Mark 6

NAKATA 6

Nazarethmiut Jesus piyumangngitaat

(Mt. 13:53-58; Lk. 4:16-30)

1Jesus talva aullagami nunaminun tikittuk, maligutaita malikhugu. 2Sabbathmilu atugvingmi ilihauyyinahualektuk, amihullu tuhaagamitku agligutaktun ukakhutik, “Nakin una ilihauyyauva hapkuninga? Humin una ihumatutiginikka? Hapengnaktunik havagaaningnaktuk. 3Tamna hanayiungilak, Marym engniga. Tapfumalu James, Joseslu, Judaslu, Simonlu nukagiyain, naiyaillu nunaptingni-ingilat?” Talva ihuigiyaat. 4Jesusimli ukallautiyain, “Nalautaiyi nagugiyauyunaektuk nunaminiitillugu nuakatiminin ilamininlu, aahini kihimi.” 5Talva Jesus hapengnaktumik pilimaituk takanani, kihimi aaniakhimayun ikitun aktugamigit naguhipkaktain. 6Tapkualu inuit inminun ukpegngitpiangmata Jesus agligutaktuk.

Apostles 12nguyun naunaektun

(Mt. 10:5-15; Lk. 9:1-6)

Tapfumalu iglukagluangitun apkutigigamigit ilihauyyingnakpaktuk. 7Talva angutit 12n kaitkuyain inminun tililektainlu malgutivlugit hakugiktitugillu agiuktunun. 8Pitkuyaillu maligutini upalungayakunagit aullautikhamingnun aiyaupiaktuinangmik kihimi. Natkaktukhaungitun mukpauyanik, pukhamingniglunin manimiglunin. 9Kamiktukhauyugaluit atigikaktukhaungitulli malgunik. 10Ukallautiyaillu, “Namunlunin iglumun itegaigupfi taikanihimayukhaugaluaktuhi aullakiktinahi. 11Ilaitali naiyuktailipahi tuhaavigiyumangitkivluhi, kimagupfigit itigahi hiugaektilugit tapkunani naunaikutagikuvlugut.” 12Talva aullakhutik ilihauyyiyun inuit ihumaliukikuvlugit. 13Huli agiuktun amigaitun anipkaktain aaniaktunlu ukhuktekhugit naguhipkaktain.

John Baptaiektim tukuyyuta

(Mt. 14:1-2; Lk. 9:7-9)

14Tapfumani Atanek Herod tuhaayuk, Jesusim atinga tuhaanangman inungni. Ilait ukaktun, “John Baptaiekti makittitauyuk hapengnaktumik havakhuni.” 15Allat ukaktugaluit, “Una Elijauyuk.” Allatauk ukaktun, “Nalautaiyiuyuk ingilgattun.” 16Herodim tuhaagamiuk ukaktuk, “John niakuektihimayagaluanga tukungayunin inupkaktauyuk.

17Hivungani Herodim John pivagmagu itektauvigmungaktitugu. Taimalivaktuk Herodiasim, katangumi Philipim nuliyangata pitkumagu, tamna angnak nuliagigamiuk. 18Johnim Herodmun ukakhimangman “Nukavit nuliyanga pigangni ihuitpiaktuk”. 19Talvangaanin Herodiasim John nagugiyunaektaa tukutumainakhugu. Pilimaitugaluak taimatumik 20Herodim John ekhigimagu ilumugnahugivlugu. Nagunahugigamiuglu munagiyaa. Johnmin nalaugagami kapiahuktuk tuhaavigiyumainakaluaktillugulu atauhektun.

21Kakugugunmanli Herodim aniyauvia tikittuk, tapfumalu negiaktukuyain maliktini, atanikpaillu, Galileemiun ataningillu. 22Tapfumani Herodiasim pania itegami numekpaktuk aliahuktitugit Herod, negikataillu. Taima atanek angnaguhengmun ukallaktuk, “Ihumangnik tukhiaviginga, aitukuvlutin.” 23Tapfumunga ukagiaktuk ukakhuni, “Humiklunin tukhiagvigigungma, tuniniaktagin, atanguvingma pikutaita nappainlunin aitutiginiaktatka ilingnun.” 24Tayyainak aniyuk angnani apeginahualekhugu, “Humik tukhiaktukhauvik?” Kiuyuk “John Baptaiektim niakuanik.” 25Talva kilamiuvluni itegmiyuk atanek apegivlugu ukakhuni, “Tayya tuniyyavangma John Baptaiektim niakuanik akiutakpagmun.” 26Ataneklu kapiakhukpiaktuk ukagiakhimagamili negikatait tuhaatillugit, ukagiyautini puigugunaitain. 27Tayyainaglu atangum anguyakti tiliyaa itektauvingmun niakuektikuvlugu John. 28Niakua akiutakpagmi kagitimagu, atangum tuniyaa angnaguhek tapfuminga, tapfumalu angnaminun tunihiyuk niakuanik. 29Maligutaita Johnim tuhaagamitku kaiyun timaa tiguvlugu iluvektaat.

Apostles utektun

(Mt. 14:13-14; Lk. 9-10)

30Apostleslu Jesusmun utektun uniutivlugu tamainik havaamingnik ilihauyyutimingniglu. 31Ukallautiyait, “Iglukpailgulmun aavungaugitti kihimgiugluhi unanguekhekuvluhi”, inuit amigaitpiaktun tikingnangmata ailutiglunin negitailivlugit. 32Talva kihimgiukhutik iglukpailgulmun aullaktun umiaktukhutik. 33Kihimi inuit tautugamitigit aullalektillugit ilitagivlugit, iglukagvingnin kaiyun akpathutik hivuliuvlutik akianun tikittun. 34Jesusim tikinami tautugamigit inuit amigaitun nagligiyain imnaitun imnailikangngitutun-inmata; aahin ilihautinahualektain amihumik.

Inuit 5000guyun negipkaktauyun

(Mt. 14:15-21; Lk. 9:11-17; Jn. 6:1-13)

35Unulengman, maligutaita upaktaat ukakhutik, “Iglukpailgulmiinapta unulengmanlu 36inuit aullaktikit iglukagluangitununlunin niuvegiaktukuvlugit nekihamingnik.” 37Kiuyagaluangit, “Ilipfi nekihainik tunihigit.” Ukallautiyaat “Aavungaktukhauvita niuvegiaktukuvluta mukpauyanik, 200 dallat atuglugit, nekihainik tunikuvlugit?” 38Ukautiyait, “Mukpauyagliuyuhi uhimayunik kafiinik? Keniyyavuhi.” Kenigamik ukaktun, “Talimanik, ikalungniglu malgunik.” 39Talva ingikuyain ivingnun katimakuvlugit. 40Tamangmiglu akuvittun 50-laanik, 100-laaniglu. 41Jesuslu mukpauyanik talimanik, ikalungniglu malgunik tiguhigami aagluktuk kilangmun kuyakhukhuni mukpauyat avguktain tunivlugit tapkuninga maligutini tapkua tunikuvlugit inuit; tunipkaiyuglu ikalungnik tamainun. 42Tamangmiglu akeatuktun naamaktumik. 43Kinguagun tapkua ilakungit katigamitigit tigumiaktit 12n tatatait. 44Tapkualu mukpauyaktuktun 5000guyun angutit.

Jesus imam kangagun pihuktuk

(Mt. 14:22-27; Jn. 6:16-21)

45Tayyainaglu Jesusim maligutini ikipkaktain umiagmun akianun ikaakuvlugit Bethsaidamun inmi aullaktikuvlugit inuit. 46Tapkua aullakaaktillugit Jesus manilgulmun maiyugaktuk kengauyumavluni. 47Unulengmanlu umiak tahegmiitillugu kihimgiukhuni nunamiitpaktuk. 48Tapkua paukhutik aiyukalengmata anugigaalugmun Jesusim tautuktain imam kangagun pihuktillugu. Uvlaamilu kaulgaktinagu tapkununga aullaktuk pihukhuni kangiutinahualekaakhunilu, 49tapkuali takugamitku imam kangagun pihuktillugu anengniunahugiyaat tukungayumin, igialaakhutik 50ekhitakpiakamik. Tayyainagli ukagvigiyain ukakhuni, “Ekhiuktailuhi uvangauyunga kuviahukpagitti”. 51Aahin umiagmun ikinman anugaektuk, tapkuali agligutakpiaktun, 52mukpauyaktigunlu kangekhiyuitun umatain naptuvallaamata.

Gennesaretmi Jesus naguhipkaiyuk

(Mt. 14:34-36)

53Ikagamik Gennesaretmiun nunaanun tikittun umiatik kehakhugu. 54Umiagmin atkaumata tayyainak inuit ilitagiyaat. 55Aahin utiuvlutik iglukagvingnun, kagitinahualektain aaniakhimayun kipikhimayun Jesusmun naiyugaanun kuyagingnakhuni. 56Namunlunin tikikagan iglukagluangitunun, iglukagvingnunlunin aahinunlunin, aaniaktun kaitauningnaktun iliyauvlutik niuvavingni, tapkua tukhiavigiyumavlugu Jesus aktuinakuvlugu annugaata hinaa, aktuinaktunlu naguhipkaktauyun.

Currently Selected:

Mark 6: Sperry

Highlight

Copy