Mark 5

NAKATA 5

Gerasene agiuktulik ikayuktauyuk

(Mt. 8:28-34; Lk. 8:26-39)

1Tapkua tahium akianun, Gerasenemiun nunaanun tikittun. 2Jesuslu umiagmin atkauman, inum agiuktulgum upaktaat, 3tamna naiyuinaktugaluak iluvevingmi, inungninlu kilekhuktaulimaitgaluakhuni ipiutagmunlunin. 4Tamna kilekhuktauhimayugaluak akhunagmun ipiutagmunlu, tamaitali navingnaktain inuit hakugikpallaanginmata tapfumunga. 5Uvluk taman unuamilu iluvevingmiitpaktuk manilgulmilunin igialainakhuni inminik pautunguyalakhivluni uyagagnun. 6Tapfumalu kanilgulmin Jesus takugamiuk, tapfumunga akpahiyuk angayyuvigivlugu 7ukakhuni nipikuktuyumik, “Huliniakkinga, Jesus Godim kingikiyauyum engniga? Tukhiagvigigapkin Godikun kapiahuktitailunga.” 8Jesusim ukautimagu” Umanga anigiagin agiuktuk”. 9Talva Jesusim apegiyaa “Kina atkin?” Kiuyaa, “Atikaktunga Legionmik amigainapta.” 10Tukhiagvigiyaa Jesus aullakunagit nunaum avataanun.

11Tapfumanilu tuktukluit amigaitpiaktun manilgulmi neginiaktun, 12agiuktunlu tukhiagvigiyaat Jesus, “Tuktuklungnun tapkununga itektitigut.” 13Pipkagmatik agiuktun anivlutik tuktuklugnun itektun, tapkualu 2000guyun uvinangnengmin hitualegamik iyukaktun imangmun tamakhutik.

14Tuktuklukhekhiyillu kimauyun tapfuminga uniuyyivlutik inungnun iglukagvigmiununlu. Inuitlu kaiyun takuyaktugumavlutik tamainik. 15Tapkua Jesus upagamitku agiuktulik tautukaakhugu ikhivaktillugu annugakhimayumik ihumatukhuni, tamnauyuk agiuktukakpaktugaluak amigaitunik, ekhitaktunlu inuit. 16Tapkualu tautukpaktun tapkuninga uniuyyiyun akuihimayunun agiuktulikun, tuktukluktigunlu 17Inuillu tukhiagviginahualektaat Jesus nunamingnin aullakuvlugu.

18Umiagmunlu ikilengman agiuktukaktugaluak tukhiaktuk Jesusmun tapfumunga ilaukuvlugu. 19Tapfumali pitailiyagaluanga ukautivlugu, “Aigiagin ilannangnun uniutilugit tamainik Godim ikayugmatin, nagligivlutinlu.” 20Aullaktuglu iglukagvingnun kulinun uniuyyinahualekhuni Jesuskun tapfuma ikayukpagmani. Inuillu tamangmik agligutakpiaktun tuhaagamik.

Jairusim paniagun, angnakunlu aaniaktukun naguhipkaktaumanik

(Mt. 9:18-26; Lk. 8:40-56)

21Akianunlu Jesus ikangman umiaktukhuni, hinaaniitillugu inuit amigaitpiaktun tapfumani katimavaktun. 22Talva atugvium ataningata ilangat, Jairusmik atikaktuk, tikittuk takugamiuglu nallakhuni palluktuk itigaini, 23tukhiagvigivlugulu ukaktuk, “Paninuaga tukuyyukilengman kaigiagin aktugiaktukuvlugu naguhipkaklugulu tukutinagu.” 24Jesusim maligniamagu inuit amigaipiaktun maliktaat nimniuktitugu.

25Aahin angnak aungnayuktuk aaniakpakhuni ukiuni 12ni 26aiyukakpakhunilu daktinin amigaitunin maniekhunilu tapkununa, kinguaguntauk ingataktuk. 27Aahin tamna Jesuskun tuhaagami inuit akungaktigun upaktaa aktuinakhugu annugaa tunuanin, 28ukakhimagami, “Tapfuma annugaitlunin aktuinakupkit naguhiniaktunga.” 29Tayyainaglu aungnahuektainaktuk naguhigami timimini mihigiyuk. 30Jesuslu tapfuma hakugigningata ilangit aninman mihigigamiuk tayyainak inungnun kiviakhuni ukaktuk, “Kia annugatka aktukpagit?” 31Maligutaita kiuyaat, 'Inuit amigaitun nimniuktilengmatin tautuktutin, ukagaluaktutin, “Kia aktukpanga?” 32Keniktugli aktuktigiyiminik takuyumavlugu. 33Angnagli, ikayuktaugami ilihimavluni kaiyuk palluktuk nallakhuni hayukhunilu tunganun ukautivlugu itkumayumik tamanik. 34Jesusim ukallautiyaa “Paniga ukpegnivit naguhipkagmatin ailutin naguyumik, naguhiyyavutin.”

35Taima ukaktillugu atangum igluanin kivgak tikittuk ukakhuni ataniminun, “Panin tukuyuk, ilihauyyi kaiyukhaungituk tayya.” 36Jesusim tuhaanginamigit tapkua atugvium ataninga ukallautiyaa, “Ekhiuktailutin ukpekpaglutin kihimi.” 37Talva malikuyait Peter, Jameslu, Jamesim nukaa Johnlu, allat tamaita maliktailivlugit. 38Atugvium ataningata igluanun tikinamik tautuktain inuit amihun mamiahuktillugit kiavlutiglu akhun nipikuktuyumik. 39Iglumun itegami ukautiyain, “Hug mamiahukpihi kiavallaavluhi? Nutaagak hiningnaktuk kihimi tukuhimaitumik.” 40Inuilli iglautigiyagaluangat. Jesusimlu inuit anipkakaaktillugit itekatigiyain nutagaum angutaa, angnangalu malikuyanilu, nutagaum iglukhaanun. 41Talva alganga tigugamiuk ukallautiyaa, “Talitha cumi” – imaatun-ituk “Angnaguhek, ukautigipkin, makittin”. 42Tayyainaglu angnaguhek makittuk pihugahuakhuni. Ukiukaktugaluak 12nik. Tapkualu kungniaktun agligutakpiaktun. 43Jesusimli akhun angiyitkuyain tapfuminga, angnaguhek negipkaktaukuyaalu.

Currently Selected:

Mark 5: Sperry

Highlight

Copy