Matìyò 15
15
Kəngùmə̀ byìʼì ntsìnə̀ loʼ bènə̀ soʼ Nyìngòŋ
(Mak 7.1-13)
1Viʼi Falàsi bènə̀ ndìʼsə̀sə təsoʼ sətsensə lù fa Jelusalèm ə vì yèn Yesò ə bèm à wen la, 2“Byìʼì ghò a ndzɨ̀mtə̀sə bàm wù sə ko tsi ntsìnə̀ vətìʼ və vəghəŋ a? Vəwenə nə̀ mbʉʼsə nzhɨ kò vəwenə lə shʉ̀ avu vəwenə.”
3Yesò bwènsə̀ bèm à vəwenə la, “Byìʼì ghò a ghə̀ŋ kwàʼà soʼ Nyìngòŋ byìʼì ntsìnə̀ loʼ vəghəŋ a? 4Nyìngòŋ ngaʼà li la, Zhʉ gɨ̀ tìʼ wù wenə̀ lì wù! bè gàʼ la, No ndò a ghə̀ te tìʼ wen ko lì wen, və diʼi zhwi wen. 5Ghə̀ŋ sə bòŋsə̀ ziʼi la, wìʼ zì ghə̀ tyen kəfo fà tìʼ wen ko lì wen a ghə̀ yi ndiʼ gyàmtə̀ wen tsu tò byìʼàndo ghə̀ nghʉ li la yì a ku kəfo akì à Nyìngòŋ. 6Ghə̀ŋ dìʼ ji a ghə̀ŋ əchò fa tsu ko ghə̀ŋ ə dìʼì gumlə a tìʼ ghə̀ŋ ko lì ghə̀ŋ. A diʼ a ji aghèn a ghə̀ŋ tyenə kənyʉ̀ kə Nyìngòŋ tsu byìʼì ntsìnə̀ loʼ ghə̀ŋ. 7Ghə̀ŋ viʼi kəmbɨ̀lə̀ venə Nshə̀ʼtə̀ Azayà ngàʼa tò nəmwèʼè ando ghə̀ nshə̀ʼtə̀ ntɨm Nyìngòŋ byìʼì ghə̀ŋ la, 8Viʼi venə ghoʼsə̀ mò tò nə̀ chʉ, alì tətyɨm tə vəwenə tə diʼ kəghaf fà mò. 9Vəwenə ghoʼsə̀ mò tò kədyàŋ kədyàŋ byìʼàndo vəwenə dìʼsə̀ təsoʼ mu a shɨ̀tə̀ viʼi ə ghʉ la à dìʼ təsoʼ tyomtə?”
Yesò shə̀ʼtə̀ nyʉ̀ vyi a və nè la kə wìʼ ndiʼ wu laynə
(Mak 7.14-23)
10Yesò gàʼ a lì ə̀ dzàŋtə̀ nòyn viʼi vi, vəwenə vì, ghə̀ gàʼ à vəwenə la, “Ghə̀ŋ zhʉtə nkɨ. 11A ko diʼ kəfo kì a kə kwenə à wìʼ a chʉ̀ a kə nè la kə wìʼ ndiʼ wu laynə a ashɨ Nyìngòŋ, à bòŋsə̀ dìʼ nyʉ̀ vyi a və fʉ̀ fà wen a chʉ̀.” 12Ndzɨ̀mtə̀sə bàm wen sə nè gàʼ a wen la, “Wù yì gàʼ a lì viʼi Falàsi sə fwisə tin.” 13Yesò bwènsə̀ a gàʼà shəʼə ghə̀ a vəwenə la, “Və ne tsuʼ no ghò a ghə̀ kwi kuʼu kènla a wè Tìʼ ghom a kàŋ. 14Ghə̀ŋ ghʉsə vəwenə tò a lì, vəwenə diʼ mfyɨ̀f alì kəŋ ndìʼì jì a vətsenvə. Kənfyɨf kə sətsèn ə ndìʼì jì a kətsenkə, vəwenə à tsèntə̀ fəŋkə a nkwòŋ no vətsèm.”
15Bità gàʼ à wen la, “Shə̀ʼtə̀ kənyʉ̀ a ngàyn ghèn ziʼi à yès.”
16Yesò bèm à vəwenə la, “La mbo tə tofə təŋtə bò bu bwaʼa tò nə̀ tə viʼi vətsenvə mu? 17Ghə̀ŋ ko yenə la no ghò a wìʼ zhɨ ə shiʼì à wen a bèm kə be chò fʉ fà wen a wèn, 18alì nyʉ̀ vyi a və fʉ̀ fa wìʼ a chʉ̀ dìʼ mu və lù fà wen a tyɨm, à diʼ nyʉ̀ a vyi a və nè la kə wìʼ ndiʼ wu laynə. 19Kwòʼtə byɨghə fʉ̀ tò fà wìʼ a tyɨm nə̀ nyʉ̀ byɨvə tsenəvə anə̀ ə zhwi, ə ntsi nə̀ wùwì ko wùlɨm a ko diʼ yə̀ nə̀ dzɨ̀mtə̀ ki, nə̀ tsoŋə, ə ndiʼ wùkəwam à wìʼ a kətʉ be gàʼà nyʉ̀ byɨvə tsenəvə byìʼì wìʼ. 20A le nyʉ̀ vyi a və nè kò wìʼ ndiʼ wu laynə ashɨ Nyìngòŋ, a ko diʼ a zhʉ a wìʼ zhɨ kènla ghə̀ shʉ̀ li avu wen ando ntsìnə̀ loʼ vəghəŋ ə kəŋ.”
Wùwì kətɨm tsen dìʼ byɨmə wen à Yesò
(Mak 7.24-30)
21Yesò gàʼ a lì ə̀ lù fa tsu ə dyʉ̀ a shə loʼ yì a ntə̀ʼ Tilè nə̀ Sidòn ndìʼ tsu.
22Wùwì Kanà tsen a ghə̀ ntsi boʼsə tsu vi à Yesò mù sə zɨmə dì gàʼà la,“Kusə nshinsə à mò a Bobo, wàyn fòyn Devìt! Wàyn ghom wùwì yenə ngəʼ no nànto byìʼàndo ghə̀ kiʼi kəzhwì kəbyɨkə.”
23Kò Yesò lù gàʼ kənyʉ̀ a wen. Ndzɨ̀mtə̀sə bàm wen sə vì a wen mù sə sensə̀ wen gàʼà la, “Dzɨ̀mə̀ wen fa vəghəŋ a bàm. Ghə̀ jèʼè zɨmə alə̀ chiʼsə̀ tiʼitiʼi viʼi.”
24Yesò gàʼ à wùwì ayì la, “Nyìngòŋ tɨm mo tò à viʼi Islel vi a və diʼì tò nə̀ byisə vənjɨ̀ sə lekəsə.”
25Wùwì ayì kwentə vì gwʉ̀ʼtə alwi wen a nse ə̀ gàʼ la “Bobo gyamtə mo.”
26Yesò gàʼ à wen la, “Kə ko bòŋ la və lyɨ fozhɨvə vunə ə̀ mòʼ à bʉsə.”
27Wùwì ayì byɨmə ə̀ gàʼ la, “Bobo, mà kɨ li a lì, alì tì ngə̀ŋ nə̀ nzhɨ, byèʼ fo fəŋkə bʉsə sə boŋtə zhɨ.”
28Yesò mù gàʼ à wen la, “Wù dìʼ wùwì a byɨmə wu to, Nyìngòŋ a nè kənyʉ̀ a wù kəŋ.” Yesò gàʼ a lì wàyn wen yì to tò a zhʉ ayì.
Yesò chʉʼ viʼi no və ghoʼo
29Yesò lù fa kəshi ayì sə jèʼè dyʉ̀ fa mbyɨ̀ mo Galìlì, ə dyʉ̀ kuʼ a kwi pfen mù shiʼi ŋwʉʼʉ a nse. 30Ngwàʼà viʼi sə vì a wen. Vəwenə mvì nə̀ viʼi və kwaʼkəvə vəwenə, və ngesə̀ fwen, mfyɨ̀f, viʼi kənkwàʼkə̀, və bɨbɨ̀ bènə̀ viʼi a və nkwaʼa nə̀ tənkì tə təkwaʼa no tətsèm. Vəwenə ə̀ mvì nə̀ vəwenə a lì ghʉ ashɨ Yesò la ghə̀ chʉʼ vəwenə. 31Viʼi vi sə diʼ nə̀ kaynə ando və nyenə la bɨbɨ̀ sə bwènsə̀ gàʼà, və ngesə̀ fwen nə̀ viʼi kənkwàʼkə̀ be bwènsə̀ jèʼè tò a nkayn, bènə̀ la nshɨ̀f nsə̀ bwènsə̀ yenə shi. Vəwenə yen a lì sə̀ ghoʼsə̀ Nyìngòŋ viʼi Islel.
Yesò zhis viʼi və chò nkamsə kàʼ
(Mak 8.1-10)
32Yesò mù dzàŋ ndzɨ̀mtə̀sə bàm wen ə̀ gàʼ à vəwenə la, “Nshinsə ku mò à viʼi venə. Vəwenə tsi li vəghəŋ vəwenə a mətsi ntaʼ luwèn, alì kènla vəwenə təmə̀ zhɨ̀ kəfo. Ma ko kòŋ əgàʼ la vəwenə bwènə̀ mpfwo nə̀ jɨ̀ŋ. Wìʼ zì ghə̀ fʉ bwaʼ, ashɨ wen fen ghə̀ fəŋ a ji.”
33Ndzɨ̀mtə̀sə bàm wen sə bèm à wen la, “Vəghəŋ lè zì vəghəŋ lyɨ fozhɨvə fa fe a shə̀, kəshi kèn kə diʼ a bàm ə və kwʉʼ ə zhis ghèn nòyn viʼi tsu a?.”
34Yesò bè bèm à vəwenə la, “Ghə̀ŋ kìʼ təghɨf tə kəbayn tə məka təshə̀ʼ?.” Vəwenə gàʼ la, “Yès kìʼ təghɨf la sòmbo nə̀ məshʉ̀tə tò nshə̀ʼ alə̀.”
35Yesò mù gàʼ à viʼi vi la vəwenə ŋwʉʼtə a nse. 36Vəwenə nè ŋwʉʼtə, Yesò shi təghɨf tə kəbayn tə məka titə sòmbo nə̀ məshʉ̀tə mì ə̀ kù kəzòŋ à Nyìngòŋ mù byəʼə̀ kù à ndzɨ̀mtə̀sə bàm wen, vəwenə mù gə̀tə̀ dyʉ̀ à viʼi vi. 37No ndò zhɨ kwiʼ. Ndzɨ̀mtə̀sə bàm wen sə boŋtə byəʼ a və mfəŋkə və lwin a nkyèsə sòmbo. 38Viʼi a və nzhɨ ndìʼ lʉmə nkamsə kàʼ mibu ki nə̀ vunə a və ndiʼì tsu.
39Yesò gàʼ viʼi a vyi sə mpfwo ghə̀ kwen a ti nkànuʼ ə dyʉ̀ a shyə loʼ Magadan.
Currently Selected:
Matìyò 15: bbkDBLnt
Highlight
Share
Copy
Want to have your highlights saved across all your devices? Sign up or sign in
