Matthew 7
7
NAKATA 7
Uktugiaktukunagit allat
(Lk. 6:37-38, 41-42)
1“Uktugiaktuktailuhi uktuktaukunahi ilipfi. 2Uktugiaktugupfi uktugiaktunipfingnik uktuktauhunguyuhi ilipfi ayyikiitumik piluhi. 3Ilvin katangutivit iyingani iyyiun hug takuviuk malugingitkaluaktillugu keyuk iyingnihimayuk? 4Kanuktuntauk katangutin ukautiniakkiuk imaatun, 'Uvanga iyyiut pieglagu iyingnin', iyin keyukakaluaktillugu ilvin? 5Ilumukhektuktutin, hivullengmik iyingnin keyuk pieguk tautuktiakuvlutin iyyiut piekuvlugu katangutivit iyinganin. 6Kenmit tunitailugit humillika nagutpiaktunik pinekutiniglu tuktuklugnun, tapkua tutinakhavain ugiagumavluhi ilipfi.
Kengakuvluhi
(Lk. 11:9-13)
7“Tukhiagitti tunihiviuniakuvluhi talva, kenigitti pakekuvluhi, tigluktugittilu ukuiguyyaukuvluhilu. 8Kinalika tukhiagumi tunihiviuniaktuk, kenigiaktugumilunin pakengniaktuk, tigluktugumilunin tamna ukuiguyyauniaktuktauk. 9Nallipfi kia inum tapfuma engningata tukhiagvigipani mukpauyamik, uyagagmik tuniniakkauk? 10Tukhiagvigipani ikalugmiglunin nimegiagmik tuniniakkauk? 11Ilipfili nagungitkaluaktilluhi nutakahi tunigupfigik naguyumik, Angutipfi kilangmitum nagutkiyanik tuniniagunakhiyain tapkua inuit tukhiagvigipayyuk.
Pitkuyak naguyuk
(Lk. 6:31)
12“Ilipfi kanu-iliugutikhapfingnik piyumagupfi inungnin, ilaa ayyikutaaniktauk taimaliukpagluhi tapkununga; pitkuyat, nalautaiyitlu tiitigangit maliktauyun taima.
Apkutikhak malgunguyuk
(Lk. 13:24)
13“Itegvingmun negukiktumun itegitti, itegvik, apkunlu aullayuk nungutitaunegmun negutuman, amigaitunlu inuit atuktaat tamna. 14Inunengmunli itegvik negukitpiaktuk, apkunlu aiyungnaktuk, tapkuatauk atuktaat ikitugaluit.
Ilumuktutigun, ilumugngitutigunlu
(Lk. 6:43-44)
15“Upingakhitailuhi nalautaiyimagluktunin tikitpahi annugakakhutik imnaitun ilumingnili amakuktun ugiaktutun-ililektugaluit. 16Tapkua ahiagingnin ilitaginiaktahi. Inuit ahianikkat grapesnik ukpingnin, figniglunin kakilautilingnin? 17Taima napaaktun naguyun ahiakakpaktun naguyumik, napaaktulli nagungitun tapkua ahiakakpaktun nagungitumik. 18Napaaktuk nagugumi ahianiyuituk nagungitumik. Napaaktuglunin nagungitkumi tamna ahianiyuituk naguyumik. 19Napaaktun tamangmik ahiakangngitkumik naguyumik kipiyauyukhat igitaukuvlugit ingnengmun. 20Taima huliyangingnin ilitaginiaktahi.
Ukainaglugit havalugitlu atautikun
(Lk. 6:46, 13:25-27)
21“Tamnaungitum ukautivlunga ukakhuni, 'Atanengmik, Atanengmik' kilaum atanguvianun itegniaktuk, tamnauyumli Angutima kilangmiitum ihumangit pigumigit kihimi. 22Uvluk kingullik tikitpan amihut ukautiniaktangnga ukaglutik, 'Atanek, Atanek hivuniugiakpagngilavut atingni, agiuktunlu anipkakpagngilavut atingni, hapengnaktuniklunin havakpagngilavut atingni?' 23Talva ukallautihunguyavut tapkua imaatun, 'Uvanga ilihimangngitpiagapfi kimakhinga huinekituyuhi.'
Igluk tungavikaktuk ayyikiingitumik
(Lk. 6:47-49; Mk. 1:22)
24“Kinalika tapfuma ukauhitka tuhaagumigit maliklugit angutun-ituk ihumatuyutun iglulivangman kaektumun. 25Ilaani nipalugyuaman kugaglu ulipkangman, anukim iglu hayuktitugu imiglimaituk tungavikakpagami kaektumi. 26Kinalikalunin ukauhitka nalaugumigit malikhimaitumik angutuniniaktuk ihumaitutun tamna iglulengman hiugainangmun. 27Nipalugyuaman, kugaglu ulipkangman anukimlu iglu hayuktimani imikpaktuk. Tapfumalu tamagvia kuvianaitpiaktuk.”
28Jesuslu ukaguegman hapkuninga inuit agligutakpiaktun ilithauyyutainun, 29ilithautivangmatik akhukhuni tiitigaktitun-ingitgaluakhunilu.
Currently Selected:
Matthew 7: Sperry
Highlight
Share
Copy
Want to have your highlights saved across all your devices? Sign up or sign in
©1972 Canadian Bible Society
