Matìyò 16
16
Viʼi bè kəŋ əyen kəchwitə
(Mak 8.11-13; Luk 12.54-56)
1Viʼi Falàsi bènə̀ Vəsadùsis vətsenvə vì à Yesò sə kəŋə jì əghaʼ wen fa tsu mù gàʼ la ghə̀ ne kənyʉ̀ kə kaynə kə kətsen kə ədìʼ kəchwitə la kədyòʼ kə wen kə lù fà Nyìngòŋ. 2Yesò gàʼ à vəwenə la, “Chʉzhʉ nə̀ mbʉsə nshwè kaŋ sə bàŋə̀, ghə̀ŋ ə gàʼa la shi lə bòŋ a boʼòngə̀ŋ. 3A sətsèn tʉʼʉ layn shi nghwʉ̀ʼʉ̀, ghə̀ŋ gàʼa la ghʉ a vì layn. Ghə̀ŋ kɨ ki kəbəŋ, ghə̀ŋ shə̀ʼtə kənyʉ̀ a kə a fʉ̀, alì ko andiʼ la ghə̀ŋ zì ghə̀ŋ kɨ la chwitə a və fʉ̀ luwèn ə shə̀ʼtə̀ la ghò lo. 4A dìʼ tò kəlyɨŋ kə byɨkə anə̀ kènkə a kə ko ghʉ tyɨm wen à Nyìngòŋ a kə zì kə mbèmə̀ kəchwitə. Ghə̀ŋ ko a yen kəchwitə kətsenkə əchò tò nchwi Jonà.” Ghə̀ gàʼ a lì ə lù mòʼtə̀ vəwenə.
Yesò pfàntə̀ byìʼì ziʼi viʼi Falàsi bènə̀ Vəsadùsis
(Mak 8.14-21)
5Yesò wenə̀ ndzɨ̀mtə̀sə bàm wen nè sə dyàŋ a ndzèn mo tsen yì, ndzɨ̀mtə̀sə bàm wen sə lyèsə̀ əlyɨ̀ kəbayn kəməka, 6nè dyàŋ zaʼa tsu, Yesò gàʼ à vəwenə la, “Ghə̀ŋ tuʼmə kùmə̀ fəshɨ̀ŋ fə viʼi Falàsi bènə̀ Vəsadùsis.”
7Ndzɨ̀mtə̀sə bàm wen shìsə sə̀ bèsə̀ kənyʉ̀ akì à vəwenə a ntìntìn gàʼà la, “Ghə̀ gàʼà alə̀ byìʼàndo vəghəŋ yì lyèsə̀ əlyɨ̀ kəbayn kəməka.”
8Yesò kɨ kənyʉ̀ a vəwenə mbèsə̀ à vəwenə a ntìntìn mù bèm à vəwenə la, “Byɨmə ghə̀ŋ bwaʼ ghò alə̀ a, byìʼì ghò a ghə̀ŋ ə gàʼ à la à diʼ byìʼàndo ghə̀ŋ ko kiʼ kəbayn a? 9Kə lè dìʼ la ghə̀ŋ ko təmə kɨ̀ kənyʉ̀ mu? Ghə̀ŋ ko bè kwòʼtə̀ ando mà nzhisə̀ viʼi vi nkamsə sə tàyn nə̀ təghɨf tə kəbayn tə məka tə tàyn? Ghə̀ŋ mboŋtə byəʼ vi a və mfaŋə̀ və lwin a nkyèsə sə shə̀ʼ lì? 10Ghə̀ŋ lyesə li viʼi vi nkamsə sə kàʼ a ma nzhisə̀ nə̀ təghɨf tə kəbayn ti sòmbo? Ghə̀ŋ mbòŋtə byèʼ vi a və nfaŋə̀ və lwin a nkyèsə sə shə̀ʼ lì. 11A nè ghò a ghə̀ŋ ko kɨ̀ la mà ko yi ngàʼà à ghə̀ŋ byìʼì kəbayn a? Ghə̀ŋ tuʼmə kùmə̀ fəshɨ̀ŋ fə viʼi Falàsi bènə̀ Vəsadùsis.”
12Ghə̀ gàʼ a lì ndzɨ̀mtə̀sə bàm wen sə mù kɨ̀ la ghə̀ ko yi ngàʼà byìʼì fəshɨ̀ŋ fə kəbayn alì la ghə̀ ngàʼà kùmə̀ ziʼi viʼi Falàsi bènə̀ Vəsadùsis.
Bità shə̀ʼtə̀ wìʼ yì a Yesò diʼi wen
(Mak 8.27-30; Luk 9.18-21)
13Yesò lù dyʉ̀ a shə loʼ tsenghə a ntə̀ʼ Sìsalìyà, Filibày ndiʼì tsu wenə̀ ndzɨ̀mtə̀sə bàm wen mù bèm à vəwenə la, “Viʼi gàʼ à la Wàyn Wìʼ dìʼ ndo?”
14Vəwenə bwènsə̀ gàʼ la, “Viʼi vətsenvə gàʼà la wù dìʼ Joyn wù ku à mù, viʼi və tsenəvə gàʼà la wù dìʼ nshə̀ʼtə̀ Elijà, vətsenvə be gàʼà la wù dìʼ nshyə̀ʼtə̀ Jèlimayà ko nshyə̀ʼtə̀ ghoʼo tsen.”
15Yesò bèm à vəwenə la, “Nkàntə̀ ghə̀ŋ gàʼà la ma dìʼ ndo?” 16Simon Bità bwènsə̀ la, “Adìʼ ə wìʼ yì a Nyìngòŋ ntsuʼ li ə̀ ghʉ, wàyn Nyìngòŋ yì a ghə̀ faŋə̀ tò ghan mùʼ lì.”
17Yesò mù gàʼ la, “Mbwaʼmə̀ dìʼ à wù a Simon wàyn Jonà, byìʼàndo a ko shə̀ʼtə̀ Wùmə̀nsòŋ nshyə̀ʼtə̀ kənyʉ̀ kènkə la wu gàʼ a lì, à dìʼ Tìʼ ghom ə Nyìngòŋ yì a ghə̀ diʼì a kàŋ. 18Mà sə gàʼà à wù a Bità la zhiʼi wu diʼ ə nguʼ, à diʼ a kwi nguʼ ayì a mà ne bwom ngə̀ŋ ntsèntə̀ ghom. Kədyòʼ kə pfʉ kə ko lə to chò ngə̀ŋ ayì. 19Ma ku nzàs kə soʼo fòyn Nyìngòŋ à wù. No ghò a wù byɨmə a kwi nse mu Nyìngòŋ a byɨmə a kàŋ, wù be tyen no ghò a kwi nse mu Nyìngòŋ be a tyen a kàŋ.”
20Yesò gàʼ a lì mù tyɨftə ndzɨ̀mtə̀sə bàm wen la kə vəwenə lə shə̀ʼtə̀ à wìʼ la yì dìʼ Wìʼ yì a Nyìngòŋ ntsuʼ li ə̀ ghʉ.
Yesò shə̀ʼtə̀ la yi ne yen ngəʼ kaʼa pfʉ
(Mak 8.31–9.1; Luk 9.22-27)
21Yesò zìtə̀ tò a zhʉ ayì sə̀ shə̀ʼtə̀ a ndzɨ̀mtə̀sə bàm wen la, “Yì diʼi dyʉ̀ a Jelusalèm ə yen ngəʼ ghoʼo fa avu vəchəʼ, tʉtʉ vəpfèm və ngə̀ŋ Nyìngòŋ bènə̀ ndìʼsə̀sə təsoʼ, və zhwi wen à nè sə ndiʼ mətsi ntaʼ, Nyìngòŋ lusə wen fa pfʉ.”
22Bità gùftə̀ wen a bàm sə̀ ghàmə̀ wen gàʼà la, “Nyìngòŋ bʉʼsə la kə nki kənyʉ̀ alə̀ lə̀ fʉ à wù a Bobo.”
23Yesò fuʼtə gàʼ à Bità la, “Bwènə̀ fà mò a bàm a Satan, wù tàʼsə̀ mò. Wù ko kiʼ kwoʼtə Nyìngòŋ. Wù kwòʼtə̀ to nə̀ wìʼ.”
24Yesò gàʼ a lì mù gàʼ à ndzɨ̀mtə̀sə bàm wen la, “No ndò a ghə̀ kòŋ ə ndzɨ̀mtə̀ mò diʼi tyen wenə wen, bwèʼè kəntò kə wen ə dzɨ̀mtə̀ mò. 25No ndò a ghə̀ mwòmsə̀ ə ntsɨ̀ŋ sò kətʉ wen mu ghə̀ a lè, no ndò a ghə̀ le sò kətʉ wen byìʼì mò a bwòŋ. 26Wìʼ lè zì ghə̀ se no ghò a zhʉ a ghə̀ kiʼì mbi ghèn no tsèm, alì kəzhwì kə wen kə le a? Wìʼ lè zì ghə̀ zen sò kətʉ wen no nə̀ ghò? 27Mà gàʼ alə̀ byìʼàndo Wàyn Wìʼ sə̀ laʼtə bwènə̀ vì a tì baynə ghoʼ ghə̀ tìʼ wen wenə ntsɨ̀ŋsə wen ndi ku no moʼtə ndo ando ghə̀ tə nshwèʼè. 28Mà gàʼà à ghə̀ŋ nəmwèʼè la viʼi vətsenvə diʼ a shèn luwèn a vəwenə ko lə pfʉ no a mpfen əzaʼa fa tʉʼ a vəwenə lu yen Wàyn Wìʼ ghə̀ bwènə̀ vì anə̀ fòyn.”
Currently Selected:
Matìyò 16: bbkDBLnt
Highlight
Share
Copy
Want to have your highlights saved across all your devices? Sign up or sign in
