Genesis 24

Yitjakthu märraŋalana Ripaykanha

24:1-67 (Isaac married Rebecca)

1Ŋayi Yipurayimdja marrtjina worruŋuthinana, yurru ŋamathaŋala yana nhinananydja yukurrana ŋayi, ga ḻukunydja yana ŋayi yukurrana nhinana, liŋgu ŋayipina Godthuna guŋga'yurruna gäŋala yukurrana ŋanya.

2-4Waŋganymirriyunydja waluyu Yipurayim waŋana nhanŋuway walŋu ŋunhi djämamirrinha bitjarra, “Nhenydja yurru marrtjiya bala ŋunha ŋarrakiyingala nininyŋulili wäŋalili, ga maḻŋ'maraŋa ŋunhiliyi miyalknha ŋula ŋarrakalaŋuwu gäthu'mirriŋuwu Yitjakku. Yaka nhe yurru djarr'yurra mulkurunhanydja miyalknha, dhiyakuynhanydja bäyma wäŋawuy Gaynanbuynhanydja. Djarr'yurranydja nhe yurru ga ŋunhiyi yana liŋgu ŋarrakuway walŋu gurruṯu'mirrinha.”

5Ga ŋayinydja ŋunhi djämamirrinydja nhanbala Yipurayimba waŋana, “Mak yurru miyalktja ŋula waŋa ŋarrakala yaka'yun ŋiniya,... yakana mak ŋayi yurru gonha'yun nhanŋuway wäŋanydja, bala marrtji dhipalanydja wäŋalili. Bay' nhaltjanna ŋarranydja yurru? Garr'yun nhuŋu gäthu'mirriŋunhana?... märr maṉḏa ŋuli ŋunhalana nhini yukirri?”

6Bala Yipurayimdja waŋana nhanukala, “Yaka nhe biyakayi,” bitjarrana. “Yaka djaw'yurra ŋarraku gäthunha dhipuŋuru wäŋaŋuru, 7-8liŋgu Godthu ŋuriŋi Djiwarr'wuyyunydja Waŋarryu ŋayipi yana ŋarranha gäŋalanydja beŋuru ŋarrakalaŋuwala bäpawala ŋarakaŋuru wäŋaŋuru dhipalanydja gay' wäŋalili, ga ŋayipi yana dhawu'-nherrara bitjarra, ‘Dhuwalanydja yurru nhuŋuna wäŋa, ga nhokalaŋuwu yumurrku'wuna, ga bitjanna liŋguna yukurra yurru gupaḏalŋuwuna nhumalaŋgu nhinanharawu yukurranharawu.’ Godthu yurru nhuŋu dhukarrnydja buma ŋathil'yun, märr nhenydja yurru maḻŋ'maramana dhäykanha ŋarrakalaŋuwu gäthu'mirriŋuwu. Ga ŋuli ŋayi yurru yakanydja marrtji dhipala, ŋunhiyinydja manymaknha, yaka warwuyurranydja, yurru yaka nhe yurru ŋarrakunydja gäthunha djaw'yurra dhipuŋuru wäŋaŋuru.”

9Bala djämamirriyunydja ŋuriŋi dhawu'mirriyaŋala Yipurayimnha, ŋayinydja yurru dhäruk märrama ŋanyapinyay yana Yipurayimnha, ŋunhi nhaltjarra ŋayi dhäruk-nherraṉmina.

10Bala yana ŋuriŋiyi djämamirriyu marrtjina ga märraŋala märrma' rulu wäyinnha walalanha gamulnha, bala wap-wapmaraŋala ḻatju'mirri ŋanya dhika girri' ḏiltjililinydja walalaŋgala, bala marrtjinana yana. Marrtjinanydja ŋayi nhinana bala-a-a, ga-ga-ga-ga-a-a, ga yana liŋgu baṯ mulkana wäŋa nhäyika, ŋunhi Näyu yolŋu yäku ŋuli yukurranha nhinanha be ŋäthili. 11Bunananydja ŋayi ŋunhalayi gapumirriŋurana ŋunhi yukurra gapu maŋutji djingaryun, galki ŋunhina bäyma bala'mirriŋurana wäŋaŋura, yurru milmitjpana walŋu, galkina walalanydja dhäykawurrunydja wäŋgamana marrtji lili gapuwuna dhiṯthu-dhiṯthunarawu.

12Bala ŋunhiliyinydja ŋayi Yipurayimgu djämamirri galkurrunana nhinana, ga bitjarrana ŋayi bukumirriyaŋalanydja yukurrana gam' ŋäŋ'thurruna. “Garray, Waŋarr Yipurayimgu, wuyurra nhanŋu ŋuruku Yipurayimgu, ga ŋarranhanydja guŋga'yurra biyakayi. 13Dhuwalana ŋarra nhina yukurra, liŋgu galki yurru dhika dhäykawurrunydja bunana dhiyala gapuwuna märranharawu. 14Ŋarra yurru waŋa ŋäŋ'thun gapuwu waŋganynha ŋula miyalknha, ga ŋuli yurru ŋayi wekamanydja ŋarranha, ga waŋa yurru ŋula biyapul bitjan, ‘Ŋay' ḻukiya nhe ŋäthilinydja, ga yurruna ŋarra yurru nhokalaŋuwu gamulwunydja walalaŋgu dhiṯthu'-dhiṯthun nhina,’ bala yurruna ŋarra yurru marŋgithirrinydja, ŋunhiyina miyalktja nhokuŋuwaynydja walŋu djarr'yunara ŋuruku Yipurayimgalaŋuwunydja gäthu'mirriŋuwu.”

15Mukthurruna yana ŋayi yukurrana bukukurru waŋanaŋga, bala ŋayinydja marrtjina bunanana ŋunhi dhäykanydja, yäku Ripayka, gämanydja ŋayi marrtji lili botjuŋ gapuwuy. Ŋunhiyinydja dhäyka gäthu'mirriŋu Bithiyulwu, ga Bithiyulnydja ŋunhi walkur Näyuwu, maṉḏa-yaŋara Yipurayim. 16Yurru ŋayi ŋunhiyi dhäykanydja ŋanyana dhikana djana'mirrina wirrkuḻnha, ga ŋunhi ŋayi marrtjinanydja lili dhiṯthunarawu gapuwunydja, 17bala ŋayi ḏarramuyunydja ŋuriŋiyi waŋa ŋäŋ'thunna ŋanya, “Way, gapu ŋarranha wekaŋa go,” bitjanna.

18Ga dhunupa ŋayinydja wekamana-wala, “Ŋay' ḻukiyana,” bitjan, bala ŋayi wurkthunna. 19Ga dhawar'yundja ŋayi, bala ŋuliŋurunydja Ripayka waŋa nhanukala bitjanna, “Ŋarra wäyinguna nhokalaŋuwu rarryu'-rarryun ŋi', märr walalanydja yurru ḻuka yukurra dhaŋaŋdhiyana.”

20-21Ga bitjarrayina ŋayi Ripaykayu yukurrana yulŋunydja, ga ŋayinydja ŋuriŋi ḏarramuyunydja yukurrana yana nhäŋala murrŋa, liŋguna dharaŋarana walŋu ŋayi, ŋurikiyina ŋunhi ŋayi ŋäŋ'thurrunanydja yukurrana.

22Ŋunhi ŋayi dhawar'yurruna djämaŋurunydja ŋunhiyi miyalk, bala ŋayi ŋunhi ḏarramuyu mundhurrnha malanha galkara, bala dhaṯthurrunana ŋanya marrtjina, ŋopurrlili nherrara garwarrwarr bulayi. 23Ga ŋuliŋurunydja ŋayi bala dhä-wirrka'yurrunana ŋanya bitjarra, “Yolku dhuwala nhe walkurnydja? Nhina ŋanapurru yurru ŋi?... nhokalaŋuwala bäpa'mirriŋuwala wäŋaŋura.” 24Ga ŋayi Ripaykanydja waŋana buku-ruŋiyinmaraŋala bitjarra, “Ŋarranydja dhuwala gäthu'mirriŋu Bithiyulwu, ga bäpa'mirriŋunydja nhanŋu yäku Näyu. 25Go malthurra ŋarraku. Ga ŋunhala nhe yukirriyanydja yurru, ŋanapurruŋgala wäŋaŋura.”

26Bala yana ŋayi ŋunhiyi ḏarramunydja buku-nyilŋ'thurruna, wokthurrunana Garraywuna, 27buku-wekaŋalana wirrkina ŋuriki ŋunhi ŋayi Garrayyu gäŋala ŋanya dhunupa yana Yipurayimgalaŋuwala gurruṯu'mirriwala.

28Ŋuliŋurunydja dhurrwaraŋuru bala ŋayi ŋunhi dhäykanydja waṉḏina wäŋalilina, bala yana ḻakaraŋala ŋäṉḏi'mirriŋuwana ga wäwa'mirriŋuwa Laypanba. 29-30Ga ŋunhi ŋayi Laypandhu nhäŋala ŋopurrwuynydja girri', dhunupana ŋayinydja walmanana, bala yana marrtjinana ga maḻŋ'-gay maḻŋ'maraŋala ŋunhiyinydja ḏarramunha, ŋayi yukurrana nhinana galki gapu-maŋutjiŋura. 31Maḻŋ'maraŋalanydja ŋanya ŋayi ŋunhi Laypandhu, dhunupa ŋayi waŋanana ŋanya, “Nhäku nhe yukurra dhuwala djingaryun dhiyalanydja bäyma? Go marrtjiyana lili. Ŋunha ŋarrakala wäŋanydja nhuŋu ŋorranharawunydja; guḻku' ŋunha dhaḻakarr nhuŋu ga nhokalaŋuwu wäyingu walalaŋgu.”

32Bala yuwalkthi ŋunhiyi ḏarramunydja malthurruna Laypanbana, ga ŋunhala wäŋaŋuranydja ŋayi Laypandhu gapuna gäŋala nhanŋu djalkiriwuna ḻupmaranharawu, ga ŋatha ḻukanharawu. 33Yurru ŋayi ŋunhi Yipurayimgu djämamirrinydja waŋana yaka'yurruna bitjarra gam', “Yäw yaka ŋathili ŋarra yurru ŋathanydja ḻuka, bulnha galkurra, liŋgu ŋarra ŋäthilinydja yurru dhäruk wekama nhumalaŋgu, ŋunhi ŋarra gäŋala lili.”

Ga ŋayi Laypandja waŋana, “Ma' waŋiyana ḻakaraŋana,” bitjarra.

34-49Bala yana ŋayi waŋana ŋunhi yolŋu djämamirrinydja, ḻakaranhamirri bitjan, “Ŋarranydja dhuwala yolŋu Yipurayimgu djämamirri. Ŋayipi yawungu dhuwala ŋarranha yängumanydja lili dhipala Yipurayimdhu miyalkku märranharawu, ŋarra yurru maḻŋ'marama dhiyala miyalk nhanukalaŋuwu gäthu'mirriŋuwu Yitjakku. Ŋarra bukukurru waŋana yukurrana ŋunhala bäyma gapu-maŋutjiŋura, bala Godthunydja yana gäŋala lilina nhuŋu yapa'mirriŋunhanydja dhuwali, ŋayi yukurrana djämanydja dhikana buta'kuŋalana, bitjarra yana liŋgu ŋunhi ŋarrapi yukurrana bukukurru waŋana. Bala ŋarranydja marrtjina dharaŋarana ŋanya nhäŋalanydja ŋunhimala, dhuwalayina liŋgu dhäyka djarr'yunara nhanukuŋuway Godkuŋunydja. Ŋarranydja ḏukṯuk ŋarra yurru djaw'yunna Ripaykanha ŋunhamalana wäŋalili, märr ŋayi yurru Yitjakkuna miyalk.”

50-51Bala maṉḏa Laypandja ga Bithiyulnydja dhunupa waŋanana, “Ŋe-e bay',” bitjarra. “Manymak dhuwali. Ŋayi yurru marrtjina, malthunna nhuŋu bitjanna-wala, liŋgu nhanukiyinguŋu dhuwala malanha, Garraywuŋu yana.”

52Ŋuliŋurunydja dhurrwaraŋuru waŋanhaminyaraŋurunydja bala yana ŋunhi djämamirrinydja buku-nyilŋ'thurruna, buku-wurrparana yana Godnhana. 53Ga biyapul ŋayi rarr'yurruna marrtjina mundhurrnha malanha, ḻatju'mirri malanha girri' ŋayi wekaŋalanydja marrtjina nhanŋu Ripaykawu, ga bitjarrayi liŋgu ŋayi rarr'yurruna mundhurr nhanukalaŋuwu wäwa'mirriŋuwu ga ŋäṉḏi'mirriŋuwunydja. Dhawar'yurrunanydja ŋuliŋuru, bala yurruna ŋayi ŋathanydja ḻukana, ga dhäŋuru ŋathaŋurunydja, ŋayi yukurrananydja ŋunhiliyi bäyma wäŋaŋura.

54Yukurrananydja ŋayi, djaḏaw' way wiripuna walu, bala ŋunhi djämamirrinydja gaŋgathinana, gurku'yurruna marrtjinyarawuna, bala ŋayi dhä-ŋäkula wäwa'mirriŋunha ga ŋäṉḏi'mirriŋunha, waŋananydja bitjarrana gam', “Ŋilinyunydja maṉḏa yurru marrtji gäthurana ŋi, roŋiyirrina yurru Yipurayimbana buna,” bitjarra. 55Bala maṉḏanydja waŋana bitjarra warray, “Yäw, bulnha ŋäthili galkurra, märr-gurriri, ŋula nhämunha' walu, ga yurruna ŋayi boŋguŋu marrtjinydja-wala.” 56Yurru ŋunhiyi ḏarramu djämamirrinydja waŋana bitjarrana, “Yaka nhuma gulmaraŋa ŋarranha. Yana yänguŋana-wala ŋinyalanha bala Yipurayimgalana, liŋgu Garrayyu ŋarranha guŋga'yundja yawungu. Yaka biyapul ŋinyalanha roŋiyinmaraŋa,” bitjarra.

57Bala maṉḏanydja waŋana, “Ŋilimurru dhä-wirrka'yun ŋäthili Ripaykanha ŋi?” bitjarra. 58Wäthurrunanydja maṉḏa nhanŋu Ripaykawu, bala maṉḏa ŋanya dhä-wirrka'yurrunana, “Malthun muka nhenydja yurru?... dhiyakuyinydja ḏarramuwu?” bitjarra.

Bala Ripaykanydja buku-ruŋiyinmaraŋala waŋana, “Malthunna-wala ŋarra yurru nhanŋu,” bitjarra. 59-60Bala yana maṉḏa yänguŋalana-wala ŋanya Ripaykanha, liŋguna malthurrunana ŋayi ŋuripa ḏarramuwanydja.

61Marrtjinanydja maṉḏa yukurrana weyinnha dhika, wäŋanydja ŋupara-a-a, djuḻk-djuḻkmaraŋala ŋulana-wala Gaynangurruna, yana liŋgu galki ŋunhalana wiripuŋurana galiŋura, yäkuŋura Nigip wäŋaŋura, ŋunhiyina wäŋa ŋunhi wanhaka Yitjak yukurrana nhinana.

62Ga ŋulinyaramirriyu waluyu maṉḏanydja marrtji galki wäŋa ŋayathamana, ŋayi Yitjaktja dhawaṯthun, 63bala marrtji'-marrtji ŋula baṉarra'kurruna, dhukarr-nhäma'-nhama, gumu'-gumurryunna maṉḏaku, bala ŋayi bitjanna bala nhäma dharr-way wäyinnha gamulnhana walalanha, walala marrtji wäŋgama lili withiyan ŋanya. 64Ga ŋayinydja Ripaykayunydja nhämayi, ŋayi nhina Yitjaktja marrtji lili withiyan maṉḏanha, bala yana ŋayi yarrupthun gamulwalanydja ḏiltjiŋuru, wapthun munatha'lilina, 65ga yurruna dhä-wirrka'yun ŋunhinha ḏarramunhanydja, “Yol ŋunhanydja gay' ḏarramu?... marrtji nhina lili?” bitjan. Ga ŋayi ŋunhi ḏarramunydja waŋa, “Ŋunhayina ŋarraku buŋgawa'mirriŋunydja, Yitjaktja,” bitjan. Bala yana ŋayi Ripaykayunydja märraŋala dhomala, bala bukuna ŋanyapinyay ŋayi ŋäkirrmaranhamirri.

66Bala yana walala gumurr-wunanharamirrina ŋunhiliyina, ga ḻakaramana yukurra nhanbala Yitjakpa djämamirriyunydja ŋuriŋi yolŋuyu, ŋurukuy ŋunhi ŋayi bitjan yukurra ŋunhala, ŋamathama yana.

67Ŋuliŋurunydja ŋayi Yitjakthunydja märramana Ripaykanhanydja, bala gäma ŋanya ḏalwaḏalwa'lilina ŋunhimalana, ŋäṉḏi'mirriŋuwalana wäŋalili. Bala maṉḏa märranharamirrina. Ŋayi Yitjaktja wirrkina nhanŋu dhika mäḏapthurruna, bili nhanŋu ŋunhi miyalknha ŋayi.

Currently Selected:

Genesis 24: gnnNTOTPO

Highlight

Copy