Matthew 8
8
NAKATA 8
Kilakhimayuk naguhipkaktauyuk
(Mk. 1:40-45; Lk. 5:12-16)
1Jesus manilgulmin atkauman inuit amihun maliktaat. 2Aahin inum kilakhimayum tikittugu hitkuvigiyaa ukallautivlugu, “Atanek, piyumaguvin kilaektiniaktangma.” 3Jesusimlu ihakhuni aktuktaa ukakhuni, “Piyumayunga, naguhiguin”. Tayyainaglu kilaekpaktuk. 4Jesus ukallautiyagaluanga, “Uminga uniutitailugit inuit. Angayyuvikpagyuakut kihimi upakit takupkaikuvlutin ilingnik tapkununga aitugiaktuklutinlu Mosesim pitkuivangman naunaikutikhakakuvlutin inungnun.”
Anguyaktilgum kivganga naguhipkaktauyuk
(Lk. 7:1-10)
5Jesus Capernaumun tikilektillugu angun anguyaktilik tapfumunga upangniktuk tukhiagvigivlugu 6ukakhuni, “Atanek, kivgaga iglumni nallayuk tumangayutun ulugiahukpiakhuni” 7Kiuyaa, “Pulaayyavunga naguhipkakuvlugu”. 8Anguyaktilgum ukautiyagaluanga, “Atanek, uvanga kanguhutikhakakpallaagama iglumnun pulaaktukhaungitkaluaktutin; ukainagiaguvin kivgaga naguhiniaktuk. 9Uvanga ataninguktitauhimavagama anguyaktinun, ilangaanun ukaguma, 'Ailegin', aiyuk, allanunlunin 'Kaigiagin', kaiyuk, kivgagalunin ukautigupku, 'Una piguk', piyaa tamna.” 10Jesus tapfuminga tuhaagami agligutaktuk maligutiminun ukakhuni, “Ilumun ukautigipfi Israelmiuni ilaa ukpekpiaktumik ikumaatun-itumik tautuyuitpaktunga. 11Ukautigipfilu uataanin, kivataaninlu inuit amigaitun kaithunguyun ikhivakatigiyumavlugit Abraham, Isaaclu, Jacoblu kilaum atanguviani, 12atanguviata kitungain taaknengmun hilataanun igitaugaluaktillugit; takanani inuit kiahunguyun kiipkaktiniakhutik. 13Anguyaktilingmunlu Jesus ukaktuk, “Ailutin, ukpegavin pinialekutin piyumaningnik.” Tayyainaglu tapfuma kivganga naguhipkaktauyuk.
Jesusim naguhipkaktain Peterm hakia, inuillu allat
(Mk. 1:29-34; Lk. 4:38-41)
14Jesus Peterm igluanun pulaagami, tapfuma hakia angnak nallayuk kiyyahimavluni tautuktaa. 15Angnam algaa aktugmagu kiyyahuegami makittuk kivgaktukhugu.
16Uvlailgunmi Jesusmun inuit agiuktulgit amihut agitiyauyun. Tapfumalu ukauhimigun agiuktun anipkaktain naguhipkakhugillu aaniakhimayun taimaita. 17Taimaatun nalautaiyim Isaiam ukauhiit ilumukpaktun ukangman, “Tapfuma aaniagutivut piektitpagain.”
Maligumayun piyakhain
(Lk. 9:57-62)
18Aahin Jesusim inuit amigaitun takugamigit iluvangniamayyuk ikaakuiyuk tahiup akiaanun. 19Tiitigaktilu tikinami ukallautiyaa, “Ilihauyyi, naamunlunin aullaguvin malingniaktagin.” 20Jesusim kiuyagaluanga, “Teggiganiat hitikaktun, tingmiallu uvlukakhimayun, Inum engnigali innikhaekpiaktugaluak.” 21Maligumayunlu ilangata ukallautiyaa Jesus, “Atanek, angutiga tukuman iluvegiaktugniagiga ilvin pipkagungma.” 22Jesusim kiuyagaluanga, “Malinga, tukungayun tukungayunik iluvegiaktuglit.”
Jesusim anugi nutkaktitaa
(Mk. 4:35-41; Lk. 8:22-25)
23Jesus umiagmun ikinman, maligutaita maliktaat. 24Ilaa tahengmilu maligyualengman umiak kalualektuk, Jesusli hiningnaktugaluak. 25Tapkua tupapkaktaat ukakhutik, “Atanek, annautitigut tamangnialegapta.” 26Tapfuma ukaullautiyain, “Hug nangialekihi ukpegnekukitpallagapfi?” Makinamilu anugi malgillu nutkaktitain, ukhuaktuklu talva. 27Angutillu tapkua aglegutakpiagamik ukaktun, “Una angut kinauva anukimlu, malgit tuhaavigimayyuk?”
Gadarenemi Agiuktulik ikayuktauyuk
(Mk. 5:1-20; Lk. 8:26-39)
28Tahiup akiaanun tikinman Gadaremiun nunaanun, agiuktulik malguk iluvilingmin kaigamik upaktaak. Tapkuak ekhinakpiangmanik inuit apkuhagumangngitain. 29Tapkuak tukhulayuk, “Godim engniga, huliniakkitiguk? Uktuktauvik tikitinagu kapiahuktiniakkitiguk?” 30Taikani kanilgumi tuktukluit amigaitun neginialektun. 31Agiuktun Jesus tukhiagvigigamitku ukaktun, “Anipkangniaguptigut tuktuklungnun tapkununga itekutigut.” 32Ukautiyain, “Tapkunungaugitti”. Tayyainaglu tapkua anigamik tuktukluit itegvigiyain. Aahin tuktukluit tamangmik uvinnanengmin hitualegamik iyukaktun imangmun tamakhutik.
33Tuktuklukhekiyit angutit kimauvlutik aiyun iglukagvingmun inuit uniutiyain tamainik agiuktuliktigun. 34Aahin iglukagvigmiut tamangmik paaktaat Jesus, takugamitkulu tukhiagvigiyaat nunamingnin aullakuvlugu.
Currently Selected:
Matthew 8: Sperry
Highlight
Share
Copy
Want to have your highlights saved across all your devices? Sign up or sign in
©1972 Canadian Bible Society
