Matthew 23

NAKATA 23

Jesusim tiitigaktit Pharisekullu ihuigiyain

(Mk. 12:38-40; Lk. 11:37-54, 20:45-47)

1Talva Jesus inungnun, maligutiminunlu ukaktuk, 2“Tiitigaktit Pharisekullu Moses pivlugu ilihauyyivangmata 3tapkua ukautigihimayain malikhigit pitkuhilli maliktailugit ukainakpagmata inuhigikhimaitumik. 4Tapkua nangmautikhanik ukumaitunik kilekhiyun inuit kuliningnun ilivlugit ingmingnik aktugumangngitugaluit tapkuninga algamingnunlunin. 5Humillika piyun pivaktun tautuktaukuvlugit inungnin, anguakakpaktunlu tiitigakaktunik, annugaita hinait pinekaktain. 6Tapkua negikataugagamik ikhivautait nagutkiyat atugumayain atugvingnilu, 7halutitauyumavlutik inungnin niuvavingni, taiyauyumavlutiglu atanengmik 8Ilipfili taiyauyukhaungitgaluaktuhi Rabbimik ilihauyyikakpagapfi atauhengmik tamapfilu katangutigiktuhi. 9Aahin nunamilu inuit ilangatlunin taiyauyukhaungitun paapamik ilipfingnin kilangmi angutipfi atauhium nutagagimahi. 10Aahintauk taiyauyukhaungituhi atanengnik atanegigapfiuk atauhek, tamna Christiuyuk. 11Ilipfingnilu inuk ataniukiak kivgaginiaktakhi. 12Inuk anangaiyaakumi inminik nangaktauyunaituk, kinalikalunin anangayangitkumi nangaktauniaktuk akhun.

13“Kapiahungniaktuhi Pharisekut, tiitigaktiuyuhi, ilumukhektuktuhi, Kilaum atanguvia ukuagutiyapfiuk inuit itekunagit. Iluanun iteglimaitgaluaktilluhi ilipfingnik itektailiyahi allatauk itegumayun.

14“Kapiahungniaktuhi Pharisekut tiitigaktiuyuhi ilumekhektuktuhi, uilgakhimayun igluit aagiyahi kengainaktutunililektilluhi; taimaliugapfi ihuigiyauniaktuhi akhun.

15“Kapiahungniaktuhi Pharisekut tiitigaktiuyuhi ilumukhektuktuhi, aullainakpiagapfi nunakun tagiukunlu inuk atauhek Jewmiutanguktitkuvlugu, tamnali ilagipahi taaknegmiutanguktitagaluakhi ilipfitun.

16“Kapiahungniaktuhi hivulliuktiugapfi takpiitpiaktilluhi ukagapfilu, 'Inuk ukagiagumi angayyuvikpagyuak tailugu, hungituk, inugli ukagiagumi tailugit angayyuvikpagyuam goldingit talva ukagiyauta puiguktaungitukhak.' 17Ihumaituhi takpiitpiaktuhilu, nallit nagutkiat, golditlunin angayyuvikpagyuaklunin angayyuvikpagyuam goldit naguguktipagit? 18Ukaktuhilu, 'Inuk ukagiagumi tailugu tunihivik, tapfuma ukagiyauta hungituk, inumlunin ukagiagumi tailugu tunihivium aitutaa, talva ukagiyauta puiguktauyukhaungituk.' 19Takpiitutun-iliyuhi nalliak nagutkiak, aitunek, tunihiviklunin, tunihivium aitunek naguguktipagu? 20Inum ukagiagumi tailugu tunihivik, atauhektun ukagiaktuk tunihivium kaanganiitun pivlugitauk. 21Inum ukagiagumi tailugu angayyuvikpagyuak atauhektun ukagiaktuk angayyuvikpagyuak, tamnatauk iluaniituk pivlugik. 22Inumlu ukagiagumik tailugu kilak ukagiaktuk atauhektun Godim ikhivautakpanga, tapfumani ikhivayuglu pivlugik.

23“Kapiahungniaktuhi tiitigaktiuyuhi, Pharisekullu ilumukhektuktuhi, aitutigigapfigik nauhimayun tipigiktukhan, mintmik, dillmiglu cumminmiglu puigukaluaktilluhi nagutkiyanik pitkuyainin, ilumuktukhaugapfi, nagliguhukluhi, ukpekluhilu. Hapkuninga itkaumayukhauyugaluyuhi allat maliktillugit. 24Hivulliuktiuyuhi takpiitun, imekhapfingnin kiktugiak piektitakhi iihivakaluaktilluhi negyumik camelmik.

25“Kapiahungniaktuhi tiitigaktiuyuhi, Pharisekullu ilumukhektuktuhi ilipfi kallutit akiutallu hilatain halumaktigapfigit iluangit tatatpiaktillugit halumaitumik, ihuitumiglu. 26Takpiipiaktuhi Pharisekun, hivullengmik kallutim ilua halumaktihiuk hilataa halumaktitaukuvlugu kinguagun.

27“Kapiahungniaktuhi tiitigaktiuyuhi, Pharisekullu ilumukhektuktuhi, iluvektutun kakutanik minguhektutun-inapfi. Tapkua hilatain pinekpiaktun iluangit tatatpiaktillugit tukungayun hauningingnik halumaitiniglu. 28Taimatun ilipfi kaaninapfingni naguyutun-innakpaktuhi inuit takuangni, tatatpiaktilluhi ihuitunik huinekinengniglu ilupfingni.

29Kapiahungniaktuhi tiitigaktiuyuhi Pharisekullu nalautaiyit iluvingit hanagapfigit pinektitugit ilumuktun tukungayun iluvingitlu, 30ukagaluaktilluhi, 'Inugupta hivullivut umatillugit, pitailiniaktavut inuktagikunagit nalautaiyyit.' 31Taima ukagapfi ilihimayyiyuhi ilipfigun, inuakhimayun nalautiyyinik kitungagivagmahi. 32Takki hivullipfi havaangit inekhimalugit.

33Nimegiaktun-ituhi, ilaa nimegiakpaitun tukunakaktutunlu ilipfi, kanuk annangniakkihi ikualaattivingmin? 34Talva tiliniaktatka nalautaiyit, ihumatuyunlu, tiitigaktillu naguyun ilipfingnun. Tapkua ilangit inuktaginiaktahi kikiaktuglugit, ilangillu ungulakhunguyahi atugvipfingni nangititumavlugit iglukagvingni tamaini, 35ilipfi ihuigiyaukuvluhi inuakhimayutitun inuit ilumuktun tukutaumata Abelim tukutauyyutaanin Zechariam, Barachiam engningata, tukuyyutaa naatugu, kingullik tamna inuktagiyakhi angayyuvikpagyuam iluaniitillugu tunihivium haniani. 36Ilumun ukautigipfi, hapkua inuit ihuigiyauniaktun tapkua tamaita tukutauningatigun.

Jesusim Jerusalemiun ihumalutigiyain aiyukaktitauhungumata

(Lk. 13:34-35)

37“Jerusalemiut, Jerusalemiut, tukuttivaktuhi nalautaiyinik, millukpakhugit uyagangnik tiliyauyun. Akhun katimakatigiyumavagapfi uvamnun, akkelyyektun tapfuma akkelyyiani takkukttegmagit ihalgulminik, imanakpakaluaktuhi ilipfi. 38Ilaa innikhi inuektitauyumaaktuk. 39Ukautigipfi, ilipfi tautukigunaigipfinga ukaktinahi, 'Nagugiyauli tamna kailengman Atangum atingani.' ”

Currently Selected:

Matthew 23: Sperry

Highlight

Copy