Mark 14

NAKATA 14

Atanekpaita tukutumavlugu Jesus ihumakatigiktun

(Mt. 26:1-5; Lk. 22:1-2)

1Kangiutivik tikitinagu Mukpauyam puvlaitum uvluangni angayyuvikpagyuakut ataningit, tiitigaktillu ihumalektun tigukuvlugu Jesus tukutaukuvlugulu, 2ukaktugaluit, “Tiguguptigu Kangiutivingmi ihuituk inuit ningakpallaaniagunakhingmata.”

Jesus Bethanymiitillugu ukhukhektuk

(Mt. 26:6-13; Jn. 12:1-8)

3Bethanymiitillugulu Simonim kilakhimayum igluani pulaakhimatillugu, angnak kaiyuk tigumiakhuni tipigiktumik pukhimayumik akituyumiglu. Aahin tapfuma kuviyaa tamna Jesusim niakuanun negitillugu. 4Ilaitli tautuktun tapfuminga kuviahugluangitun ingmingnik ukakhutik, “Hug ukhuktegun tipigiktun kuviyauva? 5Ukhuktegun tamna niuvgutigiyauyukhak maninun 300 dalanun aitutigilugit ilingayunun.” Tapkualu iglumiitun angnak ihuakhaktaat, 6Jesuslu ukaktugaluak, “Hug ihumalutigivihiuk angnak? Taimak, naguyumik havangman uvamnun. 7Ilaa ilingayun ilipfingniitpaktun, ihumapfingnik ikayugniaktahi naguyumik, ilagiyunaektagaluapfingali uvanga. 8Angnak naguyumik pivaktuk. Kuvihigami ukhuktegunmik tipigiktumik timimnun upalungayaktaa hivullengmik iluvektaukuvlugu. 9Ilumun ukautigipfi, nanilikiak ukauhit naguyun tuhaanakata angnam havaanga ukaktauyukhak inuit itkaumakuvlugu.

Judas ihuitumik pinahualektuk

(Mt. 26:14-16; Lk. 22:3-6)

10Talva maligutaita 12it ilangat, atikaktuk Judas Iscariotmik, angayyuvikpagyuakut atanigingnun upagniktuk tapkununga niuvgutigiyumavlugu Jesus. 11Tapkualu tuhaagamitku kuviataktun ukagiakhutik tunikuvlugu maninik. Talvangaanin ihumaliuktuk tunikuvlugu Jesus tapkununga.

Kinguagun negikatigiktun

(Mt. 26:14-16; Lk. 22:7-23; Jn. 13:21-30; I Cor. 11:23-25)

12Talva Mukpauyam puvlaitum uvlua tikiman, Kangiutivium imnainuanga tukutauyukhauman maligutaita ukallautiyaat, “Nani upalungayakuniakkitigut Kangiutivikhamik negiaktukuvluta?” 13Talva maligutini malguk tiliyaik ukautivlugik, “Iglukagvingmungaugittik angutimlu imektautilgum paagniaktaatik. Malikhiuk tamna. 14Namunlunin itekpan, iglulingmun inungmun ukayyavutik imaa, 'Ilihauyyi apekhiyuk, innikhaga itpa Kangiutivikhamik negikatauniagama maligutimni?' 15Talva tapfuma takupkaktiniaktaatik iglukhamik angiyumik kulaaniitumik. Takanani upalungayakpaglutik uvaptingnun.” 16Maligutiglu aullaktuk iglukagvik tikittugu, katkakhutik tamainik Jesusim ukautimagik, takananilu Kangiutivikhamik upalungayaktuk.

17Unulengmanlu kaiyuk maligutini ilagivlugit. 18Tapkua negitillugillu Jesus ukaktuk, “Ilumun ukautigipfi ilapfi niuvgutiginiaktanga, negikatima ilangat tamna.” 19Tapkualu kuviahugngitkivlutik ukautinahualektaat atuni ukakhutik, “Atanek uvangaungitunakhiyuk.” 20Ukallautiyain, 12n ilangat tamnauyuk mukpauyamik mihukataugumi akiutagmun uvamni. 21Inum engniga tukuniaktuk taima tiitigakhimangman, kapiahungniaktuk akhun tamna tunihigumi inum engninganik niuvgutigikuvlugu. Tapfumunga nagutkiak inuhimangngitkumi.”

22Negitillugit Jesus mukpauyamik tiguhiyuk kuyakhukhunilu avgukataa tunivlugit tapfuminga ukakhuni, “Tigulugu timigigapku.” 23Talva kallun tiguyaa kuyakhukhuni tuniyain tapfuminga, tapkuatauk kallumin imektun. 24Ukallautiyain, “Una augigapku ukagiyautauhimayumik kuviyauyukhak amihun pivlugit. 25Ilumun ukautigipfi, talvangaanin imekigunaektunga ahiam ipteganik imekatautinanga ilipfingni angutima atanguviani.” 26Atukaaktillugillu aniyun maligulmun atikaktumun Olivenik aullakhutik.

Maligutait kimangniangmata Jesus ukaktuk

(Mt. 26:31-35; Lk. 22:31-34; Jn. 13:36-38)

27Jesusim ukautiyain, “Unukpan tamapfi kimangniagipfinga, tiitigakhimangman, 'Avaangniagapku imnailik imnait aptektitauniaktun.' 28Makiktitaukaalungali hivunipfingnun Galileemun aullakhunguyunga.” 29Peterm ukautiyaa, “Hapkua tamangmik kimakpatin uvanga kimagunaitagaluapkit.” 30Jesusim ukallautiyaa, “Ilumun ukautigipkin, unukpan tingmiak nipyaaktinagu malguektugluni ilvit ikutiginiaktangma pingahuektuglutin.” 31Peterm ukallautimiyaa, “Ilaa tukukatigiyakhagiyapkinlunin ikutigiyunaitagin.” Ayyikiitumik maligutait tamangmik ukagiaktun.

Gethsemaniituk Jesus

(Mt. 26:36-46; Lk. 22:39-46)

32Talva tapkua Gethsemanimungaktun, Jesuslu maligutiminun ukallaktuk, “Hamaniititti aavunga kengagiaktugniagama.” 33Malikugamigit Peter, Jameslu Johnlu ihumalukpallialektuk kuviahugunaekhuni. 34Ukallautiyain, “Umatimni ukumailiuktunga akhun, hamanittiti amekhiluhilu.” 35Aavungaumigami mikiyumik palluktuk nunamun nallakhuni kengaktuk pivikhanga piektitaukuvlugu aiyungnangngitpan. 36Ukaktuglu, “Aapak, angutiga, ilingnun tamaita hapengnaimata kallun una piekli uwamnin, uvanga ihumamniungitumik ihumangnik kihimi.”

37Talva maligutini upagamigit tautuktain hiniktillugit, Petermullu ukallaktuk, “Simon, hinilekkin? Amekhilimaitgaluaktutin ikangnengmun atauhengmun? 38Amekhiluhi kengaugittilu uktuktaukunahi. Umatipfingni piyumagaluaktuhi timipfingnili hakuekpallaaktuhi.”

39Aahintauk aavungaktuk ayyikiitumik tukhiakhuni. 40Kaitfaamigami upaktait maligutini tautukhugit tapkua hiniktun uingakpallaagamik; aahin kiulimaitpiaktaat.

41Kinguaguntauk upagmiyain maligutini ukautivlugit, “Hinilekkihi unanguekhekuvluhi? Taimak, ilaa pivikhaga tikitunektuk, inum engniga niuvgutigiyauniaktuk huinekiyunun. 42Makittitti aavungakta, tamayya tunihiyiginahuaktaga kailengman.

Jesus tiguyauyuk

(Mt. 26:47-56; Lk. 22:47-53; Jn. 18:2-11)

43Taima Jesus ukaktillugu, Judas 12n ilangat inuillu amigaitun havikpakakhutik annautakakhutiglu hilitunik kaiyun tiliyaugamik angayyuvikpagyuakut atanigingnin tiitigaktininlu inuit atangingingninlu. 44Tapfumani tunihinahuaktum inuit ukautiyain naunaikutamik ukakhuni, “Nalliak kunikupku tamnauman tiguhiuk munagiyyavakhi tamakunagu.” 45Kaigami upaktaa Jesus tayyainak ukakhuni, “Atanek” kunikhugu. 46Talva inuit upagamitku Jesus tiguyaat.

47Aahin nangekatauyun ilangat havikpak amugvlugu angayyuvikpagyuakut ataningata kivganga hiutaektitaa kipivlugu. 48Talva Jesusim ukautiyain, “Kaivakpihi kukiyuktuhiuktutun-ilivluhi havikpait aiyaupiallu natkakhugit tigukuvlunga? 49Uvluk taman angayyuvikpagyuami-inakpaktunga ilihauyyivlunga tigungitagaluapfinga talva. Godim ukauhiilli ilumuktukhat uvapkun.” 50Talva maligutaita tamangmik kimakhugit aullaktun.

Inuhuktuk kimauyuk

51Inuhuktuglu tapfumunga maliktuk annugakhimavluni kalikuinangmik. Inuillu tigumayyuk 52kimauyuk annugaekhuni annugani kimakhugu.

Jesus apegiyauyuk angayyuvikpagyuakut ataningaanin

(Mt. 26:57-68; Lk. 22:54-55, 63-71; Jn. 18:12-14, 19-24)

53Talva agitiyaat Jesus angayyuvikpagyuakut ataninganun. Taikanilu angayyuvikpagyuakut ataningit, inuit ataningillu, tiitigaktillu katimayun. 54Peterm kanitpallaangitumik maliktagaluanga angayyuvikpagyuakut ataningata igluata avaluata iluanun tikittuni. Taikani Peterm anguyaktit amekhiyit ikhivakatigiyain aukhekhuni ingnegvingmin. 55Talva angayyuvikpagyuakut ataningit katimayunlu inungnik ilihimayikhanik kenivaktun tapkua ukautigikuvlugu Jesus ihuitumik tukutaukuvlugu, katkangngitugaluit tapkuninga. 56Amihut ukautigiyagaluangat ihuitumik ukauhiilli ayyikingitpiaktugaluit. 57Kinguagun illait nangekhutik ukautigiyaat ihuitumik ukakhutik, 58“Tuhaayakkut tamna ukakhimangman, 'Godim angayyuvikpagyuanga hanayauhimayuk imiktiniaktaga talva uvluni pingahuni alla nappaktiniagiga hanayauhimaitumik inungnin.' ” 59Uniuyyigaluakhutik taimatumik ayyikingitpiaktun.

60Akunganilu angayyuvikpagyuakut ataningata nangekhuni Jesus apegiyaat, “Kiungilatin hapkununga? Hug imaitumik ukautigipatin?” 61Jesuslu nipliyuituk kiuyumangngitkivluni. Aahintauk angayyuvikpagyuakut ataningata apegimiyaa, “Christiuvin Naguyum engniga?” 62Jesus ukallaktuk, “Tamnauyunga, inum engnigalu tautugniaktan ikhivautillugu Hakugiktum talekpiani, atkaulunilu aahin kilangmin nuvuyaktigun.” 63Talva angayyuvikpagyuakut ataningata annugani aliktain ukakhuni, “Ilihimayinin allanin tuhaayukhaungitgaluaktugut? 64Ukanilugman Godmun tuhaayakhi. Kanuk ihumavihi?” Tamangmiglu ihuigiyaat tukutakhautigivlugu. 65Ilaitalu tivguaktuktaat akulianga ulikhugulu patiktaat ukakhutik, “Takki hivuniugiagin.” Anguyaktillu tigluktaat.

Peterm Jesus ikutigiyaa

(Mt. 26:69-75; Lk. 22:56-62; Jn. 18:15-18, 25-27)

66Peterlu ataani avalutim hanianiitillugu, angayyuvikpagyuakut ataningata kivgaita ilangat kaiyuk. 67Tautukamiuk Peter, tamna aukhektillugu, iigiyaa ukakhuni,” Nazarethmiutagmi Jesusmiitpaktutin.” 68Imanakpaktugaluak ukakhuni, “Ukauhingnik ilihimangngitunga kangekhinginama.” Talva tukhumungaktuk. 69Kivgamlu takugamiuk ukagahualengmiyuk inungnun, “Tapfumatauk ilagingnaktain tapkua.” 70Aahintauk Peter imanakpaktuk. Tayyagunuaktauk nangekatigiktun Peter ukallautiyaat, “Ila ilagivaktatin tapkua Galileemiutaugavin.” 71Talva Peter taimaglukpiaktuk taivlugu God, “Tamna inuk ukautigiyakhi ilihimangngitpiaktaga” 72Tayyainak tingmiak nipyaaktuk malguektukhuni. Petermlu Jesusim ukauhiit ukakhimayain, “Tingmiak nipyaaktinagu malguektugluni ikutiginiaktangma pingahuektuglutin” itkaumagamigit kiavaktuk akhun.

Currently Selected:

Mark 14: Sperry

Highlight

Copy