Jɔn 8

Haah baa lawɔ jwamane bɔe ta wa

1Asɛ Yeesu kaa Ɔlevere Bwejen la ta. 2Bɔr aa dɛ chaah chɔmbibi la, o berɛ kaa Korowii Dea. Belaa nɛnlaa ba o be dɛ ba baro cheme, asɛ o so harɛ dɛɛ chaɡ ba Korowii Wa. 3Asɛ Tɔnjerema ne Farisii tena lawɛ haah bɛl waa dɛ bɔ jwamane dɛ ba o ne Yeesu be, dɛ ɡel o ba che ba bwa baah ta. 4Asɛ ba ŋɔ Yeesu be ŋɔ, “Nomoa, ya lawɛ haah nɔ dɛ o ne baa bɛl waa wola o jaa ɛɛ chɔɔ. 5Mosis Mmara dɛ baɡle kɛŋɔ haah waa do ken la chɛ kɛŋɔ bá foɡro bwea kpo. Amɔ taraken ɛrɛɛ he ɡe ŋɔɔ?”#Mma 22:24 6Ba pɛɛro ɡɛ waa nɔ dɛ́ kpɔ daahno na kɛŋɔ wɛɛ bol waanee ásɛ ba fee dɔ o nyoa lawɛ.

Belaa Yeesu joŋi asɛ dɛ kpɔ o nonii dɛɛ chwerɛ harɛ. 7Ba taa cheɡa dɛɛ pɛɛro waa ɡɛ la, o iro che asɛ dɛ ŋɔ ba be ŋɔ, “Hé bini bɛlbwa waa wola wechɔɡa ɛɛ bwa la, ó tɔ sie ta bwe forɔ.” 8Asɛ dɛ berɛ kwaa joŋi dɛɛ chwerɛ harɛ ja.

9Waa ŋɔ ɡɛ la, bɛlbwa lii o wechɔɡa waa ɛa. Bɛlbwa ta wone kpɔ kon forɔ kpa, dɛ bwa peɡre. Ba nomonomee tɔ sie dɛ kaa beŋkpoŋa beŋkpoŋa a ba tel bechale nɛɛ dɛ ba tonɛ, a ba ka Yeesu ne haah la o ta che bela ɡɛ. 10Asɛ Yeesu ir che, dɛ pɛɛ haah la ŋɔ, “Leperaa ba kaalɔ? Ba bini bɛlbwa toole dɛ́ pae bolchɔɡe kpa aa?”

11Anee o ŋɔ, “Ɔɔh, n Dɔɔ, bɛlbwa toole.”

Asɛ Yeesu ŋɔ, “Ate, n ɡe aa hen bolchɔɡee pa kpa. Kaa, kɛ bɛ wechɔɡa ka ɛ kpa.”

Yeesu ɛ harɛ nɔ ta kandea

12Yeesu bol waa baɡle Farisii tena la ja, dɛ ŋɔ, “N ɛ kandea dɛɛ chaah harɛ nɔ ta nɛra. Nomɛlbwa waa dɛ teŋɛ n nɛɛ la aa biro taa valɛ bwa, wɛɛ valɛ bochaah taa dɛ́ dɔ mkpa.”

13Belaa Farisii tena la ŋɔ o be ŋɔ, “Henee bol he waa dɛ ɡbaɡba berɛ di he te danseɛ, anomanta, nyosonee hɛɛ teŋe.”

14Anee o ŋɔ, “Akai. A lole kɛ n dɛ di n ɡbaɡba danseɛ te, kɛ kasinteŋii mɛɛ bol, dɛkalkɛ n jemɛ bela maa lea ne bela maa dɛ kaa. Haa n leebɔr ne n kaabɔr jemɛ. 15Harɛ nɔ ta liiree he kpɔ nyiŋi nɛn dɛɛ bol wa, kɛ n te aa bole pa. 16Dɛ mɛɛ ɛ ɡɛ kwaraa yaa, mɛɛ ɛa á toɡre, dɛkalkɛ n ɡbo laa, n Mɛɛ waa tom mɛ la ja n nɛ. 17He mmarare la dɛ baɡle kɛŋɔ webeŋkpoŋ nɛra banɛ bwa aa bol la ɛ kpela. 18N ɡbaɡbaa dɛɛ di n te danseɛ, asɛ n Mɛɛ la waa tom mɛ la ɡe ɛ danseɛ dɛ ja n nɛɛ wobɛlbwa maa dɛ ɛ ta.”

19Asɛ ba pɛɛro ŋɔ, “Leperaa he mɛɛ nɔ doɔ?”

Anee o ŋɔ, “Gɛ haa wola men jemɛ nɔ, ɡɛɛ haa wola n Mɛɛ la ɡe jemɛ,” dɛ berɛ ŋɔ, “Dɛ he fe jem mɛ naa, he fe jemɛ n Mɛɛ la ɡe.” 20Korowii Dea suuɡa tae dakare bɔr belaa Yeesu do dɛɛ baɡle waa dɛ bol ɡɛ waa nɔ. Bɛlbwa ta wone lawɔ, dɛkalkɛ dɛ o tɔpere ta tele mɔɔ.

Yeesu ŋɔ, haa won la bela maa dɛ kaa

21Asɛ Yeesu berɛ bol waa baɡle nɛra la ja ŋɔ, “Mɛɛ ba kaaloo he ɡaaɡe dɛɛ nyin n bɔr, kɛ haa men na. He wechɔɡa taa hɛɛ ba sewa. Bela maa kaa la, haa won ba bela.”

22Anee Juu tena nomonome la bɔɔ dɔŋa ŋɔ, “O ŋɔ yaa won la bela waa dɛ kaa! Jamɔ wɛɛ kpo o tenee kɛɛ?”

23Belaa Yeesu chaŋ ba ŋɔ, “Harɛ nɔ ta nɛraa heya, asɛ n ɡe le nyundua. He le harɛ nɔ ta, kɛ n te, harɛ nɔ ta laa n le. 24A waa n ŋɔ he be ŋɔ, hɛɛ sewɛ he wechɔɡa taa la. Dɛ nomɛlbwa ta men yaradae kɛŋɔ Menee Men te naa, hɛɛ sewɛ he wechɔɡa taa.”

25Belaa ba bɔɔro ja ŋɔ, “Henee ume o?”

Asɛ o chaŋe ŋɔ, “Anee n ŋɔ he be chɔɔ bwa la. 26N fe dɔ he waa dɛ bol kohona he di bolchɔɡe a ta, kɛ maa bol. Naate waa tom mɛ la waa dɔ kasinteŋ nomanta, n wobɛlbwa maa bol nɛra be la ɛ waa aa le o be.”

27Waa ŋɔ ɡɛ la, ba ta o waa la mun noɛ kɛŋɔ o Mɛɛ Korowii waa wɛɛ bol. 28Anomanta, o ŋɔ ba be ŋɔ, “Awola haa ɡɔɔ Men Nɛn Bie nyundua la, belaa hɛɛ ba n nae kɛŋɔ Menee Men kpela, ásɛ dɛ jemɛ kɛŋɔ n ɡbaɡba kpeɡri ne laa mɛɛ ɛ wa, kɛ anɔ la n Mɛɛ la aa ŋɔ n be laanee mɛɛ bol. 29Naate waa tom mɛ la ja n nɛ, o ta men tae, dɛkalkɛ n dɛ ɛ anɔ la aa dɛ too o tea.” 30Nɛra baa no Yeesu waa la kɛrɛdɛ yaradao.

Kasinteŋ jema ɛɛ ɡeloo ya dɔ ya te

31Asɛ o ŋɔ Juu tena baa yaradao la be ŋɔ, “Dɛ he ɡelɔ n waa maa baɡle heyaa la do he bambile bini hɛɛ teŋɛ a ta te naa, dɛ he ɛ n habɔteŋra kpela, 32dɛ won jemɛ kasinteŋ la, asɛ kasinteŋ la ɡel he dɔ he te.”#1Pi 2:16

33Anee ba ŋɔ, “Abraham naanaree ya te, nomɛlbwa nɛndɔɔla laa yan. Aah, ɛrɛɛ hɛɛ baɡle kɛŋɔ yaa dɔ ya tenee yaa wola nɛndɔɔlaa ɛ kpa nɔɔ?”#Mat 3:9

34Belaa Yeesu ŋɔ, “Kasinteŋ, n dɛ ŋɔ he be, nomɛlbwa waa dɛ ɛ wechɔɡa la ɛ yom. Wechɔɡa yawɔ yom. 35Yom aa o dɔɔ deemii do ka tonɛ, kɛ dem te bie te ɛɛ do dem belaa saŋ bɛlbwa. 36Anomanta, dɛ men Korowii Bie la lɛ heyaa dɛ ɡel he dɔ he te naa, amɔ te dɛ he dɔ he te kɛrɛdɛ.

37N ɡbabir jemɔ kɛŋɔ he ɛ Abraham naanar, kɛ he berɔ dɛɛ nyin mɛ dɛ́ kpo, dɛkalkɛ haa n webaɡla yarada. 38Waa n Mɛɛ aa baɡ mɛɛ mɛɛ bol he be la, asɛ he ɡe ɛɛ ɛ anɔ la he mɛɛ aa bola he no.”

39Anee ba ŋɔ, “Ya mɛɛɛ Abraham.”

Belaa Yeesu ŋɔ, “Dɛ Abraham bii tentenee heya aa, he fe dɛ ɛ o we-ɛɛla siwi. 40N waa maa dɛ bol saŋ bɛlbwa la ɛ kasinteŋ waa maa noa le Korowii be, kɛ he dɛ nyin mɛ dɛ́ kpo. Gɛɛ Abraham ɛ aa? 41He ɡe mɛɛ toma siwii hɛɛ ɛ la.”

Anee ba ŋɔ, “Nyoasɛm bii laa yan oo, Korowii ɡboo ya Mɛɛ.”

42Yeesu ŋɔ ba be ŋɔ, “Dɛ he Mɛɛ Korowii kpela aa, he fe dɛ nyin n wa, dɛkalkɛ o bee n le ba, dɛ do bonɔ taraken nɔ. N ɡbaɡba kpeɡri ne laa n ba, onee tom mɛ. 43Ɛrɛɛ haa wola n waa mun no nɔɔ? Haa wola nyin kɛ he teŋɛ a ta la waa. 44Bɔnsam biirii heya. Waa waa dɛ nyin ɛɛ laanee he ɡee nyin ɛɛ. Chɔɔ bwaa o le nɛŋkpoa we-ɛɛla ne, waa kasinteŋ ŋwɛnɛ kpɔ nemenɛ nyosone ɡbo. O ŋɔ o bol wa aa, nyosone ɡboo wɛɛ teŋe, dɛkalkɛ o daa. O ɛ nyosonteŋni, asɛ nyosone bwa kooroo on. 45Kɛ n te maa dɛ bol kasinteŋ la waa haa wola men yarada la. 46He bini umee dɛ́ won chaɡle kɛ n ɛ wechɔɡa kaɔ? Aah dɛ n dɛ bol kasinteŋ aa, ɛrɛɛ haa wola men yarada ɔ? 47Nomɛlbwa waa ɛ Korowii bie la dɛ no o wa. Haa wola o bii ɛɛ la waa haa wola o waa nyin dɛ́ no la.”

Gɛ Yeesu aa baɡle o nɛnsoo

48Belaa Juu tena la bɔɔro ŋɔ, “Nyosonee yaa teŋe kɛ yaa ŋɔa ŋɔ, he ɛ Samaria te kwa ɛɛ ir he nɛɛ la aa?”

49Anee o ŋɔ, “Kwa aa n nɛɛ ir, n Mɛɛ sɔnee mɛɛ kwaa, asɛ he te ɛɛ chɔɡ mɛ. 50Sɔn laa mɛɛ nyin. Nɛn waa nyin sɔn dɛɛ tɛ mɛ la lole. Onee dɛ́ ba pa nomɛlbwa bole. 51Kasinteŋ, n dɛ ŋɔ he be, nomɛlbwa waa no n waa nɔ dɛ teŋɛ a ta la aa sewɛ bwa.”

52Anee Juu tena la ŋɔ, “Ya ta ŋɔe yaa? Kwaa dɛ ir o nɛ. Ya nabaa Abraham ne Korowii keamere la ɡba serewɔ, ɡɛɛ he te ŋɔ nomɛlbwa waa no he waa nɔ dɛ́ teŋɛ a ta la aa sewɛ bwa naa? 53He ɡwaa ya nabaa Abraham waa sewa la kɛɛ? Korowii keamere la ɡe serewɔ. Aah dɛ ɛrɛɛ hɛɛ lii he te nɔ?”

54Anee Yeesu ŋɔ, “N ɡbaɡba dɛ nyin sɔn aa, a ɛ pɛɛpɛɛ, kɛ n Mɛɛ la haa dɛ bol o waa ŋɔ onee Korowii haa dɛ tomɔ laanee dɛɛ tɛ mɛ sɔn. 55Haa on jemɛ, kɛ n te jemɔ. Dɛ n ŋɔ maa on jemaa, dɛ n ɛ nyosonteŋni kɛ heya. N jemɔ asɛ dɛɛ no o deŋna wa. 56He nabaa Abraham sie lɛo wɛɛ tamane n bala wa. O nao o baah sɔɔhno.”

57Asɛ ba ŋɔ o be ŋɔ, “He ta bene fifraanue ɡba dii mɔɔ, ɡɛɛ he na Abraham aa?”

58Anee o ŋɔ, “Kasinteŋ, n dɛ ŋɔ he be, baa wola Abraham lolɛ mɔɔ la dɛ n lole.” 59Belaa ba pa bwea ŋɔ ba dɛ foɡro, asɛ o sɔh dɛ le Korowii Dea bela kaa.

Currently Selected:

Jɔn 8: mzw

Highlight

Copy