Mark 4

NAKATA 4

Hivuniunek nauttiyekhiyikun

(Mt. 13:1-9; Lk. 8:4-8)

1Aahin Jesus ilihauyyinahualektuk tahium hinaani. Inuit amigaitun katimalengmata umiagmun ikiyuk ingivluni tapfumani inuit hinaaniitillugit. 2Tapfuma inuit ilihautiyain amihumik hivuniunektigun, ilihauyyitillugulu ukaktuk, 3“Ata nauttiyekhiyi nauttiyekhivaktuk. 4Taimaliuktillugu nautiakhait ilait apkunmun katangmata kupanuat negiyain. 5Nautiakhaillu allat uyagaliagmun nunakukitumun katangmata kilamik nauyun nunakukinmata. 6Hikenegli nuiman naulihaaktun panektun tukuvlutik mangutikhainamik. 7Nautiakhaillu allat kataktun ukpit kakilautilgit akunganun, kakilautilgilli naugamik huguktitain nautailivlugit. 8Nautiakhailli allat nunagiktumun katangamik nauvaktun naguyumik mukpauyakhagnikhutik 30nik, 60niglu, 100niglunin.” 9Ukangmiyuk, “Inuk hiutikagumi tuhaali”.

Hivuniunit atuglugit

(Mt. 13:10-17; Lk. 8:9-10)

10Jesus, maligutaillu kihimgiukhutik, naiyuktingita apegiyaat hivuniunektigun. 11Ukallautiyain, “Ilipfingnun Godim atanguviata naunangningit naunaekhimayun, tapkunungali hilataaniitunun allauyuk ilihauyyaumata hivuniunektigun 12tapkua tautuinakuvlugit ilitukhihimaitumik, nalaukuvlugut kangekhihimaitumik, ihumaliukikunatik ihumagiyauyunaekunatiglu.”

Nauttiyyekhiyim hivuniugutata itkumayyutaa

(Mt. 13:18-23; Lk. 8:11-15)

13Ukautiyaillu, “Ilipfi una hivuniunek kangegngitkupfiuk kanuk kangegniakkihigik hivuniunit tamaita? 14Nauttiyekhiyi nauttiyekhiyuk ukauhinik. 15Apkunmiitun ukauhit iliyauyugaluit, tapkuaguyun tuhaalektillugit tayyainak Satan kaivluni akhaaktaa ukauhek tapkunanga. 16Tapkuatauk uyagaliamiitun iliyauyun tapkuaguyun tuhaagamitku ukauhek piyutigiyaat kuviatakhutik. 17Tapkuali ukpegafukaaktillugit naglikhaktitauvlutik ukauhek pivlugu, ingmingni mangutikangnginamik ipigaktun. 18Allat ukpit kakilautilgit akunganiitun tapkuaguyun ukauhengmik tuhaagaluaktun. 19Kihimi ihumagivallaagamitigit nunaum pikutait, aliagivallaakhugit manitlu, aaguhugamiglu humillika ipigaktaat ukauhek ahianikunagu. 20Tapkuali iliyauyun nunagiktumun tapkuaguyun tuhaagamitku ukauhek piyutigiyaat, talva ahianikpaktun 30nik, 60niglu, 100niglu.”

Kullengmin, nautiakhangmin ilihakuvluta

(Mt. 13:31-35; Lk. 8:16-18, 13:18-19)

21Jesusim ukallautiyain, “Kullik ikitauyukhauva iliyaukuvlugu kataum iluanun, iglim ataanunlunin kullikagvik atugngitkaluaktillugu? 22Tamangmik iyekhimayun takupkaktauhunguyun, naunaktunlunin hullika naunaekhunguyun. 23Inuk hiutikagumi tuhaali.”

24Ukallautiyaillu “Upingakhitailuhi tuhaayapfingnik. Uktugiaktugupfigit allat ayyikiitumiktauk uktuktauhunguyuhi uktutipfingnin avakumayumiglunin. 25Inuk pikakhimayuk aituhiakhungumiyuk allanik; piyutaitum tapfuma pikutain mikigaluakhuni piiyaktauniaktun tapfumanga.”

26Ukallautiyaillu “Godim atanguvia inuktun-iliyuk tamna nauttiyekhivangman nunamun. 27Talvangaanin uvluk taman kuyagingnakhuni pivaktuk unukkagan hiningnaktuk nauthiak niutillugu nauyumavluni. Nautilanga ilitukhinaipiaktugaluak inungmun. 28Nuna inminik nautiakhakakpaktuk hivullengmik kihektutain niuyun naukaaktillugit tapkua mukpauyakhait piyain. 29Mukpauyakhait naulluakpata nauttivilgum ungavaktektain tapkua katihivik tikinman.”

30Jesus ukaktuk, “Humun Godim atanguvia ayyikutaginiakkitigu? Kanuktauk hivuniunekun naunaekhunguyakkut? 31Ilaa mustardim nauthiakhangatun-iliyuk. Tamna nunamun iliyaugami mikikiyauyuk nauthiakhainin tamainin allanin. 32Nautkaaktillugu ukpingnin tamainin angikiyauyugaluak, kihektutainilu kupanuat uvluliukpaktun.”

33Taimatun hivuniunektigun Jesusim ilihautiyain kangekhigaluaktillugit. 34Inungnunlu hivuniunektigun ilihauyyingnaktuk kihimi, maligutiminunli kangekhipkaiyuk tamainik naunaitumik tapkua avaliitillugit.

Jesus anugi nutkaktitaa

(Mt. 8:23-27; Lk. 8:22-25)

35Tapfumani unulengman Jesusim ukautiyain, “Tahiup akianun ikaakta” 36Kimagamitigit inuit amigaitun maligutaita aullautiyaat umiagmi. Umiallu allat aullakatauvlutik. 37Talva anukhilektuk akhun maligyualengmanlu umiak kalugalektuk kivinahualekhuni. 38Jesus hinilektugli umiam akkuani ikhivautaani. Tapkuali tupapkakhugu ukautiyaat, “Ilihauyyi, tamalegupta ihumalugiyakhaituk?” 39Makinami anugi nutkakuyaa, imak ukautivlugu “Taimak, ukhuagli”. Tayyainak anugaektuk ukhuaktuglu. 40Talva ukallautiyain, “Hug ekhiukpakpihi? Ukpegnekangnginapfi?” 41Tapkuala agligutakpiagamik ingmingnun ukaktun, “Kina una, anukim imamlu tuhaavigimayyuk?”

Currently Selected:

Mark 4: Sperry

Highlight

Copy