Matthew 22
22
NAKATA 22
Hivuniunek katuhekhektutigun
1Aahintauk Jesusim ukautilektain hivuniunektigun ukakhuni, 2“Kilaum atanguvia atanekpaktun-iliyuk tamna negiaktukuiman katuhekhektunun engniga tapfuma nulianinialengman. 3Tapfuma kivgani tiliyain tapkununga negiaktukuyauyunun, tapkuali kaiyumangngitugaluit. 4Aahin kivgaminik allanik tilivagmiyuk ukakhuni, 'Ukallautiyyavahi tapkua negiaktuktukhan, ilaa nekikhavut upalungayakhimayun, tuktukpautitka, nugatitkalu puvalayun tukutauyun, tamangmik upalungayangmata katuhekhektunun kaiyyavuhi.' 5Tapkuali tuhaayumangngitutun-ilivlutik aahinungaktun, ilangat nauttiviminun, aipa havahaminun, 6allatalu kivgain tigugamitigit nangiktitain tukuvlugit. 7Atanekpaklu ningngaktuk, anguyaktinilu tilimagit tapkua inuaktun tukutpagain iglukagviat ikuakhipkakhugu. 8Talva kivgani ukautiyain, 'Nekikhait katuhekhektunun upalungayaktun, pulaakuyauyugaluit naguhuekpaktunli. 9Taavungaugitti iglukagvium apkutainun katuhekhektunun pulaakulugit inuit tamaita tautukgagupfigit.' 10Tapkua kivgait aavungaugamik apkutainun tautukpagamitigit pulaaktitain inuit naguyun, nagungitunlu kuyagingnakhutik, nulianiktum katimavia tatatkuvlugu pulaakuyauyunik.
11“Atanekpagli itegami takuyaktugumavlugit pulaakuyauyun tautuktaa inuk annugakangngituk negikatauyutun katuhekhektunun. 12Tapfuma apegiyaa, 'Ilvin kanuk itekpakpin hamunga annugakangngitgaluaktillutin negikatauyutun katuhekhektuni?' Tamnali niplilimaituk. 13Talva atanekpaum kivgani ukallautiyain, 'Tapfuma algait, itigaillu kilekhuglugit taagnengmun igihiuk, takanani inuit kiahunguyun kiipkaktiniakhutik.' 14Amigaitun kaitkuyauyun, tapkuali pilluakhimayun ikitugaluit.”
Inuk akilekhiyukhaumangan maninik Caesarmun
(Mk. 12:13-17; Lk. 20:20-26)
15Talva Pharisekut katimavaktun ukakatigikhutik Jesus aiyukaktitumavlugu apekkutitigun. 16Tapkualu maligutik Herodim inungillu tiliyain Jesusmun ukakhutik, “Ilihauyyi ilumugavin ilihimagaluaktugut Godim apkutaanik naunaekhimagavin ilumuktumik, ekhigingitgaluakhugit inuit tamaita. 17Ukautitigut kanuk ihumavin. Caesarmun maninik akilekhigupta naamakpa naamangngitpalunin?” 18Jesusim tapkua apekkutikhain ihuigigamigit ukaktuk, “Hug uktukpihinga, ilumukhektuktuhi? 19Takupkaktilanga manimik tuniyauyukhamik.” Takupkaktaat maniuyak atauhek tapfumunga. 20Jesusim apegiyain, “Umani kia niakuguanga, una atingalu?” 21Kiuyun, “Caesaum”. Talva ukallautiyain, “Talva Caesaum piyutainik tunihigitti Caesarmun, Godimtauk piyutainik tunihigitti Godmun.” 22Tapkuatauk tuhaagamitku agligutaktun, kimakhugulu aullaktun.
Apekkut tukungayun makiyyutaitigun
(Mk. 12:18-27; Lk. 20:27-40)
23Tapfumanilu Sadducekun upaktaat. Tapkua tukungayun inupkaktaulimainahugiyain. Apekhiyun tapfuminga, 24ukakhutik, “Ilihauyyi, Moses ukaktuk, 'Angun tukutpan nutagaitumik tapfuma nukata nuliyanga nuliagiyakhagiyaa nutaganikuvlugu, angayualu kitungakakuvlugulu.' 25Ila uvaptingni nukagit 7nguyun itpaktun. Hivullik nulianikaaktillugu tukuyuk. Nutagakangnginami nuliyani kimaktaa nukaminun. 26Taima tuglia, pingahuaglu kingullik tikitugu nulianikpaktun tamangmik tapfuminga. 27Kinguagunlu angnak tukuyuktauk. 28Ilaa tukungayun makilvilgum uvlua tikitpan nukagit 7it nalliata piniakkauk angnak? Tamangmik pihimagamitku umatillugit.” 29Jesus tapkununga kiuyuk, “Ulamnektuhi Godim ukauhianik hakugigninganiglu ilitukhinginapfi. 30Makilvingmi inuit nulianiyunaitun uinilimaikivlutiglunin ihalguliktitun-iniagamik. 31Aahin taigukpangngitahi Godim ukakhimayain tukungayun makilvingagun, 32'Abraham Godigiyanga, Isaacimlu Godigiyanga, Jacobimlu Godigiyanga'? Tukungayun God Godigingitaat, inuyun kihimi.” 33Inuitlu tamna tuhaagamitku, ilihauyyutain agligutautigiyain.
Apekkut pitkuyatigun nalliak angikiyaumangan
(Mk. 12:28-34)
34Pharisekullu tuhaagamik Jesusim Sadducekut ukaguektimagit, katimalektun. 35Tapkualu ilangata, pitkuhiliuktiugami, Jesus apegiyaa uktugumavlugu. 36“Ilihauyyi, Godim pitkuyainin tamainin nalliak angikiyauva?” 37Kiuyaa, “Godim Atanin nagugiyakhagiyan umatingnin tamaanin, napatingninlu tamaanin, ihumatingninlu tamainin. 38Tamna pitkuyak angikiyauyuk hivulliuvluni. 39Tapfuma tugliatauk hivullektun-iliyuk, Nuakatin nagugiyakhagiyan iliptun. 40Ukunani malguni pitkuyanni Godim pitkuyain, nalautaiyillu tiitigain tamangmik tungavikaktun.”
Apekkut Messiahkun
(Mk. 12:35-37; Lk. 20:41-44)
41Pharisekut katimalektillugit, Jesusim apegiyain, 42“Christikun kanuk ihumavihi? Kia engniginahugivihiuk?” Kiuyaat, “Davidim engnigiyaa.” 43Jesusim ukallautiyain, “Hug Davidim, Anengnikun Naguyukun ukakhuni, taivauk Atanengmik ukagami,
44'Atanek Atanimnun ukallaktuk, Talekpingma tunganun ingitin
akigatin itigakpit ataanungautikaaktinagit'?
45Davidim tamna taigamiuk Atanengnmik kanuk engnigivauk?”
46Talva inuit tamangmik kiulimaektun tapfumunga talvangaanin apekhiyunaekhutik allanik.
Currently Selected:
Matthew 22: Sperry
Highlight
Share
Copy
Want to have your highlights saved across all your devices? Sign up or sign in
©1972 Canadian Bible Society
