Matthew 20

NAKATA 20

Hivuniunek havaktigun ahiakagvingmiitutigun

1“Kilaum atanguvia nauttiviliktun-iliyuk tamna uvlaami havagiektukuiman havaktinik ahiakagviminun. 2Tamna ukagiakaaktillugu havaktun akikhainik uvluk atauhengmun ahiakagviminungaktitain. 3Uatiagungumantauk 9mungaktillugu aavungaugami tautuktain allat havakhaitun nangekhutik niuvavingmi, 4ukautivlugillu 'Ilipfitauk ahiakagvigmungaugitti akilengniagapfi naguyumik.' Havagiektuktunlu tapkua. 5Nauttiviliglu avungaumigami uvluk kitkaniitillugu, 3mungagmanlu, taimalivaktuk. 6Aahintauk 5mungagman aavungagmiyuk tautukhugit allat havakhaitun ukautivlugit, 'Hug uvlugaaluk nangekpakpihi hamani havakhimaitumik?' 7Tapkua kiuyain, 'Havakuyaunginapta', tapfuma ukallautimiyain, 'Ilipfitauk ahiakagvigmungaugitti.' 8Unungmanli nauttivilik kivgaminun ukaktuk, 'Havaktun kaitkukit akileglugit kingullengmin hivullik tikillugu.' 9Tapkuatauk havakuyauhimayun 5mungaktillugu kaigamik akiliuhiaktun uvluk atauhengmun. 10Talva hivullit kaigamik avakumayumik akiliuhiagnahugiyun, tapkuali tamangmik akiliuhiaktun uvluk atauhengmun. 11Tapkualu pigamik nauttivilik kannektaat, 12ukakhutik, 'Hapkua kingullit havagafukaluaktillugit ikangnengmun atauhengmun ayyikutagiyatin uvaptitun havagaluakhuta uvlugaaluk unakpiaktillugu hikenek.' 13Tapfumali ilangat kiuyagaluanga, 'Ilaa ihuitumik pingitgaluaktunga ilingnun, uvlaami ukagiagama akikhangnik angekpaktutin? 14Piyakhatin pikit aigiaginlu, uvanga una kingullik akilegumayaga iliktun. 15Pikutimnik uvanga tunihilimaitunga ihumamnik? Hug tuhulekkin uvanga nagugaluaktillunga?' 16Taima kingullik hivulliuhunguyuk, hivulliglu kinguliuhunguyugaluak.

Jesus ukagiaktuk pingahuanik tukuyyutimigun

(Mk. 10:32-34; Lk. 18:31-34)

17Jesus Jerusalemungautillugu aullakhuni kihimgiutillugit maligutiminun ukaktuk, 18“Ilaa Jerusalemungaulektugut, inum engnigalu angayyuvikpagyuakunun ataningit tiitigatinunlu tuniyauniangman tapkua tukutakhautiginiaktaat. 19Tapkua tamna tuniniakta Jewmiungitunun mitautigikuvlugu ungulakuvlugulu, kikiaktuglugulutauk, uvlugli pingahuangni makiktitauniaktugaluak.”

Angnak engnilik tukhiaktuk

(Mk. 10:35-40)

20Talva Zebedem engningata angnangata upaktaa Jesus engnini ilagivlugik. Tapfuma hitkuvigigamiuk tukhiaktuk tapfumunga. 21Jesusim apegiyaa, “Humik?” Angnam ukallautiyaa, “Engnikka ukkuak ikhivakataukulugik atanguvingni aipa talikpikpit tungani, aipangalu haumikpit tungani.” 22Jesus kiuyugaluak, “Ilipfi tukhiagutipfingnik naluyuhi. Imingniakkitik kallumin imegahualektamnin?” Ukautiyaak, “Piniaktuguk”. 23Jesusim ukautiyaik, “Ilaa kallumnin imengniaktutik, talekpingmali tungani, haumingmalunin tungani ikhivakataukuvlutik pipkailimaitunga tapkuali angutima ikhivakupagit piniaktun.”

Ataniukiyaukuvlugit naguyumik

(Mk. 10:41-45)

24Kulinlu maligutaita tamna tuhaagamitku kuviahutigingitain nukagik. 25Jesusimli inminun kaitkugamigit ukaktuk, “Ilihimayuhi Jewmiungitun atanekpait atannektuiyumainaktun tapkununga atannektukhugit inuit. 26Taimaliuktukhaungitpiaktuk ilipfingni, kinalikalunin ilipfingni ataniukiyauyumagumi tamna kivgaktuktukhauyugaluak ilipfingnun. 27Kinalikalunin hivulliugumakpan ilipfingni tapfuma kivgaktugli ilipfingnun. 28Taima inum engniga tikihimangngituk kivgaktuktaukuvlugu kivgaktugiaktukuvlugu inmi inuhinilu aitutigikuvlugu inuit amihun annautikhainun

Angutik takpiituk takpikhipkaktauyuk

(Mk. 10:46-52; Lk. 18:35-43)

29Jerichomin aullangmata inuit amigaitun maliktaat Jesus. 30Aahin angutik takpiituk apkutim haniani ikhivayuk, talva tuhaagamik, Jesus apkuhainalengman tukhulauktuk, “Davidim engniga, nagligitiguk.” 31Inuilli tanektait nipaekuvlugik, tapkuagli nipikuktuyumik tukhulauktuk akhun, “Atanek, nagligitiguk Davidim engniga.” 32Jesuslu nutkakhuni apegiyaik, “Humik piyumavitik uvamnin?” 33Tapkuak kiuyaak, “Atanek, takpikhipkaktauyumavlunuk.” 34Jesusimli nagligigamigik iyingit atkuktain. Tayyainak tautuglegamik maligahualektaak.

Currently Selected:

Matthew 20: Sperry

Highlight

Copy