Matthew 26

NAKATA 26

Atanekpaita tukutumavlugu Jesus ihumakatigiktun

(Mk. 14:1-2; Lk. 22:1-2)

1Jesuslu taimatumik ukaguegami maligutini ukautiyain, 2“Ilihimagaluaktuhi akaguani Kangiutivik tikitpan, inum engniga tuniyauniaktuk kikiaktuktaukuvlugu.” 3Tapfumani angayyuvikpagyuakut, inuillu ataningit tapkua ataningata iglukpangani, atikaktuk Caiaphasmik, katimayun 4ukakatigikhutik tiguyumavlugu Jesus tukutumavlugulu. 5Tapkua ukaktugaluit “Tiguguptigu Kangiutivingmi ihuituk inuit ningakpallaaniagunakhingmata.”

Jesus Bethanymiitillugu ukhukhektuk

(Mk. 14:3-9; Jn. 12:1-8)

6Jesus Bethanymiitillugu Simonim kilakhimayum igluani pulaakhimatillugu, 7angnak tapfumunga upautiyuk tigumiakhuni tipigiktumik pukhimayumik akituyumik. Aahin tapfuma kuviyaa tamna Jesusim niakuanun negitillugu. 8Maligutaita tamna takugamitku ihuigiyaat ukakhutik, 'Hug tamna kuviyauva? 9Tamna ukhuktegun tipigiktumik niuvgutigiyauyukhak maninun amigaitunun manit aitutigilugit ilingayunun.” 10Jesusim ilihimagami, ukallautiyain, “Hug ihumalutigivihiuk angnak? Naguyumik havangman uvamnun. 11Ilingayun ilagingnaktaahi talvangaanin uvangali talvangaanin ilagiyunaitagaluapfi. 12Angnak kuvihigami ukhuktegunmik tipigiktumik timimnun pivaktuk upalungayakuvlunga iluvekhamnun. 13Ilumun ukautigipfi, nanilikiak Godim ukauhiit tuhaanakkata angnam havaanga ukaktauyukhak inuit itkaumakuvlugu.

Judas ihuitumik pinahualektuk

(Mk. 14:10-11; Lk. 22:3-6)

14Talva maligutaita 12it ilangat, atikaktuk Judas Iscariotmik, angayyuvikpagyuakunun ataningit upautiyuk, 15ukakhuni, “Humik tuniniakkihinga ilipfingnun tunigupku Jesus?” Tapkua akilektaat silvernik 30nik. 16Talvangaanin ihumaliuktuk tunihikuvlugu tapfuminga.

Kinguagun negikatigiktun

(Mk. 14:12-26; Lk. 22:7-23; Jn. 13:21-30; I Cor. 11:23-25)

17Talva Mukpauyam puvlaitum uvlua tikinman maligutaita Jesus upaktat ukakhutik, “Nani upalungayakuniakkitigut Kangiutivikhamik negiaktukuvluta?” 18Ukaktuk, “Iglukagvingmungaugitti angunmun, ukautiginiaktamnun ukallautiluhiuk, 'Ilihauyyi ukaktuk, Pivikhaga tikilengman iglungni Kangiutivikangniaktugut maligutitkalu.' ” 19Maligutaitalu tuhaagamitku Jesus pivaktun Kangiutivikhamik upalungayakhutik.

20Unulengman Jesusim maligutini 12 negikatigiyain, 21negitillugulu ukallaktuk, “Ilumun ukautigipfi, ilapfi niuvgutiginiaktanga.” 22Tapkualu kuviahugunaekhutik tamangmik apeginahualektaat, “Atanek uvangaungitunakhiyuk?” 23Kiuyuk, “Tamna mukpauyamik mihukataugumi akiutagmun uvamni, tapfuma niuvgutiginiaktanga. 24Inum engniga tukuniaktuk taima tiitigakhimangman, kapiahungniaktuk akhun tamna tunihigumi inum engninganik niuvgutigikuvlugu. Tapfumunga nagutkiak inuhimangngitkumi.” 25Judaslu, tapfuma niuvgutiginiaktaa, ukaktuk, “Uvangauva, Atanek?” Kiuyaa, “Ukakkutin, ilvit”.

26Negitillugillu Jesus mukpauyamik tiguhiyuk kuyakhukhunilu avguktaa tunivlugit maligutini, ukaktuk, “Tigulugu negihiuk una timigigapku.” 27Talva kallun tiguyaa kuyakhukhuni tuniyain tapfuminga ukakhuni, “Uminga tamapfi imegitti 28una augigapku ukagiyautauhimayumik kuviyauyukhak huinekiyun amihun ihumagiyauyunaekuvlugit. 29Ukautigipfi, talvangaanin imekigunaektunga ahiam ipteganik imekatautinanga nutaamik ilipfingni angutima atanguviani.” 30Talva tapkua atukaaktillugit aniyun manilgulmun atikaktumun Olivemik aullakhutik.

Maligutait kimangniangmata Jesus ukaktuk

(Mk. 14:27-31; Lk. 22:31-34; Jn. 13:36-38)

31Talva Jesusim ukautiyain maligutini, “Unukpan tamapfi kimangniagipfinga tiitigakhimangman, 'Avaangiagapku imnailik imnaingit aptektitauniaktun.' 32Makiktitaukaalungali hivunipfingnun Galileemun aullakhunguyunga.” 33Peterm ukautiyaa, “Hapkua tamangmik kimakpatin kimagunaitagaluapkin uvanga.” 34Jesusim kiuyagaluanga “Ilumun ukautigipkin, unukpan tingmiak nipyaaktinagu ikutiginiaktangma pingahuektuglutin.” 35Peterm ukallautiyaa, “Ilaa tukukatigiyakhagiyapkinlunin ikutigiyunaitagin.” Ayyikiitumik maligutait tamangmik ukagiaktun.

Jesus Gethsemaniituk

(Mk. 14:32-42; Lk. 22:39-46)

36Talva Jesus maligutaillu Gethsemanimungakamik tapkununga ukallaktuk, “Hamaniititti aavunga kengigiaktugniagama.” 37Malikugamigit Peter, Zebedeem engningiklu aavungaktuk ihumalukpallialekhuni, 38ukautivlugit “Umatimni ukumailiuktunga akhun, hamaniititti amekhiluhi uvamni.” 39Aavungaumigami mikiyumik palluktuk nunamun nallakhuni kengaktuk “Angutiga aiyungnangngitpan kallun una piekli uvamnin, uvanga ihumamniungitumik ihumangnik kihimi.”

40Tapfuma upagamigit maligutini tautuktain hiniktillugit. Petermunlu ukallaktuk, “Hunauva ikangnengmun atauhengmun amekhilimaitgaluaktuhi? 41Amekhiluhi kengaugittilu uktuktaukunahi. Umatipfingni piyumagaluaktuhi timipfingnili hakuekpallaaktuhi.”

42Aahintauk aavungauyuk kengakuvlugu ukakhuni, “Angutiga una kallun piegngitpan uvamnin umanga imengngitkuma ihumatin taimaliukli.” 43Kaitfaamigami upaktait maligutini tautukhugit, tapkua hiniktun uingakpallaagamik. 44Kimagmigamigit Jesus kengagmiyuk aahin ayyikiitumik tukhiakhuni.

45Kinguagun upaktait maligutini ukautivlugit, “Hinilekkihi unanguekhekuvluhi? Tautuk pivikhaga tikitunektuk, inum engniga niuvgutigiyauniaktuk huinekiyunun. 46Makittitti aavungakta, tamayya tunihiyiginahuaktaga kailengman.”

Jesus tiguyauyuk

(Mk. 14:43-50; Lk. 22:47-53; Jn. 18:2-11)

47Taima Jesus ukaktillugu Judas 12n ilangat, inuillu amigaitun havikpakakhutik, annautakakhutiglu hilitunik kaiyun tiliyaugamik angayyuvikpagyuakunin ataningit inuit ataningingnin. 48Tapfumani tunihinahuaktum inuit ukautiyain naunaikutamik ukakhuni, “Nalliak kunikupku tamnauman tiguhiuk.” 49Tayyainak upagamiuk Jesus ukaktuk, “Atanek hallu” kunikhugu. 50Jesusim ukallautiyaa, “Ilannaga hug kaivakpin” Talva inuit upautivlugit Jesus tiguyaat.

51Aahin Jesusim maligutaita ilangat havikpak amugvlugu angayyuvikpagyuakun ataningata kivganga hiutaektitaa kipivlugu. 52Tayyainak Jesusim ukautiyaa, “Havikpautin pugiaguk, kikun anguyagumik havikpaktigun havikpaktiguntauk tukutauhunguyun. 53Itkaumalutin angutiga tukhiagvigigupku tayyainak tiliniaktain ihalgulgit amigaitpiaktun uvamnun ikayukuvlunga? 54Taimaliukpan kanuk Godim ukauhiit tiitigakhimayun ilumugniakkat pinahualektapkun?”

55Tapfumani Jesusim inuit amigaitun ukautiyain, “Kaivakpihi kukiyuktuhiuktutun-ilivluhi havikpait, aiyaupiallu natkakhugit tigukuvlunga? Uvluk taman angayyuvikpagyuami-inakpaktunga ilihauyyivlunga tigungitagaluapfinga talva. 56Ukua pivaktun nalautiyyit tiitigait ilumukuvlugit.”

Talva maligutaita tamangmik kimagamitku kimauyun.

Jesus apegiyauyuk angayyuvikpagyuakun ataningaanin

(Mk. 14:53-65; Lk. 22:54-55, 63-71; Jn. 18:12-14, 19-24)

57Inuillu tigugamitku Jesus aullautiyaat Caiaphasmun angayyuvikpagyuakut ataninganun, tapfumanilu tiitigaktit, inuit atangillu katimayun. 58Peterm kanitpallaangitumik maliktagaluanga Jesus angayyuvikpagyuam ataningata igluanun. Iglukpaum avaluata iluanungaugami Peter tapfuma ikhivakatigiyain anguyaktit amekhiyun takuyumavluni Jesus kanuiliuktaumangan. 59Talva angayyuvikpagyuakut ataningit katimayunlu inungnik ilihimayihanik kenivaktun tapkua ukautigikuvlugu Jesus ihuitumik tukutaukuvlugu, 60katkangngitun tapkuninga ilihimayihat amigaituk ikuvaktugaluit. Kinguagun malguk kaiyuk, 61ukakhutik, “Tamna inuk ukaktuk, 'Godim angayyuvikpagyuanga imiktiniaktaga talva uvluni pingahuni nappaktiniagigalu.' ”

62Talva angayyuvikpagyuakut ataningat nangekhuni ukallaktuk, “Kiungilatin hapkununga, hug imaitumik ukautigipatin?” 63Jesusli nipliyuituk. Angayyuvikpagyuakut atangingata ukautiyaa, “Pitkuyagin Godikun inuyukun ukautitigut Christiuguvin Godim engnigipatinlu.” 64Jesusim ukautiyaa, “Taima ukakkutin. Ukautigipkinlu, talvangaanin tautugniaktan inum engniga ikhivautillugu Hakugiktum talekpiani, atkaulunilu aahin kilangmin nuvuyaktigun.” 65Talva angayyuvikpagyuakut ataningata annugani aliktain ukakhuni, “Ukanilutigiyaa God tapfuma. Ilihimayinin allanin tuhaayukhaungitgaluaktugut? Ukanilugman Godmun tuhaayakhi. 66Kanuk ihumavihi?” Tapkua kiuyun, “Tukutauyukhak”.

67Talva Jesus akulia tivguaktuktaat tiglukhugulu. Ilaita patiktaat 68ukakhutik, “Takki hivuniugiagin, Christ, kia tiglukpatin?”

Peterm Jesus ikutigiyaa

(Mk. 14:66-72; Lk. 22:56-62; Jn. 18:15-18, 25-27)

69Tapfumani Peter hilataani iglukpaum, avalut haniani ikhivainaktuk. Kivgaglu angnaguhek, upautiyuk tapfumunga ukakhuni, “Ilvillu Galileemiutagmi Jesusmiitpaktutin.” 70Tapkunungali tamainun imanakpaktugaluak ukakhuni, “Ukauhipfingnik kangekhingitunga.” 71Tukhumunlu aninahualengman kivgam allata tautuktaa nangekatauyunun ukallaktuk, “Unatauk inuk Jesus Nazarethmiutagmiitpaktuk.” 72Aahintauk Peter imanakpaktuk taimaglukhuni, “Tamna inuk ilihimangitaga” 73Uatiagunguman nangekatigiktun Peter upagamitku ukaktun, “Ilaa tapfumunga ilauvaktutin tapkunaatun ukayukpiaktutin.” 74Talva Peter taimaglukpiaktuk taivlugu God, “Inuk tamna ilihimangitpiaktaga”. Tayyainak tingmiak nipyaaktuk. 75Petermlu Jesusim ukauhiit itkaumayain, “Tingmiak nipyaaktinagu ikutiginiaktangma pingahuektuglutin”. Anigamilu kiavaktuk akhun.

Currently Selected:

Matthew 26: Sperry

Highlight

Copy