Luk 11

Gɛ Yeesu aa chaɡle Korowii soŋa wa

(Mat 6:9-13; 7:7-11)

1Awola bɛl, dɛ Yeesu lɔ bobɛl dɛɛ soŋe Korowii. Waa tona la, o habɔteŋra la bɛl ŋɔ o be ŋɔ, “N Dɔɔ, baɡle yaa ɡɛ yaa soŋe Korowii, ɡɛ Jɔn aa baɡle o habɔteŋra la.”

2Anee Yeesu ŋɔ ba be ŋɔ, “Dɛ he dɛ soŋe Korowii aa, hé ŋɔ,

‘Ya Mɛɛ haa lɔ nyundua,

henee chɛ duura.

Baɡle he Kora dii harɛ nɔ ta.

3Tɛ yaa ya fini kondikwa,

4dɛ́ kpɔ ya wechɔɡa kɛ yaa, ɡɛ yaa kpɔ

ya dɔŋa wechɔɡa dɛɛ kɛ ba la.

Dɛɛ ke yaa wechɔɡa luɡri ta.’ ”#1Kɔ 10:13

5Ate, Yeesu ŋɔ o habɔteŋra la be ŋɔ, “Hé kpɔ kɛŋɔ he bini bɛl dɔ o dam, dɛ la ka chumu harambaŋa, dɛ ŋɔ o be ŋɔ, ‘N dam, kem mɛ pea atoro. 6N dam bɛl le bobɛl ba choɡ mɛ taraken, n ɡe ta komɛlbwa dɔe dɛ́ tɛo ó di.’

7Dɛ he soŋo ɡɛ naa, wɛɛ wonoo ŋɔ hé ɡelo ŋɔ he bɛ o dom chɔɡ ŋɔ o karɛ o ɡbera o ne o bii chɔ, anomanta, waa won ir dɛ́ tɛɛ komɛlbwa naa? Akai! Waa won ŋɔ ɡɛ. 8Kasinteŋ, dɛ a ka darame la ɡbo wa aa, o fe aa ir dɛ́ tɛɛ komɛlbwa. Kɛ haa wola kaalɛ, dɛ ta che dɛɛ soŋo la nomanta, wɛɛ tɛɛ komɛlbwa haa dɛ nyin laanee.

9Anomanta, ɡɛɛ a do, hɛ́ɛ soŋe Korowii, wɛɛ tɛ heyaa. Hɛ́ɛ nyin he konnyina o be, hɛɛ dɔɔ. Hé swɛɛ siwi dɛɛ lɔ ɡbera, wɛɛ ya heyaa. 10Nomɛlbwa waa dɛ soŋo la dɛ dɔ, asɛ nomɛlbwa waa dɛ nyin o konnyina dɛɛ le o be la, o dɛ tɛo. Gɛɛ Korowii ɛɛ ba ɡbera yae dɛ́ tɛ nomɛlbwa waa dɛ lɔ la.

11He bini umee o bie ɛɛ nyin pɛŋe, ó ka lawɛ harɛkon ba tɛo wɔ? 12Kɛɛ dɛ o dɛ nyin jahal aa, ó ka lawɛ nɔm ba tɛo wɔ? 13Dɛ he wechɔɡ-ɛɛra nɔ kwaraa jemɔ dɛ kpɔ kondɛɛɡa dɛɛ tɛ he bii aa, ɛrɛ waa he Mɛɛ waa lɔ nyundua la te aa wola nɛra baa dɛ soŋo o Domadɛɛɡe la tenee tɛo!”

Yeesu ne Bɛlsebul

(Mat 12:22-30; Mak 3:20-27)

14Dɛ Yeesu dɛ doŋi kwaa aa lɔ baa bɛl nɛɛ o berɛ amumu. Kwaa la aa le baa la nɛɛ la, o bol wa. Nɛnlaa la aa lɔ bela la nyoa kpoo. 15Bane te ŋɔ, “Kwaa aa dɛ ir nɛra nɛɛ bwa kooro baa dɛ yerɔ Bɛlsebul la, onee tɛo kpeɡri wɛɛ doŋi kwaa la.” 16Dɛ bane ɡe dɛ nyin dɛ daahno na, dɛ ŋɔ o be ŋɔ ó ɛ we-ɛɛla ane, ásɛ a baɡle kɛ o le Korowii be kpela.

17Yeesu aa jemɛ waa baa dɛ lii la, o ŋɔ ba be ŋɔ, “Dɛ harɛ bɛl ta tena bini pere anɛ ba ɡbo ɛɛ yo aa, harɛ la dɛ paɡre. Gɛɛ dɛ waane ba lolanar bane bini asɛ ba baah pere anɛ ba ɡbo ɛɛ yo aa, lola la aa won ɛ lola. 18Anomanta, dɛ Bɔnsam kora bini pero baa yo aa, o kora la aa won ɛ kora. Heyaa ŋɔa ŋɔ Bɛlsebulee tɛ mɛ kpeɡri n won kwaa aa dɛ ir nɛra nɛɛ doŋa. 19Dɛ Bɛlsebul nɛɛ n che dɛɛ doŋa aa, a wer. Aah dɛ he ɡe, umee tɛ he habɔteŋra nɔ kpeɡri ba won a doŋa ɔ? He ɡbaɡba habɔteŋra la we-ɛɛlaa dɛɛ baɡle kɛŋɔ he kono kwara! 20Korowii kpeɡri nee mɛɛ doŋi kwaa aa dɛ ir nɛra nɛɛ la. Anomanta, hé jemɛ kɛŋɔ Korowii Kora dii la telo tonɛ.

21Dɛ bokpeɡa te kpɔ o dɔmkwaa dɛɛ daah o dem kɛrɛdɛ naa, o komɛlbwa aa chɔɡ. 22Kɛ dɛ bɛl ɡe berɔ do kpeɡri ɡwaalo dɛ ka puu dɛ pɔ o nɛ aa, o dɛ kpɔ o dɔmkwaa waa kpɔ o sie dawɛ a ta la, dɛ́ kpɔ o kondɔɔh ja.

23Nomɛlbwa waa wola n nɛɛ jae la aa n waa nyin. Nomɛlbwa waa wola men chae dɛɛ boa n nɛra nyoa dɛɛ pɛ la lɔ ba dɛɛ peɡre.

Bɔnsam torome bera dɛ́ ba nɛn be ja

(Mat 12:43-45)

24Fini nɔ nɛra do kɛŋɔ nɛn Bɔnsam aa ɡela o torome bɛl do o nɛɛ dɛ chɔɡ o da. A habɔɔ la, naate charɛ o liire, asɛ Bɔnsam torome la le o nɛɛ dɛ kaa ka nyin bofale dɛ so. O ɡaaɡaa, o ta wone dɔ bɔr dɛ́ so onɛ, dɛ berɛ ŋɔ, ‘Mɛɛ kaa n buɡ ta bela maa lea ba laanee,’ 25dɛ berɛ ka na kɛ baa la liire bini chaahnɔ kɛŋɔ dea baa chaaro dɛ kwaaro kɛrɛdɛ ba ta nɛn kpɔe do o ta dɛ ɡel o chɔ pɛɛ la. 26Gɛɛ o yon la ka kpɔ o bala anuanɛ aa ɡwaalo kwara. A bwa yon ba so naate la nɛ, dɛ́ chɔɡ o da ɡwaa ɡɛ o fa aa doa wubwa la. Gɛɛ aa ba doe fini nɔ nɛra baa ɛ nɛnchɔɡa nɔ nɛ.”

Som nae tenten wa

27Yeesu aa bol ɡɛ waa nɔ tonɛ la, haah bɛl bol waa o be takpeɡ ne nɛra la baah ta, dɛ ŋɔ, “Haah waa lolɛ dɛ dɛɛre la na som.”

28Anee Yeesu ŋɔ, “Nɛra baa dɛ no Korowii Waa dɛɛ teŋɛ a ta laanee na som.”#Jem 1:22-25

Ba soŋe Yeesu ŋɔ ó ɛ nyokpowa

(Mat 12:38-42)

29Nɛra la aa bar Yeesu cheme pirim la, o ŋɔ ba be ŋɔ, “Ɛrɛɛ fini nɔ nɛra ɛ nɛnchɔɡa ken?” Ba dɛ nyin nyokpowaa dɛ́ na mɔɔ dɛ́ yarada kɛ Korowii bee n le, kɛ baa dɔ na. Waa aa pu Korowii keame Jona la dɔŋa ɡboo dɛɛ ba n ɡe pui, ásɛ he che a ta jemɛ n nɛnsoo.#Jon 1:17 30Gɛ Korowii aa ɛ Jona dɛ baɡle Niniwe tena kɛ on tomɔ la, ɡɛ tentenee wɛɛ ba Men Nɛn Bie la ɡe ɛɛ dɛ́ baɡle fini nɔ nɛra kɛ on tom mɛ. 31Awola nɛra bwa aa ir seo ta dɛ ba che Korowii sie ásɛ o bol ba waa dɛ́ pa bole la, Seeba kooro waa ɛ haah la ɛɛ bol waa bɔ fini nɔ tena, dɛkalkɛŋɔ o valɔ le harɛ jaɡa dɛ́ ba no Kooro Solomɔn wejemwa. Kɛ kasinteŋ, naate waa ɡwaa Kooro Solomɔn lɔ bonɔ, asɛ he ŋɔ haa o bee no. 32Niniwe tena ɡba ɛɛ bol waa bɔ fini nɔ tena, dɛkalkɛ ba te no Korowii Waa Jona aa bola la mun dɛ charɛ ba liire le ba wechɔɡa ta.#Jon 3:5 Kɛ kasinteŋ, naate waa ɡwaa Jona lɔ bonɔ, asɛ he ŋɔ haa o bee no.

Kandea waa dɛ chaah we-ɛɛla

(Mat 5:15; 6:22-23)

33“Nomɛlbwa aa kandea choŋi asɛ dɛ kpɔ dɛɛ sɔh dea bini, bela nomɛlbwa aa wola on na, kɛɛ dɛ kpɔ kon pi o ta. Ba choŋi kandea aa, ba kpɔɔ dɛɛ chɔŋɛ kon ta, ásɛ wɛɛ chaah nomɛlbwa waa dɛ ba bela. 34Sibie do kɛ kandea dɛ tɛ nɛwɛnyini. He sibie wer aa, he dɛ na bɔr. Dɛ a chɔɡɔ ɡe aa, amɔ dɛ he lɔ biro ta. Gɛɛ a do, dɛ he sie beɡre Korowii waa ta naa, dɛ he wobɛlbwa chaahnɔ. Kɛ dɛ he sie beɡre harɛ nɔ ta kwaa ta naa, he lɔ biro ta. 35Anomanta, hé nyiŋi kɛrɛdɛ ásɛ he sie won chaah waa Korowii aa kpɔa tɛ heyaa la ta, he bɛ biro ta so. 36Dɛ he sie beɡre Korowii waa ta, asɛ he ɡel wetɔŋla ne dachɔɡe bɛlbwa dɛ lɛ Korowii wa aa, ɡɛɛ he sie ɛɛ ba chaahna kɛrɛdɛ Korowii waa la ta, kɛŋɔ baa choŋi kandea asɛ wɛɛ chaah bɔr kohona la.”

Yeesu chɛɡre Farisii ne Tɔnjerema

(Mat 23:1-36; Mak 12:38-40)

37Yeesu aa bol waa tonɛ la, Farisii te bɛl yerɔ ŋɔ ó ba di kwaa o dem. Anee o la baa la dem dɛ ka so dɛɛ ba kwaa dii. 38A ɛ Farisii te la nyokpoa kɛ waa dɛ ba kwaa dii la, o ta nɔɔra samɛ ɡɛ ba nawee wa aa dɛ baɡle la.

39Asɛ Yeesu ŋɔ o be ŋɔ, “He Farisii tena do kɛŋɔ baa loo numoli ne hɛne bwara dɛ ɡel a bini la. Nɛra sie ta waa ɡboo hɛɛ ɛ, kɛ he bambile bini te, wechɔɡa ne kwaa ta sibeɡra ɡboo he bwa. 40Gɛna! Korowii waa ta yaa nɔ, o laa ɛ ya bini ne ya baŋ bwa kɛɛ? 41Hé kpɔ kwaa haa nyina cheɡ la dɛɛ kɛ nyaara he bambile bwa ne ásɛ komɛlbwa do wer tɛ heya.

42He Farisii tena, hé bwɛɛlɛ kɛ haa dɛ tɛ Korowii o bɔr he par nyoa kondikonjeɡre kwaraa ta, kɛ dɛ vɛh kasinteŋ ne Korowii nyina te la. Anɔ nɔɔ chɛ kɛ hɛ́ɛ ɛ, kɛ he bɛ anɔ la aa jaa la ɡel.

43Farisii tena, hé bwɛɛlɛ kɛ haa dɛ nyin sobɔrdɛɛɡa cheremi deene bini, dɛɛ nyin kɛ baa duu heyaa nɛra baah ta nɔ.

44Hé bwɛɛlɛ! He do kɛŋɔ ŋwama nɛra aa wola a waa jemɛ dɛɛ valɛ a ta ken.”

45Belaa Tɔnjerema la bɛl ŋɔ Yeesu be ŋɔ, “Nomoa, dɛ he ŋɔ ɡɛ naa, dɛ he jo ya ɡba nɛ.”

46Anee Yeesu chaŋo ŋɔ, “He Tɔnjerema haa dɛ baɡle Korowii Waa la ɡe, hé bwɛɛlɛ. Hé kpɔ wekpeɡa aa do kɛŋɔ bone dɛ dawɛ nɛra nɛ, kɛ dɛ te berɛ laa nɔn kpɔ a ta.

47Hé bwɛɛlɛ. Heyaa ma kwaa chɔŋre Korowii keamere ŋwama ta la. Gɛ nɛra nɔ laa he naawa kpoo la aa? 48Kwaa haa maa chɔŋre Korowii keamere la ŋwama la ta la baɡlɔ kɛŋɔ he ɡbabir sɛh waa he naawa aa ɛa la ta. 49Anɔ waa Korowii bol o Tɔn la baa dɛ yerɔ Wejema la bini ŋɔ, ‘Mɛɛ tomɛ n keamere ne toroma ba bee, baa kpoo banee dɛ́ fiiɡi bane’ la. 50Anomanta, Korowii ɛɛ pɛɛ fini nɔ nɛra o keamere nɛra aa kpoo ba le harɛ mumpar la bwa waa. 51Dɛ le Ebel kpoe ta ka tel Sekaria#2We 24:20-21 baa kpoo bela baa dɛ fuh kwaa dɛɛ tɛ Korowii ne Korowii Dea la tenten baah ta la. Kasinteŋ, n dɛ ŋɔ he be, Korowii ɛɛ pɛɛ fini nɔ nɛra ba bwa waa.

52Hé Tɔnjerema ɡe bwɛɛlɛ! He do kɛŋɔ nɛra baa laa dea Korowii wejema aa lɔ o bini karɛ, dɛ laa koŋkare la kpɔ haa wola o binii jo, he ɡe aa nɛra ŋwɛnɛɛ tɛ bá jo dɛ́ ka hweli.”#Mat 22:15

53Yeesu aa le bela kaa la, Tɔnjerema la ne Farisii tena la muɡli o baah taeh, dɛ ɡel o bol waa kohona.#Luk 20:20 54Ba haɡro bela dɛ́ lawɛ o nyoa.

Currently Selected:

Luk 11: mzw

Highlight

Copy