Jɔn 19

Ba ŋɔ ba kpaa Yeesu pɛl daɡaɡre ta

1Belaa Paelet ɡel o soojare ka lawɛ Yeesu, dɛ lɔɔro bampɔrɔ ŋwɛɛra ne.#Mat 27:27-31; Mak 15:16-20 2Ba koh o baah muɡla waa dɛ kpɔ sɔɔhne sɔh kooɡbɛrɛ piu, dɛ kpɔ yaswɛm bɛl o do kɛŋɔ ba bela koranar wur ken dɛ doo. 3Dɛ ba dɛ ba o be dɛɛ si, “Woowo, Juu tena kooro!” dɛɛ kpaa o lwɛrɛme.

4Baa ɛo ɡɛ la, Paelet le buse ja dɛ ba ŋɔ Juu tena la be ŋɔ, “Hɛ́ɛ no bonɔ, mɛɛ le o ne busee tɛ heya, ásɛ he jemɛ kɛ n ta wobɛlbwa o nɛɛ nae dɛ́ che a ta dɛ́ pao bolchɔɡe.” 5Anomanta, o ɡelɔ Yeesu le buse, dɛ sɔɔhne kooɡbɛrɛ piu, asɛ o do wurswɛm la. Asɛ Paelet ŋɔ ba be ŋɔ, “Onee la.”

6Sɔfonomonome ne nɛra baa dɛ daah Korowii Dea la aa nao la, ba kpɔ takpeɡ ŋɔ, “Gel ba kpoo! Gel ba kpaaro pɛl daɡaɡre ta!”

Anee Paelet chaŋ ba ŋɔ, “Hé ɡbaɡba ba kpɔɔ ka kpaa pɛl daɡaɡre ta. N te ta wobɛlbwa o nɛɛ nae dɛ́ che a ta dɛ́ ɡel ba kpoo.”

7Belaa Juu tena la berɛ chaŋo ŋɔ, “Ya dɔ Mmara bɛl waa dɛ baɡle kɛ o chɛ kpoe, dɛkalkɛ o dɛ yerɛ o te Korowii Bie.”

8Paelet aa no ɡɛ waa nɔ la, a taa o berɛ ɔmɛ kohona kwara. 9Anomanta, o berɔ jo koodem bela, asɛ dɛ ka bɔɔ Yeesu ŋɔ, “Lepetenee he leɔ?” Kɛ o ta on chaŋɛ. 10Anee o berɛ bɔɔro ŋɔ, “Haa men chaŋe kɛɛ? Haa jemɛ kɛŋɔ n dɔ kpeɡri dɛ́ won ɡel ba foori ta, dɛ́ berɛ won ɡel ba kpaare pɛl daɡaɡre ta kɛɛ?”

11Asɛ Yeesu ŋɔ, “Korowiirii sɛah dɛ ɡel he dɔ kpeɡri n nɛ. O fe ta sɛɛh yaa, he fe ta kpeɡri dɔe n nɛ. Nɛn waa lee mɛ tɛ dɛ ɡel he dɔɔ mɛ la wechɔɡa ɡwaa he kwa.”

12Paelet aa no ɡɛ la, dɛ o dɛ nyin ŋwɛnɛ bɛl dɛ́ fee kpɔ Yeesu ta ó kaa. Ate, nɛnlaa la kpɔ takpeɡ dɛɛ ŋɔ, “Nomɛlbwa waa dɛ yerɛ o te kooro la ɛ Rom Koojen Siisa dɔm! Anomanta, dɛ he kpɔ baa nɔ ta aa, amɔ dɛ Rom Koojen la dɔmee hen!”

13Paelet aa no ɡɛ la, o kpɔ Yeesu le buse dɛ ba so bela waa soɡa dɛɛ bol waa dɛɛ pa bole la. Bwea nee ba mao o ir nyundua. Juu tena wobol ta, baa dɛ yerɛ bela ‘Gabata’. 14Awola tɔpere la ɛ tɔpere Juu tena bwa aa dɛ kpɔ ba te, dɛ́ daa kondikwaa cheɡ, dɛ́ won di Ona Tɔpere waa lɔ ba Galekaa la ta la. Dɛ wee tel nyufala tonɛ, asɛ Paelet ŋɔ ba be ŋɔ, “He kooro laanee la!”

15Anee ba nyɛɡ kohona ŋɔ, “Gel ba kpoo! Gel ba kpaaro pɛl daɡaɡre ta!” Asɛ Paelet bɔɔ ba ŋɔ, “He kooro ɡbabirii he ŋɔ ń ɡel ba kpaaro pɛl daɡaɡre ta naa?” Anee Sɔfonomonome la chaŋo ŋɔ, “Ya ta kooro bɛlbwa dɔe ka ja Koojen Siisa nɛ!”

16Ate, Paelet kpɔ Yeesu tɛɛ ba ŋɔ bá ka kpaaro pɛl daɡaɡre ta. Asɛ soojare la kpɔɔ kaa.

Ba kpaa Yeesu pɛl daɡaɡre ta

(Mat 27:32-44; Mak 15:21-32; Luk 23:26-43)

17Ba kpɔ Yeesu le koodem bela dɛ ɡel o che daɡaɡre baa dɛ ba o kpaara pɛl o ta la, dɛ ba tel bobɛl baa dɛ yerɛ bela Nyuhoɡ Bɔr, asɛ Juu tena wobol ta, ba ɡe ɛɛ yerɛ bela Gɔlɡɔta. 18Baa tel bela la, ba kpaaro pɛl daɡaɡre la ta. Ba kpaa nɛra banɛ ja o nɛ, bɛl do o diɡ ta, asɛ bɛl ɡe do o ɡal ta, asɛ o do ba bwa baah ta.

19Belaa Paelet ɡel ba chwerɛ waane ka pɛl Yeesu daɡaɡre la nyundua. Waa baa chwera laanee kɛ, juu tena kooro yeesu waa le nasarɛt laanee la. 20Dɛ bela ne bwɛjen Jerusalam aa jaŋɛ, anomanta, Juu tena kɛrɛdɛ bwa na ɡɛ waa la dɛ kura. Ba chwera Juu tena wobol ne Rom tena wobol ne Grik tena wobol ta. 21Anomanta, Juu tena Sɔfonomonome la ŋɔ Paelet be ŋɔ, “Gɛ haa chwera ŋɔ, ‘Juu tena kooroo on’ nɔ aa were. Chwerɛ ŋɔ ‘Onee ŋɔa Juu tena kooroo on.’ ”

22Anee Paelet chaŋe ŋɔ, “N te dɔɔ chwerɛ tonɛ.”

23Soojare la aa kpaa Yeesu pɛl daɡaɡre ta tonɛ la, ba bɔne o laala bini bɔre anaarɛ, asɛ bɛlbwa kpɔ beŋkpoŋ. Kɛ o batakaare waa doo lɔɡa la te, ba sɔɔh kombir, ba ta bobɛlbwa nyarɛ pɛ.

24Anomanta, soojare la ŋɔ dɔŋa be ŋɔ, “He bɛ ɡel ya kɛɛro. Hé ɡel ya ta chacha, naate waa di la ó kpɔ.” Ba chwerɛ Korowii Tɔn bini ŋɔ,

“Baa kpɔ n laalaa bɔne dɔŋa,

dɛ́ ta chacha dɛ́ na naate waa di n batakaare.”

Gɛ baa chwera laanee soojare la ɛ, dɛ ɡel a ɛ kpela.

25Dɛ Yeesu nya ne Yeesu nyajen ne Klopas haah Mɛɛre ne Mɛɛre waa le Maɡdala la cheɡɛ Yeesu daɡaɡre la jwɛɛh bela.#Luk 8:2 26Yeesu aa na o nya ne o habɔteŋre waa dɛ nyinu kohona la kɛŋɔ baa cheɡɛ dɔŋa jwɛh, asɛ o ŋɔ o nya be ŋɔ, “N nya, he biee la,” 27dɛ ŋɔ o habɔteŋre la ɡe be ŋɔ, “He nyaa la.” Le a ɡɛ saŋ la, o habɔteŋre la lawɛ Mɛɛre kaa o dem o ka so o be.

Yeesu seo wa

(Mat 27:45-56; Mak 15:33-41; Luk 23:44-49)

28A habɔɔ Yeesu aa naa kɛŋɔ o wobɛlbwa tonɔ la, o ŋɔ, “Nyɔɡre dɛ kpo mɛ,” ásɛ waa aa lɔ Korowii Tɔn bini la ɛ kpela.#Yel 69:21 29Dɛ vii bɛl ne sennyɛɡa cheɡɛ bela, asɛ ba kpɔ konjɔɡɔjɔɡɔ bɛl waa won nee lɛɛ vɔwɛ daa bɛl baa dɛ yerɔ hesɔp dajaŋ ta, dɛ kpɔ li sennyɛɡa la dɛ kpɔ su o nyoa ó nyɔ. 30Yeesu aa nyɔa tonɛ la, o ŋɔ, “A tonɔ,” asɛ dɛ ɡure o nyu dɛ ɡel o doma le, o sewɛ.

31Dɛ awola tɔpere la ɛ tɔpere Juu tena aa dɛ kpɔ ba te, dɛkalkɛ tɔɔ peraa dɛ ba jo Ona Tɔpere waa ɛ ba tɔpejen tenten la ta. Dɛ baa nyin kɛŋɔ Yeesu ne nɛra la saɡɛ ka tel tɔpejen la ta. Anomanta, ba kaa soŋe Paelet ŋɔ ó ɡel soojare kuuɡi ba nakpale bá sewɛ warane, ásɛ ba dɔ bɔr laa ba kpɔ daɡaɡre la ta. 32Baa soŋe ŋwɛnɛ la, soojare la kaa kuuɡi nɛra la baa kpaa ba ne Yeesu pɛl daɡaɡre ta la nakpale. 33Baa tel Yeesu be la, ba nao kɛŋɔ o te dɔɔ sewɛ, anomanta, ba ta o te nakpale kuuɡe. 34Kɛ soojare la bɛl kpɔ lampea dɛ yaɡɛ Yeesu loŋi ta. Buɡ la ta, chal ne nee le. 35Naate waa di waa nɔ danseɛ la naa siwi ne, dɛ jemɛ kɛŋɔ kasinteŋii, dɛɛ bola ásɛ he ɡe no dɛ́ yarada. 36Anɔ ɡelɔ waa baa chwera Korowii Tɔn bini ŋɔ, “Baa o hoɡ beŋkpoŋ kwaraa ku” la ɛ kpela.#Yel 34:20 37Ba chwerɛ Korowii Tɔn la bobɛl ɡe ŋɔ, “Baa nyiŋi nɛn baa yaɡɔ lampea ne laanee.”#Sek 12:10

Yeesu huɡa wa

(Mat 27:57-61; Mak 15:42-47; Luk 23:50-56)

38Anɔ bwa habɔɔ la, baa bɛl waa le Arimatea baa yerɔ Josef la Paelet be dɛ ka soŋo Yeesu lale. Dɛ a ɡɛ Josef nɔ dɛ teŋɛ Yeesu nɛ, kɛ o koh Juu tena ɔma waa dɛɛ sɔh o te a ɡɛ bɔr. Paelet tɛo ŋwɛnɛ ŋɔ ó ka kpɔ lale la kaa, asɛ o ka kpɔɔ kaa. 39Nikodeemɔs waa la Yeesu be jwaana bɛl la, o ne Josefoo la Yeesu huɡribɔr bela. Nikodeemɔs la konsɔɔhsoma bwa soo siwi baa kpɔa dɛɛ fɔɡle ba lala ne bela. A kan dɛ do tɔɡre dɛ́ ɛ men baa kpɔa dɛɛ ɛ paanoo la baaɡe del.#Jɔn 3:1-10 40Ba nɛra banɛ la kpɔ Yeesu lale la, dɛ kpɔ konsɔɔhsoma la fɔɡlo, dɛ kpɔ yapoŋ vɔrɔwo, ɡɛ Juu tena aa dɛ ɛ ba lala dɛɛ huɡ ba la. 41Bela baa kpo Yeesu la, dɛ bodɛɛɡe bɛl baa du daa lɔ bela, asɛ ba forɛ lalbɔɔ bwe bɛl ta kɛŋɔ dea ken. Dɛ ba ta nomɛlbwa o bini huɡe bwa. 42Dɛ lalbɔɔ la bɛne bela, asɛ ba Ona Tɔpere ɡe telo tonɛ, anomanta, ba denɔ kpɔ Yeesu ka huɡe o bini.

Currently Selected:

Jɔn 19: mzw

Highlight

Copy