Luk 12

Jae Yeesu aa ja nɛra

(Mat 10:26-27)

1Aa ɛ tama la, nɛra kaɡboŋa baa cheme Yeesu sie. Baa wara nomanta, dɛ ba dɛ tiɡri dɔŋa nakpale ta. Belaa Yeesu tɔ sie bol waa o habɔteŋra la be dɛ sɛɡ ba ŋɔ, “Hé nyiŋi he te kɛrɛdɛ Farisii tena iisi wa. Nɛra sie baa nyiŋi dɛɛ ɛ wa. 2Wobɛlbwa nɛra aa tɔ a ta la ɛɛ le baŋee, ásɛ waa aa sɔah bwa ɡe le nɛra jemɛ. 3Taraken waa haa bola biro ta la, aa le bochaah taa ba no, ásɛ waa haa sɔah bol nɛn be dea he ne o ɡbo la, baa bola nɛnlaa baahnee.

4Yabala, n dɛ ŋɔ he be ŋɔ, he bɛ nɛra baa dɛ ba wona kpo heyaa baa wola won ɛ waane kpa la ɔmɛ.#Mat 10:28-31 5Kɛ mɛɛ baɡle heyaa naate aa chɛ kɛŋɔ hɛ́ɛ ɔmɛɛ. Hɛ́ɛ ɔmɛ Korowii waa dɔ kpeɡri dɛ́ won kpo heya, dɛ́ berɛ won kpɔ heyaa kaa Bɔnsam nii ta la. Onee chɛ kɛŋɔ hé ɔmɛ. 6He nao kɛ pɛtoprɛ ta yoɡ dɔe, kɛ Korowii ta beŋkpoŋ kwaraa waa soɛh. 7He nyumpona kwara, Korowii jemɛ a nyoa. He bɛ dɛɛ ɔmɛ. He ta pɛtoprɛ ɡwaalɛ wobɛlbwa ta naa?

8Hé ɡel ń ŋɔ he be, nomɛlbwa waa won che nɛra baah ta dɛ́ sɛh ŋɔ o ja n nɛɛ la, awola Korowii aa ba dɛ ba bol nɛra bwa waa dɛ́ pa bole la, Men Nɛn Bie la ɡee yerɛ naate sɔn nyundua toroma siee kɛ o ja n nɛ.#Mat 10:32-33 9Nomɛlbwa ɡe waa vɛɛh mɛ nɛra baah ta, dɛ ŋɔ o ta n nɛɛ jae la, awola Korowii aa ba dɛ́ ba bol nɛra bwa waa dɛ́ pa bole la, n ɡee vɛh naatee nyundua toroma sie ŋɔ n ne o laa. 10Nomɛlbwa waa bol waa yaɡɛ Men Nɛn Bie la, Korowii ɛɛ kpɔɔ kɛo, kɛ naate waa ɛ Korowii Domadɛɛɡe la nɛnhɛla la te, Korowii aa o wechɔɡaa kpɔ kɛo.#Mat 12:32

11Dɛ ba yerɛ heyaa ka che cheremi deene bini ne harɛ nɔ ta nomonome sie naa, he bɛ ɡel waa haa bol dɛ lɛ he te la hiah heya,#Mat 10:19-20; Luk 21:14-15 12dɛkalkɛŋɔ Korowii Domadɛɛɡe la ɛɛ baɡle heyaa buɡ la ta, ɡɛ haa dɛ ba bola.”

Suuɡate ɡɛne bɛl sɛɡla

13Belaa baa bɛl waa ja nɛnlaa la nɛɛ ŋɔ Yeesu be ŋɔ, “Nomoa, ŋɔ n dɔɔ be ásɛ o ɡel ya bɔne kpanjoɡo ya mɛɛ aa sewa dɛ ɡel tɛ yaa a do o be la bini.”

14Asɛ Yeesu ŋɔ o be ŋɔ, “Nɛmbaa, umee kpɔ mɛ cheɡ ŋɔ ń bol he waa dɛ́ bɔne he kapɛrɛ ɔ?” 15O ŋɔ ba be ŋɔ, “Hé ɡel he sie chɔ harɛ he nyiŋi kɛrɛdɛ dɛ bɛ kwaa dɛɛ kam, dɛkalkɛŋɔ nɛwɛnyini kondɔɔh kohona laa o mkpa.”#1Ti 6:6-11

16Yeesu sɛɡ ba ŋɔ, “Suuɡa te bɛlee fa lole o koo kondikwaa ɛ taeh. 17Belaa o so dɛ lii o nyu bini ŋɔ, ‘Ɛrɛɛ mɛɛ ba ɛɛ yɔ? Bela maa chea do la aa kanɛ.’

18Anee o ŋɔ, ‘Mɛɛ paɡre n dɔndɔŋre nɔɔ dɛ́ ɛa a do kan, ásɛ n mea ne n kwaa bwa dɔ bɔr jo a bini.’ 19O lii waa o nyu bini dɛ ŋɔ, ‘N dɔ kwaa dɛ́ di la sie, mɛɛ diu dɛ́ lɛ n sie dɛ́ so dɛɛ onɛ.’#Wej 2:1

20Anee Korowii ŋɔ o be ŋɔ, ‘Gɛne! Fini jwaana nɔ ne hɛɛ sewɔɔ, ásɛ kwaa haa kwaara cheɡ la, lee hɛɛ ba a bɔr nae jaɔ?’ ”#Jer 17:11

21Waa Yeesu aa bola dɛ kpɔ teŋe ɡɛ waa la ta laanee kɛ, “Gɛɛ aa ba nɛra baa kwaa kondɔɔh dɛɛ cheɡ ba te harɛ ta bonɔ baa wola kembɔr bɛlbwa dɔe Korowii be la nɛɛ doe.”#Mat 6:19-21

Hé yarada Korowii

(Mat 6:25-34)

22Yeesu ŋɔ o habɔteŋra la be ŋɔ, “Anomanta, n dɛ ŋɔ he be ŋɔ, he bɛ ɡel he sie beɡre he soɡa bini kwaa haa di ne yale haa tɔ wa. 23He mkpa ɡwaa kondikwa, he bwadabii ɡe ɡwaa yal. 24Hé ta sie nyiŋi jumbii na. Aa kwaa du, aa komɛ, a ta bela aa komɛ kwaa dɛɛ do dɔe. Korowiirii dɛɛ tɛa kondikwa. He ɡwaa jumbii bam! 25He bini umee dɛ́ won kpɔ sibeɡra ŋwɛnɛ bɛl dɛ́ kpɔ tɔpebeŋkpoŋ ja o mkpa ta nɔ? 26Dɛ haa won ɛ a ɡɛ wetamaa nɔ ɡba aa, ɛrɛɛ he ɡel he sie ɛɛ beɡre anɔ la aa kaa waɔ?

27Hé ta sie nyiŋi ɡɛ kpɔɡ bini koŋkwaa dɛ fe aa, a fee yon do wer la dɛ́ na. Aa toma ɛ dɛɛ koh, aa yabi ta. Kɛ n dɛ ŋɔ he be ŋɔ, Kooro Solomɔn ɡba ne o kondɔɔh bwa, o laala ta wer doe kɛ a ɡɛ kwaa nɔ bwa. 28Kpɔɡa haa naa a do wer fini, ásɛ kere ɡbo dɛ a serewɔ ba fuah nɔ, dɛ Korowii ɡelɔ a do wer ken naa, ɛrɛɛ waa wola won tɔ heyaa yal ɡwaala ɔ? He yarada aa kanɛ kwara! 29Anomanta, he bɛ ɡel he sie beɡre hɛɛ nyin anɔ la haa di ne anɔ la haa nyɔ. 30Nɛra baa wola Juu tena ɛɛ baa wola Korowii tomɛ la liiree dɛɛ do a ɡɛ kwaa nɔ ta. He Mɛɛ waa lɔ nyundua la jemɔ kɛ he dɛ nyin anɔ bwa. 31Hé ɡel he sie beɡre Korowii Kora la ta, ásɛ o kpɔ anɔ haa dɛ nyin nɔ bwa tɛ heya.”

Korowii doa kondɔɔh

(Mat 6:19-21)

32Anee Yeesu berɛ ŋɔ, “Anomanta, Korowii toroma, haa kanɛ, kɛ he bɛ dɛɛ ɔmɛ, dɛkalkɛ a dɛ ɛ he Mɛɛ waa lɔ nyundua la silɛɛ kɛ he ja o Kora la ta. 33Hé yoɡ kwaa haa dɔa, ásɛ dɛ kpɔ a suuɡa la kɛ nyaara. He ɛ ɡɛ naa, hɛɛ dɔ pure aa wola chɔɡ ne kondɔɔh aa wola tonɛ bwa Korowii doa. Belaa kondɔɔh aa wola mule, dɛkalkɛ ŋwɛɛra aa won la ka ŋwɛa, kwaa ɡe aa wola won chwea. 34Bela he kondɔɔh aa lole laanee he liire ɡe do.

Bonɔɔna baa dɔ liire dɛɛ kpa

35Hé kpɔ he te dɛɛ kpa toma ɛɛ. Hé kpɔ he te dɛ́ ɡel he kandere ɛɛ hɔ,#Mak 13:34-37 36kɛŋɔ bonɔɔna ba dɔɔ aa kaa hanfale chema asɛ ba so kpao, ásɛ dɛ o balɔ dɛ ba lɔ ɡbera aa, buɡ la ta, ba yao la. 37Bonɔɔna baa soɡa kpa ba dɔɔ, ba ta dom chɔe o ba puu ba la, ba sie dɛ lɛ. Kasinteŋ, n dɛ ŋɔ he be, wɛɛ kpɔ o tenee dɛ́ yer ba so tiɡ ta, ásɛ dɛ tɛɛ ba kwaa ba di. 38Dɛ ba dɔɔ la balɔ jwaana kɛɛ harambaŋa dɛ ba puu ba kɛ ba soɡo kpao waa, ba sie ɛɛ lɛo. 39Hɛ́ɛ no. Dɛ dem te fe jemɛ ɡɛ saŋ ŋwɛɛ aa ba ŋwɛo waa, o fe aa ɡel ó won ba jo o dem dɛ́ ŋwɛo. 40Gɛɛ chɛ kɛŋɔ hé ɡe kpɔ he te, dɛ́ so kpa, dɛkalkɛ piɡraa Men Nɛn Bie la ɛɛ ba ba piɡri heya.”

Kasinteŋ te ne kasinteŋ te bɛ dɔe wa

(Mat 24:45-51)

41Anee Pita ŋɔ, “N Dɔɔ, yanee hɛɛ sɛɡle nɔ kɛɛ nomɛlbwa jao wɔ?”

42Asɛ Yeesu chaŋo ŋɔ, “Bonɔɔ waa dɔ kasinteŋ dɛ dɔ liire la nɔn taa o dɔɔ kpɔ o dem tena dɛɛ do, dɛ ŋɔ bɔr dɛ maɡre aa, ó tɛɛ ba kondikwa. 43Dɛ bonɔɔ la dɔɔ la baa puu, dɛ o dɛ ɛ ɡɛ waa kpɔa do o nɔn ta la aa, bonɔɔ la sie ɛɛ lɛo. 44Kasinteŋ, n dɛ ŋɔ he be, o dɔɔ la ɛɛ kpɔ o komɛlbwaa do o nɔn ta ŋɔ wɛ́ɛ nyiŋi a ta. 45Kɛ dɛ bonɔɔ la ta ɡɛ liire, dɛ ŋɔ, ‘N dɔɔ ŋwɛnɛ nɔ waa kaala nɔ, waa ba taraken,’ dɛ do o dɔŋa bonɔɔna la ne toli baa kaa la nɛɛ dɛɛ lɔɔ, dɛ di kwaa dɛ nyɔ sen dɛɛ dɛɛ raa, amɔ wɛɛ na waa. 46Tɔpebeŋkpoŋii o dɔɔ ɛɛ ba bala ba piɡru, ásɛ dɛ ba tɛr o deŋne taeh kɛŋɔ baa dɛ ɛ nɛra baa wola Korowii yarada la ken.

47Bonɔɔ waa jemɛ ɡɛ o dɔɔ aa dɛ nyin, kɛ dɛ vɛh o te kpɔe dɛ ɛ ɡɛ tɛo la, o dɔɔ ɛɛ ɡeloo ba lɔɔro taeh. 48Kɛ bonɔɔ waa wola ɡɛ o dɔɔ aa dɛ nyin jemɛ, dɛ ɛ lɔɔra waa la, baa lɔɔroo tamaa ken dɛ́ kpɔ tɛr o deŋne. Nɛn Korowii aa chao o jemɛ waa kohona la nɛɛ o kpɔ wedamanta ɛɛ dawɛ. Nɛn baa kpɔ waa do o nɔn ta kohona la bee baa bɔɔ waa kohona.

Gɛ Yeesu aa bala ásɛ nɛra baah peɡri

(Mat 10:34-36)

49N balɔ dɛ́ ba kpɔ nii ta harɛ nɔ ta ó fuh. Dɛ nii la fe dɔɔ dɛɛ hɔ aa, a fe ɛɛ do n somee taeh. 50Wahala ane chɔ n sie a chɛ kɛŋɔ bá do mɛ a ta kɛŋɔ ba dɛ sɔ nɛn Korowii ne aa, ba yon doo nee ta la. Dɛ n ta a ɡɛ wahala la nae tonaa, n bambile ta men sɔɔhnɛ.#Luk 22:42 51He dɛ lii kɛ n ba nyopɛo ne harɛ nɔ ta kɛɛ? Akai, n balɔ ásɛ nɛra ne ba lolanar dɔm. 52Le fini dɛɛ kaa, dembeŋkpoŋ nɛra banue aa lɔ o ta la, ba baah dɛ ba pera ásɛ batoro hah banɛ, ásɛ banɛ la ɡe hah batoro la. 53Mɛɛnanar dɛ ba ba bibaala haeh, ásɛ bibaala ɡe hah ba mɛɛnanar. Nyare ɛɛ hah ba bihaahnaa, ásɛ bihaahna hah ba nyare. Haahna ɛɛ hah ba bii haahnaa, ásɛ ba bii haahna hah ba.”#Mae 7:6

Waa mun jema

(Mat 16:2-3)

54Yeesu berɔ ŋɔ nɛnlaa la be ŋɔ, “Dɛ he na baama dɛ kaa mun ta naa, ɡɛɛ he ŋɔ bwaala dɛ ba nɛɛ, dɛ o nɛo. 55He jemɛ bela peu aa le dɛɛ ta he ŋɔ bɔwɔb ɛɛ bao, dɛ o balɔ kpela. 56Nɛra haa dɛ nyiŋi nɛn siebɔr mɔɔ dɛɛ ɛ wa, he won nyundua ne harɛ nyiŋa dɛ́ jemɛ waa aa dɛ ba chiɡa, aah ɛrɛ waa haa wola won jemɛ waa aa dɛ chiɡ taraken nɔ te mun nɔɔ?

57He te aa won nyiŋi dɛ́ na waa aa wera dɛɛ teŋɛ a ta naa?#Mat 5:25-26 58Dɛ he ne he dɔŋ dɔɔ, asɛ o kpɔe dɛɛ kaa kɔɔto aa, larawe naate he ne o pɛ. Dɛ ɡɛ laa, o tel he ne bela aa, kɔɔto nomoa waa dɛ pa bole la dɛ ba he kpɔe dɛ́ tɛ prosiri, ásɛ ba ka doe dea. 59Belaa hɛɛ ba doe ka tel kɛ haa bɔ suuɡa baa dɛ lɛɛ la bwa ka tonɛ, kapɛrɛ ɡba aa wola ka.”

Currently Selected:

Luk 12: mzw

Highlight

Copy