Mark 3

NAKATA 3

Inuk algagluktuk naguhipkaktauyuk

(Mt. 12:9-14; Lk. 6:6-11)

1Aahin Jesus atugvingmun itegman inuk algagluktuk taikaniituk. 2Inuillu iigiyaat Sabbathmi naguhipkangniamangagu imakaagiyumavlugu. 3Jesusli ukaktugaluak algagluktumun “Hamungaugit”. 4Talva ukallautiyain inuit, “Sabbathmi nalliak nagutkiak havagupta naguyumik nagungitumiglunin? Inuk inungmik tukuttigumi annauyyigumilunin?” Tapkua nipliyuitun. 5Talva iigiyain ningaktutun-ilivluni kuviahugunaekhuni tapkua umatain naptuvallaamata. Inungmunlu ukallaktuk, Ihaguk”; ihagami naguhiyuk. 6Pharisekullu anigamik tayyainak katimakatauyun Herodim inungingni Jesuskun tukutumagamitku.

Allattauk naguhipkaktauyun

7Talva Jesus maligutaillu attangmata inuit amigaitpiaktun maliktaat Galileemin, Judeaminlu. 8Aahin Jerusalemin, Idumeaninlu, Jordam avataaninlu, Tyreminlu Sidonminlu inuit amigaitun havaangit tuhaagamitigit tikittaat. 9Jesusimlu maligutini pitkuyain upalungayakuvlugu umiak atukuvlugu, inuit nimniuktikunagu. 10Tapfuma naguhipkakpagmatik amihut tapkua iluyaat aktugumagamitku. 11Agiuktunlu Jesus takugagamitku nallakhutik palluktun ukakhutik nipikuktuyumik, “Godim engnigiyaatin.” 12Pitkuyagaluangilli akhun angiyitkuvlugit inmigun.

Jesusim apostles 12n pilluaktain

(Mt. 10:1-4; Lk. 6:12-16)

13Talva Jesus manilgulmun maiyugaktuk kaitkuiyuglu inungnik piyumayaminik, tapkualu maliktaat. 14Aahin pitkuyain 12n inminun ilaukuvlugit tiliyaukuvlugilu ilihauyyilutik, 15Hakugiktitauyukhallu tapkua agiuktun anipkakuvlugut. 16Pilluakhimayunlu hapkua. Simon, Petermik attekpaga, 17Jameslu Zebedeem engniga, Johnlu Jamesim nukaa, attekpagaik nukagik Boanergesmik – imaatun kallum kitungainik. 18Andrewlu, Philiplu, Bartholomewlu, Matthewlu, Thomaslu, Jameslu Aphaeusim engniga, Thaddaeuslu, Simonlu Cananmiutauyuk, 19Judas Iscariotlu tapfuma tuniniaktagaluanga Jesus. Talva Jesus angilgaktuk.

Jesus tupilagmun ikayuktaunginami ukaktuk.

(Mt. 12:22-37; Lk. 11:14-23, 12:10)

20Taikanilu inugiekpallaaman katimavlutik negilimaitun. 21Jesusim ilannaita tamna tuhaagamitku aavungaktuk tiguyumavlugu ukakhutik, “Aiyukalengman”.

22Tiitigaktillu akuihimayun Jerusalemin ukaktun, “Tamna ilumektauyuk Beelzebulmik, agiuktun anipkainaktain Beelzebulkun agiuktun ataniagun.” 23Jesusimlu tapkua kaitkugamigit inminun hivuniunektigun ukautiyain, “Kanuk Satan anipkainiakka Satanmik? 24Atanguvigmiut ingmingnik avitkumik tapkua piektitauniaktun. 25Iglukpagmiullu ingmingnik avitkumik itlimaektun. 26Satanlunin inminun akiniakka avittuni piektitaunialektuk.

27“Inuk kukiyuktuk hakugiktum igluanun kanuk itegniakka kukitumavlugu hivullengmik kileghugngitkumiuk hakugiktuk? Kinguagun kihimi igluata tamaiyain tiguniaktain.

28“Ilumun ukautigipfi, inuit huinekutain tamaita ihumagiyauyunainiaktun ukanilukumiglunin. 29Inuilli Anengnek Naguyuk mitautigigumitku tapkua ihumagiyauyunailimaitugaluit, huinekivagamik nungulaitumun” – 30ukakhimangmata “Agiuktukangman”.

Katangutigit naguyun

(Mt. 12:46-50; Lk. 8:19-21)

31Talva angnangalu katangutaillu tikinamik, iglum hilataaniitillugit kaitkuyaat. 32Inuillu Jesusim hanianiitun ukaktun, “Angnan katangutillu tatkaaniitun ukagvigiyumavlutin.” 33Kiuyuk, “Angnaga kinauva, kikullu katangutitka?” 34Aahin ikhivakatini tautukhugit ukaktuk, “Hapkua angnaga, katangutitkalu. 35Kialika Godim piyumaningit malikpagit, tamna nukagiyaga, naiyagiyagalu angnagiyagalunin.”

Currently Selected:

Mark 3: Sperry

Highlight

Copy