Jɔn 18

Yeesu lawa

(Mat 26:47-56; Mak 14:43-50; Luk 22:47-53)

1Yeesu aa soŋe Korowii tonɛ la, o ne o habɔteŋra la leɔ, dɛ ka le nenabɔɔ Kedrɔn. Dɛ ba ɛ bodɛɛɡe bɛl dɛ du daa ane bela, asɛ ba ka jo a baah. 2Dɛ Judas waa leo tɛ la jemɛ bela, dɛkalkɛ Yeesu ne o habɔteŋra la dɛ cheme bela warawara. 3Anomanta, Judas na Sɔfonomonome ne Farisii tena, asɛ ba tɛo soojare ne nɛra baa dɛ daah Korowii Dea la bane. Asɛ ba kpɔ kandere ne kapɛle ne dɔmkwa, asɛ Judas kpɔ ba la bodɛɛɡe baa du daa la baah bela. 4Dɛ Yeesu jemɛ waa aa dɛ ba o nɛɛ chiɡa bwa, anomanta, o leɔ ka chem ba, asɛ dɛ bɔɔ ba ŋɔ, “Ume bɔree hɛɛ nyin ɔ?”

5Anee ba ŋɔ, “Yeesu waa le Nasarɛt la bɔree yaa nyin.” Belaa Yeesu ŋɔ, “Menee nɔ!” Dɛ Judas waa le Yeesu tɛ la ja soojare la ne nɛra la nɛɛ ba che bela. 6Yeesu aa ŋɔa men nɔ la, ba le habɔɔ dɛ choɡli. 7Belaa o berɛ kwaa pɛɛ ba ŋɔ, “Ume bɔree hɛɛ nyin ɔ?” Asɛ ba ŋɔ, “Yeesu waa le Nasarɛt la.”

8Anee o ŋɔ, “N ta ŋɔe ŋɔ menee nɔ naa? Dɛ n bɔree hɛɛ nyin aa, amɔ hé ɡel nɛra baa ja n nɛɛ nɔ te kaa.” 9Gɛ aa ɛ asɛ waa o fa aa bol o Mɛɛ be la ɛ kasinteŋ kɛŋɔ o fa aa ŋɔa ŋɔ, “N Mɛɛ, nɛra haa tɛ mɛ la bɛlbwa ta n nɔn ta nyoɡrɛ” la, a waa o bol ɡɛ.

10Dɛ Seemɔn Pita dɔ kere o be bela. O pamɛ kere le o tɔɔ ta, dɛ ŋwɛnɛ Sɔfonomoa la bonɔɔ diɡ deŋne dɛ laa cha. Gɛ bonɔɔ la sɔne Malkus. 11Pita aa ɛ ɡɛ la, Yeesu ŋɔ o be ŋɔ, “Kpɔ kere la su o tɔɔ ta! N bɛ wahala n Mɛɛ aa cheɡa ŋɔ ń na la na kɛɛ?”

Ba lawɛ Yeesu la Anas sie

12Rom soojare ne ba nomoa ne Juu tena baa dɛ daah Korowii Dea lawɛ Yeesu dɛ vɔrɔwo, 13dɛ tɔ sie la o ne Anas be. Dɛ Kaefasee Sɔfonomoa a ɡɛ bena la ta. Dɛ o mo Anas bie. 14A ɡɛ Kaefas nɔɔ fa ŋɔ Juu tena nomonome be ŋɔ nɛmbeŋkpoŋ lɛ nɛra bwa seo sewaa, a bɔ harɛbir bwa aa paɡra.#Jɔn 11:50-51

Pita aa tɔɔh loɡla ŋɔ waa Yeesu jemɛ

(Mat 26:69-70; Mak 14:66-68; Luk 22:55-57)

15Baa dɛ kaa Yeesu ne la, Seemɔn Pita ne o dɔŋa habɔteŋra la bɛl teŋɛ o nɛ. Dɛ Sɔfonomoa la jeremee a ɡɛ habɔteŋre nɔ, anomanta, o teŋɛ Yeesu nɛɛ dɛ jo Sɔfonomoa la dem bela. 16Baa jo dem bela la, Pita te kaa jaɡɛ che dem la doonyoa. Dɛ tolo bɛlee dɛɛ daah doonyoa la. Asɛ Yeesu habɔteŋre la Sɔfonomoa la aa jemɔ la berɛ le buse, dɛ ba bol waa tolo la be, dɛ kpɔ Pita jo dem bela.

17Belaa tolo la bɔɔ Pita ŋɔ, “Baa nɔ habɔteŋre laa hen aa?”

Anee o chaŋo ŋɔ, “Ɔɔh, o habɔteŋre laa men.”

18Dɛ waa lole, anomanta, dɛ Sɔfonomoa bonɔɔna ne nɛra baa dɛ daah Korowii Dea la do nii hɔla ta dɛ cheɡ dɛɛ ŋwee, asɛ Pita ka ja ba nɛɛ dɛ ɡee ŋwee.

Gɛ sɔfonomoa aa pɛɛ Yeesu wa

(Mat 26:59-66; Mak 14:55-64; Luk 22:66-71)

19Sɔfonomoa la bɔɔ Yeesu o habɔteŋra ne o webaɡla la wa.

20Anee o ŋɔ, “Tɔpere bɛlbwaa mɛɛ baɡla nɛra baah ta ba bwa ɛɛ no. Korowii Dea ne cheremi deene ya Juu tena bwa aa dɛ cheme a bini la, belaa mɛɛ baɡla. N ta sɔeh dɛ baɡle wobɛlbwa ɡe bwa. 21Amɔ ɛrɛɛ hɛɛ bɔɔ mɛ ɡɛ nɔɔ? Bɔɔ nɛra baa noa la, banee dɛ́ jemɛ waa maa baɡ ba dɛ́ baɡle.”

22Yeesu aa chaŋe waa la ɡɛ la, dɛ Sɔfonomoa la bonɔɔ bɛl cheɡɛ o jwɛɛh asɛ dɛ kpaa o lwɛɛma, dɛ kɔro ŋɔ, “Kenii chɛ kɛ he chaŋe Sɔfonomoa aa?”

23Belaa Yeesu ŋɔ, “Waa maa bola a ta maɡrɛ la, baɡle nɛ́ra bwa no. Dɛ ɡɛ laa ɡe aa, n lɔe nɔ munii ɛrɔɔ?” 24Asɛ Anas ɡel ba la Yeesu ne Sɔfonomoa Kaefas be, dɛ o nɔɔra ta vɔrɔwɔ ɡɛ.

Pita berɔ tɔh ja ŋɔ waa Yeesu jemɛ

(Mat 26:71-75; Mak 14:69-72; Luk 22:58-62)

25Dɛ Seemɔn Pita ta cheɡɔ dɛɛ ŋwee nii la, asɛ ba bɔɔro ŋɔ, “Baa la habɔteŋra la bɛl laa hen aa?”

Asɛ o tɔh pelepele ŋɔ, “Bɛl laa men!”#Jɔn 13:38

26Dɛ Sɔfonomoa la bonɔɔ Pita aa ŋwɛnɛ o deŋne dɛ laa cha la lole bɛl lɔ dem bela. O bɔɔrɔ ŋɔ, “Kɛ dɛ he ja baa la nɛra la nɛɛ bodɛɛɡe bela baa du daa laɔ?” 27Anee o tɔh ja ŋɔ, “Akai!” Buɡ la taa, jabal si.

Ba lawɛ Yeesu ba che Paelet sie

(Mat 27:1-2, 11-14; Mak 15:1-5; Luk 23:1-5)

28Tomun aa dɛ kpɔ la, Juu tena nomonome la kpɔ Yeesu la Kaefas be, dɛ ba o ne Rom nomoa waa dɛ nyiŋi ba harɛ ta la be koodem. Dɛ Galekaa Tɔpejen dii telo, anomanta, Juu tena nomonome la te ta dem bela joɛ, dɛkalkɛ dɛ ba jo bela aa, baa kah doŋaa baa wola won di Galekaa kondikwaa la. 29Baa vɛh bela joe la, ba harɛ nomoa Paelet leɔ ba ba be, dɛ ba bɔɔ ba ŋɔ, “Bɔkwa waa o ɛ aa wola maɡrɛ hɛɛ bɔɔro wɔ?”

30Anee ba chaŋe ŋɔ, “Dɛ wechɔɡ-ɛɛ laa aa, ya fe ta o ne he be balɛ.”

31Asɛ Paelet ŋɔ ba be ŋɔ, “Hé ɡbabir kpɔɔ kaa ka bol o waa ɡɛ he Mmara aa dɛ chaɡle.”

Anee ba ɡe chaŋo ŋɔ, “Ya ta ŋwɛnɛ dɔe kɛŋɔ yá bol nɛn waa dɛ pao bolchɔɡe bá kpoo.” 32Gɛ waa nɔ chiɡo ásɛ nɛra jemɛ kɛ Yeesu waa waa bola dɛ baɡle seo la soo waa dɛ ba sewa la ɛ kpela.#Jɔn 3:14; 12:32-33

33Asɛ Paelet berɛ jo o koodem bela, dɛ yerɛ Yeesu ba o be, dɛ bɔɔro ŋɔ, “Henee Juu tena kooro ɛ?”

34Belaa o chaŋo ŋɔ, “He ɡbaɡbaa na waa nɔ dɛɛ bɔɔ mɛ kɛɛ nɛra banee bol n waa he be nɔ?”

35Anee Paelet ŋɔ, “Haa na mɛ nɔ, Juu tee men aa? He ɡbaɡba bwɛɛ tena ne he Sɔfonomonomee ba he ne n be. Bɔkwa wechɔɡaa he ɛɔ?”

36Asɛ Yeesu chaŋo ŋɔ, “Harɛ ta bonɔ laa mɛɛ di kora. Dɛ harɛ ta bonɔɔ mɛɛ di kora aa, n nɛra fe aa sɛh bá kpɔ mɛ tɛ Juu tena, ba fe ɛɛ yoo lɛɛ mɛ. Kɛ harɛ ta bonɔ kora laa mɛɛ di.”

37Yeesu aa ŋɔ ɡɛ la, anee Paelet bɔɔro ŋɔ, “Amɔ kooroo hen kpela kenɛ?”

Asɛ o chaŋo ŋɔ, “Henee ŋɔa kooroo men. Kasinteŋ bola waa ba lol mɛ. A waa n ba harɛ nɔ ta dɛ ba bol kasinteŋ la nɛra bwa be. Nomɛlbwa waa dɛ nyin kasinteŋ la, on dɛɛ no n be.”

38Anee Paelet ŋɔ, “Bɔkwa ɡee kasinteŋ nɔɔ?”

Ba ŋɔ a chɛ kɛ bá kpo Yeesu

(Mat 27:15-31; Mak 15:6-20; Luk 23:13-25)

Waa bol ɡɛ la, o berɔ le dɛ ka ŋɔ Juu tena la be ŋɔ, “N ta waa maa che a ta pao bolchɔɡe nae, 39kɛ ɡɛ he Juu tena yon ɡel n foo wechɔɡ-ɛɛ beŋkpoŋ dɛɛ ta he Galekaa Tɔpejen dii ta la, ń foo Juu tena kooro nɔ ta ɡɛ kɛɛ?”

40Belaa ba bwa nyɛɡ kohona ŋɔ, “Bɛ on foo! Foo Barabas!” Dɛ ɡɛ Barabas nɔ, ŋwɛɛree.

Currently Selected:

Jɔn 18: mzw

Highlight

Copy