Matthew 9

NAKATA 9

Tumangayuk naguhipkaktauyuk

(Mk. 2:1-12; Lk. 5:17-26)

1Jesus umiagmun ikinami ikaaktuk iglukagvini tikittugu. 2Inuillu tumangayuk kagitiyaat kipikhimayumik tapfumunga. Jesusimlu tapkua ukpegningit nalunginamigit tumangayumun ukallaktuk, “Kuviahugin, engniga, huinekutin ihumagiyauyunaengmata.” 3Tapfumanilu tiitigaktit ilait ingmingnik ukallaktun, “Una angun ukaniluktuk Godmik.” 4Jesusimli tapkua ihumangit ilihimagamigit ukaktuk, “Hug umatipfingni ihumalukpihi? 5Nalliak aiyungnaitkiak, ukalluni, 'Huinekutitin ihumagiyauyunaektun', imaatunlunin, 'Makittin pihugiaginlu'? 6Ilihimakuvluhi Inum engniga hakugingman nunami inuit huinekutain ihumagiyunaeglugit” – tumangayumun ukallaktuk – “Makittin kipkin tiguguk aigiaginlu.” 7Tamna makinami aiyuk. 8Inuillu amigaitun tamna takugamitku agligutaktun kuyagivlugu God hakugiktimatik inuit.

Matthew malikuyauyuk

(Mk. 2:13-17; Lk. 5:27-32)

9Jesuslu talvanga aullamigami angumik atikaktumik Matthewmik tautuktuk tamna manilekhiyikagvingmi ikhivainaktillugu. Tapfuma ukallautiyaa, “Malinga”. Nangekamilu maligahualektaa.

10Aahin Jesus iglumi negitillugu, ilaa manilekhiyit amihun huinekiyullu negikatigiyain Jesus maligutaillu. 11Pharisekullu takugamitku tapfuma maligutain ukautiyain, “Hug ilihauyipfi negikatigivagit manilekhiyit huinekiyullu?” 12Jesusim tamna tuhaagamiuk ukaktuk, “Inuit naamaktillugit daktimik takuyumangngitun, tapkua aaniaktun kihimi. 13Takki uma hivunia ilihagiaktukhiuk, 'Nagliguhuktun pitkuhiit nagutkiyaunahugiyatka aitutikhaanin amigaitunin'. Kaithimangngitpaktunga inuit ilumuktun kaitkukuvlugit uvamnun, huinekiyun kihimi.

Apekkut Negitailiyukhaumangata

(Mk. 2:18-22; Lk. 5:33-39)

14Aahin Johnim maligutaita upaktaat Jesus ukakhutik, “Hug Pharisekullu negitailingnaktilluta maligutitin ilvin negitailiyuitpaktun?” 15Jesusim kiuyain, “Nulianiyukilektum ilannain kuviahungngitukhauvat uikhak ilagitillugu? Kakugulunin uikhak aullautiyautpan tapkunanga, talva negitailihunguyun.

16“Annugak alikhimayuk ilaahakaktukhaungitpiaktuk nutaamik tamna alikataknakhavuk nutaamin angikiyamik. 17Imektautinun utukangnun wainmik nutaamik ilahitailuhi imektautin aheguknakhavun wainlu kuvingnaklugit. Wainlu nutat imektautini nutaaniitpata tamangmik naamangniaktun.”

Jairusim paniagun, angnakun aaniaktukun naguhipkaktaumanik

(Mk. 5:21-43; Lk. 8:40-56)

18Taimatumik Jesus ukaktillugu, inuk ataninguyuk tikittuk hitkukhuni hanganun ukaktuk, “Tayyanuak paniga tukuyuk; kaiguvinli aktugiaktugungni inuyumaaktuk.” 19Jesuslu makinami maliktaa maligutaitalu malikhugu.

20Ilaa tapfumani angnak aungnayuktuk ukiuni 12ni tapfuma angugamiuk annugaata hinagun aktugiaktuktaa tunuanun, 21inmigun ukagami, “Annugainak aktugupku naguhiniaktunga.” 22Jesusimlu kiviakami tautukhugu ukaktuk, “Kuviahugin, paniga, ukpegnivin naguhipkagmatin”, tayyainaglu naguhivaktuk angnak tamna.

23Jesuslu atangum igluanun tikinami tautukhugit huvlutaliktuktun inuillu nipyainakhutik, 24ukautiyain, “Aahivagitti, angnanguhek hiningnangman tukuhimaitumik.” Inuit iglautigiyagaluangat. 25Inuit anipkaktaukaaktillugit itektuk angnanguhem alganga tiguvlugu, tamnatauk makittuk. 26Havaangalu tuhaatitauvaktuk nunani aahini tapfumani.

Angutik takpiituk tautuglektuk

27Jesuslu talvanga aullangman angutik takpiituk tapfumunga maliktuk tukhulauvlutik nipikuktuyumik, “Ilvin, Davidim engniga, nagligitiguk.” 28Iglumun itegman Jesus, takpiitun upaktaak. Jesusim ukautiyak, “Pinahualektamnik iliptingnun ukpekpitik?” Tapkua kiuyaak, “Ilaa, Atanek”. 29Iyingillu aktugamigit ukallaktuk, “Ukpegaptik piyauli iliptingnun.” 30Tautuglektuk talva. Jesusimlu ukallautiyak akhukhugik, “Uminga uniuyyitailutik inungnun”. 31Tapkuagli aigamik uniuyyivaktugaluak tamainik inungnun.

Agiuktulik ukayuituk ikayuktauyuk

32Tapkuak animanik, inuk agiuktulik ukayuituk agitiyauyuk Jesusmun. 33Agiuktugli anipkaktauman ukayuitugaluak ukalektuk. Inuit agligutakamik ukaktun, “Taimatumik tautugnaitugaluak Israelmiuni. 34Pharisekulli ukallaktugaluit, “Uma agiuktun anipkaktain agiuktun ataniagun.” 35Jesuslu akuivaktuk iglukagvingnun iglugiegngitununlu tamainun atugvingni ilihauyyivluni atanguvia ukauhianik naguyunik, naguhipkaivluni aaniaktunik tamainik.

Jesus Christim inuit nagligiyain

36Jesusim inuit amigaitun takugamigit nagligiyain aiyukalengmata ikayuktikhaekhutik imnaitun imnailikangngitutun-ilivlutik.

37Talva Jesusim maligutini ukallautiyain, “Katihivik ilaa angiyuk, havaktilli ikitugaluit. 38Talva katihivium ataningat tukhiagvigiluhiuk havaktukhanik tilikuvlugu katihiviminun.

Currently Selected:

Matthew 9: Sperry

Highlight

Copy