Genesis 25

Yipurayim rakunydhina worruŋuna yanana yolŋu

25:7-18 (The death of Abraham)

7-8Yo, nhinananydja ŋayi yukurrana Yipurayim ŋunhili wäŋaŋura weyinnha, bala ŋayi worruŋuthinana mirithinana, bala ŋayi rakunydhinanydja 100 ga 75-mirri dhuŋgarramirri. 9-10Bala maṉḏa nhanukala gäthu'mirriŋuyunydja maṉḏathu, Yitjakthunydja ga Yitjmayilyunydja dholkuŋalana ŋanya ŋunhimalayina mathirralili, waŋganylili yana ŋunhi ŋayi Yipurayimdhu dholkuŋala nhanŋuway miyalknha ŋäthili, ga ŋunhiwalayina maṉḏa ŋanyanydja dholkuŋala Yipurayimnhanydja, bäpa'mirriŋunhanydja maṉḏakuway maṉḏa.

11Ga dhurrwaraŋuru ŋuliŋuruna ŋunhi ŋayi Yipurayim rakunydhina, bala ŋayi Godthunydja galkikuŋalana gäŋala ŋanyana yothunhana nhanŋu Yitjaknhana, liŋgu ŋunhiyi dhawu' ŋunhi ŋayi ŋäthili Godthu nherrara Yipurayimgala, nhanŋuway yana walŋu Yitjakku ga nhanukalaŋuwu miṯtjiwu.

12-18Ga wiripunydja ŋunhi Yipurayimgu walkur-maḻŋ'maranhara yäku Yitjmayil, wiripuŋuwuŋu warray miyalkkuŋu, djamamirriwuŋu warray, ŋayinydja mala bumara yumurrku'nha miṯtjinydja märrma'-rulu ga märrma' bäythinyara, bala yana ŋayi rakunydhinana. Nhanukuŋu Yitjmayilwuŋu mala-bunhara nhinananydja yukurrana ŋunhili wäŋaŋura Yetjipnha galki, yurru bitjana liŋgu walala yukurranha ŋuli mel-nyaḻyunana ŋunhi wäwa'mirriŋunhanydja walalanha, marimirrina walala Yitjakkalaŋuwunydja miṯtjiwu.

Yitjakkuna djamarrkuḻi' dhawal-wuyaŋina, yäku Yetjuna ga Djaykupnha

25:19-26 (Isaac's children Esau and Jacob were born)

19-20Yo, Yipurayimgunydja gäthu'mirriŋu Yitjaktja, nhanŋu dhuŋgarranydja 40-na ŋulinyaramirriyuna ŋunhi ŋayi miyalknha märraŋala Ripaykanha, 21yurru dhalwaŋiny' ŋayi ŋunhi miyalktja, bäyŋu ŋayi ŋula yothuny'tja gurrukaŋala. Bala ŋayi Yitjak bukukurru waŋanana Godnha yukurrana, miyalkkunydja nhanukiyingalaŋuwu ŋäŋ'thurruna, ga Godthu ŋäkula ŋanya märrliliyanharanydja, bala dhunupa guŋga'yurrunana. Bala marrtjina ŋunhi miyalktja yothumirriyinana Ripaykanydja, 22yurru ŋurru-märrma' yothunydja maṉḏa nhanukala, yurru bunharamirrina maṉḏa yukurra ŋunhi nhanukala guḻunŋuranydja.

Bala Ripaykayunydja waŋa dhä-wirrka'yun Garraynha bitjan, “Nhaltjan dhika marrtji yulŋunydja?” 23Ga ŋayi Garrayyunydja ḻakarama nhanŋu bitjan.

“Märrma' dhuwali nhokala malanydja wälkŋuranydja,

märrma' yurru bäpurruny'tja dhawal-wuyaŋirri nhokuŋu,

yurru dhuwaliyi maṉḏa barrkuwatjthirri yurru yulŋunydja,

mari-winy'tjunmirrina walalaŋguway walala yukurra yurru.

Waŋganydja yurru mala ganydjarr-ḏilkurruna walŋu, ḏälmirrina,

ga wiripunydja mala yurru märr-ganydjarrmiriwnha,

ga ŋayi ŋurruŋunydja ŋunhi maḻamarrnydja yolŋu yurru djämamirri ŋuriki nhanŋu gutha'mirriŋuwu, ŋunhi ŋayi yurru dhuḏiŋu dhawal-wuyaŋirri nhokuŋu.”

Bitjarrayi ŋayi Garrayyu ḻakaraŋalanydja Ripaykawu dhä-ŋäthiliŋga yana.

24Walunydja galkithinana nhanŋu Ripaykawu, bala yuwalkthi yothunydja maṉḏanha dhawal-wuyaŋinana ŋulinyaramirriyu, ḏarramu maṉḏa yulŋunydja. 25Ŋurruŋunydja ŋunhi yothu dhawal-wuyaŋina gulaŋ-gulaŋ' ŋanak, ga rumbalnydja ŋayi bulka'mirri bukmak, bala maṉḏa yäkunydja nherrara ŋanya Yetju. 26Ga ŋunhi ŋayinydja dhuḏiŋunydja dhawal-wuyaŋina, ga mulkananydja ŋayi marrtjina ŋanya ŋurruŋunhanydja ga yaṯa, bala yäkunydja maṉḏa ŋanya nherrara Djaykupnha.

Yo, Yitjakkunydja dhuŋgarra 60-na, galki worruŋuyinana ŋayi ŋulinyaramirriyunydja ŋunhi yothu maṉḏa dhawal-wuyaŋina.

Yetju wirrkinydja ḏukṯukthina ŋathawuna, yakana warwuyurruna ŋurikiyi dhawu'-nherraṉarawuywunydja Godkalaŋu

25:27-34 (Esau sold his rights as the first-born son)

27Ŋutharanydja maṉḏa marrtjina bala wakindhina, ḏarramuyinana maṉḏa märrma' yana. Ŋayi Yetjunydja djambatj-ḏumurruna wäyingu bunharawu; wirrki ŋayi yana ḏukṯuk wäyingunydja ḏatthunarawu. Ga ŋayi Djaykuptja wiripu warray ḏarramu, nhinanha warray ŋuli yukurranha ŋunhala bäyma wäŋaŋura. 28Ga bäpa'mirriŋunydja maṉḏaku ŋuli yukurranha marrkapthuna wirrkinydja walŋu Yetjuwuna, liŋgu bitjana liŋgu ŋayi ŋuli gänha wäyin nhanŋu. Ga ŋayi ŋäṉḏi'mirriŋunydja wokthuna ŋuli wirrkinydja ga nhanŋu Djaykupkuna.

29Wiripuŋuyunydja waluyu ŋayi Yetjunydja marrtji wäyinlili, ga ŋayi Djaykuptja ŋunhala bäyma wäŋaŋura, bala ŋayi ŋathana bathan, ŋanya dhika ḻatju'na weyika, wuŋiḻinydja waŋgi'yun ŋunhiyi wanaŋinyamirrina. Ga ŋayi ŋunhi Yetjunydja roŋiyirrina beŋuru wäyinŋurunydja, bala ŋayi wirrkina djaṉŋarrthirri nhäma ŋunhiyi weyika'na, 30bala ŋäŋ'thun Djaykupnhana bitjan, “Ga' ŋarrakunydja wekaŋana. Ŋarra dhuwala djaṉŋarrthinana, raku'-rakunydhirrina ŋarra marrtji dhuwala djaṉŋarrthinyarayuna.”

31Ga ŋayi Djaykuptja waŋana bitjarrana, “Ŋäthilinydja nhe yurru dhawu'-nherrala ŋathili ŋarranha, märr ŋarrapina yurru märrama bukmak nhä malanha nhokalaŋumirri yäkumirrinydja, ŋunhi mäḻu'yu yurru rarr'yun nhipala, bili nheŋga dhuwala ŋurruŋunydja nhanŋu gäthu'mirriŋu. ḻakaraŋa ŋathili ŋäthilinydja, ga yurruna ŋarra wekamanydja yurru nhuŋu ŋathanydja.”

32Ŋayi Yetjunydja waŋana, “Ma', nhuŋuwaynha bukmaknha yurru. Ŋarranydja ḏukṯuk ŋathawuna. Rakunydhirrina dhuwala ŋarra yurru,” bitjarra.

33-34Yo, bitjarrayinydja ŋayi Yetjuyu ŋula nhä ḻakaraŋala ŋunhiyi malanha, bäyŋuna ŋayi ŋula märr-ḏikṯikthinanydja ŋurikiyi nhäkunydja malaŋuwu ŋunhi Godkuŋu dhawu'-nherraṉara, yana ŋayi märr-dhapinyayuna gonha'yurruna, bala dhayuŋara nhanbalaynha Djaykuppana. Bala Djaykupthunydja rarr'yurruna ŋathanydja ŋunhi dämba ga weyika nhanŋuwaynha Yetjuwuna. ḻukananydja ŋayi Yetjuyunydja, bala ḏulputhinanydja, djunuma marrtjinana; yakana ŋayi guyaŋina ŋamathaŋalanydja Godkuŋu dhawuny'tja.

Currently Selected:

Genesis 25: gnnNTOTPO

Highlight

Copy