Matthew 24

NAKATA 24

Jesus ukagiakpaktuk angayyuvikpagyuak imigniangman.

(Mk. 13:1-2; Lk. 21:5-6)

1Jesus angayyuvikpagyuamin anilengman maligutaita upakakhugu angayyuvikpagyuak ukautigiyaat Jesusmun. 2Kiuyain, “Iglukpait tapkua tamaita tautukaluakkihigik? Ilumun ukautigipfi, una imikhungugami uyagak malguglunin kaligiktauyunaektuk.”

Aiyungnagnigit kaitauhunguyun

(Mk. 13:3-23; Lk. 21:7-24)

3Jesus manilgulmi Olivemik atilingmi ittillugu maligutaita kihimgiukhutik upaktaat ukakhutik, “Ukautitigut kakugu tamna piniakka angayyuvikpagyuagmun, aahin ilvit kaitkigniagutivit naunaikuta kanuiliugniakka, nunaum ihualu?”

4Jesusim kiuyain, “Upingakhitailuhi ilipfi ulamnekunahi inuktigun. 5Amigaitun kaithungumata atipkun ukakhutik, 'Christiuyunga uvanga' ulamnektitumavlugit amihun. 6Ilipfilu tuhaaniaktuhi anguyaktutigun anguyaktun unipkautaitigunlu ekhiukpallaaktailuhili tapkua tuhaanangniagmata, nunaum ihua tikingitugaluak. 7Nunakatigit allat anguyautiginiaktain, atanguvitlu allanun anguyautingniaktun. Aahin inuit nekaekpiagamik akeaguakhunguyun, tamainilu nunat ingutaglutik. 8Taimatun aiyungnangnigit pinahualektun.

9“Talva inuit naglikhaktiniaktaahi tukutumavluhi aahin nunakatigingnin tamainin nagugiyaulimaektuhi atiga pivlugu. 10Talva amihut inuit ukpeguekhunguyun ilatik ukautigilugit ihuitumik, nagugiyuitkivlugit. 11Aahintauk nalautaiyimaluktun tikiniaktun ulamnektikuvlugit amigaitun. 12Huli inuit huinekivallialengmata inuit amigaitkiat kuviakutain niglakhunguyun. 13Kinalikalunin ukpeguegngitkumi annauyyauniaktuk. 14Ukuallu atanguvium ukauhiit naguyun ukaktauhunguyun nunani tamaini tuhaanakuvlugit nunakatigingnun tamainun, kinguagun ihua tikiniaktuk.

15“Talva tukufinaktumik takugupfi naguyumiitillugu, ukautigiyauyugaluak nalautaiyyimin Danielmin (Taiguktuk uminga kangekhili). 16Tapkua Judeamiut manilgulnun kimagialit. 17Inugli iglumi kaangani-itkumi aullagiaktukhak kimaglugit tamaiyani iluaniitun. 18Tamnalu nauttivingmi-itkumi kimauli utekhimaitumik atigiminun. 19Alianainiaktuk tapfumani angnangnun nutaganiyyukilektunun nutaganualingnunlu. 20Tukhiagitti kimayukhaukunahi ukiumitillugu, Sabbathmiitillugulunin. 21Talvani inuit aiyukaktitauhunguyun akhun taimaliyuitugaluak hivunganin talvangaanin. 22Uvlut tapkua Godim ikiliganangniaktain pilluaktauyun pivlugit annauyyaukuvlugit pingitpan annauyyaulimaitugaluit tamangmik.

23“Talva kinalika ukakkan ilipfingnun imaatun, 'Tautukhiuk uva Christ' imaatunlunin 'Tamna taikaniituk' ukpegitailuhiuk. 24Ilait Christiunahugiyun ingmingnik, nalautaiyimaluktullu kaitauniaktun naunaikutaniglu hapengnaktuniglu havaglutik ulamnektikuvlugit pilluakhimayunlunin tuhaapata. 25Ilaa ukautiyagaluapfi hivungagun. 26Taima ukautipahi, 'Takuhiuk iglukpaiilgumiituk' aavungaktailuhi, ukautipahilunin, 'Takuhiuk iglukpaum iluaniituk' ukpektailuhi. 27Taima kalluk nuiman kivataanin ingnekuyekhuni uataanun taimatun-iniaktuk inum engningata kainiagutaa.

28“Tukungayuk nunamiitpan tamna tulugat kativigiyaat.

Nunaum ihua

(Mk. 13:24-27; Lk. 21:25-28)

29“Tapkunani uvluni aiyukangnangnigit kinguatigun hikenek taakhiniaktuk, tatkeglu kaumayunaektuk, uvlugiayyallu kilangmin iyukakhunguyun, kilaum hakugigningit ingutaklutik. 30Talva inum engningata naunaikutaa nuiniaktuk kilangmi nunakatigitlu kuviahugunaektun tautugumitku inum engniga atkautillugu kilangmin nuvuyaktigun hakugiktumik kaumakpiaktumiglu. 31Huvlutaligyuak tuhaanakkan Godim ihalgulini tiliniaktain katikuvlugit pilluangit nunanin tamainin.

Inuit upalungayakuvlugit

(Mk. 13:28-37; Lk. 21:29-36, 17:26-30)

32Napaaktumin ahiakaktumin fignik ilihakpagluhi, tapfuma kihektutain nuigagata auyak tikilengman ilihimayuhi. 33Taimatauk hapkuninga tamainik takugupfi ilihimangniaktuhi tikilengman. 34Ilumun ukautigipfi, hapkua inuit inuyun tayya tukuyunaitun ukua ukautigiyatka taimaktinagit. 35Kilak nunalu nunguniaktuk, ukauhitkali nunguyunaitugaluit.

36“Uvlungmik pivikhamiklunin tapfuminga tamangmik ilihimangngitun, ihalgulgit kilangmiitun, Godim engnigalunin, tapfuma angutaa kihimi ilihimayugaluak. 37Noah umatillugu ingilgan, inuit humillika pivangmata, inum engningata tikiniagutaa taimatun-iniaktuk. 38Tapfumani nuna ulipkaktinagu imagmin inuit negingnakpaktun imekhutik, nulianikpaktun, uinikpakhutiglu, taimalivaktun inuit Noah umiagmun itektillugu. 39Tapkuali inuit ilihimangngitpaktun nungutitautinatik imangmun. Taimatun-iniaktuk inum engningata tikiniagutaa. 40Talvani angutik nauttivingmi inniaktuk havakhutik aipa tiguyauniaktuk aipangali kimaktauniaktugaluak. 41Angnaktauk malguk havangniaktuk mukpauyakagvingmi aipa tiguyauniaktuk aipangali kimaktauniaktugaluak. 42Talva upingakhitailuhi Atanipfi tikitakhaanik ilihimangnginapfi. 43Imaatun ilihimagaluaktuhilunin, inuk iglulik ilihimagumi kukinahuaktum itektakhaanik igluni munaginiaktaa akhun itegnaitkuvlugu. 44Ilipfi talva upingakhitailuhi inum engnia tikiniangman negiugiyaungitillugu.

Hivuniunek kivaktigun naguyutigun nagungitutigunlu

(Lk. 12:42-46)

45“Kinauva tamna kivgak naguyuk ihumatuyuglu, atangum atanguyanguktimagu kivgaminun allanun negipkakuvlugit naamaktumik? 46Kuviahuktuk tamna kivgak taimalingnakpiagumi ataninga tikitpan. 47Ilumun ukatigipfi, atangum tamna munakhikuniakta tamaiyaminun tamainun. 48Kivgagli nagungitkumi ukakhuni, 'Ataniga tikinahaktuk' 49ungulagahuakhugit kivgakatini negiyumavluni imekatauvlunilu imiyuktuni. 50Aahin ataninga tapfuma tikiniaktuk tikiyyutaa negiugiyaungitillugu, kivganga ilihimangngitillugulu. 51Aahin atangum kivgani naglikhaktiniakta igitugu ilumukhektuktunun talvani inuit kiahunguyun kiipkaktivlugitlu.

Currently Selected:

Matthew 24: Sperry

Highlight

Copy