Mark 13

NAKATA 13

Jesus ukagiakpaktuk angayyuvikpagyuak imigniangman

(Mt. 24:1-2; Lk. 21:5-6)

1Jesus angayyuvikpagyuagmin anilektillugu, maligutaita ilangata ukallautiyaat, “Takuguk, ilihauyyi, angayyuvikpagyuak pinekpiaktuk, hanahimayuk pimagiktumik.” 2Jesusim ukaullautiyaa, “Hapkua iglukpait tautukkigit? una imikhungugami uyagak malguglunin kaligiktauyunaektuk.”

Aiyungnagnigit kaitauhunguyun

(Mt. 24:3-25; Lk. 21:7-24)

3Jesus manilgulmi Olivemik atilingmiitillugu tapkununga angayyuvikpagyuak tautugnaktuk ungahiktumin. Talva Peterm, Jamesimlu, Johnimlu, Andrewmlu apegiyaat kihimgiukhutik, 4“Ukautitigut kakugu tamna piniakka angayyuvikpagyuagmun, hapkuaktauk naunaikutaita tikiyyutikhanik?”

5Jesusimlu ukautinahualektain ukakhuni, “Upingakhitailuhi ilipfi ulamnekunahi inuktigun, 6amigaitun kaithungumata atipkun ukakhutik, 'Christiuyunga uvanga' ulamnektitumavlugit amihun. 7Tuhaagupfilu anguyaktutigun, anguyaktun unipkautaitigunlu ekhiukpallaaktailuhi tapkua tuhaanangniagmata, nunaum ihua tikingitugaluak. 8Nunakatigit allat anguyautiginiaktain, atanguvillu allanun anguyautingnangniaktun. Tamainilu nunat ingutakhunguyun, inuit akeaguakhunguyullu. Taimatun aiyungnagnigit pinahualektun.

9“Ilipfingnigli upingakhitailuhi, inuit kagitiniagmahi katimavingnun. Atugvingnilu ungulaktauniaktuhi, aahin atanit, atanekpailu tungani nangegniaktuhi tapkua ukauyyaukuvlugit ilipfingnin. 10Godim ukauhiillu ukaktauyukhauyugaluit hivullengmik nunakatigingnun tamainun. 11Inuillu kagitipahi apekhuiyinun hivullengmik ukaktukhapfingnik ihumaluktailuhi, ukakpagluhi tapfumani ihumapfingnik Anengnim Naguyum ukaktiniagmahi. 12Aahin katangutim katangutini tuniniaktaa tukutaukuvlugu, inumlu nutagalgum nutakani, kitungallu angayukatik ihuiginiaktain tukutakhautigilugit. 13Ilipfilu nagugiyauyunaituhi tamainin atiga pivlugu, kinalikalunin ukpeguegngitkumi annauyyauniaktuk.

14“Talva tukufinaktumik takugupfi naguyumiitillugu (taigukti uminga kangekhili) talva Judaemiut manilgulnun kimagialit. 15Inuglu iglumi kaanganiitkumi aullagiaktukhak kimaglugit tamaiyani iluaniitun. 16Tamnalu nautivingmi-itkumi kimauli utekhimaitumik atigiminun. 17Tapfumani alianainiaktuk angnangun nutaganiyyukilektunun nutaganualingnunlu. 18Tukhiagitti kimayukhaukunahi ukiumiitillugu. 19Tapkunani uvluni inuit aiyukaktitauhunguyun akhun taimaliyuitugaluak hivunganin God hanakaaktillugu tamainik, talvangaanin. 20Uvlut tapkua Godim ikiliganakpagain pilluakhimayun pivlugit annauyyaukuvlugit pingitpan annauyyaulimaitugaluit tamangmik.

21Talva inuk ukakkan ilipfingnun imaatun, 'Tautukhiuk uva Christ', imaatunlunin, 'Tamna taikaniituk' ukpektailuhiuk. 22Ilait Christiungitun nalautaiyimaluktunlu kaitauniaktun naunaikkutanik hapengnaktuniglu havaglutik ulamnektikuvlugit pilluakhimayunlunin tuhaapata. 23Upingakhitailuhi tamapfi hivuniugiakpagama tamainik hivungani.

Nunaum ihua

(Mt. 24:29-31; Lk. 21:25-28)

24“Uvlunili tapkunani aiyukangnangnigit kinguatigun hikenek taakhiniaktuk tatkeglu kaumayunaektuk. 25Uvlugiayyallu kilangmin iyukakhunguyun, kilaumlu hakugigningillu ingutaklutik. 26Talva tapkua inum engniga tautukhunguyaat atkautillugu nuvuyaktigun hakugiktumik kaumakpiaktumiglu. 27Aahin tapfuma ihalgulini tiliniaktain katikuvlugit pilluakhimayun nunanin tamainin.

Inuit upalungayakuvlugit

(Mt. 24:32-36; Lk. 21:29-33)

28“Napaaktumin ahiakaktumin fignik ilihakpagluhi. Tapfuma kihektutain nuigagata auyak tikilengman ilihimayuhi. 29Taimatauk hapkuninga tamanik takugupfi ilihimangniaktuhi tikilengman. 30Ilumun ukautigipfi hapkua inuit tayya tukuyunaitun ukua ukautigiyatka taimaktinagit. 31Kilak nunalu nunguniaktuk ukauhitkali nunguyunaitagaluit.

32Uvlungmik pivikhamiklunin tapfuminga tamangmik ilihimangngitun ihalgulgit, kilangmiitun, Godin engnigalunin, tapfuma angutaa kihimi ilihimayugaluak. 33Talva upingakhitailuhi pivikhamik ilihimangnginapfi. 34Tamna inuktun-iliyuk aullangman aahinun. Tamna aullalektillugu munakhikuyain kivgani, pitkuvkugu amekhiyi ukuangmun amekhikuvlugu. 35Amekhigitti talva atangum iglukaktum tikitakhaanik ilihimangnginapfi, uvlailgun, unuktillugulunin uvlaakunlunin, kaulgaktinagulunin. 36Amekhigitti tauktugnakhavaahi hiniktilluhi. 37Tamna ukaktaga ilipfingnun tamainun ukagaluaktunga, 'Amekhigitti”.

Currently Selected:

Mark 13: Sperry

Highlight

Copy