Jɔn 9
9
Yeesu chah baa bɛl baa lolɔ nyoŋe
1Yeesu ne o habɔteŋra aa dɛ valɛ la, o na baa bɛl baa lolɔ nyoŋe. 2Belaa o habɔteŋra la bɔɔro ŋɔ, “Nomoa, baa nɔ ne o nya ne o mɛɛ, ba bini ume wechɔɡaa ba nyoŋa nɔ ne nɔɔ?”
3Anee Yeesu ŋɔ, “Baa nɔ ne o lolanar bini bɛlbwa wechɔɡa be laa a le. Gɛ aa ɛ Korowii chaɡle o kpeɡri o nɛɛ waa a ba ɡɛ la. 4A wer kɛŋɔ bɔr aa chaahna nɔ, ya swɛɛ siwi dɛɛ ɛ Naate waa tom mɛ la toma, dɛkalkɛ bɔr dɛ ba bira nomɛlbwa aa wola won ɛ toma bɛlbwa kpa. 5N taa lɔ harɛ nɔ ta bonɔ nɔ, menee kandea dɛɛ chaah nɛra bwa.”#Jɔn 8:12
6Waa bol ɡɛ tonɛ la, o ta nentane ta harɛ dɛ teɡɛ a ne teera, dɛ kpɔ fɔɡɛ baa la sie. 7Asɛ dɛ ŋɔ, “La tam la baa dɛ yerɔ Siloam la ta dɛ́ ka samɛ he sie.” Gɛ sɔn Siloam la munii kɛŋɔ “Ba tomɔ.” Waa laŋa dɛ ka samɛ o sie la tonɛ la, dɛ o dɛ na, dɛ berɛ ba buse.
8Belaa o bala ne nɛra ba fa aa nao ka kɛ o fa nyoŋɔ dɛɛ soŋe kwaa la ŋɔ, “Baa nɔ laa fa yon so dɛɛ soŋe kwaa la aa?” 9Bane ŋɔ, “Onee,” asɛ bane ɡe ŋɔ, “Akai, o laa, lee wɛɛ leo.”
Asɛ baa la ɡe ɡbaɡba ŋɔ, “Menee!”
10Anee ba bɔɔro ŋɔ, “Ɛrɛɛ a ɛ he berɛ won dɛɛ na nɔɔ?”
11Belaa o ŋɔ, “Baa la baa dɛ yerɔ Yeesu laanee ta nentane dɛ teɡɛ a ne teera pɛ dɛ kpɔ fɔɡɛ n sie, dɛ ŋɔ ń la Siloam ta dɛ ka samɛ ta. Asɛ maa laŋa dɛ ka samɛ la, buɡ la ta, mɛɛ na la.”
12Anee ba pɛɛro ja ŋɔ, “Leperaa o dɔɔ?”
Asɛ o ŋɔ, “Maa jemɛ bela waa lole.”
Farisii tena wepɛɛre
13Belaa ba lawɛ baa la o fa aa nyoŋa la dɛ kaa o ne Farisii tena sie. 14Dɛ tɔpere Yeesu aa teɡɛ nentane pɛ teera ta dɛ kpɔ chaoh la ɛ Ona Tɔpere. 15Belaa Farisii tena la berɛ pɛɛro ɡɛ aa ɛa asɛ o won dɛɛ na. Anee o ŋɔ, “Kpechɛɡree o kpɔ maa n sie asɛ n samɛ ta taraken dɛ won dɛɛ na la.”
16Asɛ Farisii tena la bane ŋɔ, “Baa nɔ ta Korowii be leɛ, dɛkalkɛ o chɔɡ Ona Tɔpere.”
Bane ɡe ŋɔ, “Ɛrɛɛ wechɔɡ-ɛɛ ɛɛ ba wona ɛ nyokpowaa nɔ dɔŋa baa nɔ aa ɛa nɔɔ?” A cheɡɛ a ta ba nyoa ta pɛɛ kpa.
17Asɛ Farisii tena la berɛ pɛɛ baa la ja ŋɔ, “He ŋɔ o chaeh dɛ ɡel hɛɛ na bɔr, taraken nɔ, ɛrɛɛ he na o waɔ?”
Anee o ŋɔ, “Korowii keamee on.”
18Dɛ Juu tena nomonome la te dɛ tɔŋle ŋɔ, ba fe aa yarada kɛŋɔ o fa nyoŋɔ ka asɛ dɛ berɛ dɛɛ na, nemenɛ baa na o nya ne o mɛɛ mɔɔ. 19Ba yer ba dɛ bɔɔ ba ŋɔ, “He bie nɔ naa? He ŋɔ haa lolɔ dɛ o nyoŋɔ ɛ? Aah ɛrɛɛ a ɛ asɛ o berɛ won dɛɛ na nɔ?”
20Anee ba ŋɔ, “Ya jemɔ kɛ ya biee. Yaa lolɔ dɛ o nyoŋɔ. 21Kɛ yaa ɡɛ aa ɛa asɛ wɛɛ na ne naate waa ɡela wɛɛ na te waa jemɛ. Amɔ hé pɛɛ o ɡbaɡba na nɔ, dɛkalkɛ o kpeɡo dɛ́ won bol wa.” 22Dɛ Juu tena nomonome laanee baa ɔmɛ waa ba ŋɔ ɡɛ. Nomonome la ɛ nyoa beŋkpoŋ kɛŋɔ nomɛlbwa waa ŋɔ Yeesu ɛ Kristo la, baa doŋi naatee o bɛ ba cheremi dea jo kpa. 23A waa o nya ne o mɛɛ ŋɔ o kpeɡo ŋɔ bá pɛɛro la.
24Ba berɔ yerɛ baa la o fa aa nyoŋa la nɛɛtena, asɛ dɛ ŋɔ o be ŋɔ, “Nyiŋi Korowii dɛ bol kasinteŋ. Ya te jemɔ kɛ baa nɔ waa chaeh nɔ ɛ wechɔɡ-ɛɛ.”
25Belaa o ŋɔ, “Dɛ o ɛ wechɔɡ-ɛɛ ne o ta ɛɛ yoo, n te aa jemɛ. Webeŋkpoŋ maa jema laanee kɛ, n fa nyoŋɔ asɛ taraken dɛ berɛ dɛɛ na.”
26Anee ba berɛ pɛɛro ŋɔ, “Aah ɛrɛɛ o ɛɛ nɔ? Bɔkwa waa o ɛ dɛ won pili he sie nɔɔ?”
27Anee o ŋɔ, “N fa aa bol he be wubwa la, he vɛh noe. Ɛrɛɛ hɛɛ nyin kɛ ń bol jaɔ? He ɡe dɛ nyin he ɛ o habɔteŋra kɛɛ?”
28Belaa ba chɛɡro kohona, asɛ dɛ ŋɔ, “Henee o habɔteŋre! Ya te, Mosis habɔteŋraa yan. 29Gɛ yaa jema laanee kɛ Korowii bol waa dɛ baɡle Mosis, kɛ baa nɔ te, yaa o leebɔr jemɛ.”
30Asɛ baa la chaŋe ŋɔ, “Bɔkwa waa nɔɔ? Heyaa ŋɔa haa o leebɔr jemɛ, kɛ o ɡelɔ n te won dɛɛ na. 31Ya jemɔ kɛŋɔ Korowii deŋna toole wechɔɡ-ɛɛra be. O deŋna lɔ banɔ la baa dɛ duuru dɛɛ ɛ waa waa dɛ nyin la be. 32Le harɛ mumpar bwa, umee noa kɛŋɔ nomɛl wono pili nɛn baa lolɔ dɛ o nyoŋɔ sie bwa nɔ? 33Dɛ Korowii be laa baa nɔ le ba naa, o fe aa won ɛ waa nɔ dɔŋa.”
34Anee ba ŋɔ o be ŋɔ, “He ne he wechɔɡaa ba lolɛ. Gɛɛ he ŋɔ hé chaɡle yaa wa aa?” Asɛ ba doŋu cheremi dea bela bala kwara.
Korowii Doma bini nyoŋa wa
35Yeesu aa noa kɛŋɔ ba doŋu cheremi dea bala la, o nyin o bɔr asɛ dɛ pɛɛro ŋɔ, “He dɛ yarada Men Nɛn Bie la aa?”
36Asɛ o pɛɛro ŋɔ, “Nomoa, umee naate ásɛ he chaɡ mɛ n jemɔ dɛ́ yaradao wɔ?”
37Anee o ŋɔ, “Naatee he den na la, o ne henee dɛɛ bol waa la.”
38Belaa baa la ŋɔ, “N Dɔɔ, n dɛ yaradae!” Asɛ dɛ ɡuŋi o sie dɛ tɛo duure.
39Asɛ Yeesu ŋɔ, “Nɛra waa bola dɛ́ pa bole waa n ba harɛ nɔ ta, ásɛ nyoŋa berɛ dɛɛ na, ásɛ banɔ la ɡe baa dɛ na la berɛ nyoŋa.”
40Dɛ Farisii tena bane lɔ bela. Baa no ɡɛ la, ba bɔɔro ŋɔ, “Amɔ ya ɡe ɛ nyoŋa kɛɛ?”
41Anee Yeesu chaŋe ŋɔ, “Dɛ he fe sɛoh kɛŋɔ he ɛ nyoŋa kwaraa naa, wechɔɡa fe toole he nɛ, kɛ haa ŋɔa he dɛ na nomanta, he ta lɔ wechɔɡa ta.”
Currently Selected:
Jɔn 9: mzw
Highlight
Share
Copy
Want to have your highlights saved across all your devices? Sign up or sign in
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.
