Jɔn 7

Yeesu ne o nimanar

1Anɔ habɔɔ la, dɛ Galilia harɛ ta ɡboo Yeesu do dɛɛ ɡaaɡe. Dɛ waa nyin kɛ o la Juda harɛ te ta, dɛkalkɛ dɛ bela nomonome la dɛ nyin o bɔr dɛ́ kpoo. 2Gɛ saŋ la dɛ a ka tama Juu tena Kukure Tɔpejen ba yon dɛɛ do kukure dɛɛ so a bini tɔpera anuatoro la telo bá di. 3Anee Yeesu nimanar ŋɔ o be ŋɔ, “Le bonɔ dɛ́ kaa Juda harɛ ta, ásɛ he habɔteŋra baa lɔ bela la ka na he nyokpowaa haa dɛ ɛ nɔ. 4Nomɛlbwa waa dɛ nyin kɛ nɛra jemɛ o waa la, waa o waa ɛɛ dɛɛ sɔh. Anomanta, ɡel nɛra bwa na he we-ɛɛla nɔ.” 5O nimanar la ɡbabir ta on yaradae.

6Yeesu ŋɔ ba be ŋɔ, “He te, tɔpere bɛlbwa wer tɛ heyaa kɛ he la bela, kɛ n te tɔpere ta tele mɔɔ. 7Heyaa harɛ nɔ ta nɛra aa wola haeh, kɛ ba hah n te, dɛkalkɛ saŋ bɛlbwaa mɛɛ bol ŋɔ ba we-ɛɛla aa were. 8Hé kaa ka di tɔpejen la. Tɔpere n te aa ba bela la ta tele mɔɔ.” 9Waa bol ɡɛ la, o kwaarɔ so Galilia harɛ ta.

Yeesu la Kukure Tɔpejen dii bɔr

10Yeesu nimanar la aa kaa ɡɛ tɔpejen la dii la, a habɔɔ o ɡe ir dɛ la bela. O kpɔ o te sɔh, o ta nɛra baah valɛ. 11Dɛ Juu tena nomonome la dɛ ɡaaɡe o bɔr tɔpejen la dii ta asɛ dɛɛ pɛɛ dɔŋa ŋɔ, “Leperaa baa la doɔ?”

12Dɛ nɛnlaa la kɛrɛdɛ dɛ ŋwalɛ o wa. Bane ŋɔ, “O ɛ nɛndɛɛɡe.” Bane ɡe ŋɔ,

“Akai, nɛra ɡboo wɛɛ neɡre.” 13Bɛlbwa ta bolɛ asɛ a le baŋ nɛra no, dɛkalkɛ dɛ ba dɛ ɔmɛ Juu tena nomonome la.

14Baa di Kukure tɔpera la tel baah ta la, Yeesu kaa jo Korowii Dea dɛ pa mun dɛɛ baɡle nɛra Korowii Wa. 15O webaɡla la ɛ Juu tena la nyokpoa kohona, asɛ baa bɔɔ dɔŋa ŋɔ, “Ɛrɛɛ ɡɛ baa nɔ won jemɛ anɔ bwa, dɛ o ta tɔnjereme ɛɛ nɔɔ?”

16Belaa o chaŋe ŋɔ, “Waa maa dɛ baɡle nɔ ta n ɡbaɡba be leɛ, a bwa le Korowii waa tom mɛ la be. 17Dɛ nomɛlbwa sɛoh kɛ wɛɛ ɛ Korowii tetoowaa te naa, wɛɛ won jemɛ kɛŋɔ kasinteŋ waa aa le Korowii bee mɛɛ bol la. N ɡbaɡba webaɡla laa. 18Dɛ nɛn kpɔ o kpeɡri dɛɛ baɡle wa aa, o nyin sɔn dɛɛ tɛ o ɡbaɡba. Nɛn waa nyin sɔn dɛɛ tɛ nɛn waa tomɔ la te la, o waa dɔ kasinteŋ, waa nɛra neɡre.

19Mosis ta heyaa Korowii Mmara la tɛɛ yaa? Asɛ he bini bɛlbwa toole dɛ teŋɛ a ta. Aah dɛ ɛrɛɛ he berɛ dɛɛ nyin mɛ dɛ́ kpo nɔɔ?”

20Belaa nɛnlaa la bane ŋɔ, “Dɛ kpoe nɛ? Jamɔ komɛl ɡale he sie. Umee dɛɛ nyini dɛ́ kpo ɔ?”

21Anee Yeesu ŋɔ ba be ŋɔ, “Webeŋkpoŋ ɡboo n ɛ asɛ he nyoa kpo ɡɛ la. 22Mosis bee he dɔ penteŋa Mmara la. O be laa penteŋa le te, he naawaa pa a mun. Anomanta, he won bie pen teŋa Ona Tɔpere kwaraa ta.#Mum 17:10 23Dɛ he lolɛ bie o yawanyoa chiɡ Ona Tɔpere ta naa, he dɛ teŋe o pen, dɛkalkɛ haa nyin he chɔɡ Mosis Mmara la. Dɛ ɡɛɛ te naa, ɛrɛɛ he baah berɛ di n nɛɛ kɛ maa chah nɛn Ona Tɔpere ta nɔ? 24Hɛ́ɛ pese wobɛlbwa kɛrɛdɛ mɔɔ dɛɛ bola. He bɛ ŋɔ waane aa were dɛ he ta a bini nyiŋe.”

Yeesuu Kristo la kɛɛ?

25Bela la, dɛ Jerusalam tena bane dɛ bol ŋɔ, “Baa nɔ laa baa nyin o bɔr dɛ́ kpo la kɛɛ? 26Na, onee cheɡɛ nɛra baah ta dɛɛ bol waa asɛ ba bwa tɔ nyoa che la. Nomonome ken nao kɛŋɔ onee Kristo la Korowii aa baɡɛ nyoa ŋɔ wɛɛ tomɔɔ ó ba lɛ yaa la. 27Akai! Baa nɔ te, ya jemɔ dɛ jemɛ o leebɔr, kɛ Kristo la te, dɛ o balaa, nomɛlbwa aa o leebɔree jemɛ.”

28Dɛ Yeesu cheɡɛ Korowii Dea bela dɛɛ bol wa. Aa ba ɡɛ la o kpɔ takpeɡ ŋɔ, “He jem mɛ dɛ jemɛ bela maa lea. N ɡbaɡba kpeɡri ne laa n ba. Korowii waa ɛ kasinteŋ te laanee tom mɛ. Haa on jemɛ. 29N te jemɔ, dɛkalkɛ o bee n le, on tom mɛ n ba nɔ.”

30Anɔ nomanta, ba fe dɛ lawɔ, asɛ ba ta wone, dɛkalkɛ dɛ o tɔpere ta tele mɔɔ. 31Nɛnlaa la kɛrɛdɛ bwa yaradao, asɛ dɛɛ bol ŋɔ, “Amɔ dɛ Kristo la baa ba naa, wɛɛ won dɛɛ ɛ nyokpowaa kohona dɛ́ ɡwaa anɔ baa nɔ aa dɛ ɛ nɔ kenɛ?”

Ba tomɛ nɛra ŋɔ bá ka lawɛ Yeesu

32Farisii tena la aa noa kɛŋɔ nɛnlaa la dɛ ŋwalɛ Yeesu waa dɔŋa be la, ba ne Sɔfonomonome la tomɛ nɛra baa dɛ daah Korowii Dea la ŋɔ bá ka lawɔ. 33Dɛ Yeesu dɛ bol ŋɔ, “Tɔpera anɛ bɛlee mɛɛ ba he be bonɔ soɡa. Maa biɡri ásɛ dɛ berɛ kaa naate waa tom mɛ la be. 34Hɛɛ baa nyin n bɔree, kɛ haa men na, dɛkalkɛ bela maa do la, haa won ba bela.”

35Anee Juu tena nomonome la bɔɔ dɔŋa ŋɔ, “Amɔ leperaa baa nɔ ɛɛ nyin kaala ásɛ yaa wola on ba na kpa nɔɔ? O ken ɛɛ kaa Juu tena baa jo pua ka so Grik tena harɛ ta la bee, dɛ́ kaa chaɡle Grik tena o waa la kɛɛ? 36O ŋɔ, yaa ba nyin o bɔree kɛ yaa on na, bela waa dɛ kaa ɡe la, bɛlbwa aa won ba o be. Aah dɛ ɛrɛɛ wɛɛ chaɡle nɔɔ?”

37Ba Kukure tɔpera la dii ta tɔpere waa baa ka mun dɛ ɛ tɔpejen tenten la, Yeesu iro che dɛ kpɔ takpeɡ ŋɔ, “Nomɛlbwa nyɔɡre aa dɛ kpoo la, ó ba n be ń tɛo nee ó nyɔ. 38Nomɛlbwa waa dɛ yarada mɛ la, mɛɛ ɛo ɡɛ Korowii Tɔn aa baɡla laanee. Dɛ, ‘Nee waa dɔ mkpa la ɛɛ dɛɛ le o nɛɛ saŋ bɛlbwaa kɛŋɔ moo aa dɛ palɛ la.’ ”#Aes 44:3 39Nee nɔ waa bol o waa nɔ, Korowii Domadɛɛɡe la waa ba kpɔ do nɛra baa yaradao la nɛɛ la waa o bol la. Gɛ saŋ la dɛ Korowii Domadɛɛɡe la ta balɛ mɔɔ, dɛkalkɛ dɛ Yeesu ta o jirima dɔe mɔɔ.

40Nɛnlaa la bini bane no o waa waa bola la, dɛ ŋɔ, “Korowii keame laanee baa nɔ kpela.”

41Bane ŋɔ, “Kristo la Korowii aa baɡɛ nyoa ŋɔ wɛɛ tomɔɔ ó ba lɛ yaa laanee.”

Asɛ bane ɡe tɔŋle ŋɔ, “Galilia harɛ taa Kristo la ɛɛ ba lee ba naa? 42Korowii Tɔn ta baɡlɛ kɛŋɔ Kristo la ɛɛ ɛ Devid naanar la bɛlee dɛ le o bwɛɛ Bɛtlɛham aa?”#Mae 5:2 43Anomanta, nyopɛo ta ba bini balɛ kpa, Yeesu ɡbosoroo wa. 44Asɛ bane ɛɛ nyin dɛ́ lawɔ, kɛ nomɛlbwa ta wone kpɔ nɔn leɡo.

Juda nomonome yarada bɛ dɔe

45Belaa nɛra baa dɛ daah Korowii Dea la berɛ kaa Sɔfonomonome ne Farisii tena la be dɛ ka bol, asɛ ba ɡe bɔɔ ba ŋɔ, “Ɛrɛɛ he ta on lawɛ ba nɔ?”

46Anee ba ŋɔ, “Baa la waa waa dɛ bol la, nomɛlbwa ta o wobol dɔŋa bolɛ bwa.”

47Asɛ Farisii tena la berɛ pɛɛ ba ŋɔ, “Jamɔ o wono neɡre he ɡe kɛɛ? 48He na ya nomonome nɔ bini bɛl kɛŋɔ waa dɛ yaradao wa aa? Kɛɛ he na Farisii tena la bɛl kɛ waa dɛ yaradao? 49A ɡɛ nɛnlaa nɔ te la, baa Mosis Mmara la jemɛ. Dɛ Korowii nyotaahna laɡ ba.”

50Belaa Nikodeemɔs waa ɛ Farisii te dɛ faa la Yeesu be ka la bɔɔ ba ŋɔ, 51“Mosis Mmara ta, yaa wonoo pa nɛn bolchɔɡe dɛ ya ta on yerɛ dɛ bɔɔro dɛ jemɛ waa waa ɛa mɔɔ naa?”

52Anee ba bɔɔro ŋɔ, “Jamɔ he ɡe le Galilia harɛ kɛɛ? Dɛ he pese Korowii Tɔn la bini dɛ na naa, hɛɛ nao kɛŋɔ Korowii keame aa Galilia harɛ taa le ba bwa.”

53Belaa ba bwa ir kaa ba deremi.

Currently Selected:

Jɔn 7: mzw

Highlight

Copy