Matthew 25

NAKATA 25

Hivuniunek uilgahuktigun kulikun

1“Talva kilaum atanguvia uilgahuktitun kulitun-iliyuk tapkua kullimingnik tigumiangmata palgiakhugu uikhak. 2Tapkua talliman ihumaitun tallimanli allat ihumatuyugaluit. 3Ihumaitun kullitik natkakamitigit ukhukhamingnik puiguinakpaktun. 4Ihumatuyulli ukhukhamingnik natkaktugaluit kullimingnun. 5Uikhak tamna tikinahangman uilgahuit uingalegamik hinaakhiyun. 6Unuak kitekkungman nipikuktuyuk tuhaanaktuk 'Ata uikhak tikilengman anititti palgiaktukhiuk.' 7Talva uilgahuit tamangmik makittun kullitik ikumangikhakhugit. 8Talva ihumaitun ihumatuyunun ukallaktun, 'Ukhukhapfingnik tunitigut kullivut kamilengmata.' 9Ihumatuyulli kiuyain, 'Naamayunaimata uvaptingnun ilipfingnulu niuvayinungaugitti niuvegiaktukuvluhi ilipfingnun.' 10Tapkualu niuvegiaktuktillugit niuvayiliakhutik uikhak tikittuk, tapkuatauk upalungayakhimayun itekatigivagaat katuhekhektunun, ukuaglu ukuaktuk. 11Kinguagunlu uilgahuit allat kaivangmiyun ukakhutik, 'Atanek, atanek ukuigutitigut.' 12Kiuyugaluak, 'Ilumun ukaktunga ilihimangngitkipfi.' 13Talva upingakhitailuhi uvlungmiglu pivikhamiglu ilihimangnginapfi.

Hivuniunek manitigun

14“Imaatun-iniaktuktauk, inuk kivgalik aullagami aullaktinani kivgaminik kaitkuiyuk inminun munakhikuvlugit tamaiyaminik. 15Ilangaanun tunihivaktuk 5000 dalanik, tugliaanun 2000 dalanik allanuntauk 1000 dalanik atuni aiyuimangata. Kinguagun aullaktuk. 16Talva tamna 5000 dalanik pivaktuk niugutigigamigit avakuktihivaktuk 5000 dalanik allanik. 17Taimalivaktuktauk tamna 2000 dalanik pivaktuk avakuktihivluni 2000 dalanik allanik. 18Tamnali 1000 dalanik pivaktuk aigami algakpaktuk nunami atanimi maningit iyektitugit. 19Kakugugaalungugman kivgait ataningat utektuk piyutini naunaegumavlugit. 20Tamna pivaktuk 5000 dalanik kaiyuk kaipkakhugit 5000 dalat allat ukakhuni, 'Atanek 5000 dalanik tunivagangma avakumayuniglu 5000 dalanik pivakaluaktunga ilingnun.' 21Ataningata ukallautiyaa kivgak, 'Kuanakpiaktuk kivgaktuyyagikpiaktutin munakhigavin ikitunik munakhikuniaktagin amigaitunik, uvamni kuviahukatauhimalutin.” 22Tamnatauk 2000 dalanik pivaktuk kaiyuk ukakhuni, 'Atanek 2000 dalanik tunivagangma avakumayuniglu 2000 dalanik pivagaluaktunga ilingnun." 23Ataningata ukautiyaa, 'Kuanakpiaktuk kivgaktuyyagikpiaktutin, munakhigavin ikitunik munakhikuniaktagin amigaitunik, uvamni kuviahukatauhimalutin 24Tamnatauk 1000 dalanik pivaktugaluak kaiyuk ukakhuni, 'Atanek, aneguhukpiagavin ilihimayunga katihivagavin humillika nauttiyyekhiyuitgaluaktillutin. 25Talva ekhiukpallaagama manitin 1000 dalauyun nunami iyektitpagatka. Ukua manitin piyutin aulayuitun.' 26Atangumli kiuyagaluanga, 'Kivgaktuyyalukpiaktutin! Katihigama humillika nauttiyyekhiyuitillunga ilihimaguvin, 27talva manimnik atukiktitakhagiyatin manikagvigmiun taima tikitkuma piyutitka pikuvlunga tapikhakakuvlungalutauk. 28Ikumanga 1000 dalat pihigit tapkuninga tunikuvlugu tamna 15,000 dalanik pivaktuk. 29Kitulika pikakpaktun tapkua pifaaniamiyun avakumayunik amigaitunik pikakuvlugit. Piyutaitugli tapfumanga humillika pikaktugaluak piiyaktauyukhat. 30Tamnalu kivgak nagunektuk hukaunginman igithiuk taagnengmun talvani inuit kiahunguyun kiipkaktilutik.'

Uktuktauvium uvluanga

31“Inum engniga tikitkumi kaumangnengmigun ilagilugit ihalgulini ikhivautakpagminun inginiaktuk kaumangnemini. 32Tapfumungalu nunakatigit tamangmik katiniaktun hangaanun. Aahin tapfuma avipkangniaktain, imnailiktun, imnailgum avipkakmagit imnait imnaitlugnin nagyuklingnin, 33imnaini talekpingmi tunganun ilivlugit, imnaitluilli ilivlugit haumingmi tunganun. 34Talva atanek tapkununga talekpimini-itunun ukangniaktuk, “Kaititti nagugiyauyuhi angutimnin, nanminigiluhiuk atanguvik itkanayakhimayuk ilipfingnun kangagaaluk nunat hanayaukaaktillugit. 35Uvanga kaalektillunga negipkakpagapfinga, imekitillungalu imektitpagapfinga, tuyungmiitillunga munagivlunga. 36Annugakhaektillunga annugaktitpagapfinga aaniaktillungalu kaiyyutigivagapfinga itektauvigmiitillungalu pulaakpagapfinga.' 37Talva ilumuktun kiuniaktun, 'Atanek, kanga kaalektillutin tautukpakpitigin negipkakhutin, imektitpakpitiginlunin imekitillutin? 38Kanga tautukpakpitigin tuyungmiitillutin munagivlutin, annugakaitillutinlunin annugaktivlutin? 39Aahin kanga tautukpakpitigin aaniaktillutin, itektauvigmiitillutinlu pulaakpakpitigin?' 40Talva atangum kiuniaktain tapkua, 'Ilumun ukautigipfi, ilipfi taimaliukpagapfi katangutima ilangaanun taimaliukpagaluaktuhi uvamnuntauk.' 41Talva ukallangniaktuk tapkununga haumingmiitunun, 'Aullagitti uvamnin huniaktaugapfi ingnengmun kamilaitumun tamna itkanayakhimayuk Tupilagmun, tapfuma ihalgulingingnunlu. 42Uvanga kaalektillunga negipkagnginapfinga, imekitillungalu imektinginapfinga. 43Uvanga tuyungmiitillunga munaginginapfinga annugakhaitillungalu annugaktinginapfinga, itektauvingmiitillungalu pulaayuinapfinga.' 44Talva tapkua kiuniaktaat, 'Atanek, kanga tautukpakpitigin kaalektillutin, imekitillutinlunin, tuyungmiitillutinlunin, annugakhaitillutinlunin, aaniaktillutinlunin, itektauvingmiitillutinlunin kivgaktugngitpakpitigin?' 45Talva kiuniaktuk, 'Ilumun ukautigipfi, taimaliyuitpagapfi ilingayun ilangaanunlunin uvamnuntauk taimaliyuitpaktuhi.' 46Tapkua aavungagniaktun kapiahugvingmun nungulaitumun, ilumuktulli inuhengmun nungulaitumun piniaktun.

Currently Selected:

Matthew 25: Sperry

Highlight

Copy