔ, “Kɛ he na haah nɔ kenɛ? Maa ba he dem bonɔ la, he ta men nee tɛɛ ń sarame n nakpale. Kɛ haah nɔ te wio ta n nakpale ta, dɛ kpɔ o nyumpona feera kɛrɛdɛ ken. 45He ta men lɛɛ silɛɛ ne dɛ mo n lwɛɛma. Kɛ maa baa so nɔ bwa, o ta n napaala moe ɡelɛ bwa. 46He ta men nee tɛɛ ń sarame n nakpale ɡɛɛ mɛɛ bol noo maa kpɔ fɔɡle n nyu wa aa? Kɛ o te fuɡe nosɔɔhsoma fɔɡle n nakpale. 47Anomanta, mɛɛ dii kasinteŋii. Nyina haah nɔ aa nyin n waa kohona nɔ baɡlɔ kɛ Korowii kpɔ o wechɔɡa damanta waa ɛa la bwa kɛo. Naate waa wola wechɔɡa ɛɛ kohona a ɛ kɛŋɔ he kpɔa kɛo la, nyina waa dɛ nyin he waa la aa kan do. Waa Korowii jam kohona kɛ nɛn waa ɛ anjena la.”

48Belaa Yeesu ŋɔ haah la be ŋɔ, “Korowii kpɔ he wechɔɡa kɛɛ.”

49Waa ŋɔ ɡɛ la, anee nɛra baa soɡe tiɡ ta bela dɛ ja o nɛɛ la ɛɛ lii ba nyu bini ŋɔ, “Nɛn besoo baa nɔ o kpɔ wechɔɡa dɛɛ kɛ nɛra nɔɔ?”

50Asɛ Yeesu ŋɔ haah la be ŋɔ, “He yarada haa yarada mɛ nɔ lɛɛ. Ir dɛɛ la. Kórowii tɛɛ bosɔɔhna.”

Currently Selected:

Luk 7: mzw

Highlight

Copy